Read Tunen Bimənyí 8 Bible Online

Bimənyí 8 - Tunen bible

Bimənyí 8

¹Ɛnaka á tubílíndíníə́ tɔ́ ná úndúsíníə́ tɔ́lɛ́ndɔ́lɔ́mɔnɔ kúnə, nɔɔ́mɛná yɛ́ ná nə́yə́níə́ yə́ə́bu hoóyi na ɛsalɛ yɛ́ ɔŋgɛ́ŋɛ́.

²Mɛ ná yɛ́ɛ́yɛ́ ikúílí bɛ́ɛ́yɛ́ bɛáŋgɛlɛ bɛ́lɛ́ndɔ́lɔ́mɔnɔ yáma ɔbá bá lɛ́á tɛ́nɛ́mátɔ́ ɔ busíə́ bɔ́ Huɛlɛ́. Bá ná bəə́bu índíə́ mɛsɛ́bɛ́ ɛ́lɛ́ndɔ́lɔ́mɔnɔ.

³Yɛmɔtɛ́ áŋgɛlɛ a ná ndá tɛ́nɛ́má ɔ ɛmɛ́ŋɛ́ yɛ niɔlɔ nɛ́ mahánɛna. A ka bá na ititiə mənumbə yɛ́ kóolo itíə́tɔ́ ɔ mɔkátá, bá ná wɛɛ́ya mənumbə túmbíə́ məəŋí, ɔkɛaka ɔwá a maáta hánɛ́ná na uŋgə́lə́kí wɔ́ banaŋanaŋa bəkimə ɔ niɔlɔ nɛ́ mahánɛna tábɔ́nákátɔ́ na kóolo ɔnɛ́á nɛ́ lɛ́á ɔ busíə́ bɔ́ hikómo.

⁴Ɔ mɔkátá tɔ́na wɔ́ áŋgɛlɛ, muóyi wɔ́ mənumbə wɔ́ ná báláka ɔ busíə́ bɔ́ Huɛlɛ́ na uŋgə́lə́kí wɔ́ banaŋanaŋa.

⁵Əlimə yɛ nɔ́yɛ́, áŋgɛlɛ a ná ititiə mənumbə ɛta, a ná yɛɛ́ta úndúsíə́ na bɛánaka bɛ́ niɔlɔ nɛ́ mahánɛna, a ná yɛɛ́ta əmbínə ɔ misí: Ɛmalamanda yɛ́ ná sana, moóni na bɛmɔanyama, misí yɛ́ ná kílímə́lə́ tɔ́na.

⁶Nɔ́yɛ́, bɛ́ɛ́yɛ́ bɛáŋgɛlɛ bɛ́lɛ́ndɔ́lɔ́mɔnɔ ɔbɛ́á bɛ́ ná bá na mɛsɛ́bɛ́, bá ná bɛ́tábɔ́náka ɔ miítə ɔ ɔlɔ́ŋɔ.

⁷Áŋgɛlɛ yibusíə́ a ná wə́yíə́ mɔsɛ́bɛ́ lɔŋɛla; ɛndánáná na hiwə latákátɔ́ na manɔ́ŋɔ́ yɛ ná kɔakɔ́na ɔ misí, ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ bɛ́ misí yɛ́ ná kɔnjɔ, ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ bɛ́ malɛ́á yɛ́ ná kɔnjɔ, imbuə miɔ́sɔ mikimə tɔ́na yɛ́ ná kɔnjɔ.

⁸Áŋgɛlɛ yɛ ɔwɔŋgɔkɔnɔ a ná wə́yíə́ mɔsɛ́bɛ́ lɔŋɛla; yɛ́ ná ɛ́náná ɛlaka bɔɔ́la ɛ́sɛ́á ɔmáá mɔŋɛ́ŋa kɔnjɔ́tɔ́ bá ná əmbínə ɔ nɔmɔ́. Ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ bɛ́ nɔmɔ́, yɛ́ ná híáná manɔ́ŋɔ́ na manɔ́ŋɔ́.

⁹Ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ yɛ́ bɛbɔ́tɛ́ná ɔbɛ́á bɛ́ ndɔ niŋə ɔ nɔmɔ́ nuúmə́ bɛ́ ná wə́kúnə, bá ná ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ bɛ́ bɛlánjɛ katáka.

¹⁰Niɔŋgɔnɔ nɛ́ bɛáŋgɛlɛ bɛ́lálɔ́ a ná wə́yíə́ mɔsɛ́bá lɔŋɛla, hisənji hɛŋɛ́ŋa hɛ́ ná kɔ́á uhúlə́kinə ɔ ɔmbáŋá kɔnjɔ́tɔ́ ɛ́sɛ́á ɔmbɛ́hɛ́. Hɛ́ ná ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ bɛ́ məə́yi maŋɛ́ŋa na ɔ tɔnyɔ́nyɔ tɔ́ məə́yi kɔɛ́na.

¹¹Nɛ́áyɛ́á niínyə á Abisɛndɛ (Isə́kə́ki). Ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ bɛ́ məə́yi, yɛ́ ná híáná isə́kəsə́kə. Bɛndɔ bəəŋí bá ná wə́kúnə bɔkɔasɛ́á, məə́yi má ka híána bisə́kəsə́kə.

¹²Əlimə yɛ nɔ́yɛ́, niɔŋgɔnɔ nɛ́ bɛáŋgɛlɛ bínisə, a ná wə́yíə́ mɔsɛ́bɛ́ lɔŋɛla; ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ bɛ́ hiɔtɔ́tɔ́, bɛ́ muilí na bɛ́ tusənji bɛ́ ná bítíə́lə. Bɛ́ ná lindímə́nə́ ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́. Ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ bɛ́ ɛsakɛsakɛ yɛ́ buɔsɛ́ yɛ́ ná nimə, hɔ́ánánátɔ́ na yɛ́ bulúə́.

¹³Nɔ́yɛ́, mɛ ná hiamɛ́la, mɛ ná ɔ́kɔ́ ilúmə yɛ́ ndɔ hululuə hə́ə́ní hata ɔ ɔmbáŋá, yɛ́ yə́mə́kə nióni nɛŋɛ́ŋa yɛ́ sɛ́á: «Indimisi! Indimisi! Indimisi na bɛndɔ bá misí, ɛlɔ́áyɛ́ nɛlɔ́ŋɔ́ nɛ́ mɛsɛ́bɛ́ yɛ́ bɛáŋgɛlɛ bɛ́lálɔ́ ɔbɛ́á ɛkasɛ bɛ́ manyɔ́ lɔ́ŋɔ́kɔ.»