Read Tunisian Arabic New Testament مَتَّى 28 Bible Online

مَتَّى 28 - Tunisian Arabic New Testament bible

مَتَّى 28

¹وْبَعْدْ مَا فَاتْ السِّبْتْ وِمْعَ طْلُوعْ الفَجْرْ فِي نْهَارْ الأَحَدْ، مْشَاتْ مَرْيَمْ المَجْدَلِيَّة وْمَرْيِمْ الأُخْرَى بَاشْ يْشُوفُوا القْبَرْ.

²يَاخِي وْقَعْ زِلْزَالْ كْبِيرْ، ثَمَّة مَلاَكْ مِنْ عِنْدْ رَبِّي هْبَطْ مِالسْمَاءْ وْجَا وْبَعِّدْ الحَجْرَة وِقْعَدْ فُوقْهَا.

³وْكَانْ مَنْظْرُو كِيفْ البَرْقْ وْدَبْشُو أَبْيِضْ كِيفْ الثِّلْجْ.

⁴وْوَلُّوا الحُرَّاسْ يِتْرِعْدُوا مِالخُوفْ مِنُّو وْوَلُّوا كِيفْ المُوتَى.

⁵آمَا المَلاَكْ قَالْ لِلنْسَاء: «مَا تْخَافُوشْ. آنَا نَعْرِفْ الِّي إِنْتُومَا تْلَوّْجُوا عْلَى يَسُوعْ الِّي تِصْلَبْ.

⁶هُوَ مُوشْ هْنَا، رَاهُو قَامْ كِيفْ مَا قَالْ. إِيجَاوْ وْشُوفُوا البُقْعَة الِّي كَانْ مَحْطُوطْ فِيهَا.

⁷وْإِمْشِيوْ فِيسَعْ وْقُولُوا لِتْلاَمِذْتُو: "رَاهُو قَامْ مِنْ بِينْ المُوتَى، وْهَاوْ بَاشْ يِسْبِقْكُمْ لِلجَلِيلْ، وْغَادِي بَاشْ تْشُوفُوهْ." هَانِي قُلْتِلْكُمْ.»

⁸وَلُّوا مْشَاوْ مِالقْبَرْ فِيسَعْ وْهُومَا خَايْفِينْ وْفَرْحَانِينْ بَرْشَة، وِجْرَاوْ لِلتْلاَمْذَة.

⁹وْفِي الثْنِيَّة عْرَضْهُمْ يَسُوعْ وْقَالِلْهُمْ: «السَّلاَمْ.» يَاخِي جُوهْ وْشَدُّوا فِي سَاقِيهْ وْسِجْدُولُو

¹⁰يَاخِي قَالِلْهُمْ يَسُوعْ: «مَا تْخَافُوشْ! إِمْشِيوْ وْقُولُوا لْإِخْوْتِي يِمْشِيوْ لِلجَلِيلْ، وِالغَادِي بَاشْ يْشُوفُونِي.»

¹¹وَقْتِلِّي النْسَاء مَاشِينْ ثَمَّة جُنُودْ رَجْعُوا لِلمْدِينَة وْقَالُوا لْرُؤَسَاءْ الكُهَّانْ عْلَى الحَاجَاتْ الِّي وُقْعِتْ الكُلْهَا.

¹²وْكِجْتَمْعُوا رُؤَسَاءْ الكُهَّانْ مْعَ الشْيُوخْ، تْشَاوْرُوا وِعْطُوا بَرْشَة فْلُوسْ لِلجُنُودْ،

¹³وْقَالُولْهُمْ: «قُولُوا لِلنَّاسْ: "رَاهُمْ تْلاَمِذْتُو جَاوْ فِي اللِّيلْ وْسَرْقُوهْ وَقْتِلِّي أَحْنَا رَاقْدِينْ."

¹⁴وْكيِسْمَعْ الوَالِي بِالخْبَرْ، أَحْنَا نْرَضِّيوْهْ وِنْخَرّْجُوكُمْ مِالمُشْكْلَة.»

¹⁵وِخْذَاوْ الجُنُودْ الفْلُوسْ وْعَمْلُوا كِيفْ مَا قَالُولْهُمْ. وِالحْكَايَة هَاذِي تْنُشْرُتْ مَا بِينْ اليْهُودْ حَتَّى لِليُومْ.

¹⁶وْتَوَّا مْشَاوْ الحْدَاشِنْ تِلْمِيذْ لِلجَلِيلْ، لِلجْبَلْ، كِيفْ مَا قَالِلْهُمْ يَسُوعْ.

¹⁷وْكِشَافُوا يَسُوعْ سِجْدُولُو، آمَا ثَمَّة شْكُونْ مِنْهُمْ الِّي شَكُّوا.

¹⁸وْجَا يَسُوعْ وْقَالِلْهُمْ: «تِعْطَاتْلِي كُلْ سُلْطَة فِي السْمَاوَاتْ وْفِي الأَرْضْ.

¹⁹إِمَّالاَ إِمْشِيوْ وْأَعْمْلُوا تْلاَمْذَة فِي الشْعُوبْ الكُلْهُمْ، وْعَمّْدُوهُمْ بْإِسْمْ الآبْ وِالإِبْنْ وِالرُّوحْ القُدُسْ،

²⁰وْعَلّْمُوهُمْ بَاشْ يَعْمْلُوا الشَّيْء الِّي أْمَرْتْكُمْ بِيهْ الكُلُّو، وْهَانِي مْعَاكُمْ دِيمَا، لْآخِرْ الزْمَانْ.»