Read Tunisian Arabic New Testament مَتَّى 5 Bible Online

مَتَّى 5 - Tunisian Arabic New Testament bible

مَتَّى 5

¹وْكِي شَافْ يَسُوعْ النَّاسْ طْلَعْ لِلجْبَلْ وِوقْت اللّي قْعَدْ، قُربولو تْلامِذْتو،

²وِبْدَا يْعَلِّمْ فِيهُمْ، وْقَالْ:

³«صَحَّة لِيهُمْ المْسَاكِينْ فِي الرُّوحْ! رَاهُمْ مَمْلِكْةْ السْمَاوَاتْ بَاشْ يَاخْذُوا.

⁴صَحَّة لِيهُمْ الحْزَانَى! رَاهُمْ بَاشْ يِتْعَزُّوا.

⁵صَحَّة لِيهُمْ الطَّيْبِينْ! رَاهُمْ الأَرْضْ بَاشْ يُورْثُوا.

⁶صَحَّة لِيهُمْ الجْوَاعَى وِالعْطَاشَى لِلحَقْ! رَاهُمْ بَاشْ يِشْبْعُوا.

⁷صَحَّة لِيهُمْ الِّي يَرْحْمُوا! رَاهُمْ بَاشْ يِتْرُحْمُوا.

⁸صَحَّة لِيهُمْ الِّي قْلُوبْهُمْ طَاهْرَة! رَاهُمْ وِجِهْ الله بَاشْ يْشُوفُوا.

⁹صَحَّة لِيهُمْ الِّي يْصَلّْحُوا بِينْ النَّاسْ! رَاهُمْ وْلاَدْ اللهْ بَاشْ يِتْسَمُّوا.

¹⁰صَحَّة لِيهُمْ الِّي يِتْعَذّْبُوا عْلَى خَاطِرْ الحَقْ! مَمْلِكْةْ السْمَاوَاتْ بَاشْ يَاخْذُوا.

¹¹صَحَّة لِيكُمْ وَقْتِلِّي النَّاسْ يْعَايْرُوكُمْ وِيْعَذّْبُوكُمْ وِيْقُولُوا عْلِيكُمْ الكْلاَمْ الخَايِبْ الكُلُّو عْلَى خَاطْرِي!

¹²أَفْرْحُوا وْهلّلُوا، رَاهُو أَجْرْكُمْ عْظِيمْ فِي السْمَاءْ. رَاهُو هَكَّا عَذّْبُوا الأَنْبِيَاءْ قْبَلْكُمْ.»

¹³«إِنْتُومَا مِلْحْ الأَرْضْ، آمَا إِذَا كَانْ المِلْحْ مَا عَادِشْ عَنْدُو مَطْعِمْ، كِيفَاشْ بَاشْ تْرَجّْعُولُو مَطْعْمُو؟ مَا عَادِشْ يُصْلُحْ لْحَتَّى شَيْء كَانْ بَاشْ يِتْرْمَى البَرَّا وِالنَّاسْ يْعَفّْسُوهْ.

¹⁴إِنْتُومَا نُورْ العَالَمْ. مَا ثَمَّاشْ مْدِينَة مِبْنِيَّة فُوقْ جْبَلْ وْمَا تِتْشَافِشْ،

¹⁵وْمَا ثَمَّاشْ وَاحِدْ يْشَعِّلْ فْنَارْ وِيْحُطُّو تَحْتْ طَاسَة، آمَا يْحُطُّو فِي بْلاَصَة عَالْيَة وْيِضْوِي عَلِّي فِي الدَّارْ الكُلْهُمْ.

¹⁶خَلِّي نُورْكُمْ يِضْوِي هَكَّا قُدَّامْ النَّاسْ، بَاشْ يْشُوفُوا أَعْمَالْكُمْ البَاهْيَة وِيْمَجّْدُوا بُوكُمْ الِّي فِي السْمَاءْ.»

¹⁷«مَا يِمْشِيشْ فِي بَالْكُمْ الِّي آنَا جِيتْ بَاشْ انَّحِّي الشَّرِيعَة وِاللّي قالُوهْ الأَنْبِيَاءْ، آنَا مَا جِيتِشْ بَاشْ انَّحِّيهُمْ آمَا جِيتْ بَاشْ نْتَمِّمْهُمْ.

¹⁸نْقُلْكُمْ الحَقْ: لِينْ تُوفَى السْمَاءْ وِالأَرْضْ مَا يِتْنَحَّى حَتَّى حَرْفْ وِلاَّ نُقْطَة وَحْدَة مِالشَّرِيعَة حَتَّى لِينْ يْتِمْ كُلْ شَيْء.

¹⁹الِّي مَا يْطِيعِشْ وَحْدَة مِنْ أَصْغِرْ الوْصَايَا هَاذُومَا وِيْعَلِّمْ النَّاسْ بَاشْ يَعْمْلُو كِيفُو، بَاشْ يِتْسَمَّى صْغِيرْ فِي مَمْلِكْةْ السْمَاوَاتْ. آمَا الِّي يْطِيعْهُمْ وِيْعَلِّمْهُمْ بَاشْ يِتْسَمَّى عْظِيمْ فِي مَمْلِكْةْ السْمَاوَاتْ.

²⁰رَانِي نْقُلْكُمْ، إِذَا كَانْ مَا تْكُونُوشْ أَبْرَارْ أَكْثِرْ مِنْ الكُتَّابْ مْتَاعْ اليْهُودْ وِالفَرِّيسِيِّينْ، رَاكُمْ عْمُرْكُمْ مَا تُدْخْلُوا لْمَمْلِكْةْ السْمَاوَاتْ.»

²¹«سْمَعْتُوا الِّي تْقَالْ لِجْدُودْكُمْ: "مَا تُقْتُلْشْ، وِلِّي يُقْتُلْ يِلْزِمْ يِتْحْكَمْ عْلِيهْ."

²²آمَا آنَا رَانِي نْقُلْكُمْ: الِّي يِتْغَشِشْ عْلَى خُوهْ يِلْزْمُو يِتْحاكِمْ، وِلِّي يْقُولْ لْخُوهْ: يَا جَاهِلْ، يِسْـتْحقْ يُحْكُمْ عْلِيهْ المَجْلِسْ مْتَاعْ اليْهُودْ، وِلِّي يْقُولْ لْخُوهْ: يَا بْهِيمْ، يِسْتاهِلْ يُدْخُلْ لِجْهَنِّمْ.

²³إِمَّالاَ وَقْتِلِّي إِنْتِ تْقَدِّمْ فِي القُرْبَانْ مْتَاعِكْ فِي المَذْبِحْ وْتِتْذَكِّرْ الِّي عِنْدِكْ مُشْكْلَة مْعَ خُوكْ،

²⁴خَلِّي القُرْبَانْ مْتَاعِكْ قُدَّامْ المَذْبَحْ وْإِمْشِي اتْصَالِحْ مْعَ خُوكْ قْبَلْ، وِمْبَاعِدْ إِيجَا وْقَدِّمْ القُرْبَانْ مْتَاعِكْ.

²⁵وْإِذَا كَانْ وَاحِدْ شْكَى بِيكْ، تْرَاضَى إِنْتِ وْيَاهْ فِيسَعْ وَقْتِلِّي إِنْتُومَا مَاشِينْ لِلمَحْكْمَة، بَاشْ مَا يِشْكِيشْ بِيكْ لِلقَاضِي وِالقَاضِي يْكَلِّمْ عْلِيكْ الشُّرْطِي وتُدْخُلْ لِلحَبْسْ.

²⁶نْقُلِّكْ الحَقْ: مَاكِشْ بَاشْ تُخْرُجْ مِنْ غَادِي حَتَّى لِينْ تْخَلِّصْ آخَرْ مِلِّيمْ.»

²⁷«سْمَعْتُوا الِّي تْقَالْ لِجْدُودْكُمْ: "مَا تَزْنَاشْ."

²⁸آمَا آنَا رَانِي نْقُلْكُمْ الِّي كُلْ مِنْ يُخْزُرْ لِمْرَا وْيِشْتْهَاهَا، رَاهُو زْنَى مْعَاهَا فِي قَلْبُو.

²⁹إِذَا كَانْ عِينِكْ تْخَلِّيكْ تَعْمِلْ الذْنُوبْ، قَلِّعْهَا وْإِرْمِيهَا، رَاهُو كِتِخْسِرْ قَطْعَة مِنْ بَدْنِكْ خِيرْلِكْ مِلِّي بَدْنِكْ الكُلُّو يِتْرْمَى فِي جْهَنِّمْ.

³⁰وْإِذَا يِدِّكْ تْخَلِّيكْ تَعْمِلْ الذْنُوبْ، قُصّْهَا وْإِرْمِيهَا، رَاهُو كِتِخْسِرْ قَطْعَة مِنْ بَدْنِكْ خِيرْلِكْ مِلِّي بَدْنِكْ الكُلُّو يُدْخُلْ لِجْهَنّمْ.»

³¹«وِتْقَالْ زَادَا: "الِّي يْطَلِّقْ مَرْتُو، يَعْطِيهَا وَرْقِةْ الطْلاَقْ."

³²آمَا آنَا رَانِي نْقُلْكُمْ: الِّي يْطَلِّقْ مَرْتُو بِسْبَبْ حَاجَة أُخْرَى غِيرْ الزْنَى يْخَلِّيهَا تَزْنَي، وِلِّي يْعَرِّسْ بِمْرَا مْطَلّْقَة رَاهُو يَزْنَى.»

³³«وِسْمَعْتُوا زَادَا الِّي تْقَالْ لِجْدُودْكُمْ: "مَا تِحْلِفْشْ بِالكِذْبْ، آمَا أُصْدُقْ فِي الِّي تُوعِدْ بِيهْ رَبِّي."

³⁴آمَا آنَا رَانِي نْقُلْكُمْ مَا تِحْلْفُوشْ بِالكُلْ، لاَ بِالسْمَاءْ عْلَى خَاطِرْهَا عَرْشْ اللهْ،

³⁵وْلاَ بِالأَرْضْ عْلَى خَاطِرْهَا البْلاَصَة الِّي يْحُطْ عْلِيهَا سَاقِيهْ، وْلاَ بْأُورْشَلِيمْ عْلَى خَاطِرْهَا المْدِينَة مْتَاعْ المَلِكْ العْظِيمْ.

³⁶وْمَا تِحْلِفْشْ بْرَاسِكْ، عْلَى خَاطْرِكْ مَا تْنَجِّمْشْ تْرُدْ حَتَّى شَعْرَة فِيهْ بِيضَة وِلاَّ سُودَة

³⁷خَلِّي كْلاَمْكُمْ يْكُونْ نْعَمْ إِذا نْعَمْ وْلاَ إِذَا لاَ، وْأَيْ حَاجَة زَايْدَة عْلَى هَاذَا رَاهِي مِالشِّرِّيرْ.»

³⁸«سْمَعْتُوا الِّي تْقَالْ: "العِينْ بِالعِينْ وِالسِّنَّة بِالسِّنَّة."

³⁹آمَا آنَا نْقُلْكُمْ: مَا تْرُدُّشْ عْلَى الشَّرْ بِالشَّرْ. آمَا إِذَا كَانْ وَاحِدْ ضَرْبِكْ عْلَى خَدِّكْ اليْمِينْ دَوِّرْلُو الآخَرْ زَادَا.

⁴⁰وِلِّي يْحِبْ يِتْعَارِكْ مْعَاكْ بَاشْ يَاخُذْلِكْ جِبّْتِكْ، خَلِّيهْ يَاخُذْ بَرْنُوسِكْ زَادَا.

⁴¹وْإِذَا كَانْ وَاحِدْ يُجْبْرِكْ بَاشْ تِمْشِي مْعَاهْ كِيلُومِتْرْ، إِمْشِي مْعَاهْ زُوزْ.

⁴²الِّي يُطْلُبْ مِنْ عِنْدِكْ حَاجَة أَعْطِيهَالُو، وِلِّي يْحِبْ يِتْسَلِّفْ مِنْ عِنْدِكْ مَا تْرُدُّوشْ.»

⁴³«سْمَعْتُوا الِّي تْقَالْ: "حِبْ قْرِيبِكْ وْأَكْرِهْ عْدُوِّكْ."

⁴⁴آمَا آنَا نْقُلْكُمْ: حِبُّوا أَعْدَاءْكُمْ وْصَلِّيوْ مِنْ أَجْلْ الِّي يُظْلْمُوكُمْ،

⁴⁵بَاشْ تْكُونُوا وْلاَدْ بُوكُمْ الِّي فِي السْمَاءْ. عْلَى خَاطْرْ شَمْسُو تِضْوِي عْلَى البَاهِي وِالخَايِبْ، وْيَعْطِي المْطَرْ للصَّالِحْ وِالفَاسِدْ.

⁴⁶شْنُوَّة الشَّيْ الزَّايِدْ إِذَا كَانْ تْحِبُّوا الِّي يْحِبُّوكُمْ بَرْكَه؟ يَاخِي مُوشْ الِّي يْلِمُّوا فِي الضَّرَايِبْ يَعْمْلُوا الشَّيْء هَاذَا بِيدُو؟

⁴⁷وِشْنُوَّة الِّي فُتُّوا بِيهْ غِيرْكُمْ إِذَا كَانْ مَا تْسَلّْمُوا كَانْ عْلَى خْوَاتْكُمْ؟ يَاخِي مُوشْ الِّي مَا يَعْرْفُوشْ رَبِّي يَعْمْلُوا الشَّيْء هَاذَا بِيدُو؟

⁴⁸يِلْزِمْكُمْ تْكُونُوا كَامْلِينْ، كِيفْ مَا بُوكُمْ الِّي فِي السْمَاءْ كَامِلْ.»