Read Tunisian Arabic New Testament مَتَّى 25 Bible Online

مَتَّى 25 - Tunisian Arabic New Testament bible

مَتَّى 25

¹«إِمَّالاَ مَمْلِكْةْ السْمَاوَاتْ تِشْبِهْ لْعَشْرَة صْبَايَا هَزُّوا الفْنَارَاتْ مْتَاعْهُمْ وِمْشَاوْ بَاشْ يْعَرّْضُوا لِلعْرِيسْ.

²خَمْسَة مِنْهُمْ كَانُوا حَكِيمَاتْ وْخَمْسَة كَانُوا جَاهْلَاتْ.

³وَقْتِلِّي الْجَاهْلاَتْ هَزُّوا الفْنَارَاتْ مْتَاعْهُمْ، مَا هَزُّوشْ مْعَاهُمْ الزِّيتْ.

⁴آمَا الْحَكِيمَاتْ هَزُّوا ابَّادِنْ مْتَاعْ زِيتْ مْعَ الفْنَارَاتْ مْتَاعْهُمْ.

⁵وْكِبْطَى العْرِيسْ، الكُلْهُمْ هَزّْهُمْ النُّومْ وْرَقْدُوا.

⁶آمَا فِي نُصْفْ اللِّيلْ سَمْعُوا صْيَاحْ: "رَاهُو العْرِيسْ جَا، أُخْرْجُوا بَاشْ تْقَابْلُوهْ!"

⁷يَاخِي الصْبَايَا الكُلْهُمْ قَامُوا وْشَعّْلُوا فْنَارَاتْهُمْ.

⁸وْقَالِتْ الْجَاهْلاَتْ لِلْحَكِيمَاتْ: "أَعْطِيوْنَا شْوَيَّة مِالزِّيتْ مْتَاعْكُمْ، عْلَى خَاطِرْ فْنَارَاتْنَا بَاشْ تِطْفَى."

⁹آمَا الحَكِيمَاتْ جَاوْبُوا: "مُمْكِنْ مُوشْ بَاشْ يِكْفِينَا وْيِكْفِيكُمْ، إِمْشِيوْ لِلِّي يْبِيعُوا فِي الزِّيتْ وْإِشْرِيوْ الِّي تِحْتَاجُولُو."

¹⁰وْوَقْتِلِّي هُومَا مَاشِينْ بَاشْ يِشْرِيوْ، وْصُلْ العْرِيسْ. وْدَخْلُوا مْعَاهْ الصْبَايَا الحَاضْرِينْ لِلدَّارْ الِّي فِيهَا العِرْسْ وِتْسَكِّرْ البَابْ.

¹¹وِمْبَاعِدْ جَاوْ الصْبَايَا الأُخْرِينْ زَادَا وْقَالُوا لِلعْرِيسْ: "يَا سِيدْنَا، يَا سِيدْنَا، حِلِّلْنَا البَابْ!"

¹²آمَا هُوَ جَاوِبْهُمْ: "نْقُلْكُمْ الحَقْ: آنَا مَا نَعْرِفْكُمْشْ."

¹³إِمَّالاَ، حَضّْرُوا رْوَاحْكُمْ، عْلَى خَاطِرْكُمْ لاَ تَعْرْفُوا لاَ اليُومْ وْلاَ السَّاعَة.»

¹⁴«رَاهِي مَمْلِكْةْ السْمَاوَاتْ تِشْبِهْ لْرَاجِلْ حَبْ يْسَافِرْ، يَاخِي نَادَى لِلخُدَّامْ مْتَاعُو وِعْطَاهُمْ فْلُوسُو

¹⁵عْطَى لْكُلْ وَاحِدْ مِنْهُمْ عْلَى قَدْرْ طَاقْتُو، عْطَى لْوَاحِدْ خَمْسَة صْرُرْ مْتَاعْ ذْهَبْ، وِلْوَاحِدْ آخَرْ زُوزْ صْرُرْ مْتَاعْ ذْهَبْ، وْوَاحِدْ آخَرْ صُرَّة وَحْدَة وْسَافِرْ.

¹⁶الِّي خْذَا الخَمْسَة صْرُرْ مْشَى فِيسَعْ وْتَاجِرْ بِيهُمْ، وِرْبِحْ خَمْسَة صْرُرْ أُخْرِينْ.

¹⁷وِلِّي خْذَا زُوزْ صْرُرْ زَادَا، رْبِحْ زُوزْ صْرُرْ أُخْرِينْ.

¹⁸آمَا الِّي خْذَا صُرَّة وَحْدَة، مْشَى وِحْفِرْ فِي الأَرْضْ وْخَبَّى الفْلُوسْ مْتَاعْ سِيدُو.

¹⁹وْبَعْدْ مُدَّة طْوِيلَة، رْجَعْ سِيدْ الخُدَّامْ هَاذُوكُمْ وْحَاسِبْهُمْ.

²⁰وْجَا الِّي خْذَا الخَمْسَة صْرُرْ، وْجَابْ خَمْسَة صْرُرْ زَايْدِينْ وْقَالْ: "يَا سِيدِي، عْطِيتْنِي خَمْسَة صْرُرْ، هَانِي رْبِحْتْ خَمْسَة صْرُرْ أُخْرِينْ."

²¹قَالُّو سِيدُو: "صَحِّيتْ، يَا خْدِيمْ يَا صَالِحْ وْيَا ثِيقَة! كُنْتْ ثِيقَة فِي القْلِيلْ، هَانِي بَاشْ نِمّْنِكْ عْلَى الْكْثِيرْ: ادْخُلْ لِلنَّعِيمْ مْتَاعْ سِيدِكْ."

²²وِلِّي خْذَا الزُّوزْ صْرُرْ جَا هُوَ زَادَا، وْقَالْ: "يَا سِيدِي، إِنْتِ عْطِيتْنِي زُوزْ صْرُرْ، هَانِي رْبِحْتْ زُوزْ صْرُرْ أُخْرِينْ."

²³قَالُّو سِيدُو: "صَحِّيتْ، يَا خْدِيمْ يَا صَالِحْ وْيَا ثِيقَة! كُنْتْ ثِيقَة فِي الْقْلِيلْ، هَانِي بَاشْ نِمّْنِكْ عْلَى الْكْيِيرْ: ادْخُلْ لِلنَّعِيمْ مْتَاعْ سِيدِكْ."

²⁴وِلِّي خْذَا صُرَّة وَحْدَة هُوَ زَادَا جَا، وْقَالْ: "يَا سِيدِي، آنَا عْرَفْتْ الِّي إِنْتِ رَاجِلْ قَاسِي، تَحْصِدْ الِّي مَا زْرَعْتُوشْ، وتْلِمْ الِّي مَا غْرِسْتُوشْ،

²⁵يَاخِي خُفْتْ، وِمْشِيتْ وخَبِّيتْ الصُّرَّة مْتَاعِكْ فِي التْرَابْ، وْهَايْ فْلُوسِكْ."

²⁶آمَا سِيدُو جَاوْبُو: "يَا خْدِيمْ يَا شِرِّيرْ وْيَا بُخْلِي! كِعْرَفْتْ الِّي آنَا نَحْصِدْ الشَّيْء الِّي مَا زْرَعْتُوشْ ونْلِمْ الشَّيْء الِّي مَا غْرِسْتُوشْ،

²⁷كَانْ لاَزْمِكْ تْحُطْ فْلُوسِي فِي البَانْكَا، وْكِنَرْجَعْ نَاخُذْهَا مْعَ الفَايْدَة.

²⁸وْقَالْ لِلخُدَّامْ مْتَاعُو: خُوذُوا مِنْ عَنْدُو الصُّرَّة وْأَعْطِيوْهَا لِلِّي عَنْدُو العَشْرَة صْرُرْ،

²⁹رَاهُو الِّي عَنْدُو، بَاشْ يِتْزَادْلُو وِيْوَلِّي عَنْدُو بَرْشَة. آمَا الِّي مَا عَنْدُو حَتَّى شَيْء، حَتَّى الِّي عَنْدُو بَاشْ يِتْفَكّْلُو.

³⁰وِالخْدِيمْ الِّي مَا فِيهِشْ حَتَّى فَايْدَة، ارْمِيوْهْ البَرَّة فِي الظْلاَمْ. وِينْ بَاشْ يْكُونْ البْكَاءْ وْغَزَّانْ السِّنِّينْ."»

³¹«وَقْتِلِّي نْجِي آنَا إِبْنْ الإِنْسَانْ فِي مَجْدِي، وِيْجِيوْ مْعَايَا المْلاَيْكَة الكُلْهُمْ الوَقْتْ هَاذَاكَا نُقْعُدْ فِي العَرْشْ المَجِيدْ مْتَاعِي،

³²وْيِتْلَمُّوا قُدَّامِي الشْعُوبْ الكُلْهُمْ، وْنِفْرِزْهُمْ مِنْ بْعَضْهُمْ كِيفْ مَا السَّارِحْ يِفْرِزْ الغْنَمْ مِالمْعِيزْ،

³³وْبِشْ نْحُطْ الغْنَمْ عْلَى يْمِينِي آمَا المْعِيزْ نْحُطْهُمْ عْلَى يْسَارِي.

³⁴وِمْبَاعِدْ بَاشْ نْقُولْ آنَا المَلِكْ لِلِّي عْلَى يْمِينِي: "إِيجَاوْ، يَلِّي بَارِكْكُمْ بَابَا، أُورْثُوا المَمْلْكَة الِّي تْعَمْلِتْ لِيكُمْ مِلِّي تْخَلْقِتْ الدِّنْيَا،

³⁵عْلَى خَاطِرْنِي كُنْتْ جِيعَانْ وْإِنْتُومَا وَكِّلْتُونِي، كُنْتْ عَطْشَانْ وْإِنْتُومَا رْوِيتُونِي، كُنْتْ غْرِيبْ وْإِنْتُومَا سَكِّنْتُونِي،

³⁶كُنْتْ عِرْيَانْ وْإِنْتُومَا لَبِّسْتُونِي، كُنْتْ مْرِيضْ وْإِنْتُومَا زُرْتُونِي، كُنْتْ مَرْبُوطْ وْإِنْتُومَا جِيتُونِي."

³⁷الوَقْتْ هَاذَاكَا يْجَاوْبُونِي الأَبْرَارْ: "يَا رَبْ، وَقْتَاشْ شُفْنَاكْ جِيعَانْ وْوَكِّلْنَاكْ؟ وِلاَّ عَطْشَانْ وِرْوِينَاكْ؟

³⁸وْوَقْتَاشْ شُفْنَاكْ غْرِيبْ وْسَكِّنَّاكْ؟ وِلاَّ عِرْيَانْ وْلَبِّسْنَاكْ؟

³⁹وْوَقْتَاشْ شُفْنَاكْ مْرِيضْ وِلاَّ مَرْبُوطْ وْزُرْنَاكْ؟"

⁴⁰وْآنَا المَلِكْ بَاشْ نجَاوِبْهُمْ: "نْقُلْكُمْ الحَقْ فِي كُلْ مَرَّة عْمَلْتُوا الشَّيْء هَاذَاكَا مْعَ وَاحِدْ مِنْ إِخْوْتِي الصْغَارْ هَاذُومَا، رَاكُمْ عْمَلْتُوهْ مْعَايَا آنَا!"

⁴¹وِمْبَاعِدْ بَاشْ نْقُولْ لِلِّي عْلَى يْسَارِي: "إِبْعْدُونِي، يَا مَلْعُونِينْ، إِمْشيِوْ لِلنَّارْ الِّي تْعَمْلِتْ لِبْلِيسْ وِالمْلاَيْكَة مْتَاعُو لِلأَبَدْ:

⁴²رَانِي كُنْتْ جِيعَانْ وْمَا وَكِّلْتُونِيشْ، كُنْتْ عَطْشَانْ وْمَا رْوِيتُونِيشْ،

⁴³وْكُنْتْ غْرِيبْ وْمَا سَكِّنْتُونِيشْ، عِرْيَانْ وْمَا لَبِّسْتُونِيشْ، مْرِيضْ وْمَرْبُوطْ وْمَا زُرْتُونِيشْ."

⁴⁴وْهُومَا زَادَا بَاشْ يجَاوْبُوا: "يَا رَبْ، وَقْتَاشْ شُفْنَاكْ جِيعَانْ وِلاَّ عَطْشَانْ، غْرِيبْ وِلاَّ عِرْيَانْ، مْرِيضْ وِلاَّ مَرْبُوطْ، وْمَا عَاوِنَّاكِشْ؟"

⁴⁵وْآنَا بَاشْ نجَاوِبْهُمْ: "نْقُلْكُمْ الحَقْ فِي كُلْ مَرَّة مَا عْمَلْتُوشْ الشَّيْء هَاذَاكَا مْعَ وَاحِدْ مِنْ إِخْوْتِي الصْغَارْ هَاذُومَا، رَاكُمْ مَا عْمَلْتُوهِشْ مْعَايَا آنَا."

⁴⁶وْهُومَا بَاشْ يِمْشِيوْ يِتْعَذّْبُوا لِلأَبَدْ، آمَا الأَبْرَارْ بَاشْ يِمْشِيوْ لِلحَيَاةْ الأَبَدِيَّة.»