Read Tunen Bimənyí 22 Bible Online

Bimənyí 22 - Tunen bible

Bimənyí 22

¹Əlimə yɛ nɔ́yɛ́, a ná mɛaŋɔ́á núíyi nɛŋɛ́ŋa ínə́níə́ ɔnɛ́á nɛ́ ndɔ mənífə́ má buɔmɔ́ índiə, ɔnɛ́á nɛ ná bá nɛ́ ndɔ njɛa ɔ hikómo hɛ́ Huɛlɛ́ na hɛ́ mɔnándɔ́mbá, nɛ́ nɔmaka laŋɔlaŋɔ ɛ́sɛ́á hinímə.

²Bɔlɛ́á ɔbɔ́á bɔ́ ndɔ buɔmɔ́ índiə, bɔ́ hákɛna hiɔŋɔ hikimə, bɔ́ ka báá lɔ́átɔ́ ətíə́ yɛ ɛbɔ́ka yɛ́ nɛnáka nɛ́ bətínə́ na ɔ makátá áfandɛ́ má núíyi nɛŋɛ́ŋa. Bɔ́ tɔtámátámá hákɛna muilí tɛ́á, bá tɔ́áyɛ́á tɔánjɛ bɛ́kɛakɛna ɛlɔ́áyɛ́ bɛndɔ bá mɔnɔŋɔ uniŋəsiə.

³Indimisi yɛ sa ndábá tɔ́na. Hikómo hɛ́ Huɛlɛ́ na mɔnándɔ́mbá hɛ́ ŋɔ báá ɔ yɛ́táyɛ́ bətínə́, báyɛ́á bɔnyɛna bá ŋɔ wɛɛ́ya lúbúnəkə,

⁴Bá ŋɔ bɔ́áyɛ́á busíə́ siəkinə, nɛ́áyɛ́á niínyə nɛ́ ŋɔ báá tilə́kə́tɔ́ ɔ uwəbú mabɔ́ka.

⁵Ibínə́binə yɛ́ sa ndábá tɔ́na, ata mɔndɔ a sa ndá isəmú yɛ́ itiəkətiəkə ata yɛ́ hiɔtɔ́tɔ́ síə́ bɔkɔasɛ́á, Isə́lúkú á Huɛlɛ́ a ŋɔ bəə́bu yayɛ́á isəmú áyɛna, bá ŋɔ manakɛna tɔ́na ɔ tɔɛya na tɔɛya.

⁶Áŋgɛlɛ a ná kɔndá ɔlaa a sɛ́á: «Ɔ́ tokó yɛ bɛtambá bɛ́ɛbɛ bikimə ɔbɛ́á ɔ ná ɔ́kɔ́kɛ́ná, bɛ́ lɛa taká, Isə́lúkú á Huɛlɛ́ ɔwá a ndɔ Umbúínyi Mɔnaŋanaŋa índiə ɔ bɔhɛ́nátɔtányɛ́, a ná yayɛ́á áŋgɛlɛ lɔ́má ɔkɛaka ɔwá, a báyɛ́á bɔnyɛna ínə́níə́ yatɛ́ ɔyɛ́á yɛ́ ná hɔ́ánána ɔ hútú ndafama.»

⁷Ə́yə́ə́, mɛ lɛa ɔ ɔsákɔna ikúílí tɛ́tɛ́á. Nɛhɔnɔ na wɛ́ɛ́yɛ́ ɔwá a ndɔ bɛtambá bɛ́ bimənyə́síníə́ bɛ́ híihi hiəfulə tə́tə́niə.

⁸Ɔwámɛ á Yɔhánɛsɛ, mɛ ka bɛ́ɛ́yɛ́ bɛkɔa ɔ́kɔ́kɛna, mɛ ná siəkínə, ɛnaka mɛ siəkínə, mɛ́ ɔ́kɔ́kɛ́ná tɔ́na, mɛ ná kiníə́ ɔ ɔwayɛ́ makɔlɔ́ ɛlɔ́áyɛ́ ɔwayɛ́ ulúbúnə.

⁹Mba a ná mɛaŋɔ́á lɛ́na a sɛ́á: «Ɔ lɛ tíkə́ nɔyɛ́ kɛa, mɛ lɛa ikindəniə yɛ́ buolí ɛlɔ́áyɛ́ áwɔ, na báwɔ́á bənísə́ á bɔhɛ́nátɔtányɛ́, na ɛlɔ́áyɛ́ bááyɛ́ ɔbá bá ndɔ bɛtambá bɛ́ híihi hiəfulə tə́tə́niə. Á Huɛlɛ́ ɔ́ ná hɔ́ánána ulúbúnə.»

¹⁰A ná mɛaŋɔ́á lɛ́ná tɔna a sɛ́á: «Ɔ lɛ bɛndɔ bɛɛ́bɛ bɛtambá bikimə bɛ́ bimənyə́síníə́ bɛ́ híihi hiəfulə bitə, ɔ taká ikúílí yɛ́ lɛa hoóyi.

¹¹Ətíə́ yɛ ikúílí, wɛ́ɛ́yɛ́ ɔwá á lɛ́á mɔndɔ mɔbɛ́á, á ákánána ɔ busíə́ ɔ bɔbɛ́á ɔkɛa, wɛ́ɛ́yɛ́ ɔwá a ndɔ bítífílə, á nɛ́áyɛ́á nibítífílə ákánána ɔ busíə́, wɛ́ɛ́yɛ́ ɔwá a ndɔ buɛsɛ kɛa, á bɔ́áyɛ́á buɛsɛ ákánána ɔ busíə́, ɔwá a lɛ́á mɔnaŋanaŋa á bínə́ŋə́síə́ ɔ ɔyáyɛ́na.»

¹²Ə́yə́ə́, mɛ lɛa ɔ ɔsákɔna ikúílí tɛ́tɛ́á na wə́míə́ mɔsábɔ́náná ɛlɔ́áyɛ́ uwíndiə mɔɛ́ta tɛ́á ɔwɔŋgɔkɔnɔ bɛ́áyɛ́á bɛnyɛná.

¹³Mɛaŋɔ́á mɛ lɛ́á Álɛ́fa na Ɔmɛ́ka, nɔ́yɛ́ a sɛ́á: «Wəbusíə́ na Wənitifə́, nibotólíníə́ na nisúki.»

¹⁴Nɛhɔnɔ na bááyɛ́ ɔbá bá ndɔ mə́búə́ maŋgɔmba sɔa ɔkɛaka ɔwá, bá tɔtámátámá tɔ́ bɔlɛ́á nɛ́áká ɔbɔ́á bɔ́ ndɔ buɔmɔ́ índiə, bá fíə́kínínə́ tɔ́na ɔ tɔkɔ́kɛ tɔ́ bətínə́ ɔ mɛnaŋanaŋa.

¹⁵Mamɔ́á, balɛmba, bɛndɔ bá nɛbɛ́nyɔ́kɔlɔ, bɔnɔ́bɛndɔ, bəlúbúnə bililí, ata ɛ́yánɛ́ ɔwá a ndɔ bɛkanja hikiə mbá ndɔ bɛɛ́ta bɛ́kɛna, a sa ndə́fínə́ ɔ bətínə́.

¹⁶Ɔwámɛ á Yə́susu, mɛ ná yamɛ́á áŋgɛlɛ lɔ́má ɔkɛaka ɔwá a bənú yɛ́ɛ́yɛ́ imbóŋi húlə́nínə ɛlɔ́áyɛ́ bilúkunə bɛ́ bəlumininə. Mɛaŋɔ́á mɛ lɛ́á mɔlɔsa, na mɔndɛkɛ Ndə́witi, ɛnɔmakɛ yɛ́ hisənji hɛ́ siísíə́.

¹⁷Umbúínyi wɔ́ Huɛlɛ́ na ɛkɔŋɛna bá sɛ́á: «Sɔ́nɔ!» Wɛ́ɛ́yɛ́ ɔwá a ndɔ ɔ́kɔ, á láá a sɛ́á: «Sɔ́nɔ!» Wɛ́ɛ́yɛ́ ɔwá a lɛ́á na nuiyí, á sɔ́nɔ, wɛ́ɛ́yɛ́ ɔwá a ndɔ mənífə́ má buɔmɔ́ siə, á maáta kusə́nə́ ndəmə.

¹⁸Ɔwámɛ á Yɔhánɛsɛ, mɛ ndɔ mɔndɔ tɛ́á mbóŋiə ɔwá a ndɔ bɛtambá bɛ́ bimənyə́síníə́ bɛ́ híihi hiəfulə ɔ́kɔ. Ábá mɔndɔ a ná bɔkɔa kɔndá umə́, Huɛlɛ́ a ŋɔ wɛɛ́ya məsə́kə kɔndɛna ɔmá má lɛ́á tilə́kə́tɔ́ ɔ híihi hiəfulə.

¹⁹Mba, ábá mɔndɔ a ná bɔkɔa húlíə́ ɔ bɛtambá bɛ́ híihi hiəfulə, Huɛlɛ́ a ŋɔ nɛ́áyɛ́á nioko húliə ɔ tɔtámátámá tɔ bɔlɛ́á bɔ́ buɔmɔ́, na ɔ bətínə́ mɛnaŋanaŋa ɔbɛ́á bɛ́ lɛ́á tilə́kə́tɔ́ ɔ híihi hiəfulə.

²⁰Wɛ́ɛ́yɛ́ ɔwá a ndɔ bɛɛ́bɛ bɛkɔa luminə ɔwá bɛ́ lɛa taká, a sɛ́á: «Ɛ́ɛ! Mɛ lɛa ɔ ɔsákɔna ikúílí tɛ́tɛ́á. Amɛna! Á Isə́lúkú á Yə́susu, sɔ́nɔ!»

²¹Nyɔnɔ yɛ Isə́lúkú á Yə́susu yɛ́ bámɛ́nɛ́ná na bəkimə!