Read Tungag Tutapongai 11 Bible Online

Tutapongai 11 - Tungag bible

Tutapongai 11

¹Au, kuli rina aongos ke kata atogon kana sikei palau a saling i mengen i rina.

²Na taun ri vap kilapo pasal avunga ane si ring ipo sanglak ang ta makarap, kianla sabonai ani mangsikei a oring marul e Sinar na kila soi sinong singina.

³Na kila angtokai angpokpokai aniria asukang ke, “A, tara me pulpul na roe ke na tara ngangan amadot iria” Kitapo uli abis lu ta roe, parik ta iat.

⁴Na kila antok, “A, tara abis anira ta mangsikei a rina lava ve mangsikei a lu lakat luai e nei liuan ina voiang ka palak alak luai ane metekuku ani kara asan ka lava. Vei tarala uli angpotok pulakai ta kuli rina ke.”

⁵Sikei IAVE kamela pasiang asi me ararai ani rina lava ang nang a lu lava ang kilapo abis ia

⁶na kala antok, “Au, man kana using a vap ke kipo sikei palau ve kari sikei a mengen i rina na kilapo tutapongai kana asukang ke, pua! Nganlak nganing ka kovek i bil ka tubat iria man kila atogon a mang sa keve lomlomonai ang emung.

⁷A, tara kun pasiang na tara an atapagal kari mengen i rina ani ki angilung pok nei liuan iria.”

⁸Asukang na si selen ke vanang IAVE kata ailung na ka pagal na ri vap angpotok ta kuli rina ke. Io na eke avibisan i rina lava ang kata kamus palau.

⁹Ninia vanang a tukulai ina na kita atuk a rina ang ta Babel, using eiang vanang IAVE kata ailung na sikei a mengen i kuli rina aongos ke. Tapagal i matan vap ang vanang aulit i kuli rina ke kata tutapongai le iang. Polpolokan le si Sem Tung si Abaram

¹⁰Kana na akuskus i Sem. Pongua na matas emung i nole lava ang, Sem kalapo 100 na matas le na kala asereai ani Arpakad.

¹¹Emung ina kala to pok le na mang 500 na matas na kala atogon nei pangau ang kana mang rukun nat kavulik.

¹²Au, Arpakad kalapo 35 na matas le na kala asereai ani Sela.

¹³Emung ina kala to pok le na mang 403 na matas na kala atogon nei pangau ang kana mang rukun nat kavulik.

¹⁴Au, Sela kalapo 30 na matas le na kala asereai ani Eber.

¹⁵Emung ina kala to pok le na mang 403 na matas na kala atogon nei pangau ang kana mang rukun nat kavulik.

¹⁶Au, Eber kalapo 34 na matas le na kala asereai ani Peleg.

¹⁷Emung ina kala to pok le na mang 430 na matas na kala atogon nei pangau ang kana mang rukun nat kavulik.

¹⁸Au, Peleg kalapo 30 na matas le na kala asereai ani Reu.

¹⁹Emung ina kala to pok le na mang 209 na matas na kala atogon nei pangau ang kana mang rukun nat kavulik.

²⁰Au, Reu kalapo 32 na matas le na kala asereai ani Serug.

²¹Emung ina kala to pok le na mang 207 na matas na kala atogon nei pangau ang kana mang rukun nat kavulik.

²²Au, Serug kalapo 30 na matas le na kala asereai ani Naor.

²³Emung ina kala to pok le na mang 200 na matas na kala atogon nei pangau ang kana mang rukun nat kavulik.

²⁴Au, Naor kalapo 29 na matas le na kala asereai ani Tera.

²⁵Emung ina kala to pok le na mang 119 na matas na kala atogon nei pangau ang kana mang rukun nat kavulik.

²⁶Au, Tera kalapo 70 na matas le na kala asereai ani ri Abaram, Naor na Aran.

²⁷Kana na akuskus i Tera. Tera kata asereai ani ri Abaram, Naor na Aran. Au, Aran kala kun asereai ani Lot.

²⁸Le na kan mat e Ur, rina ke si ri Kalde, si ring i ingus ania. Kata mat si taun a tamana katapo to lak.

²⁹Au, ri Abaram ve Naor kilong talapo osongon na kisngana i Abaram, kana asan ta Sarai, na kisngana i Naor, kana asan ta Milka, tamarilong ve Iska ta Aran.

³⁰Sarai katapo ngolo, kovek i nat.

³¹Au, Tera kala songo kana nat ta Abaram na tivuna ta Lot, nat ang si Aran, na omona ta Sarai na kila tapasuk pelek a Ur si ri Kalde asi kari pasal ane Kanan. Sikei, taun ang kimela serei e Aran akorong, kila soi sinong eiang.

³²Tera kalapo 205 na matas aongos le na kala mat eiang e Aran.