Read Tunisian Arabic New Testament مَتَّى 24 Bible Online

مَتَّى 24 - Tunisian Arabic New Testament bible

مَتَّى 24

¹خْرَجْ يَسُوعْ مِالهَيْكِلْ. جَاوْهْ تْلاَمِذْتُو وْوَرَّاوْهْ البَنْيْ مْتَاعْ الهَيْكِلْ

²قَالِلْهُمْ: «شُفْتُوا هَاذَا الكُلُّو؟ نْقُلْكُمْ الحَقْ: حَتَّى حَجْرَة لِهْنَا مَا هِي بَاشْ تَبْقَى فُوقْ أُخْتْهَا، الكُلُّو بَاشْ يْطِيحْ.»

³وَقْتِلِّي كَانْ قَاعِدْ فِي جْبَلْ الزِّيتُونْ، جَاوْهْ تْلاَمِذْتُو عْلَى جْنَبْ وْقَالُولُو: «قُلْنَا وَقْتَاشْ بَاشْ يَاقَعْ الشَّيْء هَاذَا وِشْنُوَّة الأَمَارَة مْتَاعْ جَيَّانِكْ وِمْتَاعْ آخِرْ الزْمَانْ؟»

⁴جَاوِبْهُمْ يَسُوعْ: «رُدُّوا بَالْكُمْ وْمَا تْخَلِّيوْشْ حَتَّى وَاحِدْ يْغَلِّطْكُمْ.

⁵رَاهُمْ بَرْشَة نَاسْ بَاشْ يْجِيوْ بْإِسْمِي، وِيْقُولُوا: "آنَا هُوَ المَسِيحْ!" وِيْغَلّْطُوا بَرْشَة نَاسْ.

⁶وْوَقْتِلِّي تِسْمْعُوا بِحْرُوبْ قْرِيبَة وِحْرُوبْ فِي بْلاَيِصْ بْعِيدَة مَا تْخَافُوشْ. رَاهُو الشَّيْء هَاذَا يِلْزْمُو يَاقَعْ، آمَا مَا هِيشْ هَاذِيكَا النْهَايَة.

⁷رَاهُو شَعْبْ بَاشْ يْجِي ضِدْ شَعْبْ، وْمَمْلْكَة ضِدْ مَمْلْكَة، وْبِشْ يَاقَعْ جُوعْ وِزْلاَزِلْ فِي بَرْشَة بْلاَيِصْ.

⁸هَاذَا الكُلُّو مَا هُو إِلاَّ أَوِّلْ الوْجَايِعْ مْتَاعْ الوْلاَدَة.

⁹وِالوَقْتْ هَاذَاكَا بَاشْ يْضَايْقُوكُمْ وْيُقْتْلُوكُمْ. وِالشْعُوبْ الكُلْهُمْ بَاشْ يَكْرْهُوكُمْ عْلَى خَاطِرْ إِسْمِي.

¹⁰وِالوَقْتْ هَاذَاكَا بَرْشَة نَاسْ بَاشْ يْبَطّْلُوا مَا عَادِشْ يْوَلِّيوْ مُؤْمْنِينْ، وِيْخُونُوا بْعَضْهُمْ وْيَكْرْهُوا بْعَضْهُمْ.

¹¹ويَظْهْرُوا بَرْشَة أَنْبِيَاءْ كَذَّابِينْ وِيْغَلّْطُوا بَرْشَة نَاسْ.

¹²وِالأَغْلَبِيَّة مْتَاعْ النَّاسْ مَا عَادِشْ بَاشْ تْوَلِّي عِنْدْهُمْ مْحَبَّة، عْلَى خَاطِرْ الشَّرْ بَاشْ يُكْثُرْ.

¹³آمَا الِّي يِثْبِتْ لِلإِخْرْ رَاهُو بَاشْ يُخْلُصْ.

¹⁴وِالإِنْجِيلْ مْتَاعْ مَمْلِكْةْ اللهْ هَاذِي بَاشْ يِتْخَبِّرْ بِيهْ فِي العَالَمْ الكُلُّو، شْهَادَة لِلشْعُوبْ الكُلْهُمْ وِمْبَاعِدْ تْجِي النْهَايَة.»

¹⁵«إِمَّالاَ وَقْتِلِّي تْشُوفُوا "نْجَاسِةْ الخْرَابْ" الِّي حْكَى عْلِيهَا النَّبِي دَانْيَالْ قَايْمَة فِي البْلاَصَة المُقَدّْسَة (بَاشْ الِّي يَقْرَى يِفْهِمْ).

¹⁶الوَقْتْ هَاذَاكَا خَلِّي الِّي هُومَا فِي اليَهُودِيَّة يُهْرْبُوا لِلجْبَالْ.

¹⁷وْخَلِّي الِّي فُوقْ السْطَحْ، مَا يَهْبِطْشْ الُّوطَا بَاشْ يْهِزْ الحَاجَاتْ الِّي فِي دَارُو.

¹⁸وْخَلِّي الِّي فِي السَّانْيَة مَا يَرْجَعْشْ بَاشْ يْهِزْ كَبُّوطُو.

¹⁹وْيَا وِيلْهُمْ الحْبَالَى وِلِّي يْرَضّْعُوا فِي النْهَارَاتْ هَاذُوكُمْ.

²⁰اطْلْبُوا مِنْ رَبِّي إِنّْكُمْ تُهْرْبُوا فِي نْهَارْ مُوشْ شْتَاءْ وِلاَّ سِبْتْ.

²¹عْلَى خَاطِرْ فِي الوَقْتْ هَاذَاكَا بَاشْ يْكُونْ ثَمَّة ضِيقْ كْبِيرْ، مَا وْقَعْشْ كِيفُو مِنْ أَوِّلْ الدِّنْيَا لْتَوَّا.

²²وْإذَا كَانْ اللهْ مَا قَصِّرْشْ فِي النْهَارَاتْ هَاذُوكُمْ، تَالِي رَاهُو مَا نْجَى حَتَّى بَشَرْ. آمَا هُوَ قَصِّرْ فِيهُمْ عْلَى خَاطِرْ النَّاسْ الِّي خْتَارْهُمْ.

²³وِالوَقْتْ هَاذَاكَا إِذَا كَانْ وَاحِدْ قَالِلْكُمْ: "هَا هُوَ المَسِيحْ هْنَا" وِلاَّ "هَاوِّينُو لْغَادِي" مَا تْصَدّْقُوهِشْ!

²⁴رَاهُو بَاشْ يُظْهْرُوا بَرْشَة نَاسْ كِيفْ المَسِيحْ الدَّجَّالْ وْأَنْبِيَاءْ كَذَّابِينْ، يَعْمْلُوا حَاجَاتْ عْظِيمَة وِعْجَايِبْ بَاشْ يْغَلّْطُوا بِيهَا، حَتَّى النَّاسْ المُخْتَارِينْ، إِذَا كَانْ مُمْكِنْ.

²⁵هَانِي نَبِّهْتْكُمْ مِنْ قْبَلْ.

²⁶إِمَّالاَ إِذَا كَانْ يْقُولُولْكُمْ: "هَا هُوَ المَسِيحْ فِي الخْلاَء!" مَا تُخْرْجُوشْ، إِذَا كَانْ يْقُولُولْكُمْ: "هَا هُوَ فِي البْيُوتْ الدَّخْلاَنِيَّة" مَا تْصَدّْقُوشْ!

²⁷رَاهُو كِيفْ مَا البَرْقْ يِلْمَعْ مِالشَّرقْ وْيِضْوِي فِي إِخْرْ الغَرْبْ هَكَّا يْكُونْ جَيَّانِي آنَا إِبْنْ الإِنْسَانْ.

²⁸وْوِينْ تْكُونْ ثَمَّة جِيفَة تِتْلَمْ النْسُورَا.»

²⁹«وْفِي وَقْتْ المْصَايِبْ هَاذُوكُمْ، الشَّمْسْ تْوَلِّي ظَلْمَة وْيِتْحْجِبْ ضَوْ القَمْرَة. النْجُومْ بَاشْ اطِّيحْ مِالسْمَاءْ، وْتِتْزَلْزِلْ القُوَّاتْ الِّي فِي السْمَاءْ.

³⁰وِالوَقْتْ هَاذَاكَا بَاشْ تُظْهُرْ الأَمَارَة مْتَاعِي آنَا إِبْنْ الإِنْسَانْ فِي السْمَاءْ، وِالعْرُوشَاتْ مْتَاعْ الأَرْضْ الكُلْهُمْ بَاشْ يْنَوّْحُوا، وْبِشْ يْشُوفُونِي آنَا إِبْنْ الإِنْسَانْ جَايْ فِي سْحَابْ السْمَاءْ بْقُوَّة وِبْمَجْدْ عْظِيمْ.

³¹وْبِشْ نَبْعِثْ المْلاَيْكَة مْتَاعِي يْنَادِيوْ بْبُوقْ صُوتُو عَالِي وْبِشْ يْلِمُّوا الِّي خْتَرْتْهُمْ مِنْ الجِيهَاتْ الأَرْبْعَة مْتَاعْ الرِّيحْ مِنْ إِخْرْ الدِّنْيَا لْإِخْرْ السْمَاءْ.»

³²خُوذُوا العِبْرَة مِالكَرْمَة: دُوبْ مَا عِيدَانْهَا تِخْضَارْ وْتَعْمِلْ الوْرَقْ، تَعْرْفُوا الِّي الصِّيفْ قْرُبْ.

³³وْإِنْتُومَا زَادَا كِتْشُوفُوا الحَاجَاتْ هَاذِي قَاعْدَة تَاقَعْ، تَعْرْفُوا الِّي آنَا قْرِيبْ عْلَى الأَبْوَابْ.

³⁴نْقُلْكُمْ الحَقْ: الجِيلْ هَاذَا مُوشْ بَاشْ يُوفَى حَتَّى لِينْ تَاقَعْ الحَاجَاتْ هَاذِي الكُلْهَا.

³⁵السْمَاءْ وِالأَرْضْ بَاشْ يَفْنَاوْ آمَا كْلاَمِي عُمْرُو مَا يِفْنَى.

³⁶«آمَا اليُومْ هَاذَاكَا وِالسَّاعَة هَاذِيكَا حَتَّى وَاحِدْ مَا يَعْرِفْهُمْ، لاَ المْلاَيْكَة الِّي فِي السْمَاءْ وْلاَ الإِبْنْ، آمَا كَانْ الآبْ وَحْدُو يَعْرِفْهُمْ.

³⁷كِيفْ مَا وْقَعْ فِي زْمَانْ نُوحْ، هَكَّا بَاشْ يَاقَعْ كِنْجِي آنَا إِبْنْ الإِنْسَانْ.

³⁸رَاهُو كِيفْ مَا النَّاسْ كَانُوا فِي النْهَارَاتْ هَاذُوكُمْ قْبَلْ الفَيَضَانَاتْ يَاكْلُوا وْيُشْرْبُوا وِيْعَرّْسُوا، حَتَّى لِينْ دْخَلْ نُوحْ لِلسْفِينَة.

³⁹وْمَا كَانُوشْ فِي بَالْهُمْ بْحَتَّى شَيْء حَتَّى لِينْ جَاتْ الفَيَضَانَاتْ وْهَزِّتْهُمْ الكُلْهُمْ. هَكَّاكَا بَاشْ يَجْرَى وَقْتِلِّي نْجِي آنَا إِبْنْ الإِنْسَانْ:

⁴⁰الوَقْتْ هَاذَاكَا بَاشْ يْكُونُوا زُوزْ رْجَالْ فِي السَّانْيَة، وَاحِدْ يِتْهَزْ وْوَاحِدْ يَبْقَى.

⁴¹وْزُوزْ نْسَاء قَاعْدِينْ عْلَى الرْحَى يِرْحِيوْ فِي القَمْحْ، وَحْدَة تِتْهَزْ وِالأُخْرَى تَبْقَى.

⁴²فِيقُوا، رَاكُمْ مَا تَعْرْفُوشْ عْلَى النْهَارْ الِّي بَاشْ يْجِي فِيهْ رَبّْكُمْ.

⁴³آمَا أَعْرْفُوا الشَّيْء هَاذَا، كَانْ جَا مُولَى الدَّارْ يَعْرِفْ وَقْتَاشْ بَاشْ يِدْهْمُوا عْلِيهْ السُّرَّاقْ، تَالِي رَاهُو سْهَرْ وْمَا خَلاَّشْ دَارُو تِتْسْرِقْ.

⁴⁴هَاذَاكَا عْلاَشْ إِنْتُومَا زَادَا حَضّْرُوا رْوَاحْكُمْ، رَانِي آنَا إِبْنْ الإِنْسَانْ بَاشْ نْجِي فِي سَاعَة مَا تْجِيشْ عْلَى بَالْكُمْ.»

⁴⁵«شْكُونُو الخْدِيمْ الثِّيقَة وِلِّي يَعْرِفْ كِيفَاشْ يِتْصَرِّفْ وِلِّي سِيدُو وَكّْلُو عْلَى دَارُو بَاشْ يَعْطِيهُمْ المَاكْلَة مْتَاعْهُمْ فِي وَقْتْهَا؟

⁴⁶صَحَّة لِيهْ هَاكَا الخْدِيمْ كِيَرْجَعْ سِيدُو وْيَلْقَاهْ خْدِمْ خِدْمْتُو.

⁴⁷نْقُلْكُمْ الحَقْ: رَاهُو بَاشْ يْوَكّْلُو عْلَى أَمْلاَكُو الكُلْهَا.

⁴⁸آمَا إِذَا كَانْ الخْدِيمْ هَاذَا طْلَعْ شِرِّيرْ وْقَالْ بِينُو وْبِينْ رُوحُو: "سِيدِي بَاشْ يَرْجَعْ امَّخَّرْ"

⁴⁹وِبْدَا يُضْرُبْ فِي الخُدَّامْ الأُخْرِينْ وْيَاكُلْ وْيُشْرُبْ مْعَ السُّكَّارْجِيَّة،

⁵⁰سِيدُو بَاشْ يَرْجَعْ فِي نْهَارْ مَا يْجِيشْ عْلَى بَالُو وْفِي سَاعَة مَا يَعْرِفْهَاشْ،

⁵¹بَاشْ يْقَطّْعُو تَقْطِيعْ وِيْحُطُّو فِي البْلاَصَة الِّي مَاشِينْ لِيهَا المُنَافْقِينْ. وِينْ بَاشْ يْكُونْ البْكَاءْ وْغَزَّانْ السِّنِّينْ.»