Read Tunen Bimənyí 9 Bible Online

Bimənyí 9 - Tunen bible

Bimənyí 9

¹Niɔŋgɔnɔ nɛ́ bɛ́áŋgɛlɛ bɛ́lánɔ a ná wə́yíə́ mɔsɛ́bɛ́ lɔŋɛla; mɛ ná hisənji yámá hɛ́ nɔ́ húlínə ɔ ɔmbáŋá hɛ́ nɔ́ ndakɔ́á ɔ misí, bá ná wɛɛ́ya hilibə hɛ́ hianyaka hɛ́ bəwə́nú índíə́.

²Hisənji hɛ́ ná hianyaka kúnə, muóyi ɛ́sɛ́á wɔ́ nɛsanákɛ́ nɛŋɛ́ŋa wɔ́ ná lúmə́ ɔbála; wɔ́ ná hiɔtɔ́tɔ́ na umbúínyi tə́bə́síə́.

³Bɛtandá bɛ́ ná fə́mə́kə́níə́ ɔ muóyi, bɛ́ ná misí áyɛ́na; bá ná bɛɛ́ta ɛkɛmba índíə́ ɛ́sɛ́á yɛ́ bɛŋɛŋá bɛ́ misí.

⁴Bá ná bɛɛ́ta kotíə́ ɔwá, bɛ́ lɛ bɔbɛ́á kɛa ata ɔ umbuə úmotí wɔ́ misí, ata yatɛ́ ɔyɛ́á yɛ́ ndɔ sinənə ɛ́sɛ́á umbuə, ata ɔ bɔlɛ́á bɔ́mɔtɛ́, mba, ɔ́maná ɔ bɛndɔ ɔbá bá lɛ bá na ɛbána yɛ́ hibílíndíníə́ hɛ́ Huɛlɛ́ ɔ uwəbú nɛbɔ́ka.

⁵Bá sa bɛɛ́ta iŋgínə́ índiə yɛ uwəbú ɔwɔ́nɔ, mba uwəbú ɔ məsə́kə uwíndiə ɔ miilí ɛ́lánɔ. Məsə́kə ɔmá bɛtandá bɛ́ ndɔ bəə́bu índiə, má lɛa ɛ́sɛ́á má mɔndɔ ɔwá ɛŋɛŋá yɛ́ ná nɔma.

⁶Bɛndɔ bá ŋɔ nyɛmbɛ́ siəkə ɔ tɔ́táyɛ́ tunó, bá sa ndá mɛɛ́ta bɔŋɔ; bá ŋɔ siəkə ɔwá bá wə́kúnə, mba nyɛmbɛ́ yɛ́ ŋɔ bəə́bu tɛbakɛna.

⁷Bɛ́ɛ́yɛ́ bɛtandá bɛ́ ka báá hɔ́ákátɔ́ ɔ bɛhɔ́sɛ tábɔ́nákátɔ́ ɛlɔ́áyɛ́ bilə́. Yə́búə́ mɛlɔ́á ɔ́maná ɛ́sɛ́á tutəkə́ tɔ́ kóolo, mə́búə́ məsíə́ má siəkinənə ɛ́sɛ́á má bɛndɔ.

⁸Bɛ́ ka bá na tuhúínyi ɛ́sɛ́á tɔ́ muəndú, mə́búə́ məə́nyə ɛ́sɛ́á má ŋguə́yi.

⁹Yə́búə́ ɛtɔ́na yɛ́ ka báá ɛ́sɛ́á húə́tɔ́ na ikóbóló yɛ́ ilə́ŋú, iluluməki yɛ́ bíə́búə́ bibə́ku yɛ́ kɛaka ɛ́sɛ́á mətulumə má məsínə ɔmá bɛhɔ́sɛ bɛ́ ndɔ tɛbɛnana ɔ wákaka ɔ bilə́.

¹⁰Yə́búə́ mɛlɛ́ŋɛ́ yɛ́ ka bá na ɛmbanda ɛ́sɛ́á yɛ́ bɛŋɛŋá, ɔ uwəbú mɛlɛ́ŋɛ́ á ɛkɛmba yɛ́ ná bá ɔ bɛndɔ məsə́kə ɔ uwíndiə ɔ miilí ɛ́lánɔ.

¹¹Wəbúə́ munəni a ka báá, á áŋgɛlɛ yɛ hianyaka hɛ́ bəwə́nú, na nihókí nɛ́ Hɛ́bɛlɛ «Abatɔ́na.» Na nɛ́ kɛlɛ́kɛ «Abilɔ́nɔ» ɔ́ niɔŋɔ́ sɛ́á: «Mɔsakata».

¹²Ɛmɔ́kɛ́ yibusíə́ yɛ́ ná tɔmba. Əlimə yɛ nɔ́yɛ́, mɔmɔ́kɛ́ áfandɛ́ má lɛa tɔ́na ɔ ɔsákɔna.

¹³Niɔŋgɔnɔ nɛ́ bɛáŋgɛlɛ bɛ́lɛ́ndálɔ a ná wə́yíə́ mɔsɛ́bɛ́ lɔŋɛla, mɛ ná nióni ɔ́kɔ́ nɛ́ nɔ́ húlínə ɔ məkíli ə́nisə má niɔlɔ nɛ́ mahánɛna ɔnɛ́á nɛ́ lɛ́á ɔ busíə́ bɔ́ Huɛlɛ́.

¹⁴Nɛ́ lakɛna ɔ niɔŋgɔnɔ nɛ́ bɛáŋgɛlɛ bɛ́lɛ́ndálɔ ɔyɛ́á yɛ́ ná bá na mɔsɛ́bɛ́ itíə́tɔ́ nɛ́ nɛ́á: «Sɔ́tɔ́náká bɛ́ɛ́yɛ́ bɛáŋgɛlɛ bínisə ɔbá bá lɛ́á ɔ mɛsáŋa hoóyi na nuíyi nɛŋɛ́ŋa, á Ɛfaláta.»

¹⁵Bá ná bɛáŋgɛlɛ bínisə sɔ́tɔ́náká ɔbá bá ná bá ɔ ɔŋgɛ́ŋɛ́, hinó, muilí na hiɔŋɔ ɔtáta ɔkɛaka ɔwá, bá ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ bɛ́ bɛndɔ bá misí ɔnɔkɔ.

¹⁶Bá ná mɛaŋɔ́á ɔmbana wɔ́ mɔlɔ́ŋɔ́ wɔ́ banɔabilə́ lɛ́na ɔbá bá ná báá ɔ bɛhɔ́sɛ ɔmbáŋá, bá ka báá bɛbɔ́ɛ́yɛa bɛ́fandɛ́ bɛ́ tukóló má tukóló. Mɛ ná wútə́yí ɔmbana ɔkɔ.

¹⁷Ɔ ɔwámɛ binónó, náana mɛ́ ná bɛhɔ́sɛ siəkínə́ na bááyɛ́ ɔbá bá ná báá bá ndɔ bɛɛ́ta kɛndana: Bá ka bá na tukóbóló bolókotokoto ɛ́sɛ́á hiwə, na məlínə ɛ́sɛ́á yomí yɛ́ muɔkɔ, sɔtɔ́nɔ́ákɛ́átɔ́ ɛ́sɛ́á indusí yɛ́ tiə́tɔ. Mɛlɔ́á yɛ́ bɛhɔ́sɛ yɛ́ ka báá ɛ́sɛ́á yɛ́ biŋguə́yi. Hiwə, muóyi na indusí yɛ́ fámáka ɔ uwəbú minuə.

¹⁸Ɔ tɔ́mbákɛna mááyɛ́ mɔmɔ́kɛ́ álálɔ́, hiwə muóyi na indusí ɔyɛ́á yə́búə́ minuə yɛ́ ná bá yɛ́ ndɔ anyaka, ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ bɛ́ bɛndɔ yɛ́ ná wə́kúnə.

¹⁹Ɔ taká, ɛkɛmba yɛ́ bɛhɔ́sɛ yɛ́ ka báá ɔ uwəbú minuə na ɔ uwəbú mɛlɛ́ŋɛ́. Ɔ taká yə́búə́ mɛlɛ́ŋɛ́ yɛ́ ka báá ɛ́sɛ́á miáhɔ, yɛ́ ka báá na mɛlɔ́á, na miítə bá ná báá bá ndɔ bɛndɔ məsə́kə índiə.

²⁰Bɔ́mɔtɛ́ bɛndɔ, bááyɛ́ ɔbá mááyɛ́ mɔmɔ́kɛ́ má sá ɔ́nɔ, bá sa mɔlɛ́má kɔ́ŋɔ́na, bá sa imbúínyi mɛbɛ́á, bililí bɛ́ kóolo, mɔnɛ́á, bilə́ŋú, miɔkɔ na malɛ́á niasa ɔ ulúbúnə ɔbɛ́á bɛ́ sá ósó usinənə, ɔwɔkɔ́nɔ mbá ata ɔkɛnda.

²¹Bá sa wə́búə́ muɔnɔ́nɔ, bíə́búə́ bicocí, níə́búə́ nɛbambɛa, na búə́búə́ buíbi niasa.