Read Tunisian Arabic New Testament مَتَّى 14 Bible Online

مَتَّى 14 - Tunisian Arabic New Testament bible

مَتَّى 14

¹الوَقْتْ هَاذَاكَا سْمَعْ المَلِكْ هِيرُودُسْ أَخْبَارْ يَسُوعْ،

²وْقَالْ لِلخُدَّامْ مْتَاعُو: «هَاذَا يُوحَنَّا المَعْمَدَانْ قَامْ مِنْ بِينْ المُوتَى، هَاذَاكَا عْلاَشْ قَاعِدْ يَعْمِلْ فِي المُعْجْزَاتْ.»

³وِقْبَلْ هِيرُودُسْ شَدْ يُوحَنَّا وْرَبْطُو وْحَطُّو فِي الحَبْسْ بِسْبَبْ هِيرُودِيَّة مَرْةْ فِيلِبُّسْ خُوهْ،

⁴عْلَى خَاطِرْ يُوحَنَّا قَالُّو: «حْرَامْ عْلِيكْ كَانْ تَاخُذْهَا.»

⁵وْحَبْ يُقْتْلُو، آمَا خَافْ مِالشَّعْبْ عْلَى خَاطِرْهُمْ كَانُوا حَاسْبِينْ يُوحَنَّا نَبِي.

⁶آمَا وَقْتِلِّي جَا عِيدْ مِيلاَدْ هِيرُودُسْ، شَطْحِتْ بِنْتْ هِيرُودِيَّة فِي الحَفْلَة، وْعَجْبِتْ هِيرُودُسْ،

⁷هَاذَاكَا عْلاَشْ وْعِدْهَا وِحْلِفِّلْهَا بَاشْ يَعْطِيهَا أَيْ حَاجَة تُطْلُبْهَا.

⁸وْكِوَصَّاتْهَا أُمّْهَا، قَالِتْ لْهِيرُودُسْ: «أَعْطِينِي رَاسْ يُوحَنَّا المَعْمَدَانْ فِي طْبَقْ!»

⁹وِحْزِنْ المَلِكْ، آمَا أْمَرْ بَاشْ يِتْعْطَالْهَا الشَّيْء الِّي حَبِّتْ عْلِيهْ، عْلَى خَاطِرْ اليْمِينْ الِّي حْلِفْ بِيهْ وِالضْيُوفْ.

¹⁰وِبْعَثْ شْكُونْ، قَصْ رَاسْ يُوحَنَّا فِي الحَبْسْ

¹¹وْجَابُوا رَاسُو فِي طْبَقْ وِعْطَاوْهْ لِلبْنَيَّة، وْهَزَّاتُو لْأُمّْهَا.

¹²وْجُوا تْلاَمِذْةْ يُوحَنَّا وْهَزُّوا الجُثَّة مْتَاعُو وْدِفْنُوهَا، وِمْشَاوْ وْخَبّْرُوا يَسُوعْ.

¹³كِسْمَعْ يَسُوعْ بِالشَّيْء هَاذَا، خْرَجْ مِنْ البْلاَصَة هَاذِيكَا فِي فْلُوكَة وِمْشَى لِبْلاَصَة مَا فِيهَا حَتَّى حَدْ. آمَا وَقْتِلِّي النَّاسْ سَمْعُوا بِيهْ، تَبّْعُوهْ مَاشِينْ عْلَى سَاقِيهُمْ مِالمْدِينَة.

¹⁴كِهْبَطْ مِالفْلُوكَة شَافْ بَرْشَة نَاسْ، حَنْ عْلِيهُمْ وِشْفَى المُرْضَى مْتَاعْهُمْ.

¹⁵وْفِي العْشِيَّة، جَاوْهْ تْلاَمِذْتُو وْقَالُولُو: «النْهَارْ وْفَى، وِالبْلاَصَة هَاذِي خَالْيَة، أَبْعِثْ النَّاسْ خَلِّيهُمْ يِمْشِيوْ لِلقُرَى وْيِشْرِيوْ حَاجَة يَاكْلُوهَا.»

¹⁶قَالْ يَسُوعْ: «مُوشْ لاَزِمْ يِمْشِيوْ. أَعْطِيوْهُمْ إِنْتُومَا حَاجَة يَاكْلُوهَا.»

¹⁷قَالُولُو: «مَا عِنْدْنَا كَانْ خَمْسَة خُبْزَاتْ وْحُوتِّينْ.»

¹⁸قَالْ يَسُوعْ: «هَاتُوهُمْلِي لِهْنَا.»

¹⁹وِأْمَرْ النَّاسْ بَاشْ يُقْعْدُوا الُّوطَا عْلَى الحْشِيشْ، وِخْذَا الخَمْسَة خُبْزَاتْ وِالحُوتِّينْ، وْهَزْ عِينِيهْ لِلسْمَاء، وْبَارِكْ وِقْسِمْ الخُبْزَاتْ وِعْطَاهُمْ لِلتْلاَمْذَة، وِالتْلاَمْذَة عْطَاوْهُمْ لِلنَّاسْ.

²⁰وِالكُلْهُمْ كْلاَوْ وْشَبْعُوا. وْهَزُّوا ثْنَاشِنْ قُفَّة مْعُبّْيَة مِلِّي فْضُلْ.

²¹وِالنَّاسْ الِّي كْلاَوْ كَانُوا قْرَابِةْ خَمْسَة آلاَفْ رَاجِلْ، بِخْلاَفْ النْسَاء وِالصْغَارْ.

²²وِمْبَعْدْهَا بِالضَّبْطْ أْمَرْ تْلاَمِذْتُو بَاشْ يَطْلْعُوا فِي الفْلُوكَة وْيِسْبْقُوهْ لِلجِيهَة المْقَابْلَة مْتَاعْ البُحَيْرَة حَتَّى لِينْ هُوَ يَبْعِثْ النَّاسْ يْرَوّْحُوا.

²³وْبَعْدْ مَا بْعَثْ النَّاسْ رَوّْحُوا طْلَعْ وَحْدُو لِلجْبَلْ بَاشْ يْصَلِّي. وْبَعْدْ مَا غُرْبِتْ الشَّمْسْ كَانْ الغَادِي وَحْدُو.

²⁴آمَا الوَقْتْ هَاذَاكَا كَانِتْ الفْلُوكَة بْعِيدَة بَرْشَة عْلَى الشَّطْ وِغْلِبْهَا المُوجْ، عْلَى خَاطِرْ الرِّيحْ كَانِتْ عَاكْسِتْهَا.

²⁵وِقْبَلْ الفَجْرْ جَاهُمْ يَسُوعْ يِمْشِي فُوقْ المَاء.

²⁶آمَا التْلاَمْذَة خَافُوا وَقْتِلِّي شَافُوهْ يِمْشِي فُوقْ المَاء وْقَالُوا: «هَاذَا خْيَالْ!» وِبْدَاوْا يْصِيحُوا مِالخُوفْ.

²⁷آمَا يَسُوعْ كَلِّمْهُمْ بِالوَقْتْ وْقَالِلْهُمْ: «اتْشَجّْعُوا. رَانِي آنَا هُوَ، مَا تْخَافُوشْ!»

²⁸وْجَاوْبُو بُطْرُسْ: «يَا رَبْ، كَانِكْ إِنْتِ هُوَ، أُأْمُرْنِي بَاشْ نْجِيكْ نِمْشِي فُوقْ المَاء.»

²⁹قَالْ يَسُوعْ: «إِيجَا.» إِمَّالاَ خْرَجْ بُطْرُسْ مِالفْلُوكَة وِمْشَى فُوقْ المَاء وْجَا لْيَسُوعْ.

³⁰آمَا كِشَافْ الِّي الرِّيحْ قْوِيَّة خَافْ، يَاخِي بْدَا يُغْرُقْ، وَلَّى عَيِّطْ: «يَا رَبْ، مَنَّعْنِي!»

³¹بِالوَقْتْ مَدْ يَسُوعْ يِدُّو وْشَدُّو وْقَالُّو: «يَلِّي إِيمَانِكْ ضْعِيفْ، عْلاَشْ شَكِّيتْ؟»

³²وْكِطَلْعُوا فِي الفْلُوكَة هْدَاتْ الرِّيحْ.

³³وِلِّي فِي الفْلُوكَة سِجْدُولُو وْقَالُوا: «بِالحَقْ إِنْتِ إِبْنْ اللهْ!»

³⁴وْكِفَاتْ يَسُوعْ وِتْلاَمِذْتُو البْلاَصَة هَاذِيكَا جَاوْ لْمَنْطِقْةْ جَنِّيسَارْتْ.

³⁵وْوَقْتِلِّي امَّالِي البْلاَدْ هَاذِيكَا عَرْفُوا يَسُوعْ، نُشْرُوا الخْبَرْ مْتَاعُو فِي المَنْطْقَة هَاذِيكَا الكُلْهَا وْجَابُولُو النَّاسْ الِّي كَانُوا مُرْضَى الكُلْهُمْ

³⁶وْطَلْبُوا مِنُّو بَاشْ يْخَلِّيهُمْ يْمِسُّوا حَتَّى الطّْرَفْ مْتَاعْ دَبْشُو. وِلِّي مَسُّوهْ الكُلْهُمْ تِشْفَاوْ.