Read Tunisian Arabic New Testament مَتَّى 12 Bible Online

مَتَّى 12 - Tunisian Arabic New Testament bible

مَتَّى 12

¹فِي الوَقْتْ هَاذَاكَا تْعَدَّى يَسُوعْ فِي وُسْطْ القَمْحْ نْهَارْ السِّبْتْ، وِتْلاَمِذْتُو كَانُوا جْوَاعَا. يَاخِي بْدَاوْا يْنِحُّوا فِي السْبُولْ وْيَاكْلُوا.

²وَقْتِلِّي شَافُوا الفَرِّيسِيِّينْ الشَّيْء هَاذَاكَا قَالُولُو: «شُوفْ! رَاهُمْ تْلاَمِذْتِكْ يَعْمْلُوا فِي شَيْء مُوشْ حْلاَلْ بَاشْ يِتْعْمَلْ نْهَارْ السِّبْتْ.»

³قَالِلْهُمْ يَسُوعْ: «يَاخِي مَا قْرِيتُوشْ شْنُوَّة الِّي عَمْلُوا دَاوُدْ هُوَ وِلِّي كَانُوا مْعَاهْ وَقْتِلِّي كَانْ جِيعَانْ؟

⁴كِيفَاشْ دْخَلْ لْبِيتْ رَبِّي، وِكْلَى الخُبْزْ مْتَاعْ القُرْبَانْ، الِّي مَاكِلْتُو مَا كَانِتْشْ حْلاَلْ لِيهْ هُوَ ولِلِّي كَانُوا مْعَاهْ، آمَا كَانِتْ حْلاَلْ بَاشْ يَاكْلُوهَا الكُهَّانْ آكَاهُو؟

⁵يَاخِي مَا قْرِيتُوشْ فِي الشَّرِيعَة كِيفَاشْ الكُهَّانْ فِي الهَيْكِلْ نْهَارْ السِّبْتْ يْكَسّْرُوا وْصِيِّةْ السِّبْتْ وْحَتَّى حَدْ مَا يْلُومْهُمْ؟

⁶آمَا نْقُلْكُمْ: ثَمَّة وَاحِدْ هْنَا أَعْظِمْ مِالهَيْكِلْ.

⁷وْلُوكَانْ عْرَفْتُوا آشْ مَعْنَاهَا الآيَة هَاذِي: "نْحِبْ عْلَى رَحْمَة مُوشْ ذْبِيحَة." رَاكُمْ مَا حْكَمْتُوشْ عْلَى الْأَبْرِيَاءْ.

⁸رَانِي آنَا إِبْنْ الإِنْسَانْ هُوَ رَبْ السِّبْتْ.»

⁹وِمْشَى يَسُوعْ مِالبْلاَصَة هَاذِيكَا وِدْخَلْ لِلمَجْمَعْ مْتَاعْهُمْ.

¹⁰وِالغَادِي كَانْ ثَمَّة رَاجِلْ يِدُّو مَشْلُولَة. سِأْلُوهْ النَّاسْ: «يَاخِي حْلاَلْ بَاشْ الوَاحِدْ يِشْفِي فِي نْهَارْ السِّبْتْ؟» بَاشْ يَلْقَاوْ حَاجَة يِتْهْمُوهْ بِيهَا.

¹¹قَالِلْهُمْ يَسُوعْ: «شْكُونُو فِيكُمْ الِّي عَنْدُو عَلُّوشْ وَاحِدْ وِيْطِيحْلُو فِي بِيرْ نْهَارْ السِّبْتْ، مُوشْ بَاشْ يْشِدُّو وِيْخَرّْجُو مِالبِيرْ؟

¹²وِالإِنْسَانْ قَدَّاشْ عَنْدُو قِيمَة أَكْثِرْ مِالعَلُّوشْ! إِمَّالاَ هَاذَاكَا عْلاَشْ حْلاَلْ يِتْعْمَلْ الخِيرْ نْهَارْ السِّبْتْ.»

¹³وِمْبَاعِدْ قَالْ يَسُوعْ لِلرَّاجِلْ: «مِدْ يِدِّكْ!» وِالرَّاجِلْ مَدّْهَا، وْرَجْعِتْ صْحِيحَة الكُلْهَا كِيفْ اليِدْ الأُخْرَى.

¹⁴آمَا الفَرِّيسِيِّينْ خَرْجُوا وِتْفَاهْمُوا عْلَى يَسُوعْ كِيفَاشْ يُقْتْلُوهْ.

¹⁵وِعْرَفْ يَسُوعْ الشَّيْء هَاذَا وِمْشَى مِالبْلاَصَة هَاذِيكَا. وْتَبّْعُوهْ بَرْشَة نَاسْ وِشْفَاهُمْ الكُلْهُمْ

¹⁶وِأْمَرْهُمْ بَاشْ مَا يْخَبّْرُوا عْلِيهْ حَتَّى حَدْ،

¹⁷وِالشَّيْء هَاذَا وْقَعْ بَاشْ يْتِمْ الِّي قَالُو النَّبِي إِشَعْيَاءْ:

¹⁸هَاوْ الخَادِمْ مْتَاعِي الِّي خْتَرْتُو، حْبِيبِي الِّي رَاضِي عْلِيهْ قَلْبِي، بَاشْ نْحُطْ فِيهْ رُوحِي، بَاشْ يْخَبِّرْ الشْعُوبْ بِالعَدْلْ مْتَاعِي.

¹⁹لاَ يَعْمِلْ عَرْكْ وْلاَ يْصِيحْ، وْحَتَّى حَدْ فِي الشْوَارِعْ مَا يِسْمَعْ صُوتُو.

²⁰قَصْبَة مْرَضْرْضَة مَا يْكَسِّرْهَاشْ، وِفْتِيلَة ادَّخِّنْ مَا يِطْفِيهَاشْ. حَتَّى لِينْ يْخَلِّي الحَقْ يِغْلِبْ،

²¹وِالشْعُوبْ بَاشْ يْكُونْ عِنْدْهُمْ أَمَلْ فِي إِسْمُو.

²²وِالوَقْتْ هَاذَاكَا جَابُولُو رَاجِلْ أَعْمَى وْبَكُّوشْ سَاكْنُو شِيطَانْ. وِشْفَاهْ يَسُوعْ وْوَلَّى يِتْكَلِّمْ وِيْشُوفْ.

²³وِتْعَجّْبُوا النَّاسْ الكُلْهُمْ وْقَالُوا: «زَعْمَة هَاذَا وِلْدْ دَاوُدْ؟»

²⁴آمَا الفَرِّيسِيِّينْ وَقْتِلِّي سَمْعُوا الشَّيْء هَاذَا قَالُوا: «رَاهُو يْخَرِّجْ فِي الشْوَاطِنْ بْبَعْلَزَبُولْ رَئِيسْ الشْوَاطِنْ.»

²⁵وِعْرَفْ يَسُوعْ شْنُوَّة يْفَكّْرُوا، وَلَّى قَالِلْهُمْ: «كُلْ مَمْلْكَة تْقِسْمِتْ عْلَى بْعَضْهَا، رَاهِي تِدَّمِّرْ وْكُلْ مْدِينَة وِلاَّ دَارْ تْقِسْمِتْ عْلَى بْعَضْهَا، رَاهِي مُوشْ مُمْكِنْ تِثْبِتْ

²⁶إِذَا كَانْ الشِّيطَانْ يْخَرِّجْ الشِّيطَانْ، بَاشْ يْكُونْ مَقْسُومْ عْلَى رُوحُو، إِمَّالاَ كِيفَاشْ مَمْلِكْتُو بَاشْ تِثْبِتْ؟

²⁷وْإِذَا كَانْ آنَا نْخَرِّجْ فِي الشْوَاطِنْ بْبَعْلَزَبُولْ، التْلاَمْذَة مْتَاعْكُمْ بِشْكُونْ يْخَرّْجُوا فِيهُمْ؟ هَاذَاكَا عْلاَشْ هُومَا الِّي بَاشْ يُحْكْمُوا عْلِيكُمْ.

²⁸آمَا إِذَا كَانْ آنَا نْخَرِّجْ فِي الشْوَاطِنْ بْرُوحْ اللهْ، إِمَّالاَ رَاهِي مَمْلِكْةْ اللهْ جَاتْكُمْ.

²⁹وِلاَّ كِيفَاشْ وَاحِدْ يُدْخُلْ لْدَارْ رَاجِلْ قْوِي وِيْفُكّْلُو الدْبَشْ مْتَاعُو، إِلاَّ إِذَا كَانْ كَتِّفْ الرَّاجِلْ القْوِي فِي الأُوِّلْ، وِمْبَاعِدْ يْنَجِّمْ يْفُكّْلُو الحَاجَاتْ الِّي فِي بِيتُو؟

³⁰الِّي مُوشْ مْعَايَا رَاهُو ضِدِّي وِلِّي مَا يَجْمِعْشْ مْعَايَا رَاهُو يْفَرِّقْ.

³¹هَاذَاكَا عْلاَشْ نْقُلْكُمْ، ذْنُوبْ النَّاسْ وْكُفْرْهُمْ الكُلُّو بَاشْ يِتْغْفِرِّلْهُمْ، آمَا الكُفْرْ بِالرُّوحْ القُدُسْ مُوشْ بَاشْ يِتْغْفِرْ.

³²وْأَيْ وَاحِدْ يْقُولْ كِلْمَة عْلِيَّ آنَا إِبْنْ الإِنْسَانْ بَاشْ يِتْغْفِرْلُو، آمَا الِّي يْقُولْ كِلْمَة عْلَى الرُّوحْ القُدُسْ، مُوشْ بَاشْ يِتْغْفِرْلُو، لاَ فِي الدِّنْيَا وْلاَ فِي الآخْرَة.»

³³«يَا إِمَّا خَلُّوا الشَّجْرَة تْكُونْ بَاهْيَة وِالغَلَّة مْتَاعْهَا بَاهْيَة. وِلاَّ خَلُّوا الشَّجْرَة تْكُونْ خَايْبَة وِالغَلَّة مْتَاعْهَا خَايْبَة. رَاهِي الشَّجْرَة تِتْعْرَفْ بِالغَلَّة مْتَاعْهَا.

³⁴يَا وْلاَدْ اللْفَاعِي، كِيفَاشْ تْنَجّْمُوا تْقُولُوا كْلاَمْ بَاهِي وْإِنْتُومَا أَشْرَارْ؟ رَاهُو اللْسَانْ يَنْطِقْ بِلِّي فِي القَلْبْ.

³⁵الإِنْسَانْ البَاهِي يْخَرِّجْ الحَاجَاتْ البَاهْيَة مِالكَنْزْ البَاهِي الِّي فِي قَلْبُو، وِالإِنْسَانْ الخَايِبْ يْخَرِّجْ الحَاجَاتْ الخَايْبَة مِنْ قَلْبُو الخَايِبْ.

³⁶نْقُلْكُمْ: كُلْ كِلْمَة بَاطْلَة يْقُولُوهَا النَّاسْ بَاشْ يِتْحَاسْبُوا عْلِيهَا فِي يُومْ الحْسَابْ.

³⁷رَاكْ بِكْلاَمِكْ تُطْلُعْ بَرِيءْ وبِكْلاَمِكْ يِتْحْكَمْ عْلِيكْ.»

³⁸الوَقْتْ هَاذَاكَا قَالُوا جْمَاعَة مِنْ الكُتَّابْ مْتَاعْ اليْهُودْ وِالفَرِّيسِيِّينْ لْيَسُوعْ: «يَا مُعَلِّمْ، نْحِبُّوكْ تْوَرِّينَا مُعْجْزَة.»

³⁹آمَا هُوَ جَاوِبْهُمْ: «جِيلْ شِرِّيرْ وْزَانِي يْلَوِّجْ عْلَى مُعْجْزَة، آمَا حَتَّى مُعْجْزَة مَا هِي بَاشْ تِتْعْطَالُو كَانْ المُعْجْزَة مْتَاعْ النَّبِي يُونُسْ.

⁴⁰وْكِيفْ مَا يُونُسْ بْقَى ثْلاَثَة أَيَّامْ وِثْلاَثَة لْيَالِي فِي كِرْشْ الحُوتَة، هَكَّاكَا آنَا إِبْنْ الإِنْسَانْ بَاشْ نَبْقَى ثْلاَثَة أَيَّامْ وِثْلاَثَة لْيَالِي فِي قَلْبْ الأَرْضْ.

⁴¹امَّالِي نِينَوَى بَاشْ يْقُومُوا مْعَ الجِيلْ هَاذَا فِي يُومْ الحْسَابْ وْيُحْكْمُوا عْلِيهْ، عْلَى خَاطِرْهُمْ تَابُوا وَقْتِلِّي نَبِّهْهُمْ يُونُسْ، وْهَاوْ ثَمَّة شْكُونْ هْنَا أَعْظِمْ مِنْ يُونُسْ.

⁴²وِالمَلِكَة مْتَاعْ الجَنُوبْ بَاشْ تْقُومْ مْعَ الجِيلْ هَاذَا فِي يُومْ الحْسَابْ وْتُحْكُمْ عْلِيهْ، عْلَى خَاطِرْهَا جَاتْ مِنْ آخَرْ الدِّنْيَا بَاشْ تِسْمَعْ الحِكْمَة مْتَاعْ سُلَيْمَانْ، وْهَاوْ هْنَا شْكُونُو أَعْظِمْ مِنْ سُلَيْمَانْ!»

⁴³«وَقْتِلِّي يُخْرُجْ الرُّوحْ المَنْزُوسْ مِنْ إِنْسَانْ، يِتْعَدَّى فِي البْلاَيِصْ الِّي مَا فِيهَاشْ مَاء يْلَوِّجْ عْلَى الرَّاحَة، آمَا مَا يَلْقَاشْ حَتَّى بْلاَصَة.

⁴⁴الوَقْتْ هَاذَاكَا يْقُولْ: "بَاشْ نَرْجَعْ لْدَارِي الِّي خْرَجْتْ مِنْهَا." وْكِيَرْجَعْ يَلْقَاهَا فَارْغَة وْمَكْنُوسَة وِمْنَظّْمَة.

⁴⁵يْوَلِّي يِمْشِي وِيْجِيبْ مْعَاهْ سَبْعَة أَرْوَاحْ أُخْرِينْ أَخْيِبْ مِنُّو وْيُدْخْلُوا فِي الإِنْسَانْ هَاذَاكَا وْيُسْكْنُوا فِيهْ وْحَالْتُو تْوَلِّي أَخْيِبْ مِلِّي كَانِتْ عْلِيهْ قْبَلْ. وْهَكَّا زَادَا بَاشْ يَجْرَى فِي الجِيلْ الشِّرِّيرْ هَاذَا.»

⁴⁶وْوَقْتِلِّي يَسُوعْ مَازَالْ يْكَلِّمْ فِي النَّاسْ، جَاوْ أُمُّو وْإِخْوْتُو وْوُقْفُوا البَرَّا يْحِبُّوا يَحْكِيوْ مْعَاهْ.

⁴⁷ثَمَّة وَاحِدْ قَالُّو: «أُمِّكْ وْإِخْوْتِكْ وَاقْفِينْ البَرَّة يْحِبُّوا يَحْكِيوْ مْعَاكْ.»

⁴⁸آمَا هُوَ جَاوِبْ الرَّاجِلْ الِّي كَلّْمُو: «شْكُونْهَا أُمِّي، وِشْكُونْهُمْ إِخْوْتِي؟»

⁴⁹وْمَدْ يِدُّو عْلَى صْوَابْ تْلاَمِذْتُو وْقَالْ: «آهُومَا أُمِّي وْإِخْوْتِي.

⁵⁰رَاهُو أَيْ وَاحِدْ يَعْمِلْ إِرَادِةْ بُويَا الِّي فِي السْمَاءْ هُوَ خُويَا وْأُخْتِي وْأُمِّي.»