Read Tungag Lukas 1 Bible Online

Lukas 1 - Tungag bible

Lukas 1

¹Vap miang kitala salik a mang keve akuskus i keve bil ang kilapo serei atutuman nei liuan ira,

²asukang val kita luk le si vap po tung ang ani Akus, nang riria vap ang kitapo arai ani keve bil ang ta mataria akorong le si ainoai i taun.

³Asukang a nau kapa, using natala luk ia si kag gusgus aro luai ani keve bil aongos le si ainoai i taun tung kana anginang, natapo lomlomonai ani naka salsalik aroron a atugtugi ina anim, kag igenen roron luai ta Teopilo,

⁴ani kula kun nas ta keve akalkalit ang kutala luk ia kapo tutuman luai. Amalangasai ani kana serei a Ioanes katakai i asing tauia

⁵Si taun ang a Erodes katapo tulava i palpal Iudaia singina, mangsikei a katakai i sula katapo ago, kana asan ta Sakarias, le si keve katakai i sula si kuvkuvulan ang si Abia. Na kisngana katapo mangsikei a aina le si patvap si Aron, kana asan ta Elisabet.

⁶Rilong aongos kilongtapo uli lau korong e matana i God, na kilongtapo uli using aro ani keve asok na saupai si Volava, na katapo kovek i oring asi mengen arikek anirilong singina.

⁷Na kilongtapo kovek i inatus using a Elisabet katapo ngolo na rilong aongos kilongta lapo lapan paspasal.

⁸Au, mangsikei a taun katapo teng kana abis i sula, using ke kana kuvkuvulan ta taun si abis mete God,

⁹asukang val kari laulauan ipo gusgus, kitala sabonai ania ta kakana ta taun ani ka palak ane nei lu i atailai si Volava asi an sula ani bil sain roron.

¹⁰Na ri vap aongos kitapo ago e komo ipo sokotuk, si taun i po sula.

¹¹Na mangsikei a angelo si Volava kala tu aserei singina na kame lapo tung si palso i pata ipo sula.

¹²Na kala taping a Sakarias si arai ani bil asukang, velai ani kapo leng.

¹³Au na angelo ang kala antok ia ta, “Ku ago ta leng an, Sakarias, using kam sokotuk kitala longong ia, na kisngam ta Elisabet ka ingus ta kam nat, na ku atuk ia ta kana asan, Ioanes.

¹⁴Ku uruk alava na vap miang ki maramarak si kana serei,

¹⁵using ka igenen lava e mete Volava, na ka alal ani vaen ve mang keve laman kit. Na Malanganto Gogoai ka aol ia le si taun kapo ago lak e vingana i rinana.

¹⁶Ka songo pok amiang i ri Israel taun a Volava kari God,

¹⁷na ka pasal aino e matana ta dual na kitmat val Elias, asi kana asinong kuvul pok ani ri angtama, na ka ulpokai ani vap longobot ani ki atogon pok a lomlomonai korong, na e iang ka itoiton akokoai ani Volava ta kana vap.”

¹⁸Na Sakarias kala sui a angelo ang ta, “Na saka malangas an ta bil ke kapo tutuman? Using nau nalapo lapan na kisngag kapa kalapo lapan luai.”

¹⁹Na angelo ang kala polpol ia asukang ke, “Nau kana na Gabariel vopo uli tung ke mete God, na kata asok iau asi kag me mengen amalangas anim ta akus ro ke.

²⁰Na ku arai, ku tav angkoai asi pege, na ku ago bot tung si taun ang a keve bil kala serei atutuman singina, using parik kuta lapa lomlomon ta kag mengen, nang voiang ka serei atutuman si kana taun.”

²¹Na vap ang e komo kilapo ko na Sakarias na kilapo sugul ta marai sa kalapo amun a taun lava ang nei lu i atailai.

²²Au na taun kamela soung, parik katapa angkoai si ka pege iria, na kila malangas ta katala arai ani ararai nei lu i atailai. Na kala atoktokngai ta kungana sikei kapo bot.

²³Na taun ang kala akamusai ani kana taun i abis, le na kala pasal pok ane si kana rina.

²⁴Na mang rukun taun e mung kisngana Elisabet kala atogon sungsungukan na asukang parik katapa pasal pelek a nei lu ani palpalima na ulen aongos. Kala antok ta,

²⁵“Kana vang, Volava kala akalit iau ta kana lomlomonai roron na kala luk suai ani kag mese e mete ri vap!” Amalangasai ani kana serei a Iesu

²⁶Au, si va limalesikei i ulen, God kala asok kana angelo Gabariel asi kana pasal taun ani mang rina e palpal Galilaia, kana asan ta Nasaret,

²⁷ane si mangsikei a kavulik tanginang, ila pala ani mang igenen kana asan ta Iosep, le si patvap si David. Kana asan a kavulik ang ta Maria.

²⁸Au, kala serei singina na kala antok ia ta, “Kala ro, numai a kavulik roron luai. Volava ve numai!”

²⁹Na kala pisu alava si mengen ang, na kapo sugul ta nei a supsupai i mengen i angruduai ang.

³⁰Na angelo ang kala antok ia ta, “Ku ago ta leng an Maria, using a God katala lomon aro ua.

³¹Arai, ku atogon lak kam sungsungukan, na ku ingus asereiai ta nat tauan, na ku atuk ia ta Iesu.

³²Ka serei a igenen lava na ki posong ia ta nat i Vopo Tavirimok Luai ang. Na Volava God ka atung ia ani ka tulava val tivuna ta David.

³³Na ka tulava asikei i matan vap ang si Iakov na kana vainagoan parik kapa angkoai si ka kamus!”

³⁴Na Maria kala antok a angelo ang ta, “Bil ke ka saka serei an? Using parik lak natapa ago ve ri tauan.”

³⁵Na angelo ang kala atai ia ta, “Malanganto Gogoai ka riuk lak singim na kitmat i Vopo Tavirimok Luai ka aol ua. Asukang na nat daus ang ku ingus lak ia, nia na nat i God.

³⁶Ku arai ani tungam ta Elisabet, si kalapo lapan luai. Kitapo lomon ia ta kapo ngolo sikei kana kalapo va limalesikei i ulen ani kana sungsungukan.

³⁷Using si God kapo kovek luai i bil kapo kitmat.”

³⁸Na Maria kala antok ta, “Nau kana na asosokai si Volava. Ka serei singig val kam mengen.” Le na angelo ang kala pasal pelek ia. Maria kata sasaos a Elisabet

³⁹Si pangau i taun ang, Maria kala tapasuk na kala sumasuma suai taun a palpal mulangan ane si mang rina e Iudaia.

⁴⁰Na kala palak ane nei lu si Sakarias na kanla mengen i angruduai ve Elisabet.

⁴¹Taun ang a Elisabet kala longong kana mengen a Maria, popo ang e vingana kala aupele na Elisabet kala sung pukun ta Malanganto Gogoai,

⁴²na kala songosongo alava ta, “Numai kupo aina i atautauia luai ani ri aina aongos, na atautauia ka ago si nat ang ku ingus ia!

⁴³Pua, marai sa na bil roron ke kapo serei singig ta rinana i kag Volava kapo serei si me arai anig?

⁴⁴Using vuk taun ang palau nata longong kam mengen i angruduai, popo ke e vingag kata aupele ta uruk.

⁴⁵Vei sa ta tauia ang kupo atogon ia si lomlomon ta kana mengen a Volava singim ka serei atutuman!” Tangam si Maria

⁴⁶Na Maria kala antok, “Napo sunguk alak a Volava ta kag to aongos.

⁴⁷Malanganto ig kapo uruk si God, ninia katala asapang iau.

⁴⁸Using katala lomlomonai ani kana asosokai vopo ago e kevkev ke. Using arai, kana na iles lak a mamain ta polpolokan ki kinle na bil roron ke singig.

⁴⁹Io, using a Vokitmat kalapo abis kana abis lava singig. Asan ina kapo gogoai luai.

⁵⁰Mamain ta polpolokan voiang kipo uli mamaila ania, kana ngorem kapo pataun iria aongos, kana na iles lak e mung.

⁵¹Katala abis a mamain ta abis lava ta kitmat i kungana. Kata musa suai ani vap po alalakas pok ang tataria e lomlomonai iria.

⁵²Katala asuai ani ri vap madot le si kari sinsinong lakat, sikei riria vap po ago ang e kevkev, katala sunguk alak iria.

⁵³Katala amasung na vap po mol ang, sikei ri tauia, katala asok suai aniria ta kunga vauvau.

⁵⁴Katala pakangai ani kana asosokai Israel. Kapo tav lomon taun lak kana ngorem,

⁵⁵taun a Abaram ve mamain ta tivuna asikei, asukang val kana mengen taun ani keve tivura.”

⁵⁶Au na Maria kanla ago ve nia ani potol a ulen aongos le na kamela pasiang pok ane rina. Ingus ani Ioanes

⁵⁷Au, taun kalapo sinong ani Elisabet asi ingus, na kala ingus kana nat tauan.

⁵⁸Na vap po ago ang ngerena kuvul ve kana patvap kila longong ta Volava katala abis a abis i ngorem lava singina, na kilapo maramarak kuvul ve nia.

⁵⁹Au, si va limaletul i taun kila serei asi me lampulit ani nat ang. Na kilapo buk atuk ania ta asan i tamana, Sakarias.

⁶⁰Sikei rinana kala antok ta, “Parik! Kana asan nang ta Ioanes.”

⁶¹Na kila antok ia ta, “Kapo kovek ta si i kam patvap katapo asan asukang.”

⁶²Na kila atoktokngai ane si tamana asi susuiai ania ta kana lomlomonai i atuk ani kana asan.

⁶³Au, kala sokotuk ta bil asi salsalik na kala salik asukang ke, “Kana asan ta Ioanes.” Na kila taping aongos.

⁶⁴Na akorong si vuk pangau ang kala vil korong ia ani ka mengen, na kalapo alatun a God.

⁶⁵Na vap aongos ang kilapo leng. Na akuskus i keve bil ke kala pasal apapanai aulit a keve rina aongos i palpal mulang ang e Iudaia.

⁶⁶Riria kita longong kilapo lomon akit a keve bil ke velai ani sui ta, “Nat ke kana, kapo polok ani ka saka igenen an?” Using a kitmat i Volava katapo ago singina. Mengen i kus amalangas si Sakarias

⁶⁷Na tamana ta Sakarias kala sung pukun ta Malanganto Gogoai, na kala akus amalangas asukang ke.

⁶⁸“Atautauia ane si Volava, ninia na God si ri Israel. Kamela serei vanang na kamela samui apok kana vap.

⁶⁹Katala atung anira ta igenen madot le si patvap si kana asosokai ta David ani ka asapang ira.

⁷⁰Asukang val katala kin ia le kabang si ngururia i kana keve katakai i kus amalangas daus.

⁷¹Na ka asapang ira pelek a mamain ta vap ipo marala anira, ani ki ago ta vil arikek an anira.

⁷²E iang ka akalit ta kana ngorem taun a keve tivura, si kana lomlomonai pok ani kana palapalatung gogoai.

⁷³Atuvala ang kata kin dong a tivura ta Abaram tatana

⁷⁴ani ka asapang ira pelek a mamain ta vap ipo marala anira, ani tara abis pakangai ania ta tav leng

⁷⁵na vinga daus na lau korong si keve taun aongos i kara to e kuli rina.

⁷⁶Na numai kag nat, ki posong ua ta katakai i akus si Vopo Tavirimok Luai ang. Using numai vanang ku an pasal aino ani Volava, si itoiton ania ta selen asi kana pasal.

⁷⁷Asukang vang ku amalangasai ani kana vap ta selen asi kari sapang si lomon suai ang ani kari keve lau rikek.

⁷⁸Using le si ngorem tangis ang si kara God, na tangat ka pasiang ane singira le metekuku.

⁷⁹Na ka mang si vap po ago ang nei vong na nei kankanuai i mat, ani ka ausingai anira ane si selen i luai.”

⁸⁰Na nat ang kalapo polok alak na kalapo igenen madot si Malanganto. Katanpo ago e nei ring varasai palau tung si kamela serei e ring malangas mete ri Israel.