Read Tunen Bimənyí 3 Bible Online

Bimənyí 3 - Tunen bible

Bimənyí 3

¹Tilə́kínə ɔ áŋgɛlɛ yɛ ilúkunə yɛ́ bəlumininə ɔyɛ́á yɛ́ lɛ́á ɔ Salɛ́tɛsɛ ɔwá: Náana wɛ́ɛ́yɛ́ a ndɔ hɔ́ɔ́ ɔwá a lɛ́á na imbúínyi ɛ́lɛ́ndɔ́lɔ́mɔnɔ yɛ́ Huɛlɛ́ na tusənji tɔ́lɛ́ndɔ́lɔ́mɔnɔ, mɛ ndɔ bɛ́áwɔ́á biolí manya: Bɛndɔ bá ndɔ fɛka ɔwá ɔ lɛa muɔmɔ́, mba nɔ́yɛ́ ɔ lɛ wə́ə́tɔ́.

²Bámɛ́nɛ́ná ɛmbɛnyɛ́, ónókíníə́ bááyɛ́ ɔbá bá nɔ́ tíkə́nə hoóyi ɔ uwə́kunə, ɔ taká mɛ sa bɛ́áwɔ́á biolí bɛɛsɛ sinə ɔ busíə́ bɔ́ yamɛ́á Huɛlɛ́.

³Bílúmíníə́ yɔkɔ́na nə́ə ɔyɛ́á ɔ ná kúsə́nə, ɔ ná ɔ́kɔ́kɛ́na. Tə́tə́níə́ yɛɛ́ta, kɔ́ŋɔ́ná mɔlɛ́má. Ábá ɔ sá tuənə ɛmbɛnyɛ́, mɛ ŋɔ húlə ɛ́sɛ́á muíbi, ɛŋana ɔŋgɛ́ŋɛ́ ɔmanya ɔwá ɛkasɛ mɛ aŋɔ́á fúmə.

⁴Mba nɔ́yɛ́, ɔ báka na bɔ́mɔtɛ́ bɛndɔ ɔ Salɛ́tɛsɛ ɔbá bá sa bíə́búə́ bɛlɛŋa tífilə. Bá ŋɔ ka mɛaŋɔ́á tíkə́ lɛŋábákátɔ́ na bɛlɛŋa bɛnaŋanaŋa bɔkɔasɛ́á, bá nɔ́yɛ́ lɛa hɔ́ánánátɔ.

⁵Nɔ́yɛ́, wɛ́ɛ́yɛ́ ɔwá a ŋɔ nɔba, a ŋɔ bɛlɛŋa bɛnaŋanaŋa bɛ́hákɛna, mɛ sa ndá nɛ́áyɛ́á niínyə sɔ́tɔ́ ɔ hiəfulə hɛ́ məə́nyə má bááyɛ́ ɔbá bá ŋɔ buɔmɔ́ bɔ́ ikúílíə́kimə kusənə. Mɛ ŋɔ nɛɛ́ta manya ɔ busíə́ bɔ́ yamɛ́á Isə́ na bɔ́ bɛáŋgɛlɛ.

⁶Wɛ́ɛ́yɛ́ ɔwá a lɛ́á na məlúə́, má bɔkɔa ɔwɔ́kɔ, á ɔ́kɔ́kɛ́na muɛsɛ yatɛ́ ɔyɛ́á Umbúínyi wɔ́ ndɔ lɛna ɔ bilúkunə bɛ́ bəlumininə.

⁷Tilə́kínə ɔ áŋgɛlɛ yɛ́ ilúkunə yɛ́ bəlumininə ɔyɛ́á yɛ́ lɛ́á ɔ Filatɛlɛfíə́ ɔwá: Náana yɛ́ lɛ́á bɛtambá bɛ́ Mɔnaŋanaŋa, wataká, ɔwá a lɛ́á na hilibə hɛ́ Ndə́witi itíə́tɔ, ábá a ná kúnə ata mɔndɔ a sá ndə́kúíyíə́, ábá a ná kuiyíə́ mɔndɔ a sa ósó ukunə.

⁸Mɛ ndɔ bɛ́áwɔ́á biolí manya. Siəlínə, mɛ ná hɛkɔ́kɛ bɛ́lɛ́na ɔwáwɔ busíə́ kunə́tɔ́ ɔhɛ́á ata mɔndɔ a sa ósó ukuiyiə. Ɔ báka ɔbánɔ́ na tɛ́tɛ́á yɛ iŋgínə́, mba nɔ́yɛ́, ɔ ná yamɛ́á ɛtambá tə́tə́níə́, ɔ sa mɛaŋɔ́á bɛ́sáŋɔ́na.

⁹Siəlínə, mɛ ŋɔ aŋɔ́á bɛndɔ bá ilúkunə yɛ́ Sátana índiə, bááyɛ́ bakanjakanja ɔbá bá ndɔ bɛ́laa ɔwá bəə́bu Bɛyútɛnɛ, mba, bá lɛ nɔ́yɛ́ bámɛ́nɛ́na. Mɛ ŋɔ bəə́bu kɛaka bá ndə́kíníə́ ɔwáwɔ busíə́ mbá bá ŋɔ manya ɔwá mɛ ka aŋɔ́á hikəkiə.

¹⁰Ɛ́sɛ́á ikúílí ɔ ná yámɛ́á ɛtambá tə́tə́níə́ na nitiŋiminə nikimə, mɛaŋɔ́á tɔ́na mɛ ŋɔ aŋɔ́á tə́tə́niə ɔ ikúílí yɛ́ makɔsɔnana ɔmá má lɛ́á ɔ ɔsákɔna ɔ misí mikimə ɔkɛaka ɔwá, mɛ bɛndɔ bá misí háá ɔ makɔsɔnana.

¹¹Mɛ lɛa ɔ ɔsákɔna ikúílí tɛ́tɛ́á. Halɛ́ná muɛsɛ yatɛ́ ɔyɛ́á ɔ lɛ́á itíə́tɔ́ ɔkɛaka ɔwá, ata mɔndɔ a lɛ mɔsábɔ́náná wɔ́ nɛ́áwɔ́á nɛnɔba ɔlɔ.

¹²Wɛ́ɛ́yɛ́ ɔwá a ŋɔ nɔba, mɛ ŋɔ wɛɛ́ya híə́nəsiə nɛkɔɛnɛ́ ɔ Tɛ́mbɛlɛ yɛ yamɛ́á Huɛlɛ́, a sa ndáfámá tɔ́na. Mɛ ŋɔ niínyə nɛ́ yamɛ́á Huɛlɛ́ na nɛ́ bətínə́ yɛ yamɛ́á Huɛlɛ́ tiləkə ɔ ɔwayɛ́ mɔlɛ́má, á Yəlúsalɛma ɔ miɔ́sɔ ɔyɛ́á yɛ́ ndɔ tukinə ɔ nɔɔ́mɛná, ɔyɛ́á Huɛlɛ́ a ná lɔma.

¹³Wɛ́ɛ́yɛ́ ɔwá a lɛ́á na məlúə́ má bɔkɔa ɔwɔ́kɔ, á ɔ́kɔ́kɛ́na muɛsɛ yatɛ́ ɔyɛ́á Umbúínyi wɔ́ ndɔ lɛna ɔ bilúkunə bɛ́ bəluminə.

¹⁴Tilə́kínə́ ɔ áŋgɛlɛ yɛ ilúkunə yɛ́ bəlumininə ɔyɛ́á yɛ lɛ́á ɔ Laɔtisə́ ɔwá: Náana yɛ́ lɛ́á bɛtambá bɛ́ wa Amɛna[1], á Mumbóŋímboŋi wataká, na wa yɔkɛ́nana. Wɛ́ɛ́yɛ́ ɔwá a lɛ́á tiísi yɛ bɛɛ́la bikimə ɔbɛ́á Huɛlɛ́ a ná bɔtaka.

¹⁵Mɛ ndɔ bɛ́áwɔ́á biolí manya; ɔ lɛ bá tánánátɔ́ ata kɔnjɔ́tɔ. A nɔ́ bá ɔwá ɔ lɛa tánánátɔ́ ata kɔnjɔ́tɔ!

¹⁶Mba, bɔkɔasɛ́á a lɛa luŋuluŋu, tátá tánánákátɔ́ ata kɔnjɔ́kɔ́tɔ, ɛkasɛ mɛ aŋɔ́á ányákáka.

¹⁷Ɔ ndɔ laa ɔ sɛ́á: «Mɛ lɛa na nɛbɔ́ŋɔ, mɛ ka bɛkɔa bɛɛsɛ kɛaka, ata bɔɔ́la bɔ́ lɛ ndɔ mɛaŋɔ́á áŋgɛ́na.» Mba, ɔ lɛ ndɔ manya ɔwá ɔ lɛa mɔndɔ wa ɛmɔ́kɛ́, wa mahana, hɛtɔyɔ́nɔ́, mundímə́ndímə na ikə́ndəli.

¹⁸Nɔ́yɛ́, mɛ ndɔ aŋɔ́á lɛ́ha ɔwá, ɔ ndá kóolo yɛ nəŋə́síə́tɔ́ ɔ hiwə ɔ́ndɔ́ ɔ ɔwámɛ ɔkɛaka ɔwá, yɛ́ aŋɔ́á bóŋósíə́, bɛlɛŋa bɛnaŋanaŋa ɔkɛaka ɔwá, ɔ bámɛ́nɛ́ná húə́tɔ́ ɔwá ɛsɛ́má yɛ́ bɔ́áwɔ́á bukə́ndəli yɛ́ lɛ sinə́nə, na maányɛ ɛlɔ́áyɛ́ ɔbɔ́ɛ́na ɔ ɔwáwɔ məə́sə ɔkɛaka ɔwá ɔ siəkínə́nə.

¹⁹Ɔwámɛ, bááyɛ́ bəkimə ɔbá mɛ ndɔ hikiə, mɛ ndɔ bəə́bu kɔ́áyɛna, mɛ bəə́bu sɔ́kɔ́tɔkɛa tɔ́na. Ɔ́nɛ́na nə́ə, kɔ́ŋɔ́ná mɔlɛ́má.

²⁰Siəlínə, mɛ lɛa tɛ́nɛ́mátɔ́ ɔ hɛkɔ́kɛ, mɛ ndɔ kitə, ábá mɔndɔ a ná nɛ́ámɛ́á nióni ɔ́kɔ́, mbá a ná nɛɛ́ta kúnə, mɛ ŋɔ nɛ́áka na wɛɛ́ya, a ŋɔ nɛ́áka tɔ́na na mɛaŋɔ́á.

²¹Wɛ́ɛ́yɛ́ ɔwá a ŋɔ nɔba, mɛ ŋɔ wɛɛ́ya tuəniniə na mɛaŋɔ́á ɔ ɔwámɛ hikómo, ɛ́sɛ́á mɛaŋɔ́á tɔ́na ikúílí mɛ ná nɔ́bá, mɛ ka kə́tuənə na yamɛ́á Isə́ ɔ ɔwayɛ́ hikómo.

²²Wɛ́ɛ́yɛ́ ɔwá a lɛ́á na məlúə́ má bɔkɔa ɔwɔ́kɔ, á ɔ́kɔ́kɛ́ná muɛsɛ yatɛ́ ɔyɛ́á Umbúínyi wɔ́ ndɔ lɛna ɔ bilúkunə bɛ́ bəlumininə.