Read Tunisian Arabic New Testament مَتَّى 3 Bible Online

مَتَّى 3 - Tunisian Arabic New Testament bible

مَتَّى 3

¹وْفِي هَاكَا الأَيَّامَاتْ بْدا يُوحَنَّا المَعْمَدَانْ يْبشّر في الصّحراء مْتَاعْ مَنْطِقْةْ اليَهُودِيَّة

²وِيْقُولْ: «تُوبُوا، رَاهِي مَمْلِكْةْ السْمَاوَاتْ قُرْبِتْ!»

³وْيُوحَنَّا هَاذَا هُوَ الِّي حْكَى عْلِيهْ النَّبِي إِشَعْيَاءْ كِقَالْ: «صُوتْ يْنَادِي فِي الصحراء: حَضّْرُوا طْرِيقْ الرَّبْ، وْصوْبوا ثْنيتو!»

⁴وْكَانْ يُوحَنَّا لاَبِسْ لِبْسَة مَعْمُولَة مِنْ وْبَرْ الجْمَالْ، وْمِتْحَزِّمْ بِحْزَامْ جِلْدْ، وْما ياكلْ كان في الجْرَادْ وِالعْسَلْ الجَّالِي.

⁵وِ كَانُوا النَّاسْ يِمْشُولُو مِنْ أُورْشَلِيمْ وِاليَهُودِيَّة الكُلْهَا وِالبلايصْ الِّي دَايْرَة بِالأُرْدُنْ

⁶وْيِعْتَرْفُوا بِذْنُوبْهُمْ، وْ هو عمّدْهِم فِي وَادْ الأُرْدُنْ

⁷وْوَقْتِلِّي شَافْ بَرْشَة فَرِّيسِيِّينْ وْصَدُّوقِيِّينْ يْجِيوْهْ بَاشْ يِتْعَمّْدُوا، قَالِلْهُمْ: «يَا وْلاَدْ اللْفَاعِي! شْكُونْ الِّي نَبِّهْكُمْ بَاشْ تُهْرْبُوا مِنْ الغَضَبْ الِّي جَايْ مِن عند ربّي؟

⁸أَعْمْلُوا حَاجَاتْ تْوَرِّي الِّي إِنْتُومَا تُبْتُوا،

⁹مَا تْقُولُوشْ فِي قْلُوبْكُمْ: "أَحْنَا وْلاَدْ إِبْرَاهِيمْ." رَانِي نْقُلْكُمْ، اللهْ قَادِرْ بَاشْ يَعْمِلْ مِالحْجَرْ هَاذَا وْلاَدْ لْإِبْرَاهِيمْ.

¹⁰الفَاسْ تَوَّا مَحْطُوطْ عْلَى عْرُوقْ الشَّجَرْ، الشَّجْرَة الِّي مَا تْجِيبِشْ غَلَّة بَاهْيَة تِتْقَصْ وْتِتْرْمَى فِي النَّارْ.

¹¹آنَا نْعَمِّدْكُمْ بِالمَاء بَاشْ اتُّوبُوا، آمَا الِّي بَاشْ يْجِي بَعْدِي رَاهُو أَقْوَى مِنِّي، وْآنَا مَا نِسْتَاهِلْشْ بَاشْ انِّحِّيلُو صَنْدَالُو. هُوَ بَاشْ يْعَمِّدْكُمْ بِالرُّوحْ القُدُسْ وْبِالنَّارْ.

¹²وِيْهِزْ المِذْرى فِي يِدُّو وِيْصَفِّي صابْتو، يْلِمْ القَمْحْ فِي المَخْزِنْ، آمَا التْبِنْ رَاهُو يَحْرْقُو بْنَارْ مَا تَطْفَاشْ.»

¹³وَقْتْها جَا يَسُوعْ مِنْ مَنْطِقْةْ الجَلِيلْ لِلأُرْدُنْ بَاشْ يِتْعَمِّدْ عْلَى يْدِينْ يُوحَنَّا.

¹⁴آمَا يُوحَنَّا مَا خَلاَّهِشْ وْقَالُّو: «آنَا هُو الِّي مِحْتَاجْ بَاشْ نِتْعَمِّدْ عْلَى يْدِيكْ، كِيفَاشْ إِنْتِ الِّي تْجِينِي؟»

¹⁵ياخي يَسُوعْ جَاوْبُو: «خَلِّي الشَّيْء هَاذَا يْصِيرْ تَوَّا، وْ هَكَّا نْتَمَمُوا الحَاجَاتْ الصَّالْحَة الكُلْهَا.» يَاخِي وَافْقُو يُوحَنَّا.

¹⁶وْوَقْتِلِّي تْعَمِّدْ يَسُوعْ، خْرَجْ مِالمَاء وْبِالوَقْتْ تْحَلِّتْ السْمَاءْ، يَاخِي شَافْ رُوحْ اللهْ هَابِطْ كِيفْ اليْمَامَة وْحَطْ عْلِيهْ.

¹⁷وْصُوتْ مِالسْمَاءْ يْقُولْ: «هَاذَا هُوَ ابْنِي الِّي نْحِبُّو وِلِّي آنَا فَرْحَانْ بِيهْ.»