Read Tunisian Arabic New Testament مَتَّى 13 Bible Online

مَتَّى 13 - Tunisian Arabic New Testament bible

مَتَّى 13

¹وِخْرَجْ يَسُوعْ مِالدَّارْ فِي النْهَارْ هَاذَاكَا بِيدُو وِقْعَدْ بِجْنَبْ البُحَيْرَة.

²وِتْلَمُّوا بِيهْ بَرْشَة نَاسْ، حَتَّى لِينْ طْلَعْ فِي فْلُوكَة، وِالنَّاسْ الكُلْهُمْ وُقْفُوا عْلَى الشَّطْ.

³وِحْكَالْهُمْ بَرْشَة حَاجَاتْ بِالأَمْثَالْ: «خْرَجْ الفَلاَّحْ بَاشْ يَزْرَعْ.

⁴وْوَقْتِلِّي هُوَ يَزْرَعْ، ثَمَّة زِرِّيعَة طَاحِتْ فِي الثْنِيَّة، وْجَاتْ الْعْصَافِرْ وِكْلاَتْهَا.

⁵وْثَمَّة زِرِّيعَة أُخْرَى طَاحِتْ فِي أَرْضْ فِيهَا الحْجَرْ، مَا فِيهَاشْ بَرْشَة تْرَابْ، يَاخِي نِبْتِتْ بِالوَقْتْ عْلَى خَاطِرْ تْرَابْهَا مُوشْ بَرْشَة.

⁶آمَا وَقْتِلِّي طَلْعِتْ الشَّمْسْ تْحَرْقِتْ وْيِبْسِتْ عْلَى خَاطِرْهَا ماعِنْدْهَاشْ عْرُوقْ.

⁷وْزِرِّيعَة أُخْرَى طَاحِتْ فِي وُسْطْ الشُّوكْ، وِطْلَعْ الشُّوكْ وِخْنَقْهَا.

⁸وْثَمَّة زِرِّيعَة أُخْرَى طَاحِتْ فِي تُرْبَة بَاهْيَة وْجَابِتْ السْبُولْ، ثَمَّة الِّي جَابِتْ مْيَاةْ مَرَّة قَدْ الِّي تِزْرَعْ، وْثَمَّة الِّي جَابِتْ سِتِّينْ، وْثَمَّة الِّي جَابِتْ ثْلاَثِينْ.

⁹الِّي عَنْدُو وِذْنِينْ خَلِّيهْ يِسْمَعْ!»

¹⁰الوَقْتْ هَاذَاكَا جَاوْ التْلاَمْذَة لْيَسُوعْ وْقَالُولُو: «عْلاَشْ تْكَلِّمْ فِيهُمْ بِالأَمْثَالْ؟»

¹¹وْجَاوِبْهُمْ: «إِنْتُمْ تِعْطَالْكُمْ بَاشْ تَعْرْفُوا الأَسْرَارْ مْتَاعْ مَمْلِكْةْ السْمَاوَاتْ، آمَا هُومَا مَا تِعْطَالْهُمْشْ.

¹²رَاهُو الِّي عَنْدُو، بَاشْ يِتْعْطَالُو أَكْثِرْ وِيْوَلِّي عَنْدُو بَرْشَة. آمَا الِّي مَا عِنْدُوشْ، حَتَّى الشَّيْء الِّي عَنْدُو بَاشْ يِتْفَكّْلُو.

¹³هَاذَاكَا عْلاَشْ آنَا نْكَلِّمْ فِيهُمْ بِالأَمْثَالْ عْلَى خَاطِرْهُمْ يُخْزْرُوا وْمَا يْشُوفُوشْ وْيِسْمْعُوا وْمَا يِفْهْمُوشْ.

¹⁴تَمِّتْ فِيهُمْ النُّبُوءَة مْتَاعْ إِشَعْيَاءْ الِّي تْقُولْ: بَاشْ تِسْمْعُوا آمَا عْمُرْكُمْ مَا تِفْهْمُوا، وْبِشْ تُخْزْرُوا آمَا عْمُرْكُمْ مَا تْشُوفُوا.

¹⁵رَاهُو الشَّعْبْ هَاذَا يْبِسْ قَلْبُو، وْسَكّْرُوا وِذْنِيهُمْ وْغَمّْضُوا عِينِيهُمْ، بَاشْ مَا يْشُوفُوشْ بْعِينِيهُمْ وْمَا يِسْمْعُوشْ بْوِذْنِيهُمْ وْمَا يِفْهْمُوشْ بِقْلُوبْهُمْ وْيَرْجْعُولِي بَاشْ نِشْفِيهُمْ.

¹⁶آمَا إِنْتُومَا صَحَّة لْعِينِيكُمْ عْلَى خَاطِرْهَا تْشُوفْ وِلْوِذْنِيكُمْ عْلَى خَاطِرْهَا تِسْمَعْ.

¹⁷نْقُلْكُمْ الحَقْ: بَرْشَة أَنْبِيَاءْ وِرْجَالْ أَبْرَارْ تْمَنَّاوْ بَاشْ يْشُوفُوا الِّي تْشُوفُوا فِيهْ وْمَا شَافُوهِشْ، وْبَاشْ يِسْمْعُوا الِّي إِنْتُومَا تِسْمْعُوا فِيهْ وْمَا سِمْعُوهِشْ.»

¹⁸«إِمَّالاَ اسْمْعُوا شْنُوَّة المَقْصُودْ بْمَثَلْ الفَلاَّحْ:

¹⁹وَقْتِلِّي أَيْ وَاحِدْ يِسْمَعْ الكِلْمَة مْتَاعْ مَمْلِكْةْ اللهْ وْمَا يِفْهِمْهَاشْ، يْجِي الشِّرِّيرْ وْيَخْطِفْ الِّي تِزْرَعْ فِي قَلْبُو، هَاذَا الِّي تِزْرَعْ فِي الثْنِيَّة.

²⁰وِلِّي تِزْرَعْ فِي الأَرْضْ الِّي فِيهَا الحْجَرْ، هُوَ الِّي يِسْمَعْ الكِلْمَة وْبِالوَقْتْ يقْبِلْهَا وْهُوَ فَرْحَانْ:

²¹آمَا مَا عِنْدُوشْ عْرُوقْ فِي دَاخْلُو، يُصْبُرْ شْوَيَّة وْوَقْتِلِّي يْجِي وَقْتْ صْعِيبْ وِلاَّ إِضْطِهَادْ عْلَى خَاطِرْ الكِلْمَة، بِالوَقْتْ يْطِيحْ.

²²وِلِّي تِزْرَعْ فِي وُسْطْ الشُّوكْ هُوَ الِّي يِسْمَعْ الكِلْمَة آمَا هْمُومْ الدِّنْيَا وْحُبْ الغْنَى يُخْنْقُوا الكِلْمَة وِيْوَلِّي مَا فِيهِشْ غَلَّة.

²³وِلِّي تِزْرَعْ فِي التُّرْبَة البَاهْيَة، هُوَ الِّي يِسْمَعْ الكِلْمَة وْيِفْهِمْهَا، وِيْجِيبْ بَرْشَة زِرِّيعَة وْثَمَّة الِّي يْجِيبْ مْيَاةْ مَرَّة قَدْ الِّي تِزْرَعْ، وْوَاحِدْ آخَرْ سِتِّينْ، وْوَاحِدْ آخَرْ ثْلاَثِينْ.»

²⁴وْقَلْهُمْ يَسُوعْ مَثَلْ آخَرْ: «مَمْلِكْةْ السْمَاوَاتْ تِشْبِهْ لْرَاجِلْ زْرَعْ زِرِّيعَة بَاهْيَة فِي أَرْضُو.

²⁵آمَا وَقْتِلِّي النَّاسْ رَاقْدِينْ، جَا العْدُو مْتَاعُو وِزْرَعْ زِوَانْ فِي وُسْطْ القَمْحْ وِمْشَى.

²⁶وْوَقْتِلِّي الزِّرِّيعَة نِبْتِتْ وْعَمْلِتْ القَمْحْ، طْلَعْ مْعَاهَا الزِّوَانْ.

²⁷وْجَاوْ الخَدَّامَا مْتَاعْ مُولَى الأَرْضْ وْقَالُولُو: "يَا سِيدْنَا يَاخِي إِنْتِ مُوشْ زْرَعْتْ زِرِّيعَة بَاهْيَة فِي الأَرْضْ مْتَاعِكْ؟ إِمَّالاَ مْنِينْ جَاهَا الزِّوَانْ؟"

²⁸قَالِلْهُمْ: "وَاحِدْ عْدُوِّي عْمَلْ الشَّيْء هَاذَا." قَالُولُو الخَدَّامَا: "إِمَّالاَ تْحِبّْنَا نِمْشِيوْا وِنْلِمُّوا الزِّوَانْ؟"

²⁹آمَا هُوَ قَالْ: "لاَ، بَاشْ مَا تْقَلّْعُوشْ القَمْحْ وَقْتِلِّي إِنْتُومَا تْلِمُّوا فِي الزِّوَانْ.

³⁰خَلُّوا القَمْحْ وِالزِّوَانْ يَعْلُوا مْعَ بْعَضْهُمْ حَتَّى لِينْ يْجِي وَقْتْ الحْصَادْ، وِالوَقْتْ هَاذَاكَا تَوْ نْقُولْ لِلحَصَّادَا لِمُّوا الزِّوَانْ فِي الأُوِّلْ وْأَعْمْلُوهْ حْزِمْ بَاشْ يِتْحْرَقْ، آمَا القَمْحْ لِمُّوهْ وْحُطُّوهْ فِي مْخَازْنِي."»

³¹وِعْطَاهُمْ مَثَلْ آخَرْ، قَالْ: «مَمْلِكْةْ السْمَاوَاتْ تِشْبِهْ لْزِرِّيعَة مْتَاعْ خَرْدِلْ هَزّْهَا رَاجِلْ وِزْرَعْهَا فِي سَانِيتُو.

³²هِيَ أَصْغِرْ مِالزِّرِّيعَة الكُلْهَا، آمَا وَقْتِلِّي كِبْرِتْ وَلاَّتْ أَكْبِرْ مِالخُضْرَة الكُلْهَا، وْوَلاَّتْ شَجْرَة، لْدَرْجِةْ إِنّْهَا طْيُورْ السْمَاءْ تْجِي وِتْعَشِشْ فِيهَا.»

³³وْقَالْ مَثَلْ آخَرْ: «مَمْلِكْةْ السْمَاوَاتْ تِشْبِهْ لِخْمِيرَة هَزِّتْهَا مْرَا وْحَطِّتْهَا فِي ثْلاَثَة قْصَاعْ مْتَاعْ دْقِيقْ حَتَّى لِينْ خْمِرْ العْجِينْ الكُلُّو.»

³⁴الشَّيْء هَاذَا الكُلُّو قَالُو يَسُوعْ لِلنَّاسْ بِالأَمْثَالْ. وْمَا كَانِشْ يَحْكِيلْهُمْ حَتَّى شَيْء مِنْ غِيرْ مَثَلْ.

³⁵الشَّيْء هَاذَا كَانْ بَاشْ يْتِمْ الِّي قَالُو النَّبِي: «بَاشْ يِتْكَلِّمْ فُمِّي بِالأَمْثَالْ، وِنْخَبِّرْ بِالأَسْرَارْ الغَامْضَة مِلِّي تْخَلْقِتْ الدِّنْيَا.»

³⁶الوَقْتْ هَاذَاكَا خَلَّى يَسُوعْ النَّاسْ وِدْخَلْ لِلدَّارْ، وْجَاوْهْ تْلاَمِذْتُو وْقَالُولُو: «فَسّْرِلْنَا المَثَلْ مْتَاعْ الزِّوَانْ.»

³⁷جَاوِبْهُمْ: «الِّي زْرَعْ الزِّرِّيعَة البَاهْيَة هُوَ آنَا إِبْنْ الإِنْسَانْ،

³⁸وِالزَّرْعْ هُوَ العَالَمْ، وِالزِّرِّيعَة البَاهْيَة هُومَا وْلاَدْ مَمْلِكْةْ اللهْ، وِالزِّوَانْ هُومَا وْلاَدْ الشِّرِّيرْ،

³⁹وِالعْدُو الِّي زْرَعْهُمْ هُوَ بْلِيسْ، وِالحْصَادْ هُوَ آخِرْ الزْمَانْ، وِالحَصَّادَا هُومَا المْلاَيْكَة.

⁴⁰وْبِالضَّبْطْ كِيفْ مَا الزِّوَانْ يِتْلَمْ وْيِتْحْرَقْ بِالنَّارْ، هَكَّاكَا بَاشْ يَاقَعْ فِي آخِرْ الزْمَانْ.

⁴¹آنَا إِبْنْ الإِنْسَانْ بَاشْ نَبْعِثْ المْلاَيْكَة مْتَاعِي، وْهُومَا بَاشْ يْلِمُّوا المُفْسْدِينْ وِلِّي يَعْمْلُوا فِي الشَّرْ مِالمَمْلْكَة مْتَاعِي

⁴²وْيَرْمِيوْهُمْ فِي وُسْطْ النَّارْ، الغَادِي بَاشْ يْكُونْ البْكَاءْ وْغَزَّانْ السِّنِّينْ.

⁴³وِالوَقْتْ هَاذَاكَا الأَبْرَارْ، بَاشْ يِضْوِيوْ كِيفْ الشَّمْسْ فِي المَمْلْكَة مْتَاعْ بُوهُمْ. الِّي عَنْدُو وِذْنِينْ، خَلِّيهْ يِسْمَعْ!»

⁴⁴«مَمْلِكْةْ السْمَاوَاتْ تِشْبِهْ لْكَنْزْ مَدْفُونْ فِي سَانْيِةْ، لْقَاهْ رَاجِلْ وْخَبَّاهْ، ومِالفَرْحَة مْشَى وْبَاعْ كُلْ مَا عَنْدُو وِشْرَى السَّانْيَة هَاذِيكَا.

⁴⁵مَمْلِكْةْ السْمَاوَاتْ تِشْبِهْ زَادَا تَاجِرْ يْلَوِّجْ عْلَى الجُوهِرْ الغَالِي.

⁴⁶كِلْقَى قَطْعَة ذْهَبْ غَالْيَة، مْشَى وْبَاعْ كُلْ مَا عَنْدُو وِشْرَاهَا.

⁴⁷وْتِشْبِهْ مَمْلِكْةْ السْمَاوَاتْ زَادَا لْشِبْكَة رْمَاوْهَا فِي البْحَرْ وْلَمِّتْ بَرْشَة أَنْوَاعْ مْتَاعْ حُوتْ.

⁴⁸وَقْتِلِّي تِمْلاَتْ، خَرّْجُوهَا الصَّيَّادَا لِلشَّطْ وْقَعْدُوا وْحَطُّوا الحُوتْ البَاهِي فِي صْنَادِقْ وِالخَايِبْ رْمُوهْ.

⁴⁹وْهَكَّاكَا بَاشْ يَاقَعْ فِي آخِرْ الزْمَانْ: المْلاَيْكَة بَاشْ يْجُوا وْيِفْرْزُوا الأَشْرَارْ مِنْ بِينْ الأَبْرَارْ

⁵⁰وْيَرْمِيوْهُمْ فِي وُسْطْ النَّارْ، وِالغَادِي بَاشْ يْكُونْ البْكَاءْ وْغَزَّانْ السِّنِّينْ.»

⁵¹وْقَالْ يَسُوعْ لِتْلاَمِذْتُو: «يَاخِي فْهِمْتُوا الشَّيْء هَاذَا الكُلُّو؟» جَاوْبُوهْ: «إِي نْعَمْ.»

⁵²وْقَالِلْهُمْ: «هَاذَاكَا عْلاَشْ كُلْ كَاتِبْ يْوَلِّي تِلْمِيذْ فِي مَمْلِكْةْ السْمَاوَاتْ، يِشْبِهْ لْمُولَى دَارْ يْخَرِّجْ مِالكَنْزْ مْتَاعُو فِي حَاجَاتْ جْدِيدَة وْحَاجَاتْ قْدِيمَة.»

⁵³وْوَقْتِلِّي كَمِّلْ يَسُوعْ المَثَلْ هَاذَا، مْشَى بْعِيدْ عْلَى البْلاَصَة هَاذِيكَا،

⁵⁴وْكِجَا لِبْلاَدُو بْدَا يْعَلِّمْ فِيهُمْ فِي المَجْمَعْ مْتَاعْهُمْ، يَاخِي تْعَجّْبُوا وْقَالُوا: «الرَّاجِلْ هَاذَا مْنِينْ جَاتُو الحِكْمَة هَاذِي وِالمُعْجْزَاتْ هَاذِي؟

⁵⁵يَاخِي هَاذَا مُوشْ وِلْدْ النَّجَّارْ؟ يَاخِي أُمُّو مُوشْ إِسْمْهَا مَرْيَمْ؟ وْإِخْوْتُو مُوشْ يَعْقُوبْ وْيُوسُفْ وْسِمْعَانْ وْيَهُوذَا؟

⁵⁶وْمُوشْ خْوَاتُو البْنَاتْ الكُلْهُمْ عِنْدْنَا؟ إِمَّالاَ الرَّاجِلْ هَاذَا مْنِينْ جَاهْ الشَّيْء هَاذَا الكُلُّو؟»

⁵⁷وْهَكَّا كَانُوا يْشِكُّوا فِيهْ. يَاخِي يَسُوعْ قَالِلْهُمْ: «النَّبِي عَنْدُو قْدَرْ فِي البْلاَيِصْ الكُلْهُمْ كَانْ فِي بْلاَدُو وْفِي دَارُو»

⁵⁸وْمَا عْمَلْشْ بَرْشَة مُعْجْزَاتْ الغَادِي عْلَى خَاطِرْهُمْ مَا امّْنُوشْ بِيهْ.