Read Tunisian Arabic New Testament مَتَّى 7 Bible Online

مَتَّى 7 - Tunisian Arabic New Testament bible

مَتَّى 7

¹«مَا تُحْكْمُوشْ عْلَى النَّاسْ بَاشْ مَا يِتْحْكَمْشْ عْلِيكُمْ.

²رَاهُو الحُكْمْ الِّي تُحْكْمُوا بِيهْ عْلَى النَّاسْ بَاشْ يِتْحْكَمْ عْلِيكُمْ بِيهْ وِالكِيلْ الِّي تْكَيّْلُوا بِيهْ بَاشْ يِتْكَيّْلِلْكُمْ بِيهْ

³عْلاَشْ تْشُوفْ القَشَّة الِّي فِي عِينْ خُوكْ، وْمَا تْفِيقِشْ بِاللُّوحَة الِّي فِي عِينِكْ؟

⁴وِلاَّ كِيفَاشْ تْنَجِّمْ تْقُولْ لْخُوكْ: "خَلِّينِي انَّحِّيلِكْ القَشَّة الِّي فِي عِينِكْ" وَقْتِلِّي عِينِكْ إِنْتِ فِيهَا لُوحَة؟

⁵يَا مُنَافِقْ! نَحِّي اللُّوحَة مِنْ عِينِكْ إِنْتِ فِي الأُوِّلْ، وِمْبَاعِدْ تَوَّا تْوَلِّي تْشُوفْ بِالقْدَا وِتْنَحِّي القَشَّة مِنْ عِينْ خُوكْ.

⁶مَا تَعْطِيوْشْ الحَاجَاتْ المُقَدّْسَة لِلكْلاَبْ، وْمَا تَرْمِيوْشْ الجُوهِرْ مْتَاعْكُمْ قُدَّامْ الخْنَازِيرْ، بَاشْ مَا يَعْفْسُوشْ عْلِيهْ وِيْدُورُولْكُمْ وْيِهْجْمُوا عْلِيكُمْ.»

⁷«اطْلْبُوا تَاخْذُوا، اسْعَاوْ تَلْقُوا، دُقُّوا يِتْحَلِّلْكُمْ.

⁸رَاهُو كُلْ مِنْ يُطْلُبْ يَاخُذْ، وْكُلْ مِنْ يَسْعَى يَلْقَى، وْكُلْ مِنْ يْدُقْ يِتْحَلْلُو.

⁹شْكُونُو فِيكُمْ الِّي كِيُطْلْبُو وِلْدُو فِي الخُبْزْ يَعْطِيهْ حَجْرَة،

¹⁰وِلاَّ كِيُطْلْبُو فِي حُوتَة يَعْطِيهْ أَفْعَى؟

¹¹إِذَا كَانْكُمْ إِنْتُومَا الأَشْرَارْ تَعْرْفُوا كِيفَاشْ تَعْطِيوْ حَاجَاتْ بَاهْيَة لِوْلاَدْكُمْ، إِمَّالاَ قَدَّاشْ بُوكُمْ الِّي فِي السْمَاءْ بَاشْ يَعْطِي حَاجَاتْ بَاهْيَة لِلِّي يُطْلْبُوهْ؟

¹²إِمَّالاَ أَعْمْلُوا مْعَ النَّاسْ الحَاجَاتْ الِّي تْحِبُّوهُمْ يَعْمْلُوهُمْ مْعَاكُمْ. رَاهُو هَاذَا الِّي قَالِتْ عْلِيهْ الشَّرِيعَة وِالأَنْبِيَاءْ.»

¹³«أُدْخْلُوا مِالبَابْ الضِّيقْ. عْلَى خَاطِرْ بَابْ الهْلاَكْ وَاسِعْ وْسَاهِلْ، وْبَرْشَة اللّي يُدْخْلُوا مِنُّو.

¹⁴آمَا قَدَّاشُو ضِيقْ وصْعِيبْ الطْرِيقْ الِّي يْهِزْ لِلحَيَاةْ، وِشْوَيَّة بِالكُلْ الِّي يَلْقَاوْهْ.»

¹⁵«رُدُّوا بَالْكُمْ مِالأَنْبِيَاءْ الكَذَّابِينْ، يْجُوكُمْ لاَبْسِينْ لِبْسِةْ العْلاَلِشْ وْهُومَا مِنْ دَاخِلْ ذْيُوبَة مَا تَرْحِمْشْ.

¹⁶مِالغَلَّة مْتَاعْهُمْ تَعْرْفُوهُمْ. يَاخِي الشُّوكْ يْجِيبْ العْنِبْ، وِلاَّ العِلِّيقْ يْجِيبْ الكَرْمُوسْ؟

¹⁷إِمَّالاَ كُلْ شَجْرَة بَاهْيَة تْجِيبْ غَلَّة بَاهْيَة، وْكُلْ شَجْرَة خَايْبَة تْجِيبْ غَلَّة خَايْبَة.

¹⁸لاَ الشَّجْرَة البَاهْيَة تْجِيبْ غَلَّة خَايْبَة، وْلاَ الشَّجْرَة الخَايْبَة تْجِيبْ غَلَّة بَاهْيَة.

¹⁹كُلْ شَجْرَة مَا تْجِيبِشْ غَلَّة بَاهْيَة تِتْقَصْ وْتِتْرْمَى فِي النَّارْ.

²⁰إِمَّالاَ تَعْرْفُوهُمْ بِالغَلَّة مْتَاعْهُمْ.»

²¹«رَاهُو مُوشْ كُلْ مِنْ يْقُلِّي: "يَا رَبْ، يَا رَبْ" بَاشْ يُدْخُلْ لْمَمْلِكْةْ السْمَاوَاتْ، آمَا رَاهُو الِّي يَعْمِلْ إِرَادِةْ بَابَا الِّي فِي السْمَاءْ هُوَ الِّي بَاشْ يُدْخُلْ.

²²فِي يُومْ الحْسَابْ بَرْشَة نَاسْ بَاشْ يْقُولُولِي: "يَا رَبْ، يَا رَبْ، يَاخِي مَا تْنَبِّأْنَاشْ بْإِسْمِكْ؟ وْخَرِّجْنَا الشْوَاطِنْ بْإِسْمِكْ؟ وِعْمَلْنَا عْجَايِبْ كْبِيرَة بْإِسْمِكْ؟"

²³وْآنَا بَاشْ نْقُولِلْهُمْ: "عُمْرِي مَا عْرَفْتْكُمْ. إِبْعْدُوا عْلِيَّ يَلِّي تَعْمْلُوا فِي الشَّرْ!"»

²⁴«الِّي يِسْمَعْ كْلاَمِي هَاذَا وْيَعْمِلْ بِيهْ بَاشْ يْكُونْ كِيفْ رَاجِلْ حَكِيمْ بْنَى دَارُو عْلَى الحْجَرْ.

²⁵وْصَبِّتْ المْطَرْ وْجَاتْ الفَيَضَانَاتْ وْهَبْ الرِّيحْ بْقُوَّة عْلَى الدَّارْ هَاذِيكَا آمَا مَا طَاحِتْشْ، عْلَى خَاطِرْ السَّاسْ مْتَاعْهَا مِبْنِي عْلَى الحْجَرْ.

²⁶وِلِّي يِسْمَعْ كْلاَمِي هَاذَا وْمَا يَعْمِلْشْ بِيهْ بَاشْ يْكُونْ كِيفْ رَاجِلْ جَاهِلْ بْنَى دَارُو عْلَى الرْمَلْ.

²⁷وْصَبِّتْ المْطَرْ وْجَاتْ الفَيَضَانَاتْ وِالرِّيحْ هَبْ عْلَى الدَّارْ هَاذِيكَا يَاخِي طَاحِتْ، وْمَا بْقَى مِنْهَا حَتَّى شَيْء.»

²⁸وْكِكَمِّلْ يَسُوعْ الكْلاَمْ هَاذَا، بْقَاوْ النَّاسْ مِتْعَجّْبِينْ مِنْ التَّعْلِيمْ مْتَاعُو،

²⁹عْلَى خَاطْرُو كَانْ يْعَلِّمْ فِيهُمْ كِيفْ وَاحِدْ عَنْدُو سُلْطَة، مُوشْ كِيفْ الكُتَّابْ مْتَاعْهُمْ.