Read Tunisian Arabic New Testament مَتَّى 1 Bible Online

مَتَّى 1 - Tunisian Arabic New Testament bible

مَتَّى 1

¹فِي هَا الكْتَابْ نَلْقَاوْ نِسْب يَسُوعْ المَسِيحْ وِلْدْ دَاوُدْ وِلْدْ إِبْرَاهِيمْ:

²إِبْرَاهِيمْ جَابْ إِسْحَاقْ. وْإِسْحَاقْ جَابْ يَعْقُوبْ. وْيَعْقُوبْ جَابْ يَهُوذَا وْإِخْوْتُو.

³وْيَهُوذَا جَابْ فَارِصْ وْزَارَحْ مِنْ ثَامَارْ. وْفَارِصْ جَابْ حَصْرُونْ. وْحَصْرُونْ جَابْ أَرَامْ.

⁴وْأَرَامْ جَابْ عَمِّينَادَابْ. وْعَمِّينَادَابْ جَابْ نَحْشُونْ. وْنَحْشُونْ جَابْ سَلْمُونْ.

⁵وْسَلْمُونْ جَابْ بُوعَزْ مِنْ رَاحَابْ. وْبُوعَزْ جَابْ عُوبِيدْ مِنْ رَاعُوثْ. وْعُوبِيدْ جَابْ يَسَّى.

⁶وْيَسَّى جَابْ المَلِكْ دَاوُدْ. دَاوُدْ جَابْ سُلَيْمَانْ مِنْ المْرَا الِّي كَانْ مَاخِذْهَا أُورِيَّا.

⁷وْسُلَيْمَانْ جَابْ رَحُبْعَامْ. وْرَحُبْعَامْ جَابْ أَبِيَّا. وْأَبِيَّا جَابْ آسَا.

⁸وْآسَا جَابْ يَهُوشَافَاطْ. وْيَهُوشَافَاطْ جَابْ يُورَامْ. وْيُورَامْ جَابْ عُزِّيَّا.

⁹وْعُزِّيَّا جَابْ يُوثَامْ. وْيُوثَامْ جَابْ أَحَازْ. وْأَحَازْ جَابْ حِزْقِيَّا.

¹⁰وْحِزْقِيَّا جَابْ مَنَسَّى. وْمَنَسَّى جَابْ آمُونْ. وْآمُونْ جَابْ يُوشِيَّا.

¹¹وْيُوشِيَّا جَابْ يَكُنْيَا وْإِخْوْتُو وَقْتِلِّي كَانُوا اليْهُودْ مسبيين فِي بَابِلْ.

¹²وْبَعْدْ مَا وْفَاتْ مُدِّةْ السّبي مْتَاعْهُمْ فِي بَابِلْ، يَكُنْيَا جَابْ شَأَلْتِئِيلْ. وْشَأَلْتِئِيلْ جَابْ زَرُبَّابِلْ.

¹³وْزَرُبَّابِلْ جَابْ أَبِيهُودْ. وْأَبِيهُودْ جَابْ أَلِيَاقِيمْ. وْأَلِيَاقِيمْ جَابْ عَازُورْ.

¹⁴وْعَازُورْ جَابْ صَادُوقْ. وْصَادُوقْ جَابْ أَخِيمْ. وْأَخِيمْ جَابْ أَلِيُودْ.

¹⁵وْأَلِيُودْ جَابْ أَلِيعَازَرْ. وْأَلِيعَازَرْ جَابْ مَتَّانْ. وْمَتَّانْ جَابْ يَعْقُوبْ.

¹⁶وْيَعْقُوبْ جَابْ يُوسُفْ رَاجِلْ مَرْيَمْ الِّي جَابِتْ يَسُوعْ الِّي يْسَمِّيوْهْ المَسِيحْ.

¹⁷وْهَكَّا نَلْقَاوْ أَرْبَعْطَاشِنْ جِيلْ مِنْ إِبْرَاهِيمْ حَتَّى لْدَاوُدْ، وْأَرْبَعْطَاشِنْ جِيلْ مِنْ دَاوُدْ لِينْ تِسْباو اليْهُودْ فِي بَابِلْ، وْأَرْبَعْطَاشِنْ جِيلْ مِلِّي وْفَاتْ مُدِّةْ المنْفى مْتَاعْهُمْ فِي بَابِلْ حَتَّى لِينْ جَا المَسِيحْ.

¹⁸وْهَاوْ كِيفَاشْ تُولِدْ يَسُوعْ المَسِيحْ: وَقْتِلِّي كَانِتْ مَرْيَمْ أُمُّو مَخْطُوبَة لْرَاجِلْ إِسْمُو يُوسُفْ، وِقْبَلْ مَا يْعَرّْسُوا، حِبْلِتْ بْقُوِّةْ الرُّوحْ القُدُسْ.

¹⁹يَاخِي قَرِّرْ يُوسُفْ خَطِيبْهَا بَاشْ يِبْعِدْ عْلِيهَا في السرّ مِنْ غِيرْ مَا يَفْضِحْهَا، عْلَى خَاطْرُو كَانْ رَاجِلْ تقيّ.

²⁰وْهُوَ مَازَالْ يِخَمِّمْ فِي الحْكَايَة، ظْهُرْلُو مَلاَكْ مِنْ عِنْدْ رَبِّي فِي المْنَامْ، وْقَالُّو: «يَا يُوسُفْ وِلْدْ دَاوُدْ، مَا تْخَافِشْ بَاشْ تْعَرِّسْ بْمَرْيَمْ. رَاهِي حِبْلَى بْقُوِّةْ الرُّوحْ القُدُسْ،

²¹وْبِشْ تْجِيبْ طْفُلْ، وإِنْتِ تْسَمِّيهْ يَسُوعْ، عْلَى خَاطْرُو بَاشْ يْخَلِّصْ شَعْبُو مِنْ ذْنُوبْهُمْ.»

²²وْهَاذَا الكُلْ صَارْ بَاشْ يْتِمْ الكْلاَمْ الِّي قَالُو رَبِّي عْلَى لْسَانْ النَّبِي الِّي قَالْ:

²³الصْبِيَّة تِحْبِلْ، وِتْجِيبْ طْفُلْ، يِتْسَمَّى «عِمَّانُوئِيلْ!» (وْمَعْنَاهَا رَبِّي مْعَانَا.)

²⁴وْوَقْتِلِّي يُوسُفْ فَاقْ مِنْ النُّومْ، عْمَلْ كِيمَا قَالُّو المَلاَكْ الِّي مِنْ عِنْدْ رَبِّي، وْرَوِّحْ بْمَرْتُو لْدَارُو.

²⁵آمَا مَا رْقَدْشْ مْعَاهَا حَتَّى لِينْ جَابِتْ الطْفُلْ، وْسَمَّاهْ يَسُوعْ.