Read Tungag 1 Tesalonike 5 Bible Online

1 Tesalonike 5 - Tungag bible

1 Tesalonike 5

¹Keve tungamem, parik mipa inongos taun imem asi salik na atatai animi ta taun vo inongos i taun, nang a Volava ka serei singina,

²using mipo nas aro luai ta ka serei ataping palau val igenen tainau tenei vong.

³Si pangau ang ri vap kipo mengen asukang ke, “Kapo kovek luai i bil rikek, tara uli ago velai ani marip,” io, nang palau si taun asukang, sumasuma palau a kui lava ka meng arikek luai aniria val kui i ingus, na ki kovek luai i oring asi sip ania.

⁴Sikei parik mipa ago si vong, keve tungamem. Parik luai mipa taping ani taun ang val taping ani igenen ainau.

⁵Using nami aongos mipo inatus i malangas na tenei ias. Parik tarapa inatus i tenei vong

⁶Asukang na tara ago ta rot mat an val mang vap. Sikei tara para akoai. Tara ago ta nio an.

⁷Using vap ang kipo rot, kipo rot tenei vong, na ria kipo inum anio iria kipo inum tenei vong.

⁸Tara, parik tarapa asukang using tarapo ago si malangas. Tara aiveven pok ira. Tara lomlomon ta God, tara ngorem angpokpokai anira, na tara atu mata ta God ka teng ato ira. Na si keve selen suke tara omo bat ira tataria.

⁹Using God parik katapa atung ira ani tara me ruduai a kui i kana marala, parik. Sikei kata atung ira ani tara to si kana vilvil ato na Volava Iesu Karisto,

¹⁰nang kata mat anira, ani man ka serei pok, kantanem taratala mat, vo tarapo to lak, sikei tara an ago ve nia.

¹¹Asukang vang na mi uli akikit na angpapakangai angpokpokai animi siksikei, val mipo uli abis ania. Akamusai i pinipini ve posong ro

¹²Keve tungamem, namempo sokotuk imi ani mi mamaila aro aniria kipo tu ainoai animi. Using kipo saupai e matana i Volava, na kipo abis alava animi na kipo pinipini imi.

¹³Mi lomon alava iria si abis ang kipo teng ia. Mi vinga marip angpokpokai animi.

¹⁴Keve tungamem, namempo asum imi ani mi anonok a keve vap po uli tere suai palau ang. Na mi akikit iria kipo leng palau, mi pakangai ani vap po uli malum ang, na mi kokoai ananap ani ri vap aongos.

¹⁵Ka ago mi ngenget a rikek pok ta rikek, sikei mi pakangai angpokpokai animi, na ri vap aongos.

¹⁶Mi uli uruk.

¹⁷Mi uli sokotuk ani God si keve taun aongos.

¹⁸Mi uli posong aro ani God si keve taun i mailik vo uruk. Si lau asukang, mipo using kana vubuk a God singina na mipo angtogon ve Karisto Iesu.

¹⁹Mi ago ta nga ripus ani kut i Malanganto.

²⁰Mi ago kapa ta vil apalau ani keve mengen ang God kapo posong ia si nguruna i igenen,

²¹sikei mi atung kuvul aongos a keve bil ke si atokngai, asi kami arai ta man kapo tutuman, mi using ia,

²²na man kapo rikek, mi taval pelek ia.

²³Kamem sokotuk animi ta God i vinga marip, ninia papalik akorong, ka vil adaus luai animi, ani man a Volava Iesu Karisto kamela serei pok mi duai ia ta daus. Vingami, na lomlomonai imi, na pukun imi ka daus aroron aongos e matana. Na ka kovek i bil asi poso arikek animi singina.

²⁴Na nia akorong a vo songo ang animi asi kana abis ani vilvil adaus singimi, kana keve lau aongos kipo tutuman, na ka abis ia.

²⁵Keve tungamem, mi uli sokotuk ani God animem.

²⁶Mi alis a posong ro si keve tungara aongos, velai ani lulus daus.

²⁷Napo sokotuk akitmat e matana i Volava ta mi taot a panbuk ke e mataria i keve tungara aongos.

²⁸Kana roron kara Volava Iesu Karisto ka auai ve nami.