Read Tunisian Arabic New Testament مَتَّى 11 Bible Online

مَتَّى 11 - Tunisian Arabic New Testament bible

مَتَّى 11

¹وْوَقْتِلِّي يَسُوعْ كَمِّلْ وَصَّى تْلاَمِذْتُو الأَثْنَاشْ، مْشَى مِالبْلاَصَة هَاذِيكَا بَاشْ يْعَلِّمْ وِيْبَشِّرْ فِي المُدُنْ الِّي فِي المَنْطْقَة هَاذِيكَا.

²وِسْمَعْ يُوحَنَّا وْهُوَ فِي الحَبْسْ بِالأَعْمَالْ مْتَاعْ المَسِيحْ، يَاخِي بْعَثْلُو مْعَ تْلاَمِذْتُو

³وْقَالُّو: «إِنْتِ هُوَ الِّي جَايْ وِلاَّ نِسْتَنُّوا وَاحِدْ آخَرْ؟»

⁴جَاوِبْهُمْ يَسُوعْ: «إِمْشِيوْ وْخَبّْرُوا يُوحَنَّا بِلِّي شُفْتُوهْ وِسْمَعْتُوهْ،

⁵العِمْيَانْ يْشُوفُوا، وِالعَايْبِينْ يِمْشِيوْ، المُرْضَى بِالبْرَصْ يِتْشْفَاوْ، وِالطُّرْشْ يِسْمْعُوا، وِالمُوتَى يْقُومُوا، وِالمْسَاكِينْ يِتْبَشّْرُوا بِالإِنْجِيلْ.

⁶وْصَحَّة لِيهْ الِّي مَا يِشِكِّشْ فِيَّ!»

⁷وَقْتِلِّي مْشَاوْ تْلاَمِذْةْ يُوحَنَّا بْدَا يَسُوعْ يَحْكِي لِلنَّاسْ عْلَى يُوحَنَّا وْقَالْ: «شْنُوَّة الِّي خْرَجْتُوا بَاشْ تْشُوفُوهْ فِي الخْلاَء؟ قَصْبَة يْحَرِّكْ فِيهَا الرِّيحْ؟

⁸إِمَّالاَ شْنُوَّة الِّي خْرَجْتُوا بَاشْ تْشُوفُوهْ؟ بَاشْ تْشُوفُوا رَاجِلْ لاَبِسْ لِبْسَة غَالْيَة؟ رَاهُمْ الِّي يِلْبْسُوا اللِّبْسَة الغَالْيَة فِي قْصُورْ المُلُوكْ!

⁹إِمَّالاَ شْنُوَّة الِّي خْرَجْتُوا بَاشْ تْشُوفُوهْ؟ بَاشْ تْشُوفُوا نَبِي؟ إِي نْعَمْ وِنْقُلْكُمْ: أَعْظِمْ مِنْ نَبِي.

¹⁰هَاذَا الِّي تِكْتِبْ عْلِيهْ فِي الكْتَابْ المُقَدَّسْ: "هَانِي نَبْعِثْ قُدَّامِكْ رَسُولِي، الِّي يْحَضِّرْلِكْ الطْرِيقْ."

¹¹نْقُلْكُمْ الحَقْ مَا ظْهَرْشْ حَتَّى وَاحِدْ مِنْ بِينْ الِّي جَابِتْهُمْ النْسَاء أَعْظِمْ مِنْ يُوحَنَّا المَعْمَدَانْ، آمَا رَاهُو أَصْغِرْ وَاحِدْ فِي مَمْلِكْةْ السْمَاوَاتْ أَعْظِمْ مِنُّو.

¹²مِنْ أَيَّامَاتْ يُوحَنَّا المَعْمَدَانْ لِليُومْ وْمَمْلِكْةْ السْمَاوَاتْ قَاعْدَة تِتْعَنَّفْ، وِاللِّي يِسْتَعْمْلُوا فِي العُنْف يْحِبُّوا يِسْتَوْلُوا عْلِيهَا.

¹³الأَنْبِيَاءْ الكُلْهُمْ وِالشَّرِيعَة تْنَبّْأُوا حَتَّى لِينْ جَا يُوحَنَّا.

¹⁴وْإِذَا كَانْ تْحِبُّوا تْصَدّْقُوا، رَاهُو هُوَ إِيلِيَّا الِّي بَاشْ يْجِي.

¹⁵الِّي عَنْدُو وِذْنِينْ خَلِّيهْ يِسْمَعْ!

¹⁶بِشْنُوَّة نْشَبِّهْ الجِيلْ هَاذَا؟ هُومَا كِيفْ وْلاَدْ قَاعْدِينْ فِي السُّوقْ وِيْعَيّْطُوا عْلَى بْعَضْهُمْ:

¹⁷زَمِّرْنَالْكُمْ وْمَا شْطَحْتُوشْ، وْنَوِّحْنَالْكُمْ وْمَا بْكِيتُوشْ.

¹⁸جَا يُوحَنَّا لاَ يَاكُلْ وْلاَ يُشْرُبْ قُلْتُوا: "سَاكْنُو شِيطَانْ."

¹⁹جِيتْ آنَا إِبْنْ الإِنْسَانْ نَاكُلْ المَاكْلَة وْنُشْرُبْ الشْرَابْ قُلْتُوا: "آهُوَ رَاجِلْ هَامِعْ وْسُكَّارْجِي وِيْصَاحِبْ فِي الِّي يْلِمُّوا فِي الضَّرَايِبْ وِالمِذْنْبِينْ." آمَا رَاهِي الحِكْمَة يِشْهْدُولْهَا وْلاَدْهَا.»

²⁰وِمْبَاعِدْ بْدَا يَسُوعْ يْلُومْ فِي المُدُنْ الِّي تْعَمْلِتْ فِيهَا مُعْجْزَاتُو الكْبَارْ وْأُمَّالِيهَا مَا تَابُوشْ،

²¹وْقَالْ: «يَا وِيلِكْ يَا كُورَزِينْ! يَا وِيلِكْ يَا بِيتْ صَيْدَا! لُوكَانْ المُعْجْزَاتْ الكْبَارْ الِّي تْعَمْلُوا فِي وُسْطْكُمْ تْعِمْلُوا فِي صُورْ وْصَيْدَا، تَالِي رَاهُمْ امَّالِيهُمْ تَابُوا وْلِبْسُوا الشْكَايِرْ وْقَعْدُوا عْلَى الرْمَادْ.

²²آمَا آنَا نْقُلْكُمْ: حَالِةْ مْدِينِةْ صُورْ وْصَيْدَا بَاشْ تْكُونْ خِيرْ مِنْ حَالِتْكُمْ فِي يُومْ الحْسَابْ.

²³وْإِنْتِ يَا كَفْرْنَاحُومْ! يَاخِي بَاشْ تَطْلْعِي لِلسْمَاء؟ رَاكْ بَاشْ تَهْبْطِي لِلهَاوْيَة. عْلَى خَاطِرْ لُوكَانْ المُعْجْزَاتْ العْظِيمَة الِّي تْعَمْلِتْ فِيكْ تْعَمْلِتْ فِي مْدِينِةْ سَدُومْ، تَالِي رَاهِي بْقَاتْ لِليُومْ.

²⁴آمَا آنَا نْقُلْكُمْ: حَالِةْ أَرْضْ سَدُومْ بَاشْ تْكُونْ خِيرْ مِنْ حَالْتِكْ فِي يُومْ الحْسَابْ.»

²⁵تْكَلِّمْ يَسُوعْ فِي الوَقْتْ هَاذَاكَا وْقَالْ: «نُشْكْرِكْ يَا بَابَا، يَا رَبْ السْمَاءْ وِالأَرْضْ، عْلَى خَاطْرِكْ خَبِّيتْ الحَاجَاتْ هَاذِي عْلَى الحُكَمَاءْ وِالفَاهْمِينْ وْظَهِّرْتْهُمْ لِلوْلاَدْ الصْغَارْ.

²⁶إِي نْعَمْ، يَا بَابَا، هَكَّاكَا كَانِتْ إِرَادْتِكْ.

²⁷بَابَا عْطَانِي كُلْ شَيْء. وْحَتَّى وَاحِدْ مَا يَعْرِفْ الإِبْنْ كَانْ البُو، وْحَتَّى وَاحِدْ مَا يَعْرِفْ البُو كَانْ الإِبْنْ وْكُلْ وَاحِدْ يِخْتَارُو الإِبْنْ بَاشْ يْظَهِّرْهُولُو.

²⁸ايجُولِي يَلِّي إِنْتُومَا تَاعْبِينْ وْحِمْلْكُمْ ثْقِيلْ وْآنَا بَاشْ نْرَتِّحْكُمْ.

²⁹هِزُّوا الكَفَّة مْتَاعِي وِاتْعَلّْمُوا مِنِّي رَانِي طَيِّبْ وْقَلْبِي مِتْوَاضَعْ، وْتَوْ تَلْقَاوْ رَاحَة فِي نْفُوسْكُمْ

³⁰رَاهِي الكَفَّة مْتَاعِي مَا هِيشْ رْزِينَة وِالحِمْلْ مْتَاعِي خْفِيفْ.»