Read Tunisian Arabic New Testament مَتَّى 21 Bible Online

مَتَّى 21 - Tunisian Arabic New Testament bible

مَتَّى 21

¹وْكِي قْرُبْ يَسُوعْ وِتْلاَمِذْتُو لْأُورْشَلِيمْ وْوُصْلُوا لْقَرْيِةْ بِيتْ فَاجِي الِّي بِحْذَا جْبَلْ الزِّيتُونْ، الوَقْتْ هَاذَاكَا بْعَثْ يَسُوعْ زُوزْ تْلاَمْذَة،

²وْقَالِلْهُمْ: «إِمْشِيوْ لِلقَرْيَة الِّي مْقَابْلِتْكُمْ، تَوْ تَلْقَاوْ بْهِيمَة مَرْبُوطَة وِمْعَاهَا جَحْشْ، حِلُّولْهُمْ الرْبَاطْ وْجِيبُوهُمْلِي.

³وْإِذَا كَانْ أَيْ وَاحِدْ يْقُلْكُمْ حَاجَة، جَاوْبُوهْ: "الرَّبْ حَاجْتُو بِيهُمْ." وْتَوْ يَبْعِثْهُمْ.

⁴الشَّيْء هَاذَا وْقَعْ بَاشْ يْتِمْ الِّي قَالُو النَّبِي:

⁵قُولُوا لْبِنْتْ صِهْيُونْ: هَاوْ المَلِكْ مْتَاعِكْ جَايِكْ مِتْوَاضَعْ وْرَاكِبْ عْلَى بْهِيمَة وِعْلَى جَحْشْ وِلْدْ بْهِيمَة.»

⁶مْشَاوْ الزُّوزْ تْلاَمْذَة وْعَمْلُوا كِيفْ مَا أْمَرْهُمْ يَسُوعْ

⁷وْجَابُوا البْهِيمَة وِالجَّحْشْ وْحَطُّوا عْلِيهُمْ كْبَابِطْهُمْ وِرْكِبْ يَسُوعْ.

⁸وْأَغْلَبِيِّةْ النَّاسْ فِرْشُوا كْبَابِطْهُمْ فِي الطْرِيقْ، وْأُخْرِينْ قَصُّوا عِيدَانْ مْتَاعْ شَجَرْ وْحَطُّوهُمْ فِي الطْرِيقْ.

⁹وِالنَّاسْ الِّي سِبْقُوهْ وِلِّي يْتَبّْعُوا فِيهْ يْنَادِيوْ: أُوصَنَّا لْوِلْدْ دَاوُدْ! مُبَارَكْ إِلِّي جَايْ بْإِسْمْ الرَّبْ! أُوصَنَّا فِي الأَعَالِي!

¹⁰وْكِدْخَلْ يَسُوعْ لْأُورْشَلِيمْ خَاضِتْ المْدِينَة الكُلْهَا وْسِأْلِتْ: «شْكُونُو هَاذَا؟»

¹¹وْقَالُوا النَّاسْ: «هَاذَا النَّبِي يَسُوعْ الِّي مِالنَّاصْرَة الِّي فِي الجَلِيلْ.»

¹²وِدْخَلْ يَسُوعْ لِلهَيْكِلْ مْتَاعْ اللهْ وْطَرِّدْ الِّي يْبِيعُوا وْيِشْرِيوْ فِي وُسْطْ الهَيْكِلْ الكُلْهُمْ، وِقْلِبْ الطْوَاوِلْ مْتَاعْ الِّي يْصَرّْفُوا فِي الفْلُوسْ وِالكْرَاسِي مْتَاعْ الِّي يْبِيعُوا فِي الحْمَامْ،

¹³وْقَالِلْهُمْ: «مَكْتُوبْ فِي الكْتَابْ المُقَدَّسْ: بِيتِي تِتْسَمَّى بِيتْ الصَّلاَةْ، وْإِنْتُومَا رَدِّيتُوهَا دَامُوسْ السُّرَّاقْ!»

¹⁴وْجَاوْهْ العِمْيَانْ وِالعِيَّابْ لِلهَيْكِلْ وْهُوَ شْفَاهُمْ.

¹⁵آمَا رُؤَسَاءْ الكُهَّانْ وِالكُتَّابْ مْتَاعْ اليْهُودْ تْغَشَشُوا وَقْتِلِّي شَافُوا المُعْجْزَاتْ الِّي عْمَلْهَا يَسُوعْ وْكِيفَاشْ الوْلاَدْ الصْغَارْ يْنَادِيوْ فِي الهَيْكِلْ: «أُوصَنَّا لْوِلْدْ دَاوُدْ!»

¹⁶وْقَالُولُو: «يَاخِي تِسْمَعْ فِيهُمْ آشْ قَاعْدِينْ يْقُولُوا؟» قَالِلْهُمْ يَسُوعْ: «إِي نْعَمْ، يَاخِي عْمُرْكُمْ مَا قْرِيتُوا الآيَة هَاذِي: "خَرِّجْتْ كْلاَمْ فِيهْ شُكْرْ للهْ مِنْ افَّامْ الصْغَارْ وِلِّي مَا زَالُوا يَرْضْعُوا؟"»

¹⁷وْخَلاَّهُمْ وِخْرَجْ البَرَّة مِالمْدِينَة لْبِيتْ عَنْيَا وْبَاتْ الغَادِي.

¹⁸وْوَقْتِلِّي كَانْ رَاجِعْ لِلمْدِينَة فِي الصْبَاحْ، يَسُوعْ جَاعْ

¹⁹وْشَافْ كَرْمَة عْلَى جْنَبْ الطْرِيقْ يَاخِي مْشَالْهَا، وْمَا لْقَى فِيهَا كَانْ الوْرَقْ وْقَالِلْهَا: «عُمْرِكْ مَا تْجِيبِي الغَلَّة لِلأَبَدْ!» وْيِبْسِتْ الكَرْمَة بِالوَقْتْ.

²⁰تْعَجّْبُوا التْلاَمْذَة كِشَافُوا الشَّيْء الِّي جْرَى وْقَالُوا: «عْلاَشْ الكَرْمَة يِبْسِتْ بِالوَقْتْ؟»

²¹وْجَاوِبْهُمْ يَسُوعْ: «نْقُلْكُمْ الحَقْ، إِذَا كَانْ عِنْدْكُمْ إِيمَانْ وْمَا تْشِكُّوشْ جِمْلَة، مَا كُمْشْ بَاشْ تَعْمْلُوا الشَّيْء الِّي تِعْمَلْ لِلكَرْمَة آكَاهُو، آمَا رَاكُمْ بَاشْ تْقُولُوا حَتَّى لِلجْبَلْ: "اتْقَلِّعْ وْطِيحْ فِي البْحَرْ!" وْرَاهُو الشَّيْء هَاذَاكَا بَاشْ يَاقَعْ.

²²أَيْ حَاجَة تُطْلْبُوهَا فِي الصَّلاَةْ، امّْنُوا الِّي إِنْتُومَا خْذِيتُوهاَ تَوْ تَاخْذُوهَا.»

²³وْكِدْخَلْ يَسُوعْ لِلهَيْكِلْ، جَاوْهْ رُؤَسَاءْ الكُهَّانْ وِالشْيُوخْ مْتَاعْ الشَّعْبْ وَقْتِلِّي هُوَ يْعَلِّمْ وْقَالُوا: «بْأَيْ سُلْطَة قَاعِدْ تَعْمِلْ فِي الشَّيْء هَاذَا؟ وِشْكُونْ عْطَاكْ السُّلْطَة هَاذِي؟»

²⁴جَاوِبْهُمْ يَسُوعْ: «آنَا زَادَا بَاشْ نِسْإِلْكُمْ سُؤَالْ وَاحِدْ، إِذَا كَانْ تْجَاوْبُونِي عْلِيهْ، تَوْ نْقُلْكُمْ حَتّى آنَا بْأَيْ سُلْطَة آنَا قَاعِدْ نَعْمِلْ فِي الشَّيْء هَاذَا:

²⁵مْنِينْ جَاتْ المَعْمُودِيَّة مْتَاعْ يُوحَنَّا؟ مِالسْمَاءْ وِلاَّ مِنْ عِنْدْ النَّاسْ؟» يَاخِي تْفَاهْمُوا مَا بِينَاتْهُمْ: «إِذَا كَانْ نْقُولُوا: "مِالسْمَاءْ" بَاشْ يْقُلْنَا: "إِمَّالاَ عْلاَشْ مَا امِّنْتُوشْ بِيهْ؟"

²⁶آمَا إِذَا كَانْ نْقُولُوا: "مِنْ عِنْدْ النَّاسْ." نْخَافُوا مِالنَّاسْ عْلَى خَاطِرْهُمْ الكُلْهُمْ مِتْأَكّْدِينْ الِّي يُوحَنَّا نَبِي.»

²⁷إِمَّالاَ جَاوْبُوا يَسُوعْ: «مَا نَعْرْفُوشْ.» وْقَالِلْهُمْ يَسُوعْ: «حَتَّى آنَا مَا نْقُلْكُمْشْ بْأَيْ سُلْطَة نَعْمِلْ فِي الشَّيْء هَاذَا.»

²⁸«شْنُوَّة رَايْكُمْ؟ ثَمَّة رَاجِلْ عَنْدُو زُوزْ وْلاَدْ. مْشَى لِلأَوِّلْ وْقَالُّو: "يَا وِلْدِي، إِمْشِي إِخْدِمْ اليُومْ فِي سَانْيِةْ العْنِبْ."

²⁹يَاخِي جَاوْبُو وِلْدُو: "مَا نِيشْ مَاشِي." آمَا مْبَاعِدْ نْدِمْ وِمْشَى.

³⁰وِمْشَى لْوِلْدُو الآخَرْ وْقَالُّو نَفْسْ الشَّيْء الِّي قَالُو لْوِلْدُو الأُوِّلْ، يَاخِي جَاوْبُو: "هَانِي مَاشِي، يَا سِيدِي!" آمَا مَا مْشَاشْ.

³¹آنَاهُو مِالزُّوزْ الإِخْوَة الِّي عْمَلْ الشَّيْء الِّي يْحِبْ عْلِيهْ بُوهْ؟» قَالُولُو الشْيُوخْ: «الأُوِّلْ.» قَالِلْهُمْ يَسُوعْ: «نْقُولِلْكُمْ الحَقْ: الِّي يْلِمُّوا فِي الضَّرَايِبْ وِالنْسَاء الفَاسْدِينْ قَاعْدِينْ يُدْخْلُوا قْبَلْكُمْ لْمَمْلِكْةْ اللهْ.

³²جَاكُمْ يُوحَنَّا كِيفْ رَاجِلْ بَارْ يَاخِي مَا امِّنْتُوشْ بِيهْ آمَا الِّي يْلِمُّوا فِي الضَّرَايِبْ وِالنْسَاء الفَاسْدِينْ امّْنُوا بِيهْ. وْحَتَّى وَقْتِلِّي شُفْتُوا الشَّيْء هَاذَاكَا مَا تُبْتُوشْ وْمَا امِّنْتُوشْ بِيهْ.»

³³«اسْمْعُوا مَثَلْ آخَرْ: كَانْ ثَمَّة رَاجِلْ زْرَعْ سَانْيَة مْتَاعْ عْنِبْ، وْدَوِّرْهَا بْسُورْ وِبْنَى فِيهَا مَعْصْرَة وِعْمَلْ فِيهَا نَاظُورْ وِمْبَاعِدْ كْرَاهَا لِجْمَاعَة خَمَّاسَا وْسَافِرْ لِبْلاَدْ أُخْرَى.

³⁴وْكِقْرُبْ الوَقْتْ الِّي يْطِيبْ فِيهْ العْنِبْ، بْعَثْ الخُدَّامْ مْتَاعُو لِلخَمَّاسَا بَاشْ يَبْعْثُولُو الصَّابَة.

³⁵وْشَدُّوا الخَمَّاسَا الخُدَّامْ مْتَاعُو وْضَرْبُوا وَاحِدْ مِنْهُمْ، وقَتْلُوا الآخَرْ، وْرَجْمُوا وَاحِدْ آخَرْ بِالحْجَرْ.

³⁶وِبْعَثْ مُولَى العْنِبْ خُدَّامْ مَرَّة أُخْرَى أَكْثِرْ مِلِّي بْعَثْهُمْ المَرَّة الأُولَى، يَاخِي عَمْلُوا فِيهُمْ نَفْسْ الشَّيْء.

³⁷مْبَاعِدْ بْعَثِّلْهُمْ وِلْدُو وْقَالْ: "تَوْ يْقَدّْرُوا وِلْدِي."

³⁸آمَا وَقْتِلِّي الخَمَّاسَا شَافُوا الوْلَدْ قَالُوا لِبْعَضْهُمْ: "هَاذَا هُوَ الِّي بَاشْ يُورِثْ! إِيجَاوْ نُقْتْلُوهْ ونَاخْذُوا الوَرْثَة مْتَاعُو!"

³⁹وْشَدُّوهْ وْخَرّْجُوهْ البَرَّا مِنْ سَانْيِةْ العْنِبْ وْقَتْلُوهْ.

⁴⁰إِمَّالاَ وَقْتِلِّي يْجِي مُولَى السَّانْيَة مْتَاعْ العْنِبْ آشْ بَاشْ يَعْمِلْ فِي الخَمَّاسَا هَاذُوكُمْ؟»

⁴¹قَالُولُو شْيُوخْ اليْهُودْ: «بَاشْ يُقْتُلْ هَاكَا الأَشْرَارْ وْيَعْطِي سَانْيِةْ العْنِبْ لْخَمَّاسَا أُخْرِينْ الِّي بَاشْ يَعْطُوهْ الصَّابَة مْتَاعْ العْنِبْ فِي وَقْتْهَا.»

⁴²قَالِلْهُمْ يَسُوعْ: «يَاخِي عْمُرْكُمْ مَا قْرِيتُوا فِي الكْتَابْ المُقَدَّسْ: الحَجْرَة الِّي رَفْضُوهَا البَنَّايَا وَلاَّتْ حَجْرِةْ السَّاسْ. الرَّبْ عْمَلْ الشَّيْء هَاذَا، وْهُوَ عْجِيبْ فِي عِينِينَا.

⁴³هَاذَاكَا عْلاَشْ نْقُلْكُمْ: مَمْلِكْةْ اللهْ بَاشْ تِتْفَكِّلْكُمْ وْتِتْعْطَى لْشَعْبْ يَعْمْلُوا الثَّمَرْ مْتَاعْهَا.»

⁴⁴[رَانِي آنَا إِبْنْ الإِنْسَانْ جِيتْ بَاشْ نْخَلِّصْ الضَّايْعِينْ.]

⁴⁵وْوَقْتِلِّي سَمْعُوا رُؤَسَاءْ الكُهَّانْ وِالفَرِّيسِيِّينْ الأَمْثَالْ هَاذُومَا، فِهْمُوا الِّي هُوَ كَانْ يَحْكِي عْلِيهُمْ هُومَا.

⁴⁶آمَا كِحَاوْلُوا بَاشْ يْشِدُّوهْ، خَافُوا مِالنَّاسْ، عْلَى خَاطِرْهُمْ كَانُوا يِعْتَبْرُوهْ نَبِي.