Read Tunisian Arabic New Testament مَتَّى 23 Bible Online

مَتَّى 23 - Tunisian Arabic New Testament bible

مَتَّى 23

¹وِمْبَاعِدْ قَالْ يَسُوعْ لِلنَّاسْ وْلِتْلاَمِذْتُو:

²«الكُتَّابْ مْتَاعْ اليْهُودْ وِالفَرِّيسِيِّينْ قَاعْدِينْ عْلَى الكُرْسِي مْتَاعْ مُوسَى،

³إِمَّالاَ أَعْمْلُوا وْأَحْفْظُوا كُلْ حَاجَة يْقُولُولْكُمْ عْلِيهَا. آمَا مَا تَعْمْلُوشْ كِيفْ مَا يَعْمْلُوا هُومَا، عْلَى خَاطِرْهُمْ يْقُولُوا وْمَا يَعْمْلُوشْ:

⁴يْحُطُّوا فِي حِمْلْ رْزِينْ عْلَى كْتَافْ النَّاسْ، آمَا هُومَا مَا يْمِسُّوهِشْ بِصْبُعْهُمْ.

⁵يَعْمْلُوا الحَاجَاتْ الكُلْ بَاشْ تْشُوفْهُمْ النَّاسْ، يْكَبّْرُوا فِي عْمَايِمْهُمْ وِيْطَوّْلُوا فِي ثْرَابِلْ لِبْسِتْهُمْ،

⁶وِيْحِبُّوا يُقْعْدُوا فِي البْقَايِعْ الأُولَى فِي السَّهْرِيَّاتْ وِالكْرَاسِي الأُولَى فِي المَجَامِعْ

⁷وِيْحِبُّوا النَّاسْ يْسَلْمُوا عْلِيهُمْ فِي الأَسْوَاقْ، وِيْنَادُولْهُمْ: "يَا مُعَلّْمِينْ"

⁸آمَا إِنْتُومَا مَا تْخَلِّيوْشْ حَتَّى حَدْ يْنَادِيلْكُمْ: "يَا مُعَلّْمِينْ"، عْلَى خَاطِرْكُمْ الكُلْكُمْ إِخْوَة وْعِنْدْكُمْ مُعَلِّمْ وَاحِدْ.

⁹وْمَا تْقُولُوشْ لْحَتَّى وَاحِدْ فِي الأَرْضْ "يَا بُونَا"، عْلَى خَاطِرْ عِنْدْكُمْ بُو وَاحِدْ الِّي هُوَ فِي السْمَاءْ.

¹⁰وْمَا تْخَلِّيوْشْ حَتَّى وَاحِدْ يْقُلْكُمْ: "يَا سْيَادِي" عْلَى خَاطِرْ عِنْدْكُمْ سِيدْ وَاحِدْ الِّي هُوَ المَسِيحْ.

¹¹وْخَلِّي كْبِيرْكُمْ يِخْدِمْكُمْ

¹²الِّي يْطَلِّعْ مِنْ رُوحُو يَهْبِطْ، وِلِّي يِتْوَاضِعْ يِتْرْفَعْ.

¹³آمَا يَا وِيلْكُمْ يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! تْسَكّْرُوا فِي مَمْلِكْةْ السْمَاوَاتْ فِي وْجُوهْ العْبَادْ، لاَ دْخَلْتُوا وْلاَ خَلِّيتُوا الدَّاخْلِينْ يُدْخْلُوا.

¹⁴[يَا وِيلْكُمْ يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! تِتْحَيّْلُوا عْلَى النْسَاء الِّي رْجَالْهُمْ مُوتَى وْتَاخْذُولْهُمْ دْيَارْهُمْ وْتِحْسْبُوا رْوَاحْكُمْ اطَّوْلُوا فِي الصَّلاَةْ، هَاذَاكَا عْلاَشْ بَاشْ يْكُونْ حْسَابْكُمْ كْبِيرْ قُدَّامْ رَبِّي.]

¹⁵يَا وِيلْكُمْ يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! تْشُقُّوا البَرْ وِالبْحَرْ بَاشْ ادَّخْلُوا وَاحِدْ لْدِينْكُمْ، وْكِيُدْخُلْ، تْرُدُّوهْ مِسْتَاهِلْ جْهَنِّمْ قَدّْكُمْ مَرّْتِينْ!

¹⁶يَا وِيلْكُمْ يَا شْيُوخْ يَا عِمْيَانْ! الِّي تْقُولُوا: "الِّي يِحْلِفْ بِالهَيْكِلْ مُوشْ مَلْزُومْ بِيْمِينُو، آمَا الِّي يِحْلِفْ بِالذْهَبْ مْتَاعْ الهَيْكِلْ رَاهُو مَلْزُومْ بِيْمِينُو."

¹⁷آنَا هُو الِّي عَنْدُو قِيمَة أَكْثِرْ، يَا جُهَّالْ وْيَا عِمْيَانْ؟ الذْهَبْ وِلاَّ الهَيْكِلْ الِّي رَدْ الذْهَبْ مُقَدَّسْ؟

¹⁸وِتْقُولُوا: "الِّي يِحْلِفْ بِالمَذْبَحْ مُوشْ مَلْزُومْ بْحَتَّى شَيْء، آمَا الِّي يِحْلِفْ بِالقُرْبَانْ الِّي فُوقْ المَذْبِحْ رَاهُو مَلْزُومْ بِيْمِينُو."

¹⁹آنَا هُو الِّي عَنْدُو قِيمَة أَكْثِرْ، يَا عِمْيَانْ؟ القُرْبَانْ وِلاَّ المَذْبَحْ الِّي يْرُدْ القُرْبَانْ مُقَدَّسْ؟

²⁰إِمَّالاَ الِّي يِحْلِفْ بِالمَذْبَحْ رَاهُو حْلِفْ بِيهْ وبِالشَّيْء الِّي فُوقُو الكُلُّو!

²¹وِلِّي يِحْلِفْ بِالهَيْكِلْ رَاهُو يِحْلِفْ بِيهْ وْبِلِّي سَاكِنْ فِيهْ،

²²وِلِّي يِحْلِفْ بِالسْمَاءْ يِحْلِفْ بِالعَرْشْ وبِالله الِّي قَاعِدْ عْلَى الْعَرْشْ.

²³يَا وِيلْكُمْ يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! تَعْطِيوْ العْشُرْ مْتَاعْ النِّعْنَاعْ وِالشِّبْتْ وِالكَمُّونْ، وْهَمِّلْتُوا أَهَمْ الحَاجَاتْ الِّي فِي الشَّرِيعَة الِّي هُومَا العَدْلْ، الرَّحْمَة وِالإِيمَانْ، كَانْ لاَزِمْ عْلِيكُمْ تَعْمْلُوا هَاذُومَا وْمَا تْخَلِّيوْشْ آذُوكُمْ.

²⁴يَلِّي تْقُودُوا فِي النَّاسْ يَا عِمْيَانْ! تْصَفُّوا المَاء مِالنَّامُوسَة وْتَبْلْعُوا الجْمَلْ.

²⁵يَا وِيلْكُمْ يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! تَغْسْلُوا الكَاسْ وِالصْحَنْ مِنْ بَرَّا، وْمِنْ دَاخِلْ مِلْيَانِينْ بِالخَطْفَة وِالطْمَعْ.

²⁶يَا الفَرِّيسِي يَا أَعْمَى! إِغْسِلْ فِي الأُوِّلْ الكَاسْ وِالصْحَنْ مِنْ دَاخِلْ بَاشْ مِنْ بَرَّا زَادَا يْكُونْ نْظِيفْ.

²⁷يَا وِيلْكُمْ يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! كِيفْ القْبُورْ الِّي مَدْهُونَة بِالأَبْيِضْ، الِّي مِنْ بَرَّة تْبَانْ مِزْيَانَة آمَا مِنْ دَاخِلْ مِلْيَانَة بِعْظَامْ المُوتَى وِالحَاجَاتْ المَنْزُوسَة الكُلْهَا.

²⁸وْإِنْتُومَا زَادَا، مِنْ بَرَّة تُظْهْرُوا لِلنَّاسْ أَبْرَارْ وْمِنْ دَاخِلْ مِلْيَانِينْ بِالنِّفَاقْ وِالشَّرْ.

²⁹يَا الكُتَّابْ مْتَاعْ اليْهُودْ وْيَا الفَرِّيسِيِّينْ المُنَافْقِينْ! تِبْنِيوْ فِي قْبُورْ الأَنْبِيَاءْ وِتْزَيّْنُوا فِي القْبُبْ مْتَاعْ الأَبْرَارْ،

³⁰وِتْقُولُوا: "كَانْ جِينَا مُوجُودِينْ فِي وَقْتْ جْدُودْنَا، تَالِي رَانَا مَا شَارِكْنَاهُمْشْ فِي قَتْلاَنْ الأَنْبِيَاءْ."

³¹هَاكُمْ تِشْهْدُوا عْلَى رْوَاحْكُمْ الِّي إِنْتُومَا وْلاَدْ الِّي قَتْلُوا الأَنْبِيَاءْ.

³²إِمَّالاَ إِنْتُومَا وَفُّوا المِيزَانْ مْتَاعْ جْدُودْكُمْ

³³يَا وْلاَدْ اللْفَاعِي، كِيفَاشْ بَاشْ تُهْرْبُوا مِنْ الحُكْمْ مْتَاعْ عْذَابْ جْهَنِّمْ

³⁴هَاذَاكَا عْلاَشْ آنَا نَبْعْثِلْكُمْ أَنْبِيَاءْ وْنَاسْ حُكَمَاءْ وْكُتَّابْ، ثَمَّة شْكُونْ مِنْهُمْ الِّي بَاشْ تُقْتْلُوهُمْ وْتُصْلْبُوهُمْ، وْثَمَّة شْكُونْ مِنْهُمْ الِّي بَاشْ تَضْرْبُوهُمْ بِالسُّوطْ فِي المَجَامِعْ مْتَاعْكُمْ وِتْحَاوْزُوهُمْ مِنْ مْدِينَة لِمْدِينَة،

³⁵بَاشْ يْجِي عْلِيكُمْ كُلْ دَمْ طَاهِرْ جْرَى عْلَى الأَرْضْ، مِنْ دَمْ هَابِيلْ البَرِيءْ لْدَمْ زَكَرِيَّا وِلْدْ بَرَخِيَّا الِّي قْتَلْتُوهْ مَا بِينْ الهَيْكِلْ وِالمَذْبَحْ.

³⁶نْقُلْكُمْ الحَقْ: الحَاجَاتْ الخَايْبِينْ هَاذُومَا الكُلْهُمْ بَاشْ يْجِيوْ عْلَى الجِيلْ هَاذَا!»

³⁷«يَا أُورْشَلِيمْ، يَا أُورْشَلِيمْ، يَلِّي تُقْتُلْ فِي الأَنْبِيَاءْ وْتُرْجُمْ فِي المَبْعُوثِينْ لِيهَا، قَدَّاشْ مِنْ مَرَّة حَبِّيتْ نْلِمْ وْلاَدِكْ مْعَ بْعَضْهُمْ كِيفْ مَا الدْجَاجَة تْلِمْ الفْلاَلِسْ مْتَاعْهَا تَحْتْ جْوَانِحْهَا. آمَا إِنْتُومَا مَا حَبِّيتُوشْ

³⁸هَايْ دَارْكُمْ بَاشْ تَبْقَالْكُمْ خِرْبَة.

³⁹رَانِي نْقُلْكُمْ: مَا عَادِشْ بَاشْ تْشُوفُونِي حَتَّى لِينْ يْجِي الوَقْتْ الِّي تْقُولُوا فِيهْ: "مُبَارَكْ الِّي جَايْ بْإِسْمْ الرَّبْ!"»