Read Tunisian Arabic New Testament مَتَّى 4 Bible Online

مَتَّى 4 - Tunisian Arabic New Testament bible

مَتَّى 4

¹وْهَزْ الرُّوحْ القُدُسْ يَسُوعْ لِلخْلاَء بَاشْ بْلِيسْ يْجَرّْبُو.

²وْصَامْ أَرْبْعِينْ يُومْ وْأَرْبْعِينْ لِيلَة حَتَّى لِينْ جَاعْ.

³قْرُبْلُو الِّي بَاشْ يْجَرّْبُو وْقَالُّو: «إِذَا كَانْ إِنْتِ إِبْنْ اللهْ، قُولْ لِلحْجَرْ هَاذَا يْوَلِّي خُبْزْ.»

⁴جَاوْبُو يَسُوعْ: «مكْتوبْ في الكْتَابْ المُقَدَّسْ: مُوشْ بِالخُبْزْ بَرْكْ يْعِيشْ الإِنْسَانْ، آمَا بْكُلْ كِلْمَة تُخْرُجْ مِنْ عِنْدْ اللهْ.»

⁵وْهَزُّو بْلِيسْ للقُدس، وْوَقّْفُو عْلَى حَرْفْ السْطَحْ مْتَاعْ الهَيْكِلْ،

⁶وْقَالُّو: «كَانِكْ إِنْتِ إِبْنْ اللهْ ارْمِي رُوحِكْ الُّوطَا، عْلَى خَاطِرْ مَكْتُوبْ فِي الكْتَابْ المُقَدَّسْ: يْوَصِّي مْلاَيِكْتُوعْلِيكْ، بِينْ يْدِيهُمْ يْهِزُّوكْ بَاشْ مَا تِتْضْرَبْشْ فِي حَجْرَة رِجْلِكْ.»

⁷جَاوْبُو يَسُوعْ: «مَكْتُوبْ زَادَا: "مَا تْجَرِّبْشْ الرَّبْ إِلاَهِكْ."»

⁸زَادْ هَزُّو بْلِيسْ وْحَطُّو فُوقْ جْبَلْ عَالِي بَرْشَة، وْوَرَّاهْ المَمَالِكْ مْتَاعْ الدِّنْيَا الكُلْهَا وِالمَجْدْ الِّي فِيهُمْ،

⁹وْقَالُّو: «نَعْطِيكْ الشَّيْء هَاذَا الكُلُّو، إِذَا كَانْ تَهْبِطْ عْلَى رْكَايْبِكْ وْتُسْجُدْلِي.»

¹⁰يَاخِي جَاوْبُو يَسُوعْ: «إِبْعِدْ عْلِيَّ يَا شِيطَانْ! عْلَى خَاطِرْ مَكْتُوبْ فِي الكْتَابْ المُقَدَّسْ، للرَّبْ إِلاَهِكْ وَحْدُو تُسْجُدْ، وْهُوَ وَحْدُو تِعْبْدُ.»

¹¹وْخَلاَّهْ بْلِيسْ وِمْشَى، وْجَاتْ المْلاَيْكَة وِبْدَاتْ تِخْدِمْ فِيهْ.

¹²وْكِسْمَعْ يَسُوعْ الِّي يُوحَنَّا تْشَدْ رْجَعْ لِلْجَلِيلْ.

¹³وِخْرَجْ مِالنَّاصْرَة وِمْشَى وِسْكِنْ فِي كَفْرْنَاحُومْ الِّي عْلَى البْحَرْ فِي الحَدْ مْتَاعْ مَنْطِقْةْ زَبُولُونْ وْنَفْتَالِي،

¹⁴بَاشْ يْتِمْ الشَّيْء الِّي قَالُو النَّبِي إِشَعْيَاءْ:

¹⁵«أَرْضْ نَفْتَالِي وْأَرْضْ زَبُولُونْ، عْلَى البْحَرْعْلَى طْرِيقْ الأُرْدُنْ، الجَلِيلْ، أَرْضْ الشْعُوبْ الأُخْرِينْ!

¹⁶الشَّعْبْ الِّي عَايِشْ فِي الظْلاَمْ، شَافْ نُورْ عْظِيمْ، وِلِّي قَاعْدِينْ فِي ظُلْ أَرْضْ المُوتْ، النُّورْ ضْوَى عْلِيهُمْ.»

¹⁷وْمِالوَقْتْ هَاذَاكَا بْدَا يَسُوعْ يْبَشِّرْ وِيْقُولْ: «تُوبُوا، رَاهِي مَمْلِكْةْ السْمَاوَاتْ قُرْبِتْ.»

¹⁸وْكِكَانْ يَسُوعْ يِمْشِي عْلَى شَطْ البُحَيْرَة مْتَاعْ الجَلِيلْ، شَافْ زُوزْ إِخْوَة هُومَا سِمْعَانْ الِّي يْعَيّْطُولُو بُطْرُسْ وْخُوهْ أَنْدَرَاوُسْ يَرْمِيوْ فِي الشْبَاكْ فِي البُحَيْرَة، عْلَى خَاطِرْهُمْ كَانُوا صَيَّادَا.

¹⁹وْقَالِلْهُمْ: «تَبّْعُونِي وْآنَا بَاشْ نْرُدْكُمْ صَيَّادَا مْتَاعْ نَاسْ.»

²⁰وْبِالوَقْتْ خَلاَّوْ الشْبَاكْ مْتَاعْهُمْ وْتَبّْعُوهْ.

²¹وْهُوَ مَاشِي مِالغَادِي شَافْ زُوزْ إِخْوَة أُخْرِينْ: يَعْقُوبْ وِلْدْ زَبَدِي وْخُوهْ يُوحَنَّا كانُوا فِي الفْلُوكَة مْعَ بُوهُمْ يْصَلّْحُوا فِي الشْبَاكْ، ياخي نَادَالْهُمْ.

²²وْبِالوَقْتْ خَلاَّوْ بُوهُمْ فِي الفْلُوكَة وْتَبّْعُوهْ.

²³وْدَارْ يَسُوعْ فِي مَنْطِقْةْ الجَلِيلْ الكُلْهَا يْعَلِّمْ وُسْط المْجَامِعْ مْتَاعْهُمْ، وِيْبَشِّرْ بِالإِنْجِيلْ مْتَاعْ مَمْلِكْةْ اللهْ وْيِشْفِي فِي النَّاسْ مِالأَمْرَاضْ وِالوْجَايِعْ الكُلْهَا.

²⁴وْتِنْشَرْ خَبْرُو فِي سُورْيَة الكُلْهَا. وْجَابُولُو المُرْضَى بْكُلْ أنْواعْهمْ، وِلِّي سَاكْنِتْهُمْ الشْوَاطِنْ وِالمَصْرُوعِينْ وِالمَشْلُولِينْ، وِشْفَاهُمْ الْكُلْ.

²⁵وْتَبّْعُوهْ بَرْشَة نَاسْ مِنْ الجَلِيلْ وِالمَنْطْقَة الِّي تِتْسَمَّى العَشْرَة مُدُنْ وْأُورْشَلِيمْ وِاليَهُودِيَّة وِالمَنْطْقَة الِّي فِي الجِيهَة الأُخْرَى مْتَاعْ الأُرْدُنْ.