Read Tunen Bimənyí 5 Bible Online

Bimənyí 5 - Tunen bible

Bimənyí 5

¹Nɔ́yɛ́, mɛ ka siəkinə ɔ mɔkátá wɔ́ bɛnɔ́mɛ wɔ́ wɛ́ɛ́yɛ́ ɔwá a ná báá tuənə́tɔ́ ɔ hikómo, hiəfulə tilə́kə́tɔ́ bɛsalɛ bikimə kuɛsákátɔ́ na tubílíndíníə́ tɔ́lɛ́ndɔ́lɔ́mɔnɔ.

²Mɛ ka yɛmɔtɛ́ áŋgɛlɛ yɛ injiŋə siəkinə yɛ́ ndɔ yə́mə nióni nɛŋɛ́ŋa a sɛ́á: «Ɛ́yánɛ́ a lɛ́á hɔ́ánánátɔ́ ɔ tubílíndíníə́ uhumbulə mbá a hiəfulə kúnə əə́?»

³Ata ɔ nɔɔ́mɛná, ata ɔ misí mbá ata ɔ misí yɛ bəwə́nú, mɔndɔ a sa bá hɔ́ánánátɔ́ ɔ hiəfulə ukunə ata ɔ hiítə ɔ məə́sə ɔtála.

⁴Mɛ ka lɛlaka mɔŋɛ́ŋa bɔkɔasɛ́á, ata mɔndɔ a sa ɛ́nána hɔ́ánánátɔ́ ɔ hiəfulə ukunə mbá ata ɔ hiítə ɔ məə́sə ɔtála.

⁵Nɔ́yɛ́ ɔmɔtɛ́ ətíə́ yɛ bɛnatákɛ a ná mɛaŋɔ́á lɛ́na a sɛ́á: «Ɔ lɛ lɛlá tɔ́na! Siəlínə, ŋguə́yi yɛ nikúlə nɛ́ Yúta, á hɛtɔŋɔtɔ́ŋɔ́ hɛ́ Ndə́witi, a ka nɔba, a ŋɔ tubílíndíníə́ humbuləkə, a ŋɔ hiəfulə kunə.»

⁶Mɛ ka Mɔnándɔ́mbá siəkinə tɛ́nɛ́mátɔ́ ɔ ɛmɛ́ŋɛ́ yɛ hikómo, mɛnyama ínisə na bɛnatákɛ bá nɔ́ wɛɛ́ya nɛŋɛlɛna. A siəkinənə na yɔmɔ́ ɔ mɛɛ́lɔ. A ka bá na bɛndɔ́ŋɔ bɛ́lɛ́ndɔ́lɔ́mɔnɔ, məə́sə álɛ́ndɔ́lɔ́mɔnɔ ɔmá má lɛ́á imbúínyi yɛ́ Huɛlɛ́ ɔyɛ́á a ndɔ lɔ́ma ɔ misí mikimə.

⁷A ka bɛ́nyálɛla ɔkɛaka ɔwá a hiəfulə kusə́nə ɔ mɔkátá wɔ́ bɛnɔ́mɛ wɔ́ wɛ́ɛ́yɛ́ ɔwá a lɛ́á tuənə́tɔ́ ɔ hikómo ɔmbáŋá.

⁸Ɛnaka á hiəfulə kusə́nə, yííyí mɛnyama ínisə na mááyɛ́ moómo áfandɛ́ má bɛnatákɛ na bínisə, bá ná kiníə́ ɔ busíə́ bɔ́ Mɔnándɔ́mbá. Mɔɛ́ta tɛ́á hɛndɔ́ŋɔ́ na bɛnyɛ́ná bɛ́ kóolo, úndúə́kə́tɔ́ na mənumbə, ɔ́ ɔbɛ́á bɛ́ lɛ́á uŋgə́lə́kí wɔ́ banaŋanaŋa.

⁹Bá himboŋo hiɔ́sɔ ósóko bá sɛ́á: «Ɔ lɛ hɔ́ánánátɔ́ ɔ hiəfulə ɔ ukusənə na tubílíndíníə́ uhumbulə. Bɔkɔasɛ́á bá ka aŋɔ́á ɔ́nɔ́kɔ, ɔ tɔ́mbákɛna máwɔ́á manɔ́ŋɔ́, ɔ ka bɛndɔ bá tutikə tukimə, bá mohókí, bilúkunə na mɔnɔŋɔ məkimə háŋɔ́na ɛlɔ́áyɛ́ yəsúə́ Huɛlɛ́.

¹⁰Ɔ ka kɛaka bá ná híáná bɛláŋa bɛ́ nɛmanɛna, bətitiəmahánɛna ɛlɔ́áyɛ́ yəsúə́ Huɛlɛ́, bá ŋɔ misí manakɛna.»

¹¹Nɔ́yɛ́, mɛ ka siəkinə, mɛ ná nióni nɛ́ ɔmbana muiŋí wɔ́ bɛáŋgɛlɛ ɔ́kɔ́ bá nɔ́ hikómo, mɛnyama na bɛnatákɛ nɛŋɛlɛna, bá ka bámɛnɛna ɔ tukóló na tukóló, ɔ moómo ɔbánɔ́ má tukóló.

¹²Bá ósóko nióni nɛŋɛ́ŋa bá sɛ́á: «Mɔnándɔ́mbá wa ɔ́nɔ́kɔ́tɔ́ a lɛ hɔ́ánánátɔ́ ɔ ukusənə injiŋə, nɛbɔ́ŋɔ, ɛmanya, iŋgínə́, hibə́təniə, tuúmə na tɔnyamáná.»

¹³Nɔ́yɛ́, mɛ ka bɛbɔ́tɛ́ná bikimə ɔ́kɔ́kɛna ɔ nɔɔ́mɛná, ɔ misí, ɔ misí yɛ bəwə́nú na ɔ nɔmɔ́, bikimə ɔbɛ́á bɛ́ lɛ́á umə́ bá ndɔ óso na nióni nɛŋɛ́ŋa bá sɛ́á: «Ɔ wɛ́ɛ́yɛ́ ɔwá a lɛ́á tuənə́tɔ́ ɔ hikómo na Mɔnándɔ́mbá, tɔnyamáná, hibə́təniə, tuúmə na nɛmanɛna ɛlɔ́áyɛ́ tɔɛya na tɔɛya.»

¹⁴Yííyí mɛnyama ínisə yɛ́ laaka yɛ́ sɛ́á: «Nɔ́yɛ́ bɔ́ lɛ́á» Bɛnatákɛ bá ná kiníə́, bá wɛ́ɛ́yɛ́ lúbúnəkə ɔwá a lɛ́á ɔ hikómo.