Read Tunen Bimənyí 20 Bible Online

Bimənyí 20 - Tunen bible

Bimənyí 20

¹Nɔ́yɛ́, mɛ ná yɛmɔtɛ́ áŋgɛlɛ yámá a nɔ́ húlínə ɔ nɔɔ́mɛná. A ka bá na hilibə hɛ́ hianyaka, na ilimə́limə́ yɛ́ mɔsáŋa itíə́tɔ.

²A ná yaná hálɛ́na, á miáhɔ yɛ kokóóko, ɔwá a lɛ́á mɔlɛmba na Sátana, a ná wɛɛ́ya hɔkɛ́na ɛlɔ́áyɛ́ hikóló hɛ́ tuɔŋɔ.

³A ná wɛɛ́ya nyɛkɛ́na ɔ hianyaka, a ná kuiyíə́, a ná wɛɛ́ya kuɛsɛ́na ɔkɛaka ɔwá, a lɛ tutikə nənə́síə́ ɔ ɔkafámáká hikóló hɛ́ tuɔŋɔ. Əlimə yɛ nɔ́yɛ́, bá ná hɔ́ánána ɔwayɛ́ ɔsɔ́tɔ́na ɛlɔ́áyɛ́ tɛ́tɛ́á yɛ ikúílí.

⁴Əlimə yɛ nɔ́yɛ́, mɛ ná tukómo yama. Bá ná kuənjə yɛ ukə́lə́siə índíə́ ɔ bɛndɔ ɔbá bá ná báá tuənə́kínə́tɔ́ ɔ tukómo ɔmbáŋá. Mɛ ná manyɔ́ tɔtányɛ́ tɔ́ bááyɛ́ yáma ɔbá bá ná ɔ́nɔ́kɔ́ ɛlɔ́áyɛ́ yə́búə́ yɔkɛ́nana ɔ taká yɛ Yə́susu, na ɔ Ɛtambá yɛ́ Huɛlɛ́. Bá sa yɛ́ɛ́yɛ́ mɛnyama ata yáyɛ́á ililí lúbúnə, bá sa hibílíndíníə́ kusənə ɔ nɛbɔ́ka mbá ata ɔ mɔkátá. Bá ná hɔŋɔ́ákɛ́á, bá ná bɛndɔ manákɛ́ná iŋgində́ na Kilísitusu ɔ hikóló hɛ́ tuɔŋɔ.

⁵Yímotí imimə yɛ́ sa hɔŋɔa ubusíə́ ɔbɔ́á hikóló hɛ́ tuɔŋɔ hɛ́ bíúndúsíníə́. Ɔ́ nɛhɔŋɔa níbúsíə́.

⁶Nɛhɔnɔ na bááyɛ́ ɔbá bá lɛ́á na nioko ɔ nɛhɔŋɔa níbúsíə́, bá lɛa tɔ́na banaŋanaŋa. Bá sɔ́ ŋɔ wínə ɔ bikúílí bɛ́fandɛ́, bá ŋɔ bámɛnɛna bətitiəmahánɛna bá Huɛlɛ́ na bá Kilísitusu, bá ŋɔ bɛndɔ manakɛna na wɛɛ́ya ɔ hikóló hɛ́ tuɔŋɔ.

⁷Ikúílí hikóló hɛ́ tuɔŋɔ hɛ́ ŋɔ kafámá ɔ nisúki, bá ŋɔ Sátana húliə ɔ ɔwayɛ́ ɛbɔka.

⁸A ŋɔ ka mɔnɔŋɔ nímbə́kə́ ɔmá má lɛ́á ɔ makásá ə́nisə má misí, Ngɔ́kɛ na Maŋgɔkɛ. A ŋɔ bəə́bu kɔtaka ɛlɔ́áyɛ́ bilə́, wə́búə́ ɔmbana wɔ́ lɛa ɛ́sɛ́á mɔsɛ́á wɔ́ nɔmɔ́.

⁹Bá ná yambána ɔ misí mikimə, bá ná kɔ́mbɔ yɛ banaŋanaŋa na bətínə́ nɛ́ŋɛ́lɛ́na ɔyɛ́á Huɛlɛ́ a ndɔ hikiə. Mba, hiwə hɛ́ ná húlínə́ ɔ ɔmbáŋá, hɛ́ ná bəə́bu lúə́ŋə́kíə́.

¹⁰Bá ná Sátana á munímbə́nə əmbínə ɔ hɛfɛa hɛ́ hiwə na hɛ́ məsə́kə, ɔhá mɛnyama na wɛ́ɛ́yɛ́ mɔhɛ́nátɔtányɛ́ wa bɛkanja bá lɛ́á. Bulúə́ na buɔsɛ́ tɛ́á, bá ŋɔ báá ɔ məsə́kə maŋɛ́ŋa ɔ tɔɛya na tɔɛya.

¹¹Əlimə yɛ nɔ́yɛ́, mɛ ná ilíŋə́líŋə́ yɛ́ hikómo yámá hɛnaŋanaŋa na wɛ́ɛ́yɛ́ ɔwá a ná bá tuənə́tɔ́ umə́: Misí na nɔɔ́mɛná bɛ́ ná nyɔ́áká bikimə ɔwayɛ́ busíə́. Bá sa bɛɛ́ta bɔ́ŋɔ tɔ́na.

¹²Mɛ ná bəwə́nú síə́kínə́ tɛ́nɛ́mákátɔ́ ɔ busíə́ bɔ́ hikómo, baŋɛ́ŋa na batɛ́tɛ́á, bá ná tuəfulə úbúnə́kə. Bá ná hímotí hiəfulə ubunə; hiəfulə hɛ́ buɔmɔ́, bá ná bəwə́nú kə́lə́sə́kíə́ ɔwɔŋgɔkɔnɔ bíə́búə́ bɛnyɛná, ɔwɔŋgɔkɔnɔ yatɛ́ ɔyɛ́á yɛ́ ná báá tilə́kə́tɔ́ ɔ tuəfulə nuúmə́.

¹³Nɔmɔ́ yɛ́ ná bááyɛ́á bəwə́nú híə́níə́. Nyɛmbɛ́ na misí yɛ bəwə́nú bá ná əbú bə́búə́ bəwə́nú híə́nə́kíə́ tɔ́na. Bá ná mɔɛ́ta tɛ́á kə́lə́sə́kíə́ ɔwɔŋgɔkɔnɔ bɛ́áyɛ́á bɛnyɛná.

¹⁴Nɔ́yɛ́, bá ná nyɛmbɛ́ na misí yɛ bəwə́nú ə́mbínə́ ɔ hɛfɛa hɛ́ hiwə. Híihi hɛfɛa hɛ́ hiwə, ɔ́ niɔŋgɔnɔ ífəndí nɛ́ nyɛmbɛ́.

¹⁵Ata ɛ́yánɛ́ ɔwá bá sa niínyə bɔ́ŋɔ́ tilə́kə́tɔ́ ɔ hiəfulə hɛ́ buɔmɔ́, bá ŋɔ wɛɛ́ya əmbinə ɔ hɛfɛa hɛ́ hiwə.