Read Tunisian Arabic New Testament مَتَّى 22 Bible Online

مَتَّى 22 - Tunisian Arabic New Testament bible

مَتَّى 22

¹وْكَلِّمْهُمْ يَسُوعْ مَرَّة أُخْرَى بِالأَمْثَالْ وْقَالْ:

²«مَمْلِكْةْ السْمَاوَاتْ تِشْبِهْ لْمَلِكْ عْمَلْ سَهْرِيَّة فِي العِرْسْ مْتَاعْ وِلْدُو.

³وِبْعَثْ الخُدَّامْ بَاشْ يْنَادِي لِلمِسْتَدْعِينْ لِلسَّهْرِيَّة مْتَاعْ العِرْسْ، آمَا هُومَا مَا جَاوْشْ.

⁴وِبْعَثْ خُدَّامْ أُخْرِينْ مَرَّة أُخْرَى وْقَالْ: "قُولُوا لِلمِسْتَدْعِينْ: هَانِي حَضِّرْتْ عْشَايَا وِذْبَحْتْ الثِّيرَانْ وِالبْقَرْ السْمِينْ وْكُلْ شَيْء حْضَرْ، إِيجَاوْ لِلسَّهْرِيَّة مْتَاعْ العِرْسْ!"

⁵آمَا هُومَا مَا عَمْلُوشْ حْسَابْ لِلسَّهْرِيَّة وِمْشَاوْ عْلَى رْوَاحْهُمْ، وَاحِدْ مْشَى لِلسَّانْيَة مْتَاعُو، وْوَاحِدْ مْشَى لْحَانُوتُو،

⁶وِالأُخْرِينْ شَدُّوا الخُدَّامْ مْتَاعُو وْهَانُوهُمْ وْقَتْلُوهُمْ.

⁷تْغَشِشْ المَلِكْ وِبْعَثْ الجُنُودْ مْتَاعُو وِقْتَلْ المْجَرّْمَة هَاذُوكُمْ وِحْرَقِّلْهُمْ مْدِينِتْهُمْ.

⁸وِمْبَاعِدْ قَالْ لِلخُدَّامْ مْتَاعُو: "السَّهْرِيَّة حَضْرِتْ آمَا المِسْتَدْعِينْ مَا يِسْتَاهْلُوشْ،

⁹إِمَّالاَ إِمْشِيوْ لِلشْوَارِعْ وِاسْتَدْعُوا قَدْ مَا تْنَجّْمُوا النَّاسْ لِلسَّهْرِيَّة مْتَاعْ العِرْسْ."

¹⁰وِالخُدَّامْ هَاذُوكُمْ خَرْجُوا لِلطْرِيقْ وْجَابُوا النَّاسْ البَاهِينْ والخَايْبِينْ الكُلْهُمْ، يَاخِي تِمْلاَتْ بِيتْ العِرْسْ بِالضْيُوفْ.

¹¹آمَا وَقْتِلِّي جَا المَلِكْ بَاشْ يْشُوفْ الضْيُوفْ، شَافْ رَاجِلْ مُوشْ لاَبِسْ كِسْوَة الْعِرْسْ. يَاخِي قَالُّو:

¹²"كِيفَاشْ دْخَلْتْ لِهْنَا وْمَاكِشْ لاَبِسْ لِبْسِةْ العِرْسْ؟" يَاخِي الرَّاجِلْ سْكِتْ.

¹³وَقْتْهَا قَالْ المَلِكْ لِلخُدَّامْ: "كَتّْفُوهْ مِنْ يْدِيهْ وْسَاقِيهْ وْأُرْمِيوْهْ البَرَّة فِي الظْلاَمْ وِالغَادِي بَاشْ يْكُونْ البْكَاءْ وْغَزَّانْ السِّنِّينْ."

¹⁴رَاهُمْ بَرْشَة نَاسْ مِسْتَدْعِينْ، آمَا شْوَيَّة بَرْكْ مُخْتَارِينْ.»

¹⁵الوَقْتْ هَاذَاكَا مْشَاوْ الفَرِّيسِيِّينْ وِتْفَاهْمُوا كِيفَاشْ يْحَصّْلُوا يَسُوعْ بْكِلْمَة.

¹⁶وْبِعْثُولُو التْلاَمْذَة مْتَاعْهُمْ وِمْعَاهُمْ جْمَاعَة مِنْ حِزْبْ هِيرُودُسْ وْقَالُولُو: «يَا مُعَلِّمْ، أَحْنَا نَعْرْفُوا الِّي إِنْتِ صَادِقْ، وِتْعَلِّمْ فِي طْرِيقْ اللهْ بِالحَقْ، وْمَا تْحَابِيشْ حَتَّى حَدْ، عْلَى خَاطْرِكْ مَا تْرَاعِيشْ مْقَامَاتْ النَّاسْ.

¹⁷قُولِلْنَا: شْنُوَّة رَايِكْ؟ يَاخِي حْلاَلْ بَاشْ نَدْفْعُوا الضَّرَايِبْ لِلقَيْصَرْ وِلاَّ لاَ؟»

¹⁸آمَا يَسُوعْ فَاقْ بِالخُبْثْ مْتَاعْهُمْ، وْقَالِلْهُمْ: «يَا مُنَافْقِينْ! عْلاَشْ تْجَرّْبُوا فِيَّ؟

¹⁹وَرِّيوْنِي الفْلُوسْ مْتَاعْ الضَّرَايِبْ!» يَاخِي جَابُولُو دِينَارْ.

²⁰قَالِلْهُمْ يَسُوعْ: «مْتَاعْ شْكُونْ التَّصْوِيرَة هَاذِي وِالإِسْمْ هَاذَا؟»

²¹قَالُوا: «مْتَاعْ القَيْصَرْ!»، قَالِلْهُمْ: «إِمَّالاَ، أَعْطِيوْ الحَاجَاتْ مْتَاعْ القَيْصَرْ لِلقَيْصَرْ، وِالحَاجَاتْ مْتَاعْ اللهْ للهْ!»

²²وِتْعَجّْبُوا وَقْتِلِّي سَمْعُوا الكْلاَمْ هَاذَاكَا، وْخَلَّاوْهْ وِمْشَاوْ.

²³فِي النْهَارْ هَاذَاكَا بِيدُو جاوْ الصَّدُّوقِيِّينْ لْيَسُوعْ وْهُومَا الِّي يْقُولُوا الِّي مَا ثَمَّاشْ قْيَامَة بَعْدْ المُوتْ، وْسِأْلُوهْ سُؤَالْ

²⁴وْقَالُوا: «يَا مُعَلِّمْ، مُوسَى قَالْ: "إِذَا كَانْ وَاحِدْ يْمُوتْ وْمَا عِنْدُوشْ وْلاَدْ، يِلْزِمْ خُوهْ يْعَرِّسْ بْمَرْتُو وِيْجِيبْ وْلاَدْ لْخُوهْ."

²⁵وْتَوَّا كَانُوا ثَمَّة سَبْعَة إِخْوَة مَا بِينَاتْنَا، وْعَرِّسْ الخُو الأُوُّلْ وْمَاتْ مِنْ غِيرْ مَا يْجِيبْ وْلاَدْ، وْمَرْتُو خْذَاهَا خُوهْ.

²⁶وِجْرَى نَفْسْ الشَّيْء لِلثَّانِي وِالثَّالِثْ حَتَّى لِلخُو السَّابِعْ.

²⁷وِمْبَعْدْهُمْ الكُلْ زَادِتْ مَاتِتْ المْرَا.

²⁸إِمَّالاَ فِي يُومْ القْيَامَة المْرَا هَاذِيكَا بَاشْ تْكُونْ مَرْةْ شْكُونْ فِيهُمْ، عْلَى خَاطِرْهَا عَرّْسِتْ بِيهُمْ الكُلْهُمْ.»

²⁹جَاوِبْهُمْ يَسُوعْ: «إِنْتُومَا غَالْطِينْ، عْلَى خَاطِرْكُمْ مَا فْهِمْتُوشْ الكْتَابْ المُقَدَّسْ وْقُدْرِةْ اللهْ.

³⁰فِي يُومْ القْيَامَة رَاهُمْ لاَ يْعَرّْسُوا وْلاَ يْعَرّْسُوا بِيهُمْ، آمَا يْكُونُوا كِيفْ المْلاَيْكَة الِّي فِي السْمَاء.

³¹وْكَانْكُمْ عْلَى القْيَامَة مْتَاعْ المُوتَى، يَاخِي مَا قْرِيتُوشْ شْنُوَّة قَلْكُمْ اللهْ:

³²"آنَا إِلاَهْ إِبْرَاهِيمْ، وْإِلاَهْ إِسْحَاقْ، وْإِلاَهْ يَعْقُوبْ؟" هُوَ مُوشْ إِلاَهْ المُوتَى، هُوَ إِلاَهْ الحَيِّينْ.»

³³وْكِسَمْعُوا النَّاسْ الكْلاَمْ هَاذَاكَا، تْعَجّْبُوا مِالتَّعْلِيمْ مْتَاعُو.

³⁴آمَا كِسَمْعُوا الفَرِّيسِيِّينْ الِّي هُوَ سَكِّتْ الصَّدُّوقِيِّينْ، جَاوْ مْعَ بْعَضْهُمْ.

³⁵وْوَاحِدْ مِنْهُمْ وْهُوَ مِنْ عُلَمَاءْ الشَّرِيعَة سِأْلُو سُؤَالْ بَاشْ يْجَرّْبُو:

³⁶«يَا مُعَلِّمْ، آنَاهِي أَكْبِرْ وْصِيَّة فِي الشَّرِيعَة؟»

³⁷جَاوْبُو يَسُوعْ: «حِبْ الرَّبْ إِلاَهِكْ بْقَلْبِكْ الكُلُّو، وِبْرُوحِكْ الكُلُّو، وِبْعَقْلِكْ الكُلُّو.

³⁸هَاذِي أَوِّلْ وأَكْبِرْ وْصِيَّة.

³⁹وِالوْصِيَّة الثَّانْيَة كِيفْهَا، حِبْ قْرِيبِكْ كِيفْ مَا تْحِبْ رُوحِكْ.

⁴⁰الشَّرِيعَة الكُلْهَا وِالأَنْبِيَاءْ مِبْنِيِّينْ عْلَى الزُّوزْ وْصَايَا هَاذُومَا.»

⁴¹وَقْتِلِّي كَانُوا الفَرِّيسِيِّينْ مُجْتَمْعِينْ مْعَ بْعَضْهُمْ سْإِلْهُمْ يَسُوعْ سُؤَالْ:

⁴²«شْنُوَّة رَايْكُمْ فِي المَسِيحْ؟ هُوَ وِلْدْ شْكُونْ؟» قَالُولُو: «وِلْدْ دَاوُدْ!»

⁴³قَالِلْهُمْ: «إِمَّالاَ دَاوُدْ كِيفَاشْ يْنَادِيلُو "الرَّبْ" وَقْتِلِّي وْحَالُو الرُّوحْ وْقَالْ:

⁴⁴قَالْ رَبِّي لْرَبِّي: أُقْعُدْ عْلَى يْمِينِي حَتَّى لِينْ نْحُطْ أَعْدَاءِكْ تَحْتْ سَاقِيكْ.

⁴⁵إِذَا كَانْ دَاوُدْ يْنَادِيلُو "رَبّْنَا"، إِمَّالاَ كِيفَاشْ يْكُونْ وِلْدُو؟»

⁴⁶وْحَتَّى وَاحِدْ مَا كَانْ يْنَجِّمْ يْجَاوْبُو بْكِلْمَة. وْمِنْ النْهَارْ هَاذَاكَا حَتَّى وَاحِدْ مَا تْشَجَّعْ بَاشْ يِسْأْلُوا أَيْ سُؤَالْ.