Read Tunen Bimənyí 4 Bible Online

Bimənyí 4 - Tunen bible

Bimənyí 4

¹Əlimə yɛ nɔ́yɛ́, mɛ́ hiamɛ́la, mɛ ná hɛkɔ́kɛ yámá kunə́tɔ́ ɔ nɔɔ́mɛná. Nióni nɛ́ busíə́ ɔnɛ́á mɛ ná ɔ́kɔ́ ɛ́sɛ́á mɔsɛ́bɛ́ nɛ́ mɛaŋɔ́á lakɛna nɛ́ sɛ́á: «Báláká háha mbá mɛ ŋɔ aŋɔ́á ínə́niə yatɛ́ ɔyɛ́á yɛ́ ná hɔ́ánána ɔndafámá əlimə yɛ ikúílí».

²Ɔ umisíúmə́, Umbúínyi wɔ́ ná ndá mɛaŋɔ́á ɛ́ta, hikómo hɛ́ ka bámɛnɛna tábɔ́nákátɔ́ mɔndɔ tuənə́tɔ́ umə́.

³Wɛ́ɛ́yɛ́ ɔwá a ná bámɛ́nɛ́ná tuənə́tɔ́, a siəkinənə ɛ́sɛ́á yomí yɛ́ muɔkɔ laŋɔlaŋɔ. Munyəŋətúləkə wɔ́ ka báá hikómo nɛŋɛ́lɛ́nátɔ́ wɔ́ siəkinənə nyɔakátɔ́ bolókotokoto.

⁴Moómo áfandɛ́ má tukómo na túnisə tɔ́ ka báá hikómo nɛŋɛ́lɛ́nátɔ, moómo áfandɛ́ má bɛnatákɛ na bínisə lɛŋábákátɔ́ na bɛlɛŋa bɛnaŋanaŋa tuənə́kínə́tɔ́ ɔ tɔ́táyɛ́ tukómo, tutəkə́ tɔ́ kóolo ɔ uwəbú mɛlɔ́á.

⁵Bɛmɔanyama, moóni na ɛmalamanda yɛ́ fámálakana ɔ hikómo. Bitiəkətiəkə bɛ́lɛ́ndɔ́lɔ́mɔnɔ tiəkə́tɔ́ ɔbɛ́á bɛ́ ná báá bɛ́ ndɔ kɔnjɔ ɔ busíə́ bɔ́ hikómo, ɔ́ Imbúínyi yɛ́ Huɛlɛ́.

⁶Ɔ busíə́ bɔ́ hikómo, nuíyi nɛŋɛ́ŋa naŋákátɔ́ ɛ́sɛ́á isinínə́ ɔ ətíə́ na mamɛ́ŋɛ́ má hikómo, mɛnyama ínisə yɛ́ ka bá məə́sə na məə́sə ɔ busíə́ na ɔ əlimə.

⁷Mɛnyama yibusíə́ hɔ́ákátɔ́ ɔ iŋgoyó, yɛ ɔwɔŋgɔkɔnɔ ɛ́sɛ́á mɔná ɛfɔŋɔ, yɛ niɔŋgɔnɔ ɛ́lálɔ́ yɛ́ ka báá na busíə́ ɛ́sɛ́á bɔ́ mɔndɔ, yɛ niɔŋgɔnɔ ínisə hɔ́ákátɔ́ ɔ ilúmə ɔyɛ́á yɛ́ ndɔ hululuə.

⁸Yííyí mɛnyama ínisə yɛ́ ka báá mɛɛ́ta tɛ́á na bibə́ku bɛ́lɛ́ndálɔ, məə́sə na məə́sə ɔ ɔmbáŋá na ɔ nuúmə́. Yɛ́ yəmbələkəniə buɔsɛ́ na bulúə́ tɛ́á bá sɛ́á: «Mɔnaŋanaŋa, Mɔnaŋanaŋa, Mɔnaŋanaŋa, á Isə́lúkú, á Huɛlɛ́ yɛ injiŋə yikimə, wɛ́ɛ́yɛ́ ɔwá a ná báá, ɔwá a lɛ́á, ɔwá a lɛ́á ɔ ɔsákɔna!»

⁹Ikúílí tɛ́á ɔyɛ́á mɛnyama yɛ́ ná bá yɛ́ ndɔ tuúmə, hibə́təniə na mohóloniə híə́niniə ɔ wɛ́ɛ́yɛ́ ɔwá a lɛ́á tuənə́tɔ́ ɔ hikómo, ɔwá a ndɔ nɔmɔ ɔ tɔɛya na tɔɛya,

¹⁰bɛ́ɛ́yɛ́ bɛnatákɛ moómo áfandɛ́ na bínisə bá kiniəkiə ɔ busíə́ bɔ́ wɛ́ɛ́yɛ́ ɔwá a lɛ́á tuənə́tɔ́ ɔ hikómo, bá Muɔmɔ́ lúbúnəkə ɔ tɔɛya na tɔɛya, bá túə́búə́ tutəkə́ əmbəkinə ɔ busíə́ bɔ́ hikómo bá sɛ́á:

¹¹Á Isə́lúkú á yəsúə́ Huɛlɛ́, ɔ lɛ hɔ́ánánátɔ́ ɔ tuúmə, hibə́təniə na injiŋə ɔ ukusənə, bɔkɔasɛ́á aŋɔ́á ɔ ná bɛkɔa bikimə bɔtaka, ɔ ná síə́kə́ ɔwá bɛ́ bámɛ́nɛ́na, ɔ ka bɛɛ́ta bɔ́táka.