Read Tungag Mataio 22 Bible Online

Mataio 22 - Tungag bible

Mataio 22

¹Na Iesu kala anguan mengen an aniria si kankanuai i mengen asukang ke,

²“Vainagoan i metekuku kapo asukang val mangsikei a tulava kata vil a matan angan ani kana nat si kana osongon.

³Na kala asok kana keve asosokai asi kari an songo ani vap ang katala songo iria ane si matan angan ang, na kipo misag ani me serei.

⁴Au, kala asok kana keve asosokai ta, ‘Mi pasal na mian antok na vap ila mengen amalangas ang ta, “Natala itoitonai lenginang ani kag matan angan. Keve bulumakau ve mang keve vongo ngokngok ro natala taun aniria. Keve bil aongos kalapo usausa. Mi me ane si matan angan ke.” ’

⁵Sikei kila misag na kila pasal using kari keve lomlomonai akorong, mang anu kata pasal ane matang na mang anu ane si kana ring ipo atos.

⁶Na mang matan kila teng akit kana keve asosokai na kila nau varas iria na kila raung iria.

⁷Au na tulava kala marala na kala asok kana keve katakai i visvis asi kari an raung suai luai ani vap po daung ang na ki an ani kari rina.

⁸Au na kala antok kana keve asosokai, ‘Matan angan i osongon ke kalapo usausa, sikei vap ang natapo buk iria parik kita lapa ro angkoai asi kari me angan.

⁹Mi pasal taun a keve angmamarakai i selen na mian songo vap ane si matan angan ke. Mi songo na ri si mipo arai aniria.’

¹⁰Asukang a keve asosokai ke kila pasal taun a keve selen i nei rina na kianla songo akuvul aongos na ri vap kipo sabonai aniria, vap roron ve ri vap po rikek ang. Na nei lu sian pagamau kamela sogong atung ta kana vap.

¹¹Sikei taun a tulava ang kamela palak sime arai ani vap ke, kanla arai ani mangsikei e iang parik katapa alak a maus ipo alak si taun i pagamau na kala antok ia,

¹²‘Au tungag, kuta saka palak an? Using parik kupa alak kam maus.’ Na igenen ang kala tu bot.

¹³Na tulava ke kala antok kana keve asosokai, ‘Mi got a ngono kungana ve ngono kakina na mi asuai ania ane komo ane si ring vong itum, voiang kapo atogon tangis na ngut ngisa.’

¹⁴Io, vap miang kipo songo iria, sikei rukun lik palau kipo pilak iria.” Samui takis ane si Kaisar

¹⁵Na ri Parisaio kianla vil lomlomonai si kari teng akit ania si kana mengen.

¹⁶Na kila asok kari keve nat i akalit ane singina kuvul ve mang keve vap si Erodes. Na kianla antok ia ta, “Katakai i akalit, namempo malangas ta kupo igenen atutuman na kupo akalkalit ta kana laulauan a God si selen tutuman. Na parik kupa tarakai ani mangsikei using ri vap kipo angkokoai palau e matam.

¹⁷Ku mengen imem. Nei kam lomlomonai? Kapo korong ani tara samui takis ane si Kaisar vo parik?”

¹⁸Sikei, Iesu kala nas kari lomlomonai visuk na kala antok, “Nami na vap kapau, marai sa na mipo buk atoktokngai anig?

¹⁹Mi akalit iau ta kapkap ipo samui takis ang.” Na kila alis ia.

²⁰Na Iesu kala sui iria, “Au, nona i si kana? Na asan i si kana?”

²¹Na kila antok ia, “Ke Kaisar.” Na kala antok iria, “Mi alis a Kaisar ta sa ke Kaisar, na mi alis a God ta sa ke God.”

²²Taun kila longong asukang ke kilapo taping, na kila atolongon ia na kila pasal. Susui i tadut pok

²³Si taun ang palau mang matan Sadukaio, vap ang kipo agel suai ani tadut pok, kimela serei singina, na kila sui ia ta,

²⁴“Katakai i akalit, Moses kata antok ta si man a igenen katala mat na kapo kovek i inatus, tasina ka osongon a mainang ang asi kana aumata nat ani tasina.

²⁵Kana nei liuan imem katapo atogon a limalengua na angtasimal. Anu tuan kata osongon na kala mat. Na using kapo kovek i inatus, tasina kala osongon kana aina.

²⁶Na asukang kapa si anu tasina na vapotol na kala pasal luai tung si valimalengua.

²⁷Au, e mung iria aongos, aina ke kala kun mat kapa.

²⁸Si taun i tadut pok, si akorong i limalengua na tauan ke ka tauk i aina ke? Using ria aongos kita osongon tatana?”

²⁹Na Iesu kala antok iria, “Mipo lok singina using parik mipa nas a mengen ang nei salsalik, na parik kapa mipa malangas kana kitmat a God.

³⁰Si taun i tadut pok ri vap parik kipa angosongon, parik. Ki bil val ri angelo i metekuku.

³¹Au na ani vap la mat ang, vei parik lak nganing mipa taot kana mengen a God taun imi?

³²Nau a God si Abaram, God si Isak, na God si Iakov. Parik ta God si ri vap mat, sikei kakaria kipo to.”

³³Taun a petau lava ang e iang kipo longong ia kilapo taping ani kana akalkalit. Saka asok tapai an kapo lavlabat?

³⁴Si taun ri Parisaio kila longong ta Iesu katala vil amamaila na ri Sadukaio, kimela serei kuvul.

³⁵Na mangsikei iria, voiang katapo igenen malangas ani saupai, kala atoktokngai ania ta susui ke,

³⁶“Katakai i akalit, saka asok tapai an kapo laba luai nei liuan i keve saupai?”

³⁷Na kala antok ia, “Ku vinga ro taun a Volava kam God ta pakangat im aongos, na malanganto im aongos, na lomlomon im aongos.

³⁸Kana kapo ainoai na kapo lavlabat luai i asok tapai.

³⁹Na vapongua kapo kuvul palau, Ku atogon a tungam val kupo vinga ro taun pok ua.

⁴⁰Pongua na asok tapai ke, keve mengen i nei saupai na si ri katakai i kus amalangas kipo gon kuluna.” Igenen i akanangai, tamana ta si?

⁴¹Si taun a ri Parisaio kianlapo ago kuvul Iesu kala sui iria,

⁴²“Mipo saka lomlomonai an ani igenen i akanangai? Kapo nat i si?” Na kila antok ta, “Nat i David.”

⁴³Na kala antok ta, “Kapo saka bil an na David, si malanganto, kata songo ia ta Volava, asukang ke,

⁴⁴Volava kata antok kag Volava ta ku sinong e palso ig tung si naka vil a vap po petau ang anim asi kari ago neite ngono kakim.

⁴⁵Man a David sukana kapo songo ia ta Volava, kapo saka angkoai an si kin ania ta kapo nat ina?”

⁴⁶Na kapo kovek i mangsikei kapo angkoai si polpol ania. Na le si taun ang kilapo lolokovo luai ani sui ania ta mangsikei a susui.