Read Tunisian Arabic New Testament مَتَّى 16 Bible Online

مَتَّى 16 - Tunisian Arabic New Testament bible

مَتَّى 16

¹وْجَاوْ الفَرِّيسِيِّينْ وِالصَّدُّوقِيِّينْ بَاشْ يْجَرّْبُوا يَسُوعْ، وْطَلْبُوا مِنُّو بَاشْ يْوَرِّيهُمْ مُعْجْزَة مِالسْمَاءْ.

²وْجَاوِبْهُمْ يَسُوعْ: «وَقْتِلِّي تْجِي العْشِيَّة تْقُولُوا: "الطَّقْسْ بَاهِي، عْلَى خَاطِرْ السْمَاءْ حَمْرَا."

³وْفِي الصْبَاحْ تْقُولُوا: "ثَمَّة مْطَرْ اليُومْ، عْلَى خَاطِرْ السْمَاءْ حَمْرَا غَامْقَة." تَعْرْفُوا كِيفَاشْ تْفَسّْرُوا حَالِةْ السْمَاءْ، آمَا العَلاَمَاتْ مْتَاعْ الزْمَانْ مَا تَعْرْفُوشْ تْفَسّْرُوهَا.

⁴جِيلْ شِرِّيرْ وْزَانِي يْلَوِّجْ عْلَى مُعْجْزَة، آمَا حَتَّى مُعْجْزَة مَا هِي بَاشْ تِتْعْطَالُو كَانْ المُعْجْزَة مْتَاعْ يُونُسْ.» وَلَّى خَلاَّهُمْ وِمْشَى.

⁵كِوُصْلُوا التْلاَمْذَة لِلشَّطْ المْقَابِلْ، نْسَاوْ بَاشْ يْجِيبُوا مْعَاهُمْ الخُبْزْ،

⁶قَالِلْهُمْ يَسُوعْ: «فِيقُوا وْرُدُّوا بَالْكُمْ مِالخْمِيرَة مْتَاعْ الفَرِّيسِيِّينْ وِالصَّدُّوقِيِّينْ.»

⁷وِتْنَاقْشُوا التْلاَمْذَة مْعَ بْعَضْهُمْ وْقَالُوا: «هَاذَاكَا عْلَى خَاطِرْ مَا عِنْدْنَاشْ خُبْزْ.»

⁸آمَا يَسُوعْ عْرَفْ الشَّيْء هَاذَا وْقَالْ: «يَلِّي إِيمَانْكُمْ ضْعِيفْ، عْلاَشْ تْنَاقْشُوا فِي بْعَضْكُمْ وِتْقُولُوا: مَا عِنْدْنَاشْ خُبْزْ؟

⁹يَاخِي التَوَّا مَا فْهِمْتُوشْ؟ يَاخِي مَا تِتْذَكّْرُوشْ الخَمْسَة خُبْزَاتْ الِّي تْفَرّْقُوا عْلَى الخَمْسَة آلاَفْ وْقَدَّاشْ مِنْ قُفَّة كْبِيرَة لَمِّيتُوا مِلِّي فْضُلْ؟

¹⁰وِلاَّ السَّبْعَة خُبْزَاتْ مْتَاعْ الأَرْبْعَة آلاَفْ وْقَدَّاشْ مِنْ قُفَّة كْبِيرَة عَبِّيتُوا؟

¹¹كِيفَاشْ مَا تْنَجّْمُوشْ تِفْهْمُوا الِّي آنَا مَا نِيشْ نَحْكِي عْلَى الخُبْزْ؟ رُدُّوا بَالْكُمْ مِالخْمِيرَة مْتَاعْ الفَرِّيسِيِّينْ وِالصَّدُّوقِيِّينْ!»

¹²الوَقْتْ هَاذَاكَا فِهْمُوا الِّي هُوَ قَالِلْهُمْ رُدُّوا بَالْكُمْ مِالتَّعْلِيمْ مْتَاعْ الفَرِّيسِيِّينْ وِالصَّدُّوقِيِّينْ مُوشْ الخْمِيرَةْ مْتَاعْ الخُبْزْ.

¹³وَقْتِلِّي جَا يَسُوعْ لْجِيهِةْ قَيْصَرِيِّةْ فِيلِبُّسْ سْإِلْ تْلاَمِذْتُو: «النَّاسْ يْقُولُوا عْلِيَّ شْكُونْ آنَا ابْنْ الإِنْسَانْ؟»

¹⁴جَاوْبُوهْ: «ثَمَّة شْكُونْ يْقُولُوا الِّي إِنْتِ يُوحَنَّا المَعْمَدَانْ، وْأُخْرِينْ يْقُولُوا الِّي إِنْتِ إِيلِيَّا، وْأُخْرِينْ يْقُولُوا الِّي إِنْتِ إِرْمِيَا وِلاَّ وَاحِدْ مِالأَنْبِيَاءْ.»

¹⁵قَالِلْهُمْ: «آمَا إِنْتُومَا تْقُولُوا عْلِيَّ شْكُونْ؟»

¹⁶جَاوِبْ سِمْعَانْ بُطْرُسْ: «إِنْتِ المَسِيحْ إِبْنْ اللهْ الحَيْ.»

¹⁷وْقَالُّو يَسُوعْ: «صَحَّة لِيكْ، يَا سِمْعَانْ وِلْدْ يُونَا! مُوشْ لْحَمْ وْدَمْ هُوَ الِّي ظَهِّرْلِكْ الشَّيْء هَاذَا، آمَا رَاهُو بُويَا الِّي فِي السْمَاءْ.

¹⁸وْآنَا نْقُلِّكْ: إِنْتِ بُطْرُسْ الِّي مَعْنَاهَا حَجْرَة كْبِيرَة، وِعْلَى الحَجْرَة هَاذِي بَاشْ نِبْنِي كْنِيسْتِي، وْبِيبَانْ الهَاوْيَة مَا هِيشْ بَاشْ تِغْلِبْهَا.

¹⁹بَاشْ نَعْطِيكْ المْفَاتِحْ مْتَاعْ مَمْلِكْةْ السْمَاوَاتْ، وِلِّي تَرْبْطُو فِي الأَرْضْ بَاشْ يِتْرْبَطْ فِي السْمَاءْ، وِلِّي تْحِلُّو فِي الأَرْضْ بَاشْ يِتْحَلْ فِي السْمَاءْ.»

²⁰وِالوَقْتْ هَاذَاكَا وَصَّى تْلاَمِذْتُو بَاشْ مَا يْقُولُوا لْحَتَّى حَدْ الِّي هُوَ المَسِيحْ.

²¹وْمِالوَقْتْ هَاذَاكَا بْدَا يَسُوعْ يْوَرِّي لِتْلاَمِذْتُو الِّي هُوَ يِلْزْمُو يِمْشِي لْأُورْشَلِيمْ وْيِتْعَذِّبْ عْلَى يْدِينْ الشْيُوخْ وْرُؤَسَاءْ الكُهَّانْ وِالكُتَّابْ مْتَاعْ اليْهُودْ وْيِتْقْتَلْ وْفِي النْهَارْ الثَّالِثْ يْقُومْ.

²²وْهَزْ بُطْرُسْ يَسُوعْ عْلَى جْنَبْ وِبْدَا يْلُومْ فِيهْ وْقَالُّو: «حَاشَاكْ، يَا رَبْ! الشَّيْء هَاذَا مُوشْ مُمْكِنْ يَاقِعْلِكْ بِالكُلْ!»

²³آمَا يَسُوعْ تْلَفِّتْ وْقَالْ لْبُطْرُسْ: «إِبْعِدْ عْلِيَّ يَا شِيطَانْ! إِنْتِ تْعَطِّلْ فِيَّ، عْلَى خَاطْرِكْ تْفَكِّرْ كِيفْ النَّاسْ مُوشْ كِيفْ اللهْ.»

²⁴الوَقْتْ هَاذَاكَا قَالْ يَسُوعْ لِتْلاَمِذْتُو: «إِذَا كَانْ وَاحِدْ يْحِبْ يْتَبَّعْنِي، يِلْزْمُوا يُنْكُرْ نَفْسُو وِيْهِزْ الصَّلِيبْ مْتَاعُو وْيِمْشِي وْرَايَا،

²⁵رَاهُو الِّي يْحِبْ يْخَلِّصْ حْيَاتُو يِخْسِرْهَا، وِلِّي يِخْسِرْ حْيَاتُو عْلَى خَاطْرِي بَاشْ يِرْبِحْهَا.

²⁶شْنُوَّة فَايِدْةْ الإِنْسَانْ إِذَا كَانْ يِرْبِحْ الدِّنْيَا الكُلْهَا وْيِخْسِرْ حْيَاتُو؟ وِلاَّ شْنُوَّة هِيَ الحَاجَة الِّي يِفْدِي بِيهَا الإِنْسَانْ حْيَاتُو؟

²⁷رَانِي آنَا إِبْنْ الإِنْسَانْ بَاشْ نْجِي مْعَ المْلاَيْكَة مْتَاعِي فِي المَجْدْ مْتَاعْ بَابَا، وِالوَقْتْ هَاذَاكَا بَاشْ نْجَازِي كُلْ إِنْسَانْ عْلَى الشَّيْء الِّي عَمْلُوا.

²⁸نْقُلْكُمْ الحَقْ: ثَمَّة شْكُونْ مِالوَاقْفِينْ هْنَا مَا هُمْشْ بَاشْ يْشُوفُوا المُوتْ قْبَلْ مَا يْشُوفُونِي آنَا إِبْنْ الإِنْسَانْ جَايْ فِي مَمْلِكْتِي.»