Read Tunisian Arabic New Testament مَتَّى 15 Bible Online

مَتَّى 15 - Tunisian Arabic New Testament bible

مَتَّى 15

¹وْجَاوْ الفَرِّيسِيِّينْ وِالكُتَّابْ مْتَاعْ اليْهُودْ لْيَسُوعْ مِنْ أُورْشَلِيمْ، وْقَالُوا:

²«عْلاَشْ تْلاَمِذْتِكْ مَا يِحْتَرْمُوشْ العْوَايِدْ مْتَاعْ الشْيُوخْ؟ وْمَا يَغْسْلُوشْ يْدِيهُمْ وَقْتِلِّي يَاكْلُوا؟»

³جَاوِبْهُمْ: «وِعْلاَشْ إِنْتُومَا مَا اطِّيعُوشْ وْصِيِّةْ اللهْ وْشَادِّينْ صْحِيحْ فِي عْوَايِدْكُمْ؟

⁴رَاهُو اللهْ قَالْ: "إِكْرِمْ بُوكْ وْأُمِّكْ، وِلِّي يْسِبْ بُوهْ وِلاَّ أُمُّو يِلْزْمُو يْمُوتْ."

⁵آمَا إِنْتُومَا تْقُولُوا إِذَا وَاحِدْ يْقُولْ لْبُوهْ وِلاَّ أُمُّو: "الِّي كُنْتْ نْعَاوِنْ فِيكُمْ بِيهْ رَاوْ قُرْبَانْ للهْ، مُوشْ لاَزِمْ عْلِيهْ بَاشْ يِكْرِمْ بُوهْ وإلاّ أمُّو."

⁶وْهَكَّا رَدِّيتُوا كِلْمِةْ اللهْ بَاطْلَة بِالعْوَايِدْ مْتَاعْكُمْ.

⁷يَا مُنَافْقِينْ، صْدَقْ إِشَعْيَاءْ وَقْتِلِّي تْنَبَّأْ وْقَالْ عْلِيكُمْ:

⁸الشَّعْبْ هَاذَا بْفُمُّو يِكْرِمْ فيَّ وْقَلْبُو بْعِيدْ عْلِيَّ.

⁹بَاطِلْ يِعْبْدُوا فِيَّ وِيْعَلّْمُوا فِي وْصَايَا النَّاسْ.»

¹⁰وْنَادَى يَسُوعْ النَّاسْ وْقَالِلْهُمْ: «اسْمْعُوا وْإِفْهْمُوا

¹¹مُوشْ الِّي يُدْخُلْ لِلفُمْ هُوَ الِّي يْنَجِّسْ الإِنْسَانْ، آمَا رَاهُو الِّي يُخْرُجْ مِالفُمْ هُوَ الِّي يْنَجِّسْ الإِنْسَانْ.»

¹²وْجَاوْ تْلاَمِذْتُو وْقَالُولُو: «يَاخِي تَعْرِفْ الِّي الفَرِّيسِيِّينْ تْغَشَشُوا كِسَمْعُوا الكْلاَمْ هَاذَا؟»

¹³جَاوِبْهُمْ: «كُلْ شَجْرَة مَا غْرِسْهَاشْ بُويَا الِّي فِي السْمَاءْ بَاشْ تِتْقَلِّعْ.

¹⁴إِبْعْدُوا عْلِيهُمْ! رَاهُمْ عِمْيَانْ يْقُودُوا فِي عِمْيَانْ. وْإِذَا كَانْ رَاجِلْ أَعْمَى يْقُودْ رَاجِلْ أَعْمَى رَاهُمْ لِثْنِينْ يْطِيحُوا فِي حُفْرَة.»

¹⁵آمَا بُطْرُسْ قَالُّو: «فَسّْرِلْنَا المَثَلْ هَاذَا.»

¹⁶وْقَالْ يَسُوعْ: «يَاخِي لْتَوْ مَازِلْتُوا مَا تِفْهْمُوشْ؟

¹⁷يَاخِي مَا كُمْشْ تْشُوفُوا الِّي أَيْ حَاجَة تُدْخُلْ فِي الفُمْ تِمْشِي لِلكِرْشْ، وِمْبَاعِدْ تُخْرُجْ مِالبْدَنْ؟

¹⁸آمَا الحَاجَة الِّي تُخْرُجْ مِالفُمْ، تْجِي مِالقَلْبْ، وْهَاذَا الِّي يْنَجِّسْ الإِنْسَانْ.

¹⁹مِالقَلْبْ تْجِي الأَفْكَارْ الشِّرِّيرَة وِالقَتْلْ وِالزْنَى وِالفْسَادْ وِالسِّرْقَة وِشْهَادِةْ الزُّورْ وِالكُفْرْ،

²⁰هَاذُومَا هُومَا الِّي يْنَجّْسُوا الإِنْسَانْ. آمَا المَاكْلَة بِيْدِينْ مَا هِيشْ مَغْسُولَة مَا تْنَجِّسْشْ الإِنْسَانْ.»

²¹وِمْشَى يَسُوعْ مِالبْلاَصَة هَاذِيكَا وْجَا لْشِيرِةْ صُورْ وْصَيْدَا.

²²وِالغَادِي جَاتْ مْرَا كَنْعَانِيَّة مِالمَنْطْقَة هَاذِيكَا وْصَاحِتْ: «يَا سِيدِي، يَا وِلْدْ دَاوُدْ، ارْحِمْنِي! بِنْتِي سَاكِنْهَا شِيطَانْ، وِيْعَذِّبْ فِيهَا بَرْشَة.»

²³آمَا هُوَ مَا جَاوِبْهَا بْحَتَّى كِلْمَة. وْجَاوْ تْلاَمِذْتُو وِتْشَحّْتُوهْ وْقَالُوا: «أَعْطِيهَا الِّي تْحِبْ عْلِيهْ خَلِّيهَا تِبْعِدْنَا، رَاهِي تِمْشِي وْرَانَا وِتْصِيحْ!»

²⁴جَاوِبْ يَسُوعْ: «آنَا مَا تِبْعَثْتْ كَانْ لِلغْنَمْ الضَّايْعَة مْتَاعْ بِيتْ إِسْرَائِيلْ.»

²⁵آمَا هِيَ جَاتْ وْهَبْطِتْ عْلَى رْكَايِبْهَا قُدَّامُو وْقَالِتْ: «يَا سِيدِي، عَاوِنِّي!»

²⁶وْجَاوِبْهَا: «مُوشْ بَاهِي نَاخْذُوا الخُبْزْ مْتَاعْ الوْلاَدْ وْنَرْمِيوْهْ لِلكْلاَبْ.»

²⁷قَالِتْ: «إِي نْعَمْ، يَا سِيدِي! حَتَّى الكْلاَبْ تَاكُلْ مِالفِتْفَاتْ الِّي يْطِيحْ مِنْ الطَّاوْلَة مْتَاعْ مُولاَهَا.»

²⁸جَاوِبْهَا يَسُوعْ: «يَا مْرَا، إِيمَانِكْ عْظِيمْ! خُوذْ الشَّيْء الِّي تْحِبْ عْلِيهْ.» وْبِالوَقْتْ بْنِتْهَا تِشْفَاتْ.

²⁹وِمْشَى يَسُوعْ مِنْ غَادِي وِتْعَدَّى عْلَى الشَّطْ مْتَاعْ بُحَيْرِةْ الجَلِيلْ، وِطْلَعْ فُوقْ الجْبَلْ وِقْعَدْ الغَادِي.

³⁰وْجَاوْهْ بَرْشَة نَاسْ وْجَابُوا مْعَاهُمْ نَاسْ مَشْلُولِينْ وْعِيَّابْ وْعِمْيْ وِبْكَاكِشْ وْبَرْشَة أُخْرِينْ، وْحَطُّوهُمْ قُدَّامْ سَاقِيهْ وْهُوَ شْفَاهُمْ.

³¹وِتْعَجّْبُوا النَّاسْ كِشَافُوا البْكَاكِشْ يِتْكَلّْمُوا، وِالعِيَّابْ يِتْشْفَاوْ، وِالمَشْلُولِينْ يِمْشِيوْ، وِالعِمْيَانْ يْشُوفُوا. وْمَجّْدُوا إِلاَهْ إِسْرَائِيلْ.

³²وْنَادَى يَسُوعْ تْلاَمِذْتُو وْقَالِلْهُمْ: «رَاهُمْ النَّاسْ غَايْضِينِّي، عْلَى خَاطِرْهُمْ بْقَاوْ مْعَايَا ثْلاَثَة أَيَّامْ مِنْ غِيرْ مَاكْلَة. وْمَا نْحِبِّشْ نَبْعِثْهُمْ يْرَوّْحُوا وْهُومَا جْوَاعَا بَاشْ مَا يْدُوخُوشْ فِي الثْنِيَّة.»

³³وْقَالُولُو التْلاَمْذَة: «مْنِينْ بَاشْ نْجِيبُوا خُبْزْ فِي الخْلاَء هَاذَا يِكْفِي النَّاسْ هَاذُومَا الكُلْهُمْ؟»

³⁴وْقَالِلْهُمْ يَسُوعْ: «قَدَّاشْ عِنْدْكُمْ مِنْ خُبْزَة؟» قَالُوا: «سَبْعَة خُبْزَاتْ وْكَعْبَاتْ حُوتْ صْغَارْ.»

³⁵وِأْمَرْ يَسُوعْ النَّاسْ بَاشْ يُقْعْدُوا عْلَى الأَرْضْ،

³⁶وِخْذَا السَّبْعَة خُبْزَاتْ وْكَعْبَاتْ الحُوتْ، وْشْكَرْ اللهْ وِقْسِمْهُمْ وِعْطَاهُمْ لِلتْلاَمْذَة، وِالتْلاَمْذَة عْطَاوْهُمْ لِلنَّاسْ.

³⁷وِالكُلْهُمْ كْلاَوْ لِينْ شَبْعُوا، وْهَزُّوا الِّي فْضُلْ سَبْعَة قْفَافْ كْبَارْ مِلْيَانِينْ.

³⁸الِّي كْلاَوْ كَانُوا أَرْبْعَة آلاَفْ رَاجِلْ، بِخْلاَفْ النْسَاء وِالصْغَارْ.

³⁹وْبَعْدْ مَا بْعَثْ النَّاسْ رَوّْحُوا طْلَعْ فِي الفْلُوكَة وِمْشَى لْمَنْطِقْةْ مَجْدَلْ.