Read Tunisian Arabic New Testament مَتَّى 26 Bible Online

مَتَّى 26 - Tunisian Arabic New Testament bible

مَتَّى 26

¹وَقْتِلِّي يَسُوعْ كَمِّلْ الكْلاَمْ هَاذَا الكُلُّو، قَالْ لِتْلاَمِذْتُو:

²«إِنْتُومَا تَعْرْفُوا الِّي عِيدْ الفِصْحْ بَاشْ يْجِي بَعْدْ نْهَارِينْ، وْآنَا إِبْنْ الإِنْسَانْ بَاشْ يْسَلّْمُونِي بَاشْ نِتْصْلَبْ.»

³وِالوَقْتْ هَاذَاكَا تْلَمُّوا رُؤَسَاءْ الكُهَّانْ وِالشْيُوخْ مْتَاعْ الشَّعْبْ فِي دَارْ قَيَافَا رَئِيسْ الكُهَّانْ،

⁴وتْشَاوْرُوا مْعَ بْعَضْهُمْ بَاشْ يَعْمْلُوا حِيلَة يْشِدُّوا بِيهَا يَسُوعْ وْيُقْتْلُوهْ.

⁵آمَا قَالُوا: «مَا نْشِدُّوهِشْ فِي العِيدْ، بَاشْ مَا تْوَلِّيشْ خُوضَة فِي وُسْطْ الشَّعْبْ.»

⁶تَوَّا وَقْتِلِّي كَانْ يَسُوعْ فِي بِيتْ عَنْيَا فِي دَارْ سِمْعَانْ الأَبْرِصْ،

⁷جَاتُو مْرَا وْفِي يْدِيهَا دَبُّوزَة مْتَاعْ عِطْرْ غَالِي بَرْشَة، وْصَبَّاتُو فُوقْ رَاسُو وَقْتِلِّي هُوَ يَاكُلْ.

⁸آمَا وَقْتِلِّي شَافُوهَا التْلاَمْذَة، تْغَشَشُوا وْقَالُوا: «عْلاَشْ التَّبْذِيرْ هَاذَا؟

⁹العِطْرْ هَاذَا كَانْ يْنَجِّمْ يِتْبَاعْ ابَّرْشَة فْلُوسْ، وْتِتْعْطَى لِلفُقَرَاءْ!»

¹⁰آمَا يَسُوعْ عْرَفْ الشَّيْء هَاذَا وْقَالِلْهُمْ: «عْلاَشْ تْقَلّْقُوا فِي المْرَا؟ رَاهِي عَمْلِتْ مْعَايَا حَاجَة بَاهْيَة.

¹¹الفُقَرَاءْ دِيمَا مْعَاكُمْ، آمَا آنَا مَا نِيشْ بَاشْ نْكُونْ مْعَاكُمْ دِيمَا.

¹²وْإِذَا كَانْهَا صَبِّتْ العِطْرْ عْلَى بَدْنِي، رَاهِي بَاشْ تْحَضِّرْنِي لِلدْفِينَة.

¹³نْقُلْكُمْ الحَقْ: وِينْ بَاشْ يِتْبَشِّرْ بِالإِنْجِيلْ هَاذَا فِي الدِّنْيَا الكُلْهَا، بَاشْ يِتْحْكَى عَلِّي عِمْلاَتُو المْرَا هَاذِي، بَاشْ النَّاسْ دِيمَا يِذَّكْرُوهَا.»

¹⁴الوَقْتْ هَاذَاكَا وَاحِدْ مِالأَثْنَاشِنْ تِلْمِيذْ، وِلِّي كَانْ إِسْمُو يَهُوذَا الإِسْخَرْيُوطِي، مْشَى لْرُؤَسَاءْ الكُهَّانْ

¹⁵وْقَالِلْهُمْ: «شْنُوَّة بَاشْ تَعْطِيوْنِي كِنْخُونُو؟» وِعْطَاوْهْ ثْلاَثِينْ قَطْعَة مْتَاعْ فِضَّة.

¹⁶وْمِالوَقْتْ هَاذَاكَا بْدَا يِسْتَنَّى فِي فُرْصَة بَاشْ يْخُونُو.

¹⁷وْتَوَّا فِي النْهَارْ الأُوِّلْ مْتَاعْ عِيدْ الفْطِيرْ جَاوْ التْلاَمْذَة لْيَسُوعْ وْقَالُولُو: «تْحِبّْنَا نْحَضّْرُولِكْ عْشَاء الفِصْحْ بَاشْ تَاكْلُو؟»

¹⁸قَالِلْهُمْ: «ثَمَّة وَاحِدْ فِي المْدِينَة إِمْشِيوْ قُولُولُو: "المُعَلِّمْ يْقُولْ: سَاعْتِي جَاتْ، بَاشْ نَاكُلْ عْشَاء الفِصْحْ فِي دَارِكْ مْعَ تْلاَمِذْتِي."»

¹⁹وْعَمْلُوا التْلاَمْذَة كِيفْ مَا قَالِلْهُمْ يَسُوعْ وْحَضّْرُوا عْشَاء الفِصْحْ.

²⁰وْفِي العْشِيَّة، قْعَدْ يَسُوعْ بَاشْ يَاكُلْ هُوَ وِتْلاَمِذْتُو الأَثْنَاشْ.

²¹وْوَقْتِلِّي كَانُوا يَاكْلُوا، قَالْ يَسُوعْ: «نْقُلْكُمْ الحَقْ: وَاحِدْ مِنْكُمْ بَاشْ يْخُونِّي.»

²²وْحِزْنُوا بَرْشَة وِبْدَاوْا يْقُولُولُو بِالوَاحِدْ بِالوَاحِدْ: «يَاخِي آنَا هُوَ، يَا رَبْ؟»

²³جَاوِبْهُمْ: «الِّي حَطْ يِدُّو فِي الصْحَنْ مْعَايَا هُوَ الِّي بَاشْ يْخُونِّي.

²⁴رَانِي آنَا إِبْنْ الإِنْسَانْ لاَزِمْنِي نْمُوتْ كِيفْ مَا تِكْتِبْ عْلِيَّ فِي الكْتَابْ المُقَدَّسْ وْيَا وِيلُو الرَّاجِلْ الِّي بَاشْ يْخُونِّي! الرَّاجِلْ هَاذَاكَا خِيرْلُو لُوكَانْ مَا تُولِدْشْ.»

²⁵سِأْلُو يَهُوذَا الِّي خَانُو: «يَاخِي آنَا هُوَ، يَا مُعَلِّمْ؟» جَاوْبُو يَسُوعْ: «إِنْتِ قُلْتْ.»

²⁶وْوَقْتِلِّي كَانُوا يَاكْلُوا، خْذَا يَسُوعْ خُبْزَة وْبَارِكْ وِقْسِمْ وِعْطَى لِتْلاَمِذْتُو وْقَالْ: «خُوذُوا كُولُوا، هَاذَا بَدْنِي.»

²⁷وِخْذَا كَاسْ وْكِشْكَرْ عْطَاهُمْ وْقَالْ: «أُشْرْبُوا مِنُّو الكُلْكُمْ.

²⁸رَاهُو هَاذَا دَمِّي، دَمْ العَهْدْ الِّي جْرَى عْلَى خَاطِرْ بَرْشَة نَاسْ بَاشْ ذْنُوبْهُمْ تِتْغْفِرْ.

²⁹نْقُولِلْكُمْ: مَا عَادِشْ بَاشْ نُشْرُبْ مِنْ العَصِيرْ مْتَاعْ العْنِبْ هَاذَا، حَتَّى لِينْ يْجِي النْهَارْ هَاذَاكَا الِّي نُشْرْبُو فِيهْ مْعَاكُمْ مِنْ جْدِيدْ فِي مَمْلِكْةْ بَابَا.»

³⁰وِمْبَاعِدْ سَبّْحُوا رَبِّي بِالغْنَاء وِمْشَاوْ لِجْبَلْ الزِّيتُونْ.

³¹وِمْبَاعِدْ قَالِلْهُمْ يَسُوعْ: «الكُلْكُمْ بَاشْ تِمْشِيوْ وِتْخَلُّونِي اللِّيلَة هَاذِي، رَاهُو مَكْتُوبْ فِي الكْتَابْ المُقَدَّسْ: بَاشْ نَضْرِبْ السَّارِحْ، وِالغْنَمْ بَاشْ تِتْفَرِّقْ.

³²آمَا بَعْدْ مَا نْقُومْ مِنْ المُوتْ رَانِي بَاشْ نِسْبِقْكُمْ لِلجَلِيلْ.»

³³يَاخِي قَالُّو بُطْرُسْ: «حَتَّى لُوكَانْ خَلُّوكْ الكُلْهُمْ، آنَا عُمْرِي مَا نْخَلِّيكْ.»

³⁴قَالُّو يَسُوعْ: «نْقُلِّكْ الحَقْ: فِي اللِّيلَة هَاذِي، قْبَلْ مَا يْصِيحْ السَّرْدُوكْ، بَاشْ تْكُونْ نْكَرْتْ فِيَّ ثْلاَثَة مَرَّاتْ.»

³⁵قَالُّو بُطْرُسْ: «مَا نِيشْ بَاشْ نُنْكُرْ فِيكْ حَتَّى إِذَا كَانْ لْزِمْ بَاشْ نْمُوتْ مْعَاكْ.» وِالكْلاَمْ هَاذَا قَالُوهُولُو التْلاَمْذَة الكُلْهُمْ.

³⁶وِمْبَاعِدْ مْشَى المَسِيحْ وِتْلاَمِذْتُو لِبْلاَصَة إِسْمْهَا جَثْسَيْمَانِي، وْقَالِلْهُمْ: «أُقْعْدُوا لِهْنَا، حَتَّى لِينْ نِمْشِي لْغَادِي وِنْصَلِّي.»

³⁷وْهَزْ مْعَاهْ بُطْرُسْ وِوْلاَدْ زَبَدِي الإِثْنِينْ، وِبْدَا يْحِسْ فِي رُوحُو حْزِينْ وْمِتْقَلَّقْ.

³⁸الوَقْتْ هَاذَاكَا قَالِلْهُمْ: «نْحِسْ الِّي رُوحِي حْزِينَة بَرْشَة لْحَدْ المُوتْ. اسْتَنَّاوْ هْنَا وَابْقَاوْ فَايْقِينْ.»

³⁹وِبْعِدْ عْلِيهُمْ شْوَيَّة وْطَاحْ عْلَى رْكَايْبُو وْصَلَّى وْقَالْ: «يَا بَابَا إِذَا كَانْ مُمْكِنْ، بَعِّدْ عْلِيَّ الكَاسْ هَاذِي. آمَا خَلِّي تْكُونْ مَشِيئْتِكْ إِنْتَ، مُوشْ مَشِيئْتِي آنَا.»

⁴⁰وِرْجَعْ لِلتْلاَمْذَة وِلْقَاهُمْ رَاقْدِينْ، وْقَالْ لْبُطْرُسْ: «يَاخِي هَكَّا مَا تْنَجّْمُوشْ تَسْهْرُوا مْعَايَا حَتَّى سَاعَة وَحْدَة؟

⁴¹أَسْهْرُوا وْصَلِّيوْ بَاشْ مَا تُحْصْلُوشْ فِي تَجْرْبَة. رَاهِي الرُّوحْ تْحِبْ تَبْقَى فَايْقَة، آمَا البْدَنْ رَاهُو ضْعِيفْ.»

⁴²وِبْعِدْ مَرَّة أُخْرَى وْصَلَّى، وْقَالْ: «يَا بَابَا، إِذَا كَانْ الكَاسْ هَاذَا مُوشْ مُمْكِنْ يِبْعِدْ عْلِيَّ، وْيِلْزِمْنِي نُشْرْبُو، خَلِّي تْكُونْ إِرَادْتِكْ مُوشْ إِرَادْتِي.»

⁴³وِرْجَعْ مَرَّة أُخْرَى وِلْقَاهُمْ رَاقْدِينْ، عْلَى خَاطِرْهُمْ مَا نَجّْمُوشْ يْهِزُّوا رُوسْهُمْ مِالنُّومْ.

⁴⁴وَلَّى خَلاَّهُمْ مَرَّة أُخْرَى وِبْعِدْ بَاشْ يْصَلِّي لِلمَرَّة الثَّالْثَة، وْعَاوِدْ الكْلاَمْ هُوَ بِيدُو.

⁴⁵وِمْبَاعِدْ جَا لِلتْلاَمْذَة وْقَالِلْهُمْ: «يَاخِي مَازِلْتُوا رَاقْدِينْ وْمِرْتَاحِينْ؟ هَايْ السَّاعَة جَاتْ وْآنَا إِبْنْ الإِنْسَانْ بَاشْ يْسَلّْمُونِي لِيْدِينْ المِذْنْبِينْ.

⁴⁶قُومُوا خَلِّينَا نِمْشِيوْا! هَاوْ الِّي بَاشْ يْخُونِّي جَا.»

⁴⁷وْوَقْتِلِّي هُوَ مَازَالْ يِتْكَلِّمْ جَا يَهُوذَا، الِّي هُوَ وَاحِدْ مِالأَثْنَاشِنْ تِلْمِيذْ، وِمْعَاهْ بَرْشَة نَاسْ هَازِّينْ سْيُوفَا وِعْصِي، بَعْثُوهُمْ رُؤَسَاءْ الكُهَّانْ وِالشْيُوخْ مْتَاعْ الشَّعْبْ.

⁴⁸وِلِّي خَانُو عْطَاهُمْ أَمَارَة، وْقَالْ: «الِّي بَاشْ نْبُوسُو هَاذَاكَا هُوَ، شِدُّوهْ!»

⁴⁹وْبِالوَقْتْ مْشَى طُولْ لْيَسُوعْ وْقَالُّو: «السَّلاَمْ، يَا مُعَلِّمْ!» وْبَاسُو.

⁵⁰قَالُّو يَسُوعْ: «يَا صَاحْبِي. أَعْمِلْ الشَّيْء الِّي جِيتْ عْلَى جَالُو.» الوَقْتْ هَاذَاكَا جَاوْ وْحَطُّوا يْدِيهُمْ عْلَى يَسُوعْ وْشَدُّوهْ.

⁵¹وْوَاحِدْ مِلِّي كَانُوا مْعَ يَسُوعْ مَدْ يِدُّو وِجْبِدْ سِيفُو وِضْرَبْ العَبْدْ مْتَاعْ كْبِيرْ الكُهَّانْ قَصّْلُو وِذْنُو.

⁵²وِالوَقْتْ هَاذَاكَا قَلُّو يَسُوعْ: «رَجَّعْ سِيفِكْ لِبْلاَصْتُو. رَاهُمْ الِّي يْهِزُّوا السْيُوفَا، الكُلْهُمْ يْمُوتُوا بِالسْيُوفَا،

⁵³يَاخِي مَاشِي فِي بَالِكْ الِّي آنَا مَا انَّجِّمْشْ نُطْلُبْ مِنْ بَابَا، وْهُوَ بِالوَقْتْ يَبْعِثْلِي أَكْثِرْ مِنْ ثْنَاشِنْ جَيْشْ مْتَاعْ مْلاَيْكَة؟

⁵⁴آمَا كِيفَاشْ بَاشْ اتِّمْ الكْتُبْ المُقَدّْسَة الِّي تْقُولْ الِّي الشَّيْء هَاذَا يِلْزْمُو يَاقَعْ؟»

⁵⁵وْقَالْ يَسُوعْ لِلنَّاسْ: «يَاخِي رَدِّيتُونِي مُجْرِمْ جَايِينِّي بِالسْيُوفَا وِالعْصِي؟ كُلْ يُومْ كُنْتْ نُقْعُدْ نْعَلِّمْ فِي الهَيْكِلْ، وْمَا شَدِّيتُونِيشْ.

⁵⁶آمَا الشَّيْء هَاذَا الكُلُّو وْقَعْ بَاشْ يْتِمْ الِّي تْقَالْ فِي كْتُبْ الأَنْبِيَاءْ.» الوَقْتْ هَاذَاكَا التْلاَمْذَة خَلاَّوْهْ وْهَرْبُوا.

⁵⁷وِلِّي شَدُّوا يَسُوعْ هَزُّوهْ لْقِيَافَا الِّي هُوَ كْبيرْ الكُهَّانْ، وِينْ تْلَمُّوا الشْيُوخْ وِالكُتَّابْ مْتَاعْ اليْهُودْ

⁵⁸وْبُطْرُسْ كَانْ يْتَبَّعْ فِيهْ مِنْ بْعِيدْ حَتَّى لِينْ وْصُلْ لِلوُسْطِيَّة مْتَاعْ دَارْ كْبِيرْ الكُهَّانْ. وِدْخَلْ لْدَاخِلْ وِقْعَدْ مْعَ الحُرَّاسْ بَاشْ يْشُوفْ آشْ بَاشْ يَاقَعْ.

⁵⁹وْرُؤَسَاءْ الكُهَّانْ وِلِّي فِي المَجْلِسْ مْتَاعْ اليْهُودْ الكُلْهُمْ يْلَوّْجُوا عْلَى شْكُونْ يِشْهِدْ عْلَى يَسُوعْ بِالبَاطِلْ بَاشْ يُقْتْلُوهْ،

⁶⁰آمَا مَا لْقُوشْ كِيفَاشْ، رَغْمِلِّي بَرْشَة نَاسْ قَدّْمُوا وْشِهْدُوا بِالبَاطِلْ. وِمْبَاعِدْ قَدّْمُوا زُوزْ شْهُودْ

⁶¹وْقَالُوا: «الرَّاجِلْ هَاذَا قَالْ: "آنَا انَّجِّمْ نْطَيِّحْ هَيْكِلْ اللهْ وِانَّجِّمْ نِبْنِيهْ فِي ثْلاَثَة أَيَّامْ."»

⁶²وْقَامْ كْبِيرْ الكُهَّانْ وْقَالْ: «يَاخِي مَا عِنْدِكْ مَا تْجَاوِبْ؟ يَاخِي مَا كِشْ تِسْمَعْ فِي الرْجَالْ هَاذُومَا كِيفَاشْ يِشْهْدُوا عْلِيكْ؟»

⁶³آمَا يَسُوعْ بْقَى سَاكِتْ. وْقَالُّو كْبِيرْ الكُهَّانْ: «حَلِّفْتِكْ بِالله الحَيْ قُولِلْنَا: يَاخِي إِنْتِ المَسِيحْ إِبْنْ اللهْ؟»

⁶⁴قَالُّو يَسُوعْ: «إِنْتِ قُلْتْ هَكَّا. آمَا آنَا رَانِي نْقُلْكُمْ: مِاليُومْ بَاشْ تْشُوفُونِي آنَا إِبْنْ الإِنْسَانْ قَاعِدْ عْلَى يْمِينْ قُدْرِةْ اللهْ وْجَايْ فِي سْحَابْ السْمَاءْ!»

⁶⁵قَطِّعْ كْبِيرْ الكُهَّانْ دَبْشُو وْقَالْ: «رَاهُو كْفَرْ! يَاخِي مَازِلْنَا مِحْتَاجِينْ لِشْهُودْ؟ هَاكُمْ تَوَّا سْمَعْتُوهْ كِكْفَرْ.

⁶⁶شْنُوَّة تُحْكْمُوا عْلِيهْ؟» جَاوْبُوا: «يِلْزْمُو يْمُوتْ!»

⁶⁷وْبِزْقُوا عْلِيهْ وْضَرْبُوهْ بِالكَفْ، وْثَمَّة شْكُونْ مِنْهُمْ الِّي ضَرْبُوهْ

⁶⁸وْقَالُوا: «تْنَبَّأْ لِينَا، يَا المَسِيحْ! شْكُونْ الِّي ضَرْبِكْ؟»

⁶⁹وِالوَقْتْ هَاذَاكَا بُطْرُسْ كَانْ قَاعِدْ البَرَّا فِي الوُسْطِيَّة مْتَاعْ الدَّارْ، يَاخِي جَاتُو خْدِيمَة وْقَالِتْ: «إِنْتِ زَادَا كُنْتْ مْعَ يَسُوعْ الِّي مِالجَلِيلْ!»

⁷⁰آمَا هُوَ نْكَرْ قُدَّامْهُمْ الكُلْهُمْ، وْقَالْ: «مَا نِيشْ فَاهِمْ شْنُوَّة تُقْصْدِي.»

⁷¹وْوَقْتِلِّي خْرَجْ لِلبَابْ البَرَّانِي، شَافَاتُو خْدِيمَة أُخْرَى وْقَالِتْ لِلِّي حَاضْرِينْ الغَادِي: «الرَّاجِلْ هَاذَا كَانْ مْعَ يَسُوعْ الِّي مِالنَّاصْرَة!»

⁷²وِنْكَرْ بُطْرُسْ مَرَّة أُخْرَى وْهُوَ يِحْلِفْ وِيْقُولْ: «الرَّاجِلْ هَاذَا مَا نَعْرْفُوشْ!»

⁷³مْبَاعِدْ شْوَيَّة جَاوْ النَّاسْ الِّي حَاضْرِينْ وْقَالُوا لْبُطْرُسْ: «بِالحَقْ إِنْتِ زَادَا وَاحِدْ مِنْهُمْ، عْلَى خَاطْرِكْ تِتْكَلِّمْ كِيفْهُمْ!»

⁷⁴الوَقْتْ هَاذَاكَا بْدَا يِحْلِفْ وْيَلْعِنْ: «آنَا مَا نَعْرِفْشْ الرَّاجِلْ هَاذَا.» وْبِالوَقْتْ صَاحْ السَّرْدُوكْ،

⁷⁵وِتْذَكِّرْ بُطْرُسْ كِلْمِةْ يَسُوعْ كِقَلُّو: «قْبَلْ مَا يْصِيحْ السَّرْدُوكْ تْكُونْ إِنْتِ نْكَرْتْنِي ثْلاَثَة مَرَّاتْ.» وِخْرَجْ البَرَّا وِبْكَى بَرْشَة.