Read Tungag Marko 4 Bible Online

Marko 4 - Tungag bible

Marko 4

¹Na kala anguan tutapongai akalkalit an e ngerelo na petau lava kimela serei kuvul singina, asukang a kala kokos kuli vul, na ri vap aongos kilapo ago ngerelo.

²Na kalapo akalit iria ta keve bil miang si kankanuai i mengen. Nei liuan i kana keve akalit kala atatai iria asukang ke,

³“Mi longong. Mangsikei a katakai i sukal kata sapungai ani kana keve katui i pok e matang.

⁴Na mang matan katui kanpo uak e selen na ri mani kimela angan ia.

⁵Na mang matan katui kian lapo uak si ring iatan kapo tav angkoai roe, na using parik kapa atogon roe lava kala polok sumasuma,

⁶na sinang kala ngan amak ia using kapo kovek i mis.

⁷Na mang matan katui kipo uak nei ring kakaulan na kanla polok alak ve nia na kala palun runguk ia, na parik kalapa uai.

⁸Na mang matan katui kipo uak nei roe roron. Kipo polok alava na kipo aunai uai alava, mang matan kipo uai ta 30, na mang matan ta 60, na mang matan ta 100 alak ani keve katui i sukal ang.”

⁹Au na kala antok, “Man a si kapo atogon talinga, kapo ro ka longong!” Lomlomonai i Iesu si akuskus si kankanuai i mengen

¹⁰Na e mung kata lapo ago papalik, na vap po ago kuvul ang ve nia kuvul ve 12 na nat i akalit kilapo susuiai ania ta keve kankanuai i mengen ang.

¹¹Na kala antok iria, “Kakami na malangas i keve bil mumun i vainagoan si God, sikei riria e komo, kipo longong a keve bil aongos nei kankanuai i mengen,

¹²asi kari gulegule na ki tav sabonai, na asi kari kokolongong na ki tav nas, vei ki lomon pokai na God ka lomon suai ani kari keve lau rikek.” Supsupai i kankanuai i mengen ani katakai i sukal

¹³Na kala sui iria, “Sa, parik mipa malangas a kankanuai i mengen ke? Man asukang, mi saka malangas an ani mang matan kankanuai i mengen?

¹⁴Katakai i sukal kapo sukal a mengen.

¹⁵Mang matan vap vingaria kapo bil val katui ang kapo uak e nei selen. Kipo longong a mengen na sumasuma palau Satan kamepo luk suai ani mengen i la sukal ang.

¹⁶Au na ria kita luk a katui val roe ang nei ring iatan, ria vanang kipo luk na mengen ro na kipo uruk sumasuma palau.

¹⁷Sikei using kapo kovek i mis, kana to i lomlomon kapo kudik palau. Si man a maiten vo vilvil akui kala serei singina marai mengen ro ang, kala uak sumasuma palau.

¹⁸Na katui i la uak si ring kakaulan ang, ninia katala longong a mengen,

¹⁹sikei keve mamaiten i kuli rina ke na lomlomonai using ani tauia, na vubuk using ani mamain ta bil miang kala vil bat a mengen ro ang na kalapo kovek i uai.

²⁰Au na katui i la uak nei roe roron ang, nang ninia kapo longong a mengen na kalapo malangas ia. Na kalapo aunai uai alaba asukang ta 30 na 60 na 100 alakat ani sa i sukal ang.” Lam ni nei avubus

²¹Na kala mengen iria asukang ke, “Au si tarapo nas ani amunai ani lam ni nei avubus vo neite pata? Parik tarapa uli atung ania si kana ring akorong?

²²Using kapo kovek ta bil katapo ago mumum, na nganlak parik kapa serei e ring malangas. Vo ta bil katapo ago nei apupung, na nganlak parik kipa ulak ia.

²³Man ta si kapo atogon talinga, kapo ro ka longong!”

²⁴Au, kala mengen iria asukang ke, “Mi lomon akit a sa mitala longong ia. Ki abis singimi angkokoai palau val lau ang mita abis ia, kuvul ve ngaupap lava.

²⁵Using man a si kapo atogon, ki ngaupap ia, na man a si kapo atogon men lik, io, men lik ang kapo atogon ia, ki luk suai vang ania.” Kankanuai i mengen ani katui kapo sokopolok

²⁶Na kala mengen ta, “Vainagoan si God kapo asukang val igenen kapo sukal nei kana matang.

²⁷Na kanla matav na katui ang kala sokopolok na kala polok alava. Parik kapa nas ta kapo saka polok an.

²⁸Roe papalik kapo pakangai ani katui asi kana polok na ka uai. Ainoai ina ka kovkov, le na tis. Akamusai ina kala vaba ta uai.

²⁹Sikei, taun kala matukal, nang palau kala rok ia using kalapo taun ina.” Kankanuai i mengen ani katui i sinapeo

³⁰Na kala antok, “Au, tara alalangtongai ani vainagoan si God ta sa? Vo tara mengen atokngai ania ta sa?

³¹Kapo asukang val katui i sinapeo. Kapo liklik luai ani keve katui aongos e kuli rina,

³²sikei man ki sukal ia ka polok na ka ngakanan ani keve sukalan aongos, angkoai si ri mani kime ting si marmarip ina.” Selen i alis ani keve kankanuai i mengen

³³Si keve kankanuai i mengen duk asukang ke kata akus a ri vap, angkoai si kari nas.

³⁴Keve taun katapo mengen iria si kankanuai i mengen papalik. Sikei man ninia papa ve kana keve nat i akalit, kapo atatai aro iria. Kitmat i rai kala luai

³⁵Si tenei ngelik vong i taun ang, kala antok iria, “Tara kokos aputuk.”

³⁶Na kila papelek a petau ang na kimela kokos ve nia, using kalapo gon kuli vul lenginang. Na mang keve vul kitapo auai ve nia.

³⁷Na mal titis kala serei amadot na to kala lak nei vul na kalapo buk gok.

³⁸Nia katapo rot kirang vangang e mung i vul. Na kila pangun ia na kila antok ia, “Katakai i akalit, parik kupa ngorem ira? Oring lik tara puka!”

³⁹Na kala tapangun na kala atakun a malu asi kana kamus, “Musik! Luai!” Na malu kala aulei na luai lava kala pitik.

⁴⁰Na kala sui iria, “Marai sa na mipo leng? Mipo kovek lak i lomlomon?”

⁴¹Na kilapo leng alava na kipo sui angpokpokai aniria ta, “Saka igenen an kana na malu ve to kipo kun longong ania?”