Read Tunen Bimənyí 21 Bible Online

Bimənyí 21 - Tunen bible

Bimənyí 21

¹Nɔ́yɛ́, mɛ ná nɔɔ́mɛná na misí miɔ́sɔ siəkínə, ɔ taká, nɔɔ́mɛná na misí yibusíə́ yɛ́ ka nímínə, nuíyi nɛ́ ɛsɛ́lɛ́ ɛ́mɔtɛ́ tɔ́na nɛ́ lɛ bámɛ́nɛ́na.

²Mɛ ka bətínə́ mɛnaŋanaŋa á Yəlúsalɛma miɔ́sɔ siəkinə yɛ́ ndɔ tukinə ɔ nɔɔ́mɛná, ɔyɛ́á Huɛlɛ́ a ná lɔ́má ɛ́sɛ́á ɛkɔŋɛna ɔyɛ́á yɛ́ ná bɛ́tábɔ́náka ɛlɔ́áyɛ́ yayɛ́á ibə́.

³Mɛ ka nióni nɛŋɛ́ŋa ɔ́kɔ nɛ́ ndɔ húlínə ɔ hikómo, nɛ́ sɛ́á: «Isíŋáka, ɔ́ bituənínə́ bɛ́ Huɛlɛ́ bɛ́ɛbɛ ɔ ətíə́ yɛ bɛndɔ. A ŋɔ tuənəkinə na bəə́bu. Bəə́bu tɔ́na bá ŋɔ bámɛnɛna bɛ́áyɛ́á bilúkunə, ɔwayɛ́, a ŋɔ bámɛnɛna yəbúə́ Huɛlɛ́.

⁴A ŋɔ bililíní bikimə sɔ́tɔ́kɔ ɔ uwəbú məə́sə, nyɛmbɛ́ yɛ́ sa ndábá tɔ́na. Mənyənə, malɛlá, məsə́kə má sa ndábá tɔ́na. Ɔ taká, bɛkɔa bɛ́ buɔnɔ́ bɛ́ ŋɔ bá tɔ́mbátɔ.»

⁵Nɔ́yɛ́, wɛ́ɛ́yɛ́ ɔwá a lɛ́á tuənə́tɔ́ ɔ hikómo a ná fə́mə́lə́níə́ a sɛ́á: «Isíŋáka, mɛ nɔ́ bɛkɔa biɔ́sɔ bikimə kɛaka.» Əlimə yɛ nɔ́yɛ́, a ná mɛaŋɔ́á lɛ́na a sɛ́á: «Tilə́kə́ náana ɔwá, bɛ́ámɛ́á bɛtambá bɛ́ lɛa taká, bá ná hɔ́ánána ɔ nɛkɔmba ɔ ɔtálɛ́na.»

⁶A ná kɔndá tɔ́na a sɛ́á: «Mɛaŋɔ́á mɛ lɛ́á Álɛ́fa na Ɔmɛ́ka, Wəbusíə́ na wənitifə́. Mɛ ŋɔ hɛnyɔ́nyɔ hɛ́ mənífə́ matánana índiə ndəmə ɔ wɛ́ɛ́yɛ́ ɔwá a lɛ́á na nimótí.»

⁷Ɛmbɛndá a ŋɔ yɛ́tána ɛhálálá kusənə, mɛ ŋɔ bámɛnɛna yayɛ́á Huɛlɛ́, wɛɛ́ya tɔ́na a ŋɔ báá wamɛ́á mɔná.

⁸Ábá ɛlɔ́áyɛ́ bitəndə́, bá mɛnyɔ́, bakɛamabɛ́á, bɔnɔ́bɛndɔ, bə́nílókóno, bá mabɔ́á, bəlúbúnə bililí na bakanjakanja bəkimə, níə́búə́ nioko nɛ́ báka ɔ hɛfɛa hɛ́ nɛsanákɛ́ nɛ́ hiwə na hɛ́ məsə́kə: Ɔ́ niɔŋgɔnɔ ífəndí nɛ́ uwə́.

⁹Əlimə yɛ nɔ́yɛ́, yɛmɔtɛ́ áŋgɛlɛ ətíə́ yɛ bɛáŋgɛlɛ bɛ́lɛ́ndɔ́lɔ́mɔnɔ ɔbá bá ná bá ná bɛnyɛ́ná bɛ́lɛ́ndɔ́lɔ́mɔnɔ itíə́kə́tɔ. Úndúə́kə́tɔ́ na tukoní tútifəkə tɔ́lɛ́ndɔ́lɔ́mɔnɔ, a ná ndá mɛaŋɔ́á lɛ́na a sɛ́á: «Sɔ́nɔ, mɛ ŋɔ aŋɔ́á ɛkɔŋɛna, á muəndú wa Mɔnándɔ́mbá ínə́niə.»

¹⁰Umbúínyi Mɔnaŋanaŋa wɔ́ ná fínə́ ɔ ɔwámɛ mɛɛ́lɔ, áŋgɛlɛ a ná mɛaŋɔ́á ɛ́tá ɔ ɔmáá mɔŋɛ́ŋa, mɔtatánɛ, a ná mɛaŋɔ́á Yəlúsalɛma á bətínə́ mɛnaŋanaŋa ínə́níə́ ɔyɛ́á yɛ́ ná bá yɛ́ ndɔ tukinə ɔ nɔɔ́mɛná ɔ ɛmɛ́ŋɛ́ yɛ́ Huɛlɛ́.

¹¹Tuúmə tɔ́ Huɛlɛ́ tɔ́ wɛɛ́ya nɔmakɛna. Yáyɛ́á ɛsakɛsakɛ yɛ́ hɔ́áka ɔ hinímə hɛ́ muɔkɔ, muɔkɔ ɔwá wɔ́ lɛ́á laŋɔlaŋɔ ɛ́sɛ́á isinínə́.

¹²Bilíŋə́líŋə́ bɛ́ ɔmbambala bɛ́ ka wɛɛ́ya bá bɔŋɔ́lɛ́nátɔ. Yɛ́ ka báá na niómo nɛ́ tɔkɔ́kɛ na tɔ́fandɛ́, niómo nɛ́ bɛáŋgɛlɛ na báfandɛ́ na məə́nyə tilə́kə́tɔ́ ɔ tɔkɔ́kɛ; mááyɛ́ məə́nyə, ɔ́ ɔmá niómo nɛ́ tutikə na tɔ́fandɛ́ tɔ́ baná bá Ísilahɛ́lɛ.

¹³Yɛ́ ka bá na tɔkɔ́kɛ tɔ́lálɔ́ ɔ nɛhɔalɛ́nɛ́ná, tɔ́lálɔ́ ɔ mɔkɔndɔ, tɔ́lálɔ́ ɔ makɛ́ka, na tɔ́lálɔ́ ɔ nɛsianɛ́ná nɛ́ hiɔtɔ́tɔ́.

¹⁴Ɛmbambala yɛ́ bətínə́ yɛ́ ka bá na niómo nɛ́ matɛ́kɛ́ná na áfandɛ́, niómo nɛ́ məə́nyə má bɔŋgəlimə bá Mɔnándɔ́mbá na báfandɛ́ tilə́kə́tɔ́ ɔ mátáyɛ́ matɛ́kɛ́ná.

¹⁵Wɛ́ɛ́yɛ́ ɔwá a ná bá a ndɔ mɛaŋɔ́á hɛ́na, a ka bá na hikətíníə́ hɛ́ nɛtɔŋɔ nɛ́ kóolo ɛlɔ́áyɛ́ bətínə́, tɔ́áyɛ́á tɔkɔ́kɛ na yə́yíə́ ɛmbambala ukətiə.

¹⁶Bətínə́ yɛ́ ka bá bɛsalɛ bínisə hɔ́ánánátɔ: Bɔtatánɛ ɛ́sɛ́á mabahɔ́. Áŋgɛlɛ a ná bətínə́ kə́tə́kíə́ na nɛtɔŋɔ, a ná fanáká tukóló tɔ́fandɛ́ tɔ́ amaná na bɛbɔ́ɛ́yɛa bɛ́fandɛ́: Bɔtatánɛ, mabahɔ́ na mɔtɛ́nɛná, bɔkɔa bɔ́mɔtɛ́.

¹⁷A ná ɛmbambala kətə́kíə́, a ná fanáká ɛbɔ́ɛ́yɛa na moómo ə́nisə má amaná na ə́nisə, ɔwɔŋgɔkɔnɔ hikətíníə́ hɛ́ bɛndɔ ɔhɛ́á áŋgɛlɛ a ná bɛ́kɛ́ákɛ́na.

¹⁸Bá ka yə́yíə́ ɛmbambala bə́ləkiə na biomí bɛ́ miɔkɔ, bətínə́ tɔ́na falábákátɔ́ na tiísi yɛ kóolo, yɛ́ siəkinənə laŋɔlaŋɔ ɛ́sɛ́á isinínə́.

¹⁹Matɛ́kɛ́ná má ɛmbambala yɛ́ bətínə́ má ka báá tumə́kə́tɔ́ na ɛnyɛnya yɛ́ biomí bɛ́ miɔkɔ. Nɛtɛ́kɛ́ná níbúsíə́ na yásɛbɛ, nɛ́ niɔŋgɔnɔ ífəndí na safíli, nɛ́ niɔŋgɔnɔ ɛ́lálɔ́ na kalɛsɛtɔ́ána, nɛ́ niɔŋgɔnɔ ínisə na əməlóto.

²⁰Nɛ́ niɔŋgɔnɔ ɛ́lánɔ na salatɔ́ána, nɛ́ niɔŋgɔnɔ ɛ́lɛ́ndálɔ na kolonalínə, nɛ́ niɔŋgɔnɔ ɛ́lɛ́ndɔ́lɔ́mɔnɔ na kilisolíti, nɛ́ niɔŋgɔnɔ ɛ́námanɛ́ na biliyíli, nɛ́ niɔŋgɔnɔ ibo na tɔbásɛ, ɔ niómo nɛ́ matɛ́kɛ́ná falábákátɔ́ na kilisobalásɛ, ɔ niómo nɛ́ matɛ́kɛ́ná na nɛ́mɔtɛ́, na hiasɛ́nɛ́tɛ, ɔ niómo nɛ́ matɛ́kɛ́ná na áfandɛ́ nɛ́ ka báá falábákátɔ́ na amɛtisíti.

²¹Nɛ́ɛ́yɛ́ niómo nɛ́ tɔkɔ́kɛ na tɔ́fandɛ́ tɔ́ ka bámɛnɛna niómo nɛ́ tubilə na tɔ́fandɛ́. Hɛkɔ́kɛ tɛ́á lunə́kə́tɔ́ na hibilə hímotí. Ɛbɔ́ka yɛ́ nɛnáka nɛ́ bətínə́, tumə́kə́tɔ́ na tiísi yɛ kóolo ɛ́sɛ́á ɛlaŋɔlaŋɔ yɛ́ ɛŋgɛlásɛ.

²²Mba ábá ɔ Tɛ́mbɛlɛ, mɛ sá mɛɛ́ta sinə ɔ yɛ́táyɛ́ bətínə́ bɔkɔasɛ́á, Isə́lúkú á Huɛlɛ́ yɛ injiŋə yikimə, ɔ́ yayɛ́á Tɛ́mbɛlɛ, na Mɔnándɔ́mbá.

²³Bətínə́ yɛ́ lɛ ndɔ hiɔtɔ́tɔ́ siə mbá ata muilí ɔkɛaka ɔwá bá wɛɛ́ya nɔmákɛ́na. Ɔ taká tuúmə tɔ́ Huɛlɛ́ tɔ́ ndɔ wɛɛ́ya numiə, á Mɔnándɔ́mbá a lɛ́á yáyɛ́á itiəkətiəkə.

²⁴Mɔnɔŋɔ má misí má ŋɔ kɛndakɛna ɔ ɔwayɛ́ isəmú, bənəni bá misí bá ŋɔ wɛɛ́ya túə́búə́ tuúmə húlə́kəninə.

²⁵Tɔ́áyɛ́á tɔkɔ́kɛ tɔ́ sa ndə́bíkúíyíə́, ɔ taká ibínə́binə yɛ́ sa ndábá tɔ́na ɔ yɛ́ɛ́yɛ́ bətínə́.

²⁶Bá ŋɔ hibə́təniə na tuúmə tɔ́ mɔnɔŋɔ húlə́kənə umə́.

²⁷Ata bɔkɔa bɔ́ məhilə́ bɔ́mɔtɛ́, ata mɔndɔ ɔwá a ndɔ bɛkɔa bɛ́ nyəkə́ kɛa na bɛkanja, a sa ndə́fínə́ umə́, mba, ɔ́maná bááyɛ́ ɔbá məə́nyə má lɛ́á tilə́kə́tɔ́ ɔ hiəfulə hɛ́ buɔmɔ́ hɛ́ Mɔnándɔ́mbá.