Read Tunisian Arabic New Testament مَتَّى 6 Bible Online

مَتَّى 6 - Tunisian Arabic New Testament bible

مَتَّى 6

¹«رُدُّوا بَالْكُمْ تَعْمْلُوا الخِيرْ قُدَّامْ النَّاسْ بَاشْ يْشُوفُوكُمْ، مَا كَانِشْ رَاكُمْ مَا عِنْدْكُمْشْ أَجْرْ عِنْدْ بُوكُمْ الِّي فِي السْمَاءْ.

²وَقْتِلِّي تِتْصَدِّقْ عْلَى وَاحِدْ، مَا تْنَادِيشْ بِالبُوقْ كِيفْ مَا يَعْمْلُوا المُنَافْقِينْ فِي المَجَامِعْ وِالشْوَارِعْ بَاشْ النَّاسْ يُشْكْرُوهُمْ. نْقُلْكُمْ الحَقْ: رَاهُمْ خْذَاوْ أَجْرْهُمْ.

³آمَا إِنْتِ، وَقْتِلِّي تِتْصَدِّقْ مَا تْخَلِّيشْ يِدِّكْ اليْسَارْ تَعْرِفْ شْنُوَّة يِدِّكْ اليْمِينْ تَعْمِلْ،

⁴بَاشْ الصُّدْقَة مْتَاعِكْ تْكُونْ فِي السِّرْ، وْبُوكْ الِّي يْرَى فِي السِّرْ بَاشْ يْجَازِيكْ.»

⁵«وْوَقْتِلِّي تْصَلُّوا، مَا تْكُونُوشْ كِيفْ المُنَافْقِينْ، رَاهُمْ يْحِبُّوا يَاقْفُوا وِيْصَلِّيوْ فِي المَجَامِعْ بَاشْ يْشُوفُوهُمْ النَّاسْ. نْقُلْكُمْ الحَقْ: رَاهُمْ خْذَاوْ أَجْرْهُمْ.

⁶آمَا إِنْتِ، وَقْتِلِّي تْصَلِّي ادْخُلْ لْبِيتِكْ الدَّخْلاَنِيَّة وْسَكِّرْ البَابْ وْصَلِّي لْبُوكْ فِي السِّرْ. وْبُوكْ الِّي يْشُوفْ فِي السِّرْ بَاشْ يْجَازِيكْ.

⁷وْكِتْصَلِّيوْ مَا تُقْعْدُوشْ تْعَاوْدُوا فِي كْلاَمْ فَارِغْ كِيفْ الشْعُوبْ الأُخْرِينْ الِّي مَاشِي فِي بَالْهُمْ الِّي اللهْ بَاشْ يِسْمَعْهُمْ كِيْقُولُوا بَرْشَة كْلاَمْ.

⁸مَا تْكُونُوشْ كِيفْهُمْ، عْلَى خَاطِرْ بُوكُمْ يَعْرِفْ شْنُوَّة الِّي تِحْتَاجُولُو قْبَلْ مَا تُطْلْبُوهْ.

⁹إِمَّالاَ صَلِّيوْ هَكَّا: يَا بُونَا الِّي فِي السْمَاءْ، خَلِّي إِسْمِكْ يِتْقَدِّسْ.

¹⁰خَلِّي مَمْلِكْتِكْ تْجِينَا، خَلِّي إِرَادْتِكْ تْكُونْ، فِي الأَرْضْ كِيمَا فِي السْمَاءْ.

¹¹كُلْ يُومْ أَعْطِينَا خُبْزْنَا الِّي يِكْفِينَا.

¹²إِغْفْرِلْنَا ذْنُوبْنَا، كِيفْ مَا أَحْنَا نِغْفْرُوا لِلِّي يُظْلْمُوا فِينَا.

¹³مَا ادَّخِّلْنَاشْ فِي تَجْرْبَة، وْمِنْ الشَّرْ نَجِّينَا.»

¹⁴«وْإِذَا كَانْ تْسَامْحُوا النَّاسْ عْلَى غْلاَطْهُمْ، بُوكُمْ الِّي فِي السْمَاءْ زَادَا بَاشْ يِغْفْرِلْكُمْ ذْنُوبْكُمْ.

¹⁵آمَا إِذَا كَانْ مَا تْسَامْحُوشْ النَّاسْ عْلَى غْلاَطْهُمْ، حَتَّى بُوكُمْ الِّي فِي السْمَاءْ مَا يِغْفْرِلْكُمْشْ ذْنُوبْكُمْ.»

¹⁶«وْكِتْصُومُوا، مَا تْظَهّْرُوشْ الحُزْنْ عْلَى وْجُوهْكُمْ كِيفْ المُنَافْقِينْ، يْرُدُّوا وْجُوهْهُمْ خَايْبَة بَاشْ يْوَرُّوا لِلنَّاسْ الِّي هُومَا صَايْمِينْ. نْقُلْكُمْ الحَقْ: رَاهُمْ خْذَاوْ أَجْرْهُمْ.

¹⁷آمَا إِنْتِ، وَقْتِلِّي تْصُومْ امْشُطْ شَعْرِكْ وْأَغْسِلْ وِجْهِكْ،

¹⁸بَاشْ الصْيَامْ مْتَاعِكْ مَا يُظْهُرْشْ لِلنَّاسْ آمَا يُظْهُرْ لْبُوكْ الِّي مَا تْشُوفُوشْ العِينْ وْبُوكْ الِّي يْرَى الشَّيْء الِّي تَعْمْلُو فِي السِّرْ بَاشْ يْجَازِيكْ.»

¹⁹«مَا تْخَبُّوشْ لِرْوَاحْكُمْ كْنُوزْ فِي الأَرْضْ يْفَسِّدْهَا السُّوسْ وِالصْدِيدْ، وْيِحْفْرُوا عْلِيهَا السُّرَّاقْ وْيِسْرْقُوهَا.

²⁰آمَا إِكْنْزُوا لِرْوَاحْكُمْ كْنُوزْ فِي السْمَاءْ، لاَ يْفَسِّدْهَا لاَ السُّوسْ وْلاَ الصْدِيدْ، وْلاَ يِحْفْرُوا عْلِيهَا السُّرَّاقْ وْلاَ يْفَسّْدُوهَا

²¹وِينْ يْكُونْ كَنْزِكْ ثَمّة يْكُونْ قَلْبِكْ.»

²²«العِينْ هِيَ الفْنَارْ مْتَاعْ البْدَنْ. مَالاَ إِذَا كَانْ عِينِكْ صْحِيحَة، رَاهُو بَدْنِكْ الكُلْ بَاشْ يْكُونْ مَلْيَانْ بِالنُّورْ.

²³آمَا إِذَا كَانْ عِينِكْ شِرّيرَة، رَاهُو بَدْنِكْ الكُلُّو بَاشْ يْكُونْ مْعَبِّي بِالظْلاَمْ. إِذَا كَانْ النُّورْ الِّي فِيكْ ظْلاَمْ، مَالاَ قَدَّاشْ بَاشْ يْكُونْ كُبْرُو الظْلاَمْ!»

²⁴«حَتَّى وَاحِدْ مَا يْنَجِّمْ يِخْدِمْ زُوزْ أَسْيَادْ، رَاهُو يَا إِمَّا بَاشْ يَكْرَهْ وَاحِدْ مِنْهُمْ وِيْحِبْ الآخَرْ، وِلاَّ بَاشْ يْتَبَّعْ وَاحِدْ مِنْهُمْ وْيَحْقِرْ الآخَرْ. مَا تْنَجّْمُوشْ تِخْدْمُوا اللهْ وِالفْلُوسْ.

²⁵إِمَّالاَ آنَا نْقُلْكُمْ مَا تْخَمَمُوشْ عْلَى حْيَاتْكُمْ شْنُوَّة بَاشْ تَاكْلُوا وِلاَّ شْنُوَّة بَاشْ تُشْرْبُوا، وْلاَ عْلَى بْدُونَاتْكُمْ شْنُوَّة بَاشْ تِلْبْسُوا. يَاخِي مُوشْ الحَيَاةْ خِيرْ مِالمَاكْلَة، وِالبْدَنْ خِيرْ مِاللِّبْسَة؟

²⁶شُوفُوا العْصافِر كِيفَاشْ لاَ تَزْرَعْ وْلاَ تَحْصِدْ وْلاَ تْحُطْ فِي مَخْزِنْ، وْبُوكُمْ الِّي فِي السْمَاءْ يْوَكِّلْهَا. يَاخِي إِنْتُومَا مُوشْ خِيرْ مِنْهَا بَرْشَة؟

²⁷وِشْكُونْ فِيكُمْ الِّي كِيْ يْخَمِّمْ يْنَجِّمْ يْزِيدْ فِي عُمْرُو سَاعَة وَحْدَة؟

²⁸وِعْلاَشْ تْخَمَمُوا فِي اللِّبْسَة؟ أُخْزْرُوا لِلنُّوَّارْ مْتَاعْ بُوقَرْعُونْ كِيفَاشْ يِكْبِرْ: لاَ يِتْعِبْ وْلاَ يِغْزِلْ.

²⁹آمَا آنَا نْقُلْكُمْ: حَتَّى المَلِكْ سُلَيْمَانْ فِي كُلْ مَجْدُو مَا لْبِسْشْ كِيفْ وَحْدَة مِنْهَا!

³⁰إِذَا كَانْ اللهْ يْلَبِّسْ الحْشِيشْ لِبْسَة كِيمَا هَاذِي، رَغْمِلِّي الحْشِيشْ اليُومْ يِنْبِتْ وْغُدْوَة بَاشْ يِتْرْمَى فِي النَّارْ مْتَاعْ الطَّابُونَة، إِمَّالاَ قَدَّاشْ إِنْتُومَا أَوْلَى بَاشْ يْلَبِّسْكُمْ يَلِّي إِيمَانْكُمْ ضْعِيفْ!

³¹هَاذَاكَا عْلاَشْ مَا تْخَمَمُوشْ وِتْقُولُوا: شْنُوَّة بَاشْ نَاكْلُوا؟ وِلاَّ شْنُوَّة بَاشْ نُشْرْبُوا؟ وِلاَّ شْنُوَّة بَاشْ نِلْبْسُوا؟

³²رَاهِي الحَاجَاتْ هَاذِي الكُلْهَا يْلَوّْجُوا عْلِيهَا النَّاسْ الِّي مَا هُمْشْ مُؤْمْنِينْ، وْبُوكُمْ الِّي فِي السْمَاءْ يَعْرِفْ الِّي إِنْتُومَا تِحْتَاجُولهُمْ.

³³آمَا إِنْتُومَا لَوّْجُوا فِي الأُوِّلْ عْلَى مَمْلِكْةْ اللهْ وِالبِرْ مْتَاعُو، وِالحَاجَاتْ هَاذِي زَادَا بَاشْ تِتْعْطَالْكُمْ.

³⁴هَاذَاكَا عْلاَشْ مَا تْخَمَمُوشْ عْلَى غُدْوَة، رَاهُو نْهَارْ غُدْوَة بَاشْ يِخَمِّمْ عْلَى رُوحُو. كُلْ يُومْ يِكْفِيهْ الشَّرْ الِّي فِيهْ.»