Read Tungag Marko 3 Bible Online

Marko 3 - Tungag bible

Marko 3

¹Na kala anguan palak an nei lu i kivung, na katapo atogon a mangsikei a igenen e iang kungana katapo mat.

²Na kilapo teremai ania ta man kala vil ato ia, ki aoles ia using kapo taun i atailai.

³Na kala antok a igenen kunga mat ang ta, “Me ane ke.”

⁴Na kala sui iria, “Saupai i taun i atailai kapo asok ira si pakangai vo vil arikek? Si vil ato vo si vil punuk?” Sikei kipo musik lik palau.

⁵Na kala ararai aulitai aniria velai ani neikien na makus using a vingaria kapo kit. Na kala antok a igenen ang, “Ku koros a kungam.” Na kala koros a kungana na kala pukunan aro pok.

⁶Na ri Parisaio kila soung na akorong palau kianla gulegule selen ve kana vap a Erodes ta ki saka raung an ania. Petau duk e ngerelo

⁷Iesu ve kana keve nat i akalit kila papelek a ring ang ane ngerelo. Na petau lava le Galilaia kila using ia. Na le Iudaia kapa,

⁸na le Ierusalem, le Idumaia, na le mang palpal i sung Iordanes, na le Turo na Sidon. Petau lava ke kita lapo longong a keve abis ang kata abis ia na kila using ia.

⁹Na kala antok kana keve nat i akalit ta ki usausa ta ring vul ania vei nganing a petau lava ke kimela rumrumpulit ia,

¹⁰using katala vil ato na vap duk, asukang na kana, ri vap malepen aongos kipo kun buk sigil ania.

¹¹Na si taun ang ri malanganto rikek kipo arai ania na kipo soturungai singina na kipo songosongo ta, “Numai a nat i God.”

¹²Na kapo atakun amadot iria ta ki ago ta mengen amalangas an tatana. Iesu kata songo na 12 na igenen

¹³Na kala kiklak ane ring putputan, na kala songo asung na vap ang katapo buk iria, na kimela serei singina.

¹⁴Na kala atung a 12 na igenen asi kari auai ve nia, na asi kana asok aniria asi an akuskus,

¹⁵na ki atogon kitmat asi kirikai suai ani ri ingua.

¹⁶Simon, kata atuk pok ia ta Petero.

¹⁷Iakovo nat si Sebedaio, ve Ioanes tasina i Iakovo, kata atuk pok irilong ta Boanerges, supsupai ina ta nat i angang.

¹⁸Andereas na Pilipo na Bartolomaio na Mataio na Tomas, na Iakovo nat si Alpaio, na Tadaio, na Simon mangsikei i ri Kananaio,

¹⁹na Iudas Iskariot, vopo alis suai ania asi kana mat. Iesu ve Belsebul

²⁰Au, kala papok ane rina, na petau tavirimok kimela anguan serei akuvul pok an. Asukang a parik kilapa angkoai taun asi angan.

²¹Na keve tungana kitala longong ta kapo kovek i taun i angan, na kimela serei asi kari me aiveven ania using kitala longong a mengen ta kalapo nio.

²²Vap malangas ani saupai ang le Ierusalem kita mela antok ta, “Belsebul kapo aol ia na kapo lu suai ani ri ingua ta kitmat i kari tulava ri ingua.”

²³Na kala songo asung iria na kala atatai si kankanuai i mengen asukang ke, “Kapo saka ro an ani Satan ka lu suai pok ani Satan?

²⁴Man a vap i nei vainagoan ki angvis pok, vainagoan parik kapa angkoai si tung akit.

²⁵Vo man a angtama ki angvis pok, angtama ang parik kapa angkoai si tung akit.

²⁶Asukang palau man a Satan ka angvis pok ve kana vap, kana kitmat parik kapa tung akit luai. Ka kamus.

²⁷Parik kapa angkoai si mangsikei ka palak nei lu si igenen dual na kan ainau kana keve bil, man parik kapa got tapai ani igenen dual ang. Le lak na kalapo angkoai si ainau ani keve bil i nei kana lu.

²⁸Napo mengen atutuman imi ta God ka lomon suai ani keve lau rikek na keve mengen i nau varas ri vap kipo abis ia,

²⁹sikei ninia kapo mengen i nau varas ani Malanganto Gogoai, parik kapa angkoai luai si lomon suai ani lau rikek ang. Kana lau rikek ka dokot singina si keve taun aongos.”

³⁰Using kita antok ta ingua kapo aol ia. Rinana ve keve tasina i Iesu

³¹Na rinana na keve tasina kime lapo tung e komo na kila ali mengen ta kipo buk tapai ania.

³²Na petau lava kipo sinong aulitai ania, na kila antok ia, “Rinam ve keve tasim na keve taum kipo ago e komo na kipo buk ua.”

³³Na kala ngenget ta, “Si kana na rina ve keve tasig?”

³⁴Na kala ararai aulit ani vap po sinong ang, na kala antok, “Ria vang kana na rina na keve tasig.

³⁵Man a si kapo usiusing kana vubuk a mamai, nia vanang kapo tasig, kapo taug na kapo rina.”