Read Tunisian Arabic New Testament مَتَّى 27 Bible Online

مَتَّى 27 - Tunisian Arabic New Testament bible

مَتَّى 27

¹وْفِي الصْبَاحْ، تْفَاهِمْ رُؤَسَاءْ الكُهَّانْ وِالشْيُوخْ مْتَاعْ الشَّعْبْ الكُلْهُمْ عْلَى يَسُوعْ بَاشْ يُقْتْلُوهْ.

²وْكَتّْفُوهْ وْهَزُّوهْ وْسَلْمُوهْ لْبِيلاَطُسْ الوَالِي.

³وْوَقْتِلِّي يَهُوذَا الِّي خَانُو شَافْ الِّي يَسُوعْ تِحْكَمْ عْلِيهْ، نْدِمْ وْرَجَّعْ الثْلاَثِينْ قَطْعَة مْتَاعْ الفِضَّة لْرُؤَسَاءْ الكُهَّانْ وِالشْيُوخْ،

⁴وْقَالِلْهُمْ: «آنَا عْمَلْتْ ذَنْبْ كِبْعْتْ الدَّمْ مْتَاعْ وَاحِدْ بَرِيءْ.» قَالُولُو: «أَحْنَا مَا يْهِمّْنَاشْ؟ دَبِّرْ رَاسِكْ.»

⁵وِرْمَى الفِضَّة فِي الهَيْكِلْ وِخْرَجْ، وِمْشَى شْنَقْ رُوحُو.

⁶آمَا رُؤَسَاءْ الكُهَّانْ هَزُّوا الفِضَّة وْقَالُوا: «مُوشْ حْلاَلْ بَاشْ نْحُطُّوهَا فِي الصُّنْدُوقْ مْتَاعْ الهَيْكِلْ، مَا دَامْهَا فْلُوسْ مْتَاعْ دَمْ.»

⁷إِمَّالاَ تْفَاهْمُوا وِشْرَاوْ بِيهَا السَّانْيَة مْتَاعْ بَيَّاعْ الفُخَّارْ بَاشْ يَعْمْلُوهَا جَبَّانَة يِدْفْنُوا فِيهَا البْرَايْنِيَّة.

⁸هَاذَاكَا عْلاَشْ السَّانْيَة هَاذِيكَا يْسَمِّيوْهَا سَانْيِةْ الدَّمْ لِليُومْ.

⁹وْهَكَّا تَمْ الشَّيْء الِّي قَالُو النَّبِي إِرْمِيَا: «وْهَزُّوا الثْلاَثِينْ قَطْعَة مْتَاعْ الفِضَّة، السُّومْ مْتَاعْ الِّي سَامُوهْ بِيهْ جْمَاعَة مِنْ بَنِي إِسْرَائِيلْ،

¹⁰وِعْطَاوْهُمْ بَاشْ يِشْرِيوْ سَانْيِةْ بَيَّاعْ الفُخَّارْ. كِيفْ مَا أْمَرْنِي رَبِّي.»

¹¹وِوْقُفْ يَسُوعْ قُدَّامْ الوَالِي وْسِأْلُو الوَالِي: «يَاخِي إِنْتِ مَلِكْ اليْهُودْ؟» جَاوْبُو يَسُوعْ: «إِنْتِ قُلْتْ.»

¹²آمَا وَقْتِلِّي رُؤَسَاءْ الكُهَّانْ وِالشْيُوخْ يِتْهْمُوا فِيهْ، مَا جاوِبْشْ بْحَتَّى حَاجَة.

¹³وِمْبَاعِدْ قَالُّو بِيلاَطُسْ: «يَاخِي مَاكِشْ تِسْمَعْ كِيفَاشْ قَاعْدِينْ يِشْهْدُوا عْلِيكْ ابَّرْشَة حَاجَاتْ؟»

¹⁴آمَا هُوَ مَا جَاوْبُوشْ عْلَى حَتَّى حَاجَة مِنْهُمْ، حَتَّى لِينْ بْقَى الوَالِي مِتْعَجِّبْ بَرْشَة.

¹⁵وْفِي كُلْ عِيدْ كَانْ الوَالِي يْسَيِّبْ لِلشَّعْبْ وَاحِدْ مِالمْرَابِيطْ الِّي يْحِبُّوا عْلِيهْ.

¹⁶وْكَانْ عِنْدْهُمْ فِي الوَقْتْ هَاذَاكَا وَاحِدْ مَعْرُوفْ فِي الحَبْسْ إِسْمُو بَارَابَاسْ.

¹⁷وْوَقْتِلِّي تْلَمُّوا قَالِلْهُمْ بِيلاَطُسْ: «شْكُونْ تْحِبُّونِي نْسَيّْبِلْكُمْ: بَارَابَاسْ وِلاَّ يَسُوعْ الِّي يِتْسَمَّى المَسِيحْ؟»

¹⁸عْلَى خَاطْرُو كَانْ يَعْرِفْ الِّي هُومَا سَلْمُوهُولُو بِسْبَبْ الغِيرَة.

¹⁹زِيدْ عْلَى هَاذَا وَقْتِلِّي بِيلاَطُسْ قَاعِدْ فِي المَحْكْمَة، بَعْثِتْلُو مَرْتُو وْقَالِتْلُو: «رُدْ بَالِكْ تَعْمِلْ أَيْ حَاجَة لِلرَّاجِلْ البَارْ هَاذَاكَا، رَانِي تْقَلِّقْتْ بَرْشَة عْلَى خَاطْرُو اللِّيلَة فِي الحِلْمْ.»

²⁰وْرُؤَسَاءْ الكُهَّانْ وِالشْيُوخْ قَنْعُوا النَّاسْ بَاشْ يُطْلْبُوا مِنُّو إِنُّو يْسَيّْبِلْهُمْ بَارَابَاسْ وْيُقْتُلْ يَسُوعْ.

²¹قَالِلْهُمْ الوَالِي مَرَّة أُخْرَى: «شْكُونُو مِنْهُمْ لِثْنِينْ تْحِبُّونِي نْسَيّْبِلْكُمْ؟» وْهُومَا قَالُوا: «بَارَابَاسْ!»

²²قَالِلْهُمْ بِيلاَطُسْ: «إِمَّالاَ آشْ تْحِبُّونِي نَعْمِلْ لْيَسُوعْ الِّي يِتْسَمَّى المَسِيحْ؟» قَالُوا الكُلْهُمْ: «اُصْلْبُو!»

²³وْقَالْ: «عْلاَشْ، شْنُوَّة الشَّرْ الِّي عَمْلُو؟» آمَا هُومَا وَلاَّوْ يْصِيحُوا أَكْثِرْ: «اُصْلْبُو!»

²⁴إِمَّالاَ وَقْتِلِّي شَافْ بِيلاَطُسْ الِّي هُوَ مَا وْصُلْ لْحَتَّى شَيْء، وْبِالعَكْسْ وَلاَّتْ ثَمَّة خُوضَة، خْذَا المَاء وِغْسِلْ يْدِيهْ قُدَّامْ النَّاسْ وْقَالْ: «آنَا بَرِيءْ مِنْ دَمْ الرَّاجِلْ هَاذَا! أَعْمْلُوا فِيهْ الِّي تْحِبُّوا.»

²⁵وِالنَّاسْ الكُلْهُمْ جَاوْبُوا: «أَحْنَا وِوْلاَدْنَا مَطْلُوبِينْ بْدَمُّو!»

²⁶وِمْبَاعِدْ سَيّْبِلْهُمْ بَارَابَاسْ، وْسَلِّمْ يَسُوعْ بَاشْ يِتْصْلَبْ بَعْدْ مَا ضَرْبُو بِالسُّوطْ.

²⁷وِمْبَاعِدْ هَزُّوا الجُنُودْ يَسُوعْ لِلقْصَرْ مْتَاعْ الوَالِي وْلَمُّوا فِرْقِةْ العَسْكِرْ الكُلْهَا قُدَّامُو،

²⁸وْنَحَّاوْلُو لِبْسْتُو وْلَبّْسُوهْ لِبْسَة حَمْرَة،

²⁹وْعَمْلُوا تَاجْ مِالشُّوكْ وْحَطُّوهْ فُوقْ رَاسُو، وْحَطُّولُو قَصْبَة فِي يِدُّو، وْسِجْدُوا قُدَّامُو وْهُومَا يِتْمَسْخْرُوا عْلِيهْ وِيْقُولُوا: «يَحْيَى مَلِكْ اليْهُودْ!»

³⁰وْبِصْقُوا عْلِيهْ، وْشَدُّوا القَصْبَة وْضَرْبُوهْ بِيهَا عْلَى رَاسُو.

³¹وْبَعْدْ مَا تْمَسْخْرُوا عْلِيهْ نَحَّاوْلُو اللِّبْسَة الحَمْرَا، وْلَبّْسُوهْ دَبْشُو وْهَزُّوهْ بَاشْ يِتْصْلَبْ.

³²وْوَقْتِلِّي هُومَا خَارْجِينْ مِالمْدِينَة عْرَضْهُمْ رَاجِلْ مِنْ قِيرِينَة إِسْمُو سِمْعَانْ، وْلَزّْمُوا عْلِيهْ بَاشْ يْهِزْ الصَّلِيبْ مْتَاعْ يَسُوعْ.

³³وْوَقْتِلِّي وُصْلُوا لْبُقْعَة تِتْسَمَّى الجُلْجْثَة، الِّي مَعْنَاهَا «بُقْعِةْ الجُمْجْمَة»

³⁴عْطَاوْهْ شْرَابْ مْخَلِّطْ بْحَاجَة يْسَمُّوهَا المُرْ بَاشْ يُشْرْبُو، آمَا وَقْتِلِّي ذَاقُو مَا حَبِّشْ يُشْرْبُو.

³⁵وْوَقْتِلِّي صَلْبُوهْ عَمْلُوا قُرْعَة عْلَى لِبْسْتُو وْقَسْمُوهَا.

³⁶وْقَعْدُوا وِبْقَاوْ يْعِسُّوا عْلِيهْ الغَادِي.

³⁷وْحَطُّوا التُّهْمَة مْتَاعُو فُوقْ رَاسُو فِي بْلاَكَة مَكْتُوبْ عْلِيهَا: «هَاذَا يَسُوعْ، مَلِكْ اليْهُودْ.»

³⁸وْصَلْبُوا مْعَاهْ زُوزْ مْجَرّْمَة، وَاحِدْ عْلَى يْمِينُو وْوَاحِدْ عْلَى يْسَارُو.

³⁹وِالنَّاسْ الِّي يِتْعَدَّاوْ مِنْ غَادِي كَانُوا يْدَوّْحُوا عْلِيهْ رُوسْهُمْ وِيْسِبُّوا فِيهْ وِيْقُولُوا:

⁴⁰«يَلِّي بَاشْ اطَّيَّحْ الهَيْكِلْ وْتِبْنِيهْ فِي ثْلاَثَة أَيَّامْ، خَلِّصْ رُوحِكْ وْأَهْبِطْ مِنْ فُوقْ الصَّلِيبْ إِذَا كَانِكْ إِنْتِ إِبْنْ اللهْ.»

⁴¹وْرُؤَسَاءْ الكُهَّانْ وِالكُتَّابْ مْتَاعْ اليْهُودْ وِالشْيُوخْ هُومَا زَادَا كَانُوا يِتْمَسْخْرُوا عْلِيهْ، وِيْقُولُوا:

⁴²«خَلِّصْ نَاسْ أُخْرِينْ، وْمَا يْنَجِّمْشْ يْخَلِّصْ رُوحُو! هُوَ المَلِكْ مْتَاعْ إِسْرَائِيلْ، خَلِّيهْ يَهْبِطْ تَوَّا مِنْ فُوقْ الصَّلِيبْ وْإِحْنَا بَاشْ نِمّْنُوا بِيهْ.

⁴³مَاوْ وْثِقْ فِي اللهْ وْقَالْ: "آنَا إِبْنْ اللهْ" خَلِّي اللهْ يْخَلّْصُو إِذَا كَانُو رَاضِي عْلِيهْ.»

⁴⁴وِالمْجَرْمَة الِّي تْصَلْبُوا مْعَاهْ هُومَا زَادَا عَايْرُوهْ بِالكْلاَمْ هُوَ بِيدُو.

⁴⁵وِمْعَ نُصْفْ نْهَارْ ظْلاَمِتْ الدِّنْيَا الكُلْهَا حَتَّى لِلثْلاَثَة مْتَاعْ العْشِيَّة.

⁴⁶وْتَقْرِيبْ مْعَ الثْلاَثَة صَاحْ يَسُوعْ بْصُوتْ عَالِي: «إِيلِي! إِيلِي! لَمَا شَبَقْتَنِي؟» الِّي مَعْنَاهَا «يَا رَبِّي! يَا رَبِّي! عْلاَشْ خَلِّيتْنِي؟»

⁴⁷وْثَمَّة شْكُونْ مِالوَاقْفِينْ كِسَمْعُوهْ قَالُوا: «الرَّاجِلْ هَاذَا يْنَادِي عْلَى إِيلِيَّا!»

⁴⁸وْوَاحِدْ مِنْهُمْ جْرَى وْهَزْ شِيفُونَة، نَفِّخْهَا فِي الخَلْ وْحَطّْهَا فِي قَصْبَة وْمَدّْهَالُو بَاشْ يُشْرُبْ.

⁴⁹آمَا الأُخْرِينْ قَالُوا: «إِسْتَنَّى، خَلِّينَا نْشُوفُوا إِذَا كَانْ إِيلِيَّا بَاشْ يْجِي وْيْخَلّْصُو!»

⁵⁰وْصَاحْ يَسُوعْ مَرَّة أُخْرَى بْصُوتْ عَالِي وْخَلَّى رُوحُو تُطْلُعْ.

⁵¹وْتِقْسِمْ الحْجَابْ مْتَاعْ الهَيْكِلْ عْلَى ثْنِينْ مِالفُوقْ الُّوطَا. وِالأَرْضْ تْزَلْزْلِتْ وِالحْجَرْ تْشَقِقْ.

⁵²وِتْحَلِّتْ القْبُورْ، وْبَرْشَة بْدُونَاتْ مْتَاعْ القِدِّيسِينْ الِّي رَاقْدِينْ فِيهَا قَامُوا.

⁵³وْخَرْجُوا مِالقْبُورْ بَعْدْ مَا قَامْ يَسُوعْ، وِمْشَاوْ لِلمْدِينَة المُقَدّْسَة وْظُهْرُوا لْبَرْشَة نَاسْ.

⁵⁴وَقْتِلِّي القَايِدْ مْتَاعْ المْيَا وِلِّي كَانُوا يْعِسُّوا مْعَاهْ عْلَى يَسُوعْ شَافُوا كِيفَاشْ الأَرْضْ تْزَلْزْلِتْ وِالحَاجَاتْ الِّي وُقْعِتْ، تْرِعْبُوا وْقَالُوا: «بِالحَقْ الإِنْسَانْ هَاذَا كَانْ إِبْنْ اللهْ!»

⁵⁵وْكَانُوا ثَمَّة زَادَا بَرْشَة نْسَاء يِتْفَرّْجُوا مِنْ بْعِيدْ، وْهُومَا الِّي كَانُوا يْتَبّْعُوا فِي يَسُوعْ مِالجَلِيلْ وْيِخْدْمُوا فِيهْ،

⁵⁶وْمِنْهُمْ مَرْيَمْ المَجْدَلِيَّة، وْمَرْيِمْ أُمْ يَعْقُوبْ وْيُوسُفْ، وْأُمْ وْلاَدْ زَبَدِي.

⁵⁷وْفِي العْشِيَّة جَا رَاجِلْ غْنِي إِسْمُو يُوسُفْ مِنْ مَنْطِقْةْ الرَّامَة، وْهُوَ زَادَا كَانْ مِالتْلاَمْذَة مْتَاعْ يَسُوعْ.

⁵⁸مْشَى لْبِيلاَطُسْ وِطْلَبْ مِنُّو الجُثَّة مْتَاعْ يَسُوعْ. يَاخِي بِيلاَطُسْ أْمَرْ بَاشْ يَعْطِوْهَالُو.

⁵⁹وْهَزْ يُوسُفْ الجُثَّة مْتَاعْ يَسُوعْ وْلَفّْهَا فِي كْفَنْ نْظِيفْ،

⁶⁰وْدِفْنُو فِي قْبَرْ جْدِيدْ حِفْرُو لْرُوحُو فِي الحْجَرْ، وْحَطْ حَجْرَة كْبِيرَة فِي بَابْ القْبَرْ وِمْشَى.

⁶¹وْكَانِتْ مَرْيَمْ المَجْدَلِيَّة، وْمَرْيِمْ الأُخْرَى، قَاعْدِينْ مْقَابْلِينْ القْبَرْ.

⁶²وْمِنْ غُدْوَة، الِّي هُوَ بَعْدْ النْهَارْ الِّي يْحَضّْرُوا فِيهْ، مْشَاوْ رُؤَسَاءْ الكُهَّانْ وِالفَرِّيسِيِّينْ لْبِيلاَطُسْ

⁶³وْقَالُولُو: «تْذَكِّرْنَا، يَا سِيدْنَا، كِيفَاشْ الدَّجَّالْ هَاذَاكَا قَالْ وَقْتِلِّي كَانْ حَيْ: "بَاشْ نْقُومْ بَعْدْ ثْلاَثَة أَيَّامْ."

⁶⁴هَاذَاكَا عْلاَشْ أُأْمُرْ بَاشْ يْعِسُّوا عْلَى القْبَرْ لِلنْهَارْ الثَّالِثْ، بَاشْ تْلاَمِذْتُو مَا يِمْشِيوْشْ يِسْرْقُوهْ وِيْقُولُوا لِلشَّعْبْ: "رَاهُو قَامْ مِنْ بِينْ المُوتَى"، وِيْغَلّْطُوا النَّاسْ أَكْثِرْ مِالغَلْطَة مْتَاعْ قْبَلْ!»

⁶⁵قَالِلْهُمْ بِيلاَطُسْ: «عِنْدْكُمْ حَرَسْ، إِمْشِيوْ وْعِسُّوا عْلِيهْ كِيفْ مَا تْحِبُّوا.»

⁶⁶إِمَّالاَ مْشَاوْ حَطُّوا الشْمَعْ عْلَى الحَجْرَة وجُنُودْ بَاشْ يْعِسُّوا عْلَى القْبَرْ.