Read Tunisian Arabic New Testament مَتَّى 10 Bible Online

مَتَّى 10 - Tunisian Arabic New Testament bible

مَتَّى 10

¹وْنَادَى لِلأَثْنَاشِنْ تِلْمِيذْ وِعْطَاهُمْ سُلْطَة عْلَى الأَرْوَاحْ المَنْزُوسَة بَاشْ يْخَرّْجُوهَا وْبَاشْ يِشْفِيوْ النَّاسْ مِالأَمْرَاضْ وِالوْجَايِعْ الكُلْهَا.

²وْهَاذُومَا هُومَا أَسَامِي الأَثْنَاشِنْ رَسُولْ: الأُولاَنِي إِسْمُو سِمْعَانْ الِّي يْنَادُولُو بُطْرُسْ وْخُوهْ أَنْدَرَاوُسْ، وْيَعْقُوبْ وِلْدْ زَبَدِي وْخُوهْ يُوحَنَّا،

³وْفِيلِبُّسْ وْبَرْثُلْمَاوُسْ، وْتُومَا وْمَتَّى الِّي يْلِمْ فِي الضَّرَايِبْ، وْيَعْقُوبْ وِلْدْ حَلْفَى وْتَدَّاوُسْ،

⁴وْسِمْعَانْ الِّي يْغِيرْ عْلَى بْلاَدُو، وْيَهُوذَا الإِسْخَرْيُوطِي الِّي بَاشْ يْخُونْ يَسُوعْ.

⁵بْعَثْ يَسُوعْ الأَثْنَاشْ هَاذُومَا وْوَصَّاهُمْ: «مَا تِمْشِيوْشْ لْحَتَّى وَحْدَة مِالبُلْدَانْ مْتَاعْ الشْعُوبْ الأُخْرِينْ وْمَا تُدْخْلُوشْ لْحَتَّى وَحْدَة مِالمُدُنْ مْتَاعْ السَّامِرِيِّينْ،

⁶آمَا إِمْشيِوْ لِلغْنَمْ الضَّايْعَة مْتَاعْ بِيتْ إِسْرَائِيلْ.

⁷وْإِنْتُومَا مَاشِينْ بَشّْرُوا وْقُولُوا الِّي مَمْلِكْةْ السْمَاوَاتْ قُرْبِتْ.

⁸اشْفِيوْ المُرْضَى، اشْفِيوْ اللي عِنْدْهُمْ البْرَصْ، قَيّْمُوا المُوتَى، خَرّْجُوا الشْوَاطِنْ. خْذِيتُوا بْلاَشْ، أَعْطِيوْ بْلاَشْ.

⁹مَا تْهِزُّوشْ لاَ ذْهَبْ وْلاَ فِضَّة وْلاَ نْحَاسْ فِي حْزَامَاتْكُمْ،

¹⁰وْلاَ صُرَّة وْلاَ لِبْسْتِينْ وْلاَ صَنْدَالْ وْلاَ عْصَا، عْلَى خَاطِرْ الخَدَّامْ يِسْتْحَقْ مَاكِلْتُو.

¹¹وْأَيْ مْدِينَة وِلاَّ قَرْيَة تُدْخْلُولْهَا، لَوّْجُوا فِيهَا عْلَى شْكُونْ يِسْتَاهِلْ بَاشْ تُدْخْلُوا لْدَارُو وْأُقْعُدُوا عَنْدُو حَتَّى لِينْ تِمْشِيوْ.

¹²وكتُدْخْلُوا لْدَارْ سَلّْمُوا عْلَى النَّاسْ الِّي فِيهَا.

¹³وْإِذَا كَانْ امَّالِي الدَّارْ هَاذِيكَا يِسْتَاهْلُوا، خَلِّي سْلاَمْكُمْ يْجِي عْلِيهُمْ، آمَا إِذَا كَانْهُمْ مَا يِسْتَاهْلُوشْ رَاهُو سْلاَمْكُمْ بَاشْ يَرْجْعِلْكُمْ.

¹⁴وْإِذَا كَانْ أَيْ وَاحِدْ مَا يِقْبِلْكُمْشْ وِلاَّ مَا يِسْمَعْشْ كْلاَمْكُمْ، أُنْفْضُوا التْرَابْ مِنْ سَاقِيكُمْ وَقْتِلِّي تْجِيوْ خَارْجِينْ مِالدَّارْ هَاذِيكَا وِلاَّ مِالمْدِينَة هَاذِيكَا.

¹⁵نْقُلْكُمْ الحَقْ: رَاهِي حَالِةْ مْدِينِةْ سَدُومْ وْعَمُورَة يُومْ الحْسَابْ بَاشْ تْكُونْ خِيرْ مِنْ حَالِةْ المْدِينَة هَاذِيكَا!»

¹⁶«هَانِي نُرْسِلْكُمْ كِيفْ الغْنَمْ فِي وُسْطْ الذْيُوبَا، إِمَّالاَ كُونُوا فَايْقِينْ كِيفْ اللْفَاعِي، وْبَاهِينْ كِيفْ الحْمَامْ.

¹⁷وْرُدُّوا بَالْكُمْ مِالنَّاسْ عْلَى خَاطِرْهُمْ بَاشْ يْسَلْمُوكُمْ لِلمَجْلِسْ مْتَاعْ اليْهُودْ، وْيَضْرْبُوكُمْ بِالسُّوطْ فِي المَجَامِعْ مْتَاعْهُمْ،

¹⁸وْتِتْهَزُّوا لِلحُكَّامْ وِالمُلُوكْ عْلَى خَاطْرِي، بَاشْ تِشْهْدُوا قُدَّامْهُمْ هُومَا وْقُدَّامْ الشْعُوبْ الأُخْرِينْ.

¹⁹وَقْتِلِّي يْسَلْمُوكُمْ مَا تْخَمَمُوشْ كِيفَاشْ بَاشْ تِتْكَلّْمُوا وِلاَّ شْنُوَّة بَاشْ تْقُولُوا، رَاكُمْ فِي السَّاعَة هَاذِيكَا بَاشْ يِتْعْطَالْكُمْ الكْلاَمْ الِّي بَاشْ تْقُولُوهْ.

²⁰عْلَى خَاطِرْكُمْ مَا كُمْشْ إِنْتُومَا الِّي تِتْكَلّْمُوا، آمَا رُوحْ بُوكُمْ يِتْكَلِّمْ فِي بْلاسِطْكُمْ.

²¹الخُو بَاشْ يْسَلِّمْ خُوهْ لِلمُوتْ، وِالبُو يْسَلّمْ وِلْدُو، وِالوْلاَدْ يْدُورُوا عْلَى وَالْدِيهُمْ وْيُقْتْلُوهُمْ،

²²وِالنَّاسْ الكُلْهُمْ بَاشْ يَكْرْهُوكُمْ عْلَى خَاطِرْ إِسْمِي. آمَا الِّي يِثْبِتْ لِلإِخْرْ رَاهُو بَاشْ يُخْلُصْ.

²³وْوَقْتِلِّي يِضْطَهْدُوكُمْ فِي مْدِينَة أُهْرْبُوا لِمْدِينَة أُخْرَى، نْقُلْكُمْ الحَقْ: مَا كُمْشْ بَاشْ ادُّورُوا المُدُنْ مْتَاعْ إِسْرَائِيلْ الكُلْهَا قْبَلْ مَا نْجِي آنَا إِبْنْ الإِنْسَانْ.

²⁴التِّلْمِيذْ مُوشْ أَعْظِمْ مِالمُعَلِّمْ مْتَاعُو وِالخْدِيمْ مُوشْ أَعْظِمْ مِنْ سِيدُو.

²⁵يِكْفِيهْ التِّلْمِيذْ بَاشْ يْكُونْ كِيفْ المُعَلِّمْ مْتَاعُو وِالخْدِيمْ كِيفْ سِيدُو. إِذَا كَانْ مُولَى الدَّارْ سَمَّاوْهْ بَعْلَزَبُولْ، إِمَّالاَ عَايِلْتُو آشْ بَاشْ يْسَمِّيوْهُمْ؟»

²⁶«إِمَّالاَ مَا تْخَافُوشْ مِنْهُمْ. مَا ثَمَّاشْ حَاجَة مَسْتُورَة مَا هِيشْ بَاشْ تِتْكْشِفْ، وْمَا ثَمَّاشْ حَاجَة مْخُبّْيَة مَا هِيشْ بَاشْ تِتْعْرَفْ.

²⁷وِلِّي نْقُولْهُولْكُمْ فِي الظْلاَمْ، قُولُوهْ فِي النُّورْ. وِلِّي يِتْقَالِلْكُمْ بِالشْوَيَّة فِي وِذْنِيكُمْ، نَادُوا بِيهْ مِنْ فُوقْ السْطُوحَاتْ.

²⁸وْمَا تْخَافُوشْ مِلِّي يُقْتْلُوا البْدَنْ وْمَا يْنَجّْمُوشْ يُقْتْلُوا الرُّوحْ، آمَا خَافُوا مِلِّي هُوَ قَادِرْ بَاشْ يِهْلِكْ الرُّوحْ وِالبْدَنْ لِثْنِينْ فِي جْهَنِّمْ.

²⁹يَاخِي مُوشْ زُوزْ عْصَافِرْ يِتْبَاعُوا بِفْرَنْكْ؟ وْمَا يْطِيحُوا عْلَى الأَرْضْ كَانْ مَا يْكُونْ بُوكُمْ الِّي فِي السْمَاءْ عْلِمْ بِيهُمْ.

³⁰رَاهُو حَتَّى شْعَرْ رُوسْكُمْ الكُلُّو مَحْسُوبْ.

³¹مَا تْخَافُوشْ، إِنْتُومَا خِيرْ مِنْ بَرْشَة عْصَافِرْ!

³²إِمَّالاَ الِّي يِعْتَرِفْ بِيَّ قُدَّامْ النَّاسْ نِعْتَرِفْ بِيهْ قُدَّامْ بُويَا الِّي فِي السْمَاءْ.

³³آمَا الِّي يُنْكُرْنِي قُدَّامْ النَّاسْ، آنَا زَادَا بَاشْ نُنْكُرْ فِيهْ قُدَّامْ بُويَا الِّي فِي السْمَاءْ.»

³⁴«مَا يِمْشِيشْ فِي بَالْكُمْ الِّي جِيتْ بَاشْ نْجِيبْ سَلاَمْ لِلأَرْضْ، مَا جِيتِشْ بَاشْ نْجِيبْ سَلاَمْ آمَا بَاشْ نْجِيبْ سِيفْ.

³⁵جِيتْ بَاشْ نْفَرِّقْ بِينْ الوْلِدْ وْبُوهْ، وِالطُّفْلَة وْأُمّْهَا، وِالكَنَّة وِحْمَاتْهَا.

³⁶وِالأَعْدَاءْ مْتَاعْ الإِنْسَانْ بَاشْ يْكُونُوا امَّالِيهْ.

³⁷الِّي يْحِبْ بُوهْ وِلاَّ أُمُّو أَكْثِرْ مِنِّي مَا يِسْتَاهِلْنِيشْ. وِلِّي يْحِبْ وِلْدُو وِلاَّ بِنْتُو أَكْثِرْ مِنِّي مَا يِسْتَاهِلْنِيشْ.

³⁸وِلِّي مَا يْهِزِّشْ الصَّلِيبْ مْتَاعُو وِيْتَبَّعْنِي، مَا يِسْتَاهِلْنِيشْ.

³⁹الِّي يِرْبِحْ حْيَاتُو يِخْسِرْهَا، وِلِّي يِخْسِرْ حْيَاتُو عْلَى خَاطْرِي يَلْقَاهَا.»

⁴⁰«الِّي يِقْبِلْكُمْ يِقْبِلْنِي، وِلِّي يِقْبِلْنِي يِقْبِلْ الِّي بْعَثْنِي.

⁴¹الِّي يِقْبِلْ نَبِي عْلَى خَاطْرُو نَبِي بَاشْ يَاخُذْ أَجْرْ نَبِي. وِلِّي يِقْبِلْ رَاجِلْ بَارْ عْلَى خَاطْرُو بَارْ بَاشْ يَاخُذْ أَجْرْ رَاجِلْ بَارْ.

⁴²وِلِّي يَعْطِي لْوَاحِدْ مِالصْغَارْ هَاذُومَا حَتَّى كَاسْ مَاء بَارِدْ عْلَى خَاطْرُو تِلْمِيذِي، نْقُلْكُمْ الحَقْ، رَاهُو أَجْرُو مَا يْضِيعِشْ.»