Read Tunisian Arabic New Testament مَتَّى 19 Bible Online

مَتَّى 19 - Tunisian Arabic New Testament bible

مَتَّى 19

¹كِكَمِّلْ يَسُوعْ الكْلاَمْ هَاذَا مْشَى مِنْ مَنْطِقْةْ الجَلِيلْ وِدْخَلْ لْمَنْطِقْةْ اليَهُودِيَّة عْلَى طْرِيقْ الأُرْدُنْ.

²وْتَبّْعُوهْ بَرْشَة نَاسْ، وِشْفَاهُمْ الغَادِي.

³وْجَاوْهْ جْمَاعَة فَرِّيسِيِّينْ وْسِأْلُوهْ بَاشْ يْجَرّْبُوهْ: «يَاخِي حْلاَلْ بَاشْ الوَاحِدْ يْطَلِّقْ مَرْتُو لْأَيْ سْبَبْ؟»

⁴جَاوِبْهُمْ: «يَاخِي مَا قْرِيتُوشْ إِنُّو الِّي خْلَقْهُمْ فِي الأُوِّلْ خْلَقْهُمْ ذْكَرْ وْأَنْثَى .

⁵وْقَالْ: "هَاذَاكَا عْلاَشْ الرَّاجِلْ يْخَلِّي بُوهْ وْأُمُّو وْيِتْرْبَطْ بْمَرْتُو وْلِثْنِينْ يْوَلِّيوْ جَسَدْ وَاحِدْ؟"

⁶إِمَّالاَ هُومَا مَا عَادُوشْ ثْنِينْ، آمَا جَسَدْ وَاحِدْ. هَاذَاكَا عْلاَشْ الِّي يَجْمْعُو اللهْ مَا يْفَرّْقُوشْ الإِنْسَانْ.»

⁷قَالُولُو الفَرِّيسِيِّينْ: «إِمَّالاَ عْلاَشْ مُوسَى وَصَّى بَاشْ الرَّاجِلْ يَعْطِي وَرْقِةْ الطْلاَقْ لْمَرْتُو وِمْبَاعِدْ يْطَلِّقْهَا؟»

⁸قَالِلْهُمْ يَسُوعْ: «مُوسَى سْمَحِّلْكُمْ بَاشْ اطَّلْقُوا نْسَاكُمْ عْلَى خَاطِرْ رُوسْكُمْ كَاسْحَة. آمَا الحَاجَة هَاذِي مَا كَانِتْشْ فِي الأُوِّلْ كِيفْ هَكَّا.

⁹وْآنَا نْقُلْكُمْ: أَيْ وَاحِدْ يْطَلِّقْ مَرْتُو بِسْبَبْ حَاجَة أُخْرَى غِيرْ الزْنَى وْيْعَرِّسْ بِمْرَا أُخْرَى رَاهُو قَاعِدْ يَزْنَى.»

¹⁰قَالُولُو التْلاَمْذَة: «إِذَا كَانْ هَاذِي حَالِةْ الرَّاجِلْ مْعَ مَرْتُو، خِيرْلُو إِذَا كَانْ مَا يْعَرِّسْشْ.»

¹¹آمَا هُوَ قَالِلْهُمْ: «مُوشْ النَّاسْ الكُلْهُمْ يِقْبْلُوا الكْلاَمْ هَاذَا آمَا النَّاسْ الِّي اللهْ يْخَلِّيهُمْ يِقْبْلُوهْ.

¹²ثَمَّة شْكُونْ مَا يْنَجّْمُوشْ يْعَرّْسُوا مِلِّي تْوِلْدُوا مِنْ كِرْشْ أُمّْهُمْ، وْثَمَّة شْكُونْ الِّي النَّاسْ عِمْلُولْهُمْ حَاجَة رَدِّتْهُمْ مَا هُمْشْ قَادْرِينْ بَاشْ يْعَرّْسُوا، وْثَمَّة شْكُونْ مَا يْحِبُّوشْ يْعَرّْسُوا عْلَى خَاطِرْ مَمْلِكْةْ السْمَاوَاتْ. الِّي يْنَجِّمْ يَعْمِلْ الشَّيْء هَاذَا خَلِّيهْ يَعْمْلُو.»

¹³وْجَابُوا لْيَسُوعْ وْلاَدْ صْغَارْ بَاشْ يْحُطْ عْلِيهُمْ يِدُّو وِيْصَلِّيلْهُمْ. يَاخِي التْلاَمْذَة لاَمُوا عْلَى النَّاسْ الِّي جَابُوهُمْ.

¹⁴آمَا يَسُوعْ قَالْ: «خَلُّوا الصْغَارْ يْجُونِي وْمَا تْحُوزُوهُمْشْ، رَاهِي مَمْلِكْةْ السْمَاوَاتْ لِلنَّاسْ الِّي كِيفْهُمْ.»

¹⁵وْحَطْ عْلِيهُمْ يِدُّو وِمْشَى مِالبْلاَصَة هَاذِيكَا.

¹⁶وْجَاهْ وَاحِدْ وْقَالُّو: «يَا مُعَلِّمْ، شْنُوَّة الحَاجَاتْ البَاهِينْ الِّي لاَزِمْنِي نَعْمِلْهُمْ بَاشْ نَاخُذْ الحَيَاةْ الأَبَدِيَّة؟»

¹⁷قَالُّو يَسُوعْ: «عْلاَشْ تِسْإِلْ فِيَّ عْلَى الحَاجَاتْ البَاهِينْ؟ ثَمَّة وَاحِدْ بَرْكْ بَاهِي؟ إِذَا كَانْ تْحِبْ تُدْخُلْ لِلحَيَاةْ الأَبَدِيَّة أَعْمِلْ بِالوْصَايَا.»

¹⁸قَالُّو: «آنَاهُمْ الوْصَايَا؟» وْقَالْ يَسُوعْ: «مَا تُقْتُلْشْ، مَا تَزْنَاشْ، مَا تِسْرِقْشْ، مَا تِشْهِدْشْ بِالبَاطِلْ،

¹⁹إِكْرِمْ بُوكْ وْأُمِّكْ، وْيِلْزْمِكْ تْحِبْ قْرِيبِكْ كِيفْ مَا تْحِبْ رُوحِكْ.»

²⁰قَالُّو الوْلِدْ: «الحَاجَاتْ هَاذُمْ الكُلْهُمْ نَعْمِلْ فِيهُمْ، شْنُوَّة الِّي مَازَالْ نَاقِصْنِي؟»

²¹قَالُّو يَسُوعْ: «إِذَا كَانْ تْحِبْ تْوَلِّي كَامِلْ، إِمْشِي بِيعْ كُلْ مَا تِمْلِكْ وْفَرّْقُو عْلَى الفُقَرَاءْ، وْهَكَّا يْوَلِّي عِنْدِكْ كَنْزْ فِي السْمَاءْ وِمْبَاعِدْ إِيجَا وْتَبِّعْنِي!»

²²كِسْمَعْ الوْلِدْ الشَّيْء هَاذَا مْشَى حْزِينْ عْلَى خَاطْرُو كَانْ يِمْلِكْ بَرْشَة حَاجَاتْ.

²³وْقَالْ يَسُوعْ لِتْلاَمِذْتُو: «نْقُلْكُمْ الحَقْ بَاشْ يْكُونْ صْعِيبْ عْلَى رَاجِلْ غْنِي إِنُّو يُدْخُلْ لْمَمْلِكْةْ السْمَاوَاتْ!

²⁴وِنْقُلْكُمْ مَرَّة أُخْرَى: دْخُولْ الجْمَلْ فِي نُقْبَة مْتَاعْ إِبْرَة أسْهِلْ مِنْ إِنُّو وَاحِدْ غْنِي يُدْخُلْ لْمَمْلِكْةْ اللهْ.»

²⁵كِسَمْعُوا التْلاَمْذَة الكْلاَمْ هَاذَا سْتَغْرْبُوا بَرْشَة وْقَالُوا: «إِمَّالاَ شْكُونْ يْنَجِّمْ يُخْلُصْ؟»

²⁶آمَا يَسُوعْ خْزَرِّلْهُمْ وْقَالِلْهُمْ: «الشَّيْء هَاذَا مُسْتَحِيلْ عِنْدْ النَّاسْ، آمَا عِنْدْ اللهْ كُلْ شَيْء مُمْكِنْ.»

²⁷الوَقْتْ هَاذَاكَا جَاوِبْ بُطْرُسْ: «هَانَا أَحْنَا خَلِّينَا كُلْ شَيْء وْتَبِّعْنَاكْ، شْنُوَّة بَاشْ نَاخْذُوا؟»

²⁸قَالِلْهُمْ يَسُوعْ: «نْقُلْكُمْ الحَقْ: وَقْتِلِّي آنَا إِبْنْ الإِنْسَانْ نُقْعُدْ عْلَى عَرْشْ المَجْدْ مْتَاعِي فِي الدِّنْيَا الأُخْرَى، إِنْتُومَا زَادَا الِّي تَبِّعْتُونِي بَاشْ تُقْعْدُوا عْلَى ثْنَاشِنْ عَرْشْ بَاشْ تُحْكْمُوا عْلَى العْرُوشَاتْ الأَثْنَاشْ مْتَاعْ بَنِي إِسْرَائِيلْ.

²⁹وْكُلْ مِنْ خَلَّى دْيَارْ وِلاَّ إِخْوَة وِلاَّ خْوَاتْ، وِلاَّ بُو، وِلاَّ أُمْ، وِلاَّ وْلاَدْ، وِلاَّ أَرَاضِي عْلَى خَاطِرْ إِسْمِي، بَاشْ يَاخُذْ مْيَاةْ مَرَّة قَدْ الِّي خَلاَّهْ وْيُورِثْ الحَيَاةْ الأَبَدِيَّة.

³⁰وْبَرْشَة نَاسْ فِي الأُوِّلْ بَاشْ يْوَلُّوا فِي الإِخِّرْ وِالنَّاسْ الِّي فِي الإِخِّرْ بَاشْ يْوَلُّوا فِي الأُوِّلْ.»