Read Tunisian Arabic New Testament مَتَّى 20 Bible Online

مَتَّى 20 - Tunisian Arabic New Testament bible

مَتَّى 20

¹«رَاهِي مَمْلِكْةْ السْمَاوَاتْ تِشْبِهْ لْمُولَى دَارْ خْرَجْ الصْبَاحْ بِكْرِي بَاشْ يْحُطْ خَدَّامَا فِي سَانْيِةْ العْنِبْ مْتَاعُو.

²وِتْفَاهِمْ مْعَ الخَدَّامَا عْلَى دِينَارْ فِي النْهَارْ وِبْعَثْهُمْ لْسَانْيِةْ العْنِبْ.

³وِخْرَجْ مْعَ التِّسْعَة، يَاخِي شَافْ جْمَاعَة أُخْرِينْ وَاقْفِينْ فِي السُّوقْ وْبَطَّالاَ

⁴وْقَالِلْهُمْ: "إِنْتُومَا زَادَا إِمْشِيوْ لْسَانْيِةْ العْنِبْ، وْتَوْ نَعْطِيكُمْ حَقّْكُمْ، وَلاّوْ مْشَاوْ."

⁵وِخْرَجْ مَرَّة أُخْرَى تَقْرِيبْ مْعَ نُصْفْ النْهَارْ، وِمْبَاعِدْ مْعَ الثْلاَثَة مْتَاعْ العْشِيَّة، وِعْمَلْ نَفْسْ الشَّيْء.

⁶وِخْرَجْ تَقْرِيبْ مْعَ الخَمْسَة مْتَاعْ العْشِيَّة، وِلْقَى نَاسْ أُخْرِينْ قَاعْدِينْ، وْقَالِلْهُمْ: "شْبِيكُمْ قَاعْدِينْ هْنَا بَطَّالاَ النْهَارْ الكُلْ؟"

⁷قَالُولُو: "حَتَّى وَاحِدْ مَا عَيّْطِلْنَا بَاشْ نِخْدْمُوا." قَالِلْهُمْ: "إِنْتُومَا زَادَا إِمْشِيوْ اخْدْمُوا فِي سَانْيِةْ العْنِبْ."

⁸وْكِجَاتْ العْشِيَّة، قَالْ مُولَى العْنِبْ لِلِّي لاَهِي بِالخَدَّامَا: نَادِي الخَدَّامَا وْخَلِّصْهُمْ، أَبْدَى بِالإِخْرَانِينْ حَتَّى لِينْ تُوصِلْ لِلوَالَى.

⁹وْجَاوْ الجْمَاعَة الِّي بْدَاوْا يِخْدْمُوا مْعَ الخَمْسَة مْتَاعْ العْشِيَّة وْكُلْ وَاحِدْ فِيهُمْ خْذَا دِينَارْ.

¹⁰وْوَقْتِلِّي جَاوْ اللْوَالَى، مْشَى فِي بَالْهُمْ الِّي هُومَا بَاشْ يَاخْذُوا أَكْثِرْ مِالأُخْرِينْ، آمَا كُلْ وَاحِدْ فِيهُمْ خْذَا دْينَارْ.

¹¹وْوَقْتِلِّي هُومَا يُخْلْصُوا تْغَشَشُوا عْلَى مُولَى العْنِبْ،

¹²وْقَالُوا: "الإِخْرَانِينْ هَاذُومَا خِدْمُوا سَاعَة وَحْدَة، وْإِنْتِ خَلِّصْتْهُمْ كِيفْنَا أَحْنَا الِّي خْدِمْنَا النْهَارْ الكُلُّو فِي السْخَانَة!"

¹³آمَا هُوَ جَاوِبْ وَاحِدْ مِنْهُمْ: "يَا صَاحْبِي، آنَا رَانِي مَا ظْلَمْتِكْشْ. يَاخِي مُوشْ تْفَاهِمْتْ مْعَايَا عْلَى دِينَارْ؟

¹⁴خُوذْ حَقِّكْ وْإِمْشِي. آنَا حَبِّيتْ نَعْطِي لِلإِخْرَانِي هَاذَا كِيفْ مَا نَعْطِيكْ إِنْتِ،

¹⁵يَاخِي مَا عِنْدِيشْ الحَقْ بَاشْ نِتْصَرِّفْ فِي فْلُوسِي كِيفْ مَا نْحِبْ؟ وِلاَّ إِنْتِ حْسُودِي عْلَى خَاطِرْنِي آنَا كْرِيمْ؟"»

¹⁶وْقَالْ يَسُوعْ: «آمَا الإِخْرَانِينْ بَاشْ يْوَلِّيوْ لُولاَنِينْ، ولُولاَنِينْ بَاشْ يْوَلِّيوْ الإِخْرَانِينْ.»

¹⁷وْكِكَانْ يَسُوعْ طَالِعْ لْأُورْشَلِيمْ، هَزْ الأَثْنَاشِنْ تِلْمِيذْ عْلَى جْنَبْ، وْقَالِلْهُمْ فِي الطْرِيقْ:

¹⁸«هَانَا طَالْعِينْ لْأُورْشَلِيمْ، وْآنَا إِبْنْ الإِنْسَانْ بَاشْ يْسَلّْمُونِي لْرُؤَسَاءْ الكُهَّانْ وِالكُتَّابْ مْتَاعْ اليْهُودْ، وْبِشْ يُحْكْمُوا عْلِيَّ بِالمُوتْ

¹⁹وْبِشْ يْسَلّْمُونِي لِلشْعُوبْ الأُخْرِينْ، بَاشْ يِتْمَسْخْرُوا عْلِيَّ وْيَضْرْبُونِي بِالسُّوطْ وْيُصْلْبُونِي، وْبِشْ نْقُومْ فِي النْهَارْ الثَّالِثْ.»

²⁰وِمْبَاعِدْ جَاتُو مَرْةْ زَبَدِي وِمْعَاهَا وْلاَدْهَا، وْسِجْدِتْ قُدَّامُو وْطَلْبِتْ مِنُّو حَاجَة.

²¹وْقَالِلْهَا يَسُوعْ: «شْنُوَّة تْحِبْ؟» قَالِتْلُو: «أُأْمُرْ إِنُّو وْلاَدِي لِزُّوزْ هَاذُومَا يُقْعْدُوا، وَاحِدْ عْلَى يْمِينِكْ وِالآخَرْ عْلَى يْسَارِكْ فِي المَمْلْكَة مْتَاعِكْ.»

²²آمَا يَسُوعْ جَاوِبْ: «إِنْتُومَا مَا كُمْشْ عَارْفِينْ شْنُوَّة قَاعْدِينْ تُطْلْبُوا. يَاخِي تْنَجّْمُوا تُشْرْبُوا مِالكَاسْ الِّي آنَا بَاشْ نُشْرُبْ مِنْهَا؟» قَالُولُو: «انَّجّْمُوا!»

²³قَالِلْهُمْ: «إِنْتُومَا بَاشْ تُشْرْبُوا الكَاسْ مْتَاعِي، آمَا مَا نِيشْ آنَا الِّي نْقَرِرْ شْكُونْ بَاشْ يُقْعُدْ عْلَى يْمِينِي وِعْلَى يْسَارِي، آمَا رَاهُو بُويَا هُوَ الِّي حَضِّرْ نَاسْ لِلبْلاَصَة هَاذِيكَا.»

²⁴وْوَقْتِلِّي سَمْعُوا العَشْرَة تْلاَمْذَة الأُخْرِينْ الشَّيْء هَاذَاكَا، تْغَشَشُوا عْلَى الزُّوزْ إِخْوَة.

²⁵آمَا يَسُوعْ نَادَالْهُمْ بَاشْ يْجِيوْهْ وْقَالْ: «إِنْتُومَا تَعْرْفُوا الِّي الحُكَّامْ مْتَاعْ الشْعُوبْ يِتْحَكّْمُوا فِيهُمْ، وِلِّي عِنْدْهُمْ سُلْطَة يِتْسَلّْطُوا عْلِيهُمْ،

²⁶آمَا انْتُومَا لاَزِمْ مَا يْكُونِشْ مَا بِينَاتْكُمْ الشَّيْء هَاذَاكَا. آمَا الِّي يْحِبْ يْكُونْ فِيكُمْ عْظِيمْ، خَلِّيهْ يْكُونْ خَادِمْ لِيكُمْ.

²⁷وِلِّي يْحِبْ يْوَلِّي لُوِّلْ فِيكُمْ خَلِّيهْ يْكُونْ عَبْدْ لِلنَّاسْ الكُلْ.

²⁸حَتَّى مِنِّي آنَا إِبْنْ الإِنْسَانْ مَا جِيتِشْ بَاشْ النَّاسْ يِخْدْمُونِي، آمَا بَاشْ نِخْدِمْهُمْ وْنَعْطِي حْيَاتِي بَاشْ نِفْدِي بِيهَا بَرْشَة مِنْهُمْ.»

²⁹وْوَقْتِلِّي يَسُوعْ وِتْلاَمِذْتُو خَارْجِينْ مِنْ أَرِيحَا، بَرْشَة نَاسْ تَبّْعُوهْ.

³⁰وْثَمَّة زُوزْ رْجَالْ عِمْيَانْ قَاعْدِينْ بِجْنَبْ الطْرِيقْ وْسَمْعُوا الِّي يَسُوعْ مِتْعَدِّي مِنْ غَادِي يَاخِي بْدَاوْا يْصِيحُوا: «يَا سِيدْنَا، يَا وِلْدْ دَاوُدْ أَرْحِمْنَا!»

³¹يَاخِي النَّاسْ صَاحُوا عْلِيهُمْ بَاشْ يُسْكْتُوا. آمَا هُومَا صَاحُوا أَكْثِرْ: «يَا سِيدْنَا، يَا وِلْدْ دَاوُدْ أَرْحِمْنَا!»

³²وِوْقُفْ يَسُوعْ وْنَادَالْهُمْ وْقَالِلْهُمْ: «شْنُوَّة تْحِبُّونِي نَعْمْلِلْكُمْ؟»

³³قَالُولُو: «يَا سِيدْنَا، نْحِبُّوا نَرْجْعُوا نْشُوفُوا!»

³⁴وْحَنْ عْلِيهُمْ يَسُوعْ وْمَسِّلْهُمْ عِينِيهُمْ، وْبِالوَقْتْ وَلاَّوْ يْشُوفُوا وْتَبّْعُوهْ.