Read Tunisian Arabic New Testament مَتَّى 17 Bible Online

مَتَّى 17 - Tunisian Arabic New Testament bible

مَتَّى 17

¹وْبَعْدْ سِتَّة أَيَّامْ هَزْ يَسُوعْ مْعَاهْ بُطْرُسْ وْيَعْقُوبْ وْيُوحَنَّا خُوهْ، وِطْلَعْ هُوَ وْيَاهُمْ وَحَّدْهُمْ لِجْبَلْ عَالِي،

²وِتْبَدْلِتْ هَيْأْتُو قُدَّامْهُمْ، وْوِجْهُو ضْوَى كِيفْ الشَّمْسْ وْدَبْشُو وَلَّى أَبْيِضْ كِيفْ النُّورْ.

³وِالغَادِي ظْهَرِّلْهُمْ مُوسَى وْإِيلِيَّا يْكَلّْمُوا فِي يَسُوعْ.

⁴وْقَالْ بُطْرُسْ لْيَسُوعْ: «يَا رَبْ، هَاوْ بَاهِي الِّي أَحْنَا هْنَا: إِذَا كَانْ تْحِبْ، تَوْ نُنْصْبُو ثْلاَثَة خْيَامْ هْنَا: وَحْدَة لِيكْ وْوَحْدَة لْمُوسَى وْوَحْدَة لْإِيلِيَّا.»

⁵وْوَقْتِلِّي هُوَ مَازَالْ يِتْكَلِّمْ، غَطَّاتْهُمْ سْحَابَة ضَاوْيَة، وْصُوتْ مِالسْحَابَة قَالْ: «هَاذَا هُوَ ابْنِي الِّي نْحِبُّو وِلِّي فْرَحْتْ بِيهْ فَرْحَة كْبِيرَة، إِسْمْعُوا كْلاَمُو!»

⁶كِسَمْعُوا التْلاَمْذَة الشَّيْء هَاذَا طَاحُوا عْلَى وْجُوهْهُمْ وْخَافُوا بَرْشَة.

⁷آمَا يَسُوعْ جَا وْمَسّْهُمْ وْقَالْ: «قُومُوا، مَا تْخَافُوشْ.»

⁸وْوَقْتِلِّي هَزُّوا عِينِيهُمْ، مَا شَافُوا كَانْ يَسُوعْ وَحْدُو.

⁹وْوَقْتِلِّي هُومَا هَابْطِينْ مِالجْبَلْ، أْمَرْهُمْ يَسُوعْ: «مَا تْقُولُوا لْحَدْ عْلَى الشَّيْء الِّي شُفْتُوهْ حَتَّى لِينْ آنَا إِبْنْ الإِنْسَانْ نْقُومْ مِنْ بِينْ المُوتَى.»

¹⁰وْسِأْلُوهْ التْلاَمْذَة: «إِمَّالاَ عْلاَشْ الكُتَّابْ مْتَاعْ اليْهُودْ يْقُولُوا الِّي إِيلِيَّا لاَزِمْ يْجِي فِي الأُوُّلْ؟»

¹¹جَاوِبْهُمْ: «بِالحَقْ إِيلِيَّا يْجِي وْهُوَ يْصَلِّحْ كُلْ شَيْء.

¹²آمَا آنَا نْقُلْكُمْ الِّي إِيلِيَّا جَا وْهُومَا مَا عَرْفُوهِشْ، آمَا عَمْلُوا فِيهْ الِّي حَبُّوا عْلِيهْ الكُلْ. وْآنَا إِبْنْ الإِنْسَانْ زَادَا بَاشْ نِتْعَذِّبْ عْلَى يْدِيهُمْ.»

¹³وِالوَقْتْ هَاذَاكَا فِهْمُوا التْلاَمْذَة الِّي هُوَ كَانْ يَحْكِيلْهُمْ عْلَى يُوحَنَّا المَعْمَدَانْ.

¹⁴وْوَقْتِلِّي جَا يَسُوعْ وِتْلاَمِذْتُو لِلنَّاسْ، ثَمَّة رَاجِلْ جَاهْ وِهْبَطْ عْلَى رْكَايْبُو قُدَّامْ يَسُوعْ وْقَالْ:

¹⁵«يَا رَبْ أَرْحِمْ وِلْدِي، عْلَى خَاطْرُو يِتْصْرَعْ وْيِتْعَذِّبْ بَرْشَة وْدِيمَا يْطِيحْ فِي النَّارْ وْفِي المَاء.

¹⁶وْآنَا جِبْتُو لِتْلاَمِذْتِكْ، آمَا هُومَا مَا نَجّْمُوشْ يِشْفِيوْهْ.»

¹⁷وْجَاوِبْ يَسُوعْ وْقَالْ: «يَا جِيلْ يَا فَاسِدْ وْيَلِّي مَا عِنْدِكْشْ إِيمَانْ! لْوَقْتَاشْ بَاشْ نَبْقَى مْعَاكُمْ؟ لْوَقْتَاشْ بَاشْ نِتْحَمِّلْكُمْ؟ جِيبُوهُولِي لِهْنَا!»

¹⁸وْطَرِّدْ يَسُوعْ الشِّيطَانْ، وْخَرّْجُو مِنُّو، وْتِشْفَى الوْلِدْ بِالوَقْتْ.

¹⁹الوَقْتْ هَاذَاكَا جَاوْ التْلاَمْذَة لْيَسُوعْ عْلَى جْنَبْ وْقَالُوا: «عْلاَشْ أَحْنَا مَا نَجِّمْنَاشْ نْخَرّْجُوهْ؟»

²⁰قَالِلْهُمْ: «بِسْبَبْ إِيمَانْكُمْ الضْعِيفْ! نْقُلْكُمْ الحَقْ، لُوكَانْ جَا عِنْدْكُمْ إِيمَانْ قَدْ زِرِّيعِةْ الخَرْدِلْ، رَاكُمْ تْقُولُوا لِلجْبَلْ هَاذَا: "نَقِّلْ مِنْ هْنَا لْغَادِي!" وْهُوَ بَاشْ يْنَقِّلْ، وْرَاكُمْ وَلِّيتُوا قَادْرِينْ عْلَى كُلْ شَيْء.»

²¹[آمَا النَّوْعْ هَاذَا مَا يُخْرُجْ كَانْ بِالصَّلاَةْ وِالصْيَامْ.]

²²وَقْتِلِّي كَانُوا التْلاَمْذَة مُجْتَمْعِينْ فِي الجَلِيلْ قَالِلْهُمْ يَسُوعْ: «آنَا إِبْنْ الإِنْسَانْ بَاشْ يْسَلّْمُونِي لِيْدِينْ النَّاسْ،

²³وْبِشْ يُقْتْلُونِي وْبِشْ نْقُومْ فِي النْهَارْ الثَّالِثْ.» يَاخِي تْقَلّْقُوا بَرْشَة.

²⁴كِجَاوْ لْكَفْرْنَاحُومْ مْشَاوْ الِّي يْلِمُّوا فِي الضَّرَايِبْ مْتَاعْ الهَيْكِلْ لْبُطْرُسْ وْقَالُولُو: «يَاخِي المُعَلِّمْ مْتَاعْكُمْ يِدْفَعْ الضَّرَايِبْ؟»

²⁵جَاوِبْ: «إِي نْعَمْ.» وْوَقْتِلِّي رَوِّحْ لِلدَّارْ، سِبْقُو يَسُوعْ بِالكْلاَمْ وْقَالْ: «شْنُوَّة رَايِكْ، يَا سِمْعَانْ؟ المُلُوكْ مْتَاعْ الأَرْضْ مِنْ عِنْدْ شْكُونْ يَاخْذُوا المَكْسْ وِالضَّرَايِبْ؟ مِنْ عِنْدْ وْلاَدْ بْلاَدْهُمْ وِلاَّ مِنْ عِنْدْ البْرَايْنِيَّة؟»

²⁶قَالْ بُطْرُسْ: «مِنْ عِنْدْ البْرَايْنِيَّة.» قَالُّو يَسُوعْ: «إِمَّالاَ، وْلاَدْ البْلاَدْ أَحْرَارْ.

²⁷آمَا أَحْنَا مَا نْحِبُّوشْ نَعْمْلُولْهُمْ مُشْكْلَة، إِمْشِي لِلبُحَيْرَة وْأَرْمِي الصُّنَّارَة، وْشِدْ الحُوتَة الِّي تُحْصُلْ لُولَى وْوَقْتِلِّي تْحِلِّلْهَا فُمّْهَا تَوْ تَلْقَى بْيَاسَة مْتَاعْ فِضَّة كَافْيَة بَاشْ تِدْفَعْ عْلِيَّ وِعْلِيكْ، هِزّْهَا وْخَلِّصْ الضَّرَايِبْ مْتَاعِي وِمْتَاعِكْ.»