Read Tunisian Arabic New Testament مَتَّى 8 Bible Online

مَتَّى 8 - Tunisian Arabic New Testament bible

مَتَّى 8

¹وَقْتِلِّي هْبَطْ يَسُوعْ مِالجْبَلْ، تَبّْعُوهْ بَرْشَة نَاسْ.

²وِقْرُبْ مِنُّو وَاحِدْ أَبْرِصْ، وِسْجِدْلُو وْقَالْ: «يَا سِيدِي، إِذَا إِنْتِ تْحِبْ رَاكْ تْنَجِّمْ تِشْفِينِي.»

³وْمَدْ يِدُّو وْمَسُّو وْقَالُّو: «آنَا نْحِبْ، اتْشْفَى!» وْبِالوَقْتْ تِشْفَى مِالبْرَصْ.

⁴وْقَالُّو يَسُوعْ: «مَا تْقُولِشْ لْحَتَّى حَدْ. آمَا إِمْشِي لِلكَاهِنْ خَلِّيهْ يْشُوفِكْ. وِمْبَاعِدْ قَدِّمْ القُرْبَانْ الِّي أْمَرْ بِيهْ مُوسَى، شْهَادَة لِيهُمْ.»

⁵وِدْخَلْ يَسُوعْ لْكَفْرْنَاحُومْ، وْجَاهْ قَايِدْ مْتَاعْ مْيَاةْ عَسْكْرِي وِتْشَحّْتُو وْقَلُّو:

⁶«يَا سِيدِي، العَبْدْ مْتَاعِي رَاقِدْ مَشْلُولْ فِي الدَّارْ وْقَاعِدْ يِتْعَذِّبْ بَرْشَة وْمَا يْنَجِّمْشْ يِتْحَرِّكْ.»

⁷وْقَالُّو يَسُوعْ: «آنَا بَاشْ نْجِي وْنِشْفِيهْ.»

⁸آمَا القَايِدْ مْتَاعْ المْيَا جَاوْبُو: «يَا سِيدِي، آنَا مَا نِسْتَاهِلْشْ بَاشْ إِنْتِ تْجِي وتُدْخُلْ تَحْتْ سْقَفْ دَارِي. آمَا قُولْ كِلْمَة بَرْكْ وِالعَبْدْ مْتَاعِي بَاشْ يِتْشْفَى.

⁹رَانِي آنَا رَاجِلْ عِنْدِي شْكُونْ يُحْكُمْ فِيَّ وْعِنْدِي عَسْكِرْ نُحْكُمْ فِيهُمْ، نْقُولْ لْوَاحِدْ "إِمْشِي!" يِمْشِي. وِلْغِيرُو "إِيجَا!" يْجِي وْلِلعَبْدْ مْتَاعِي "أَعْمِلْ الشَّيْء هَاذَا!" يَعْمْلُو.»

¹⁰وَقْتِلِّي سَمْعُو يَسُوعْ تْعَجِّبْ وْقَالْ لِلِّي يْتَبّْعُوا فِيهْ: «نْقُلْكُمْ الحَقْ، حَتَّى وَاحِدْ فِي بَنِي إِسْرَائِيلْ مَا لْقِيتْ عَنْدُو إِيمَانْ كْبِيرْ كِيفْ هَاذَا.

¹¹نْقُلْكُمْ، بَرْشَة نَاسْ بَاشْ يْجِيوْ مِالشَّرْقْ وْمِالغَرْبْ وْيُقْعْدُوا عْلَى الطَّاوْلَة مْعَ إِبْرَاهِيمْ وْإِسْحَاقْ وْيَعْقُوبْ فِي مَمْلِكْةْ السْمَاوَاتْ،

¹²آمَا وْلاَدْ المَمْلْكَة بَاشْ يِتْرْمَاوْ البَرَّة فِي الظْلاَمْ، وِالغَادِي بَاشْ يْكُونْ البْكَاءْ وْغَزَّانْ السِّنِّينْ.»

¹³وْقَالْ يَسُوعْ لِلقَايِدْ مْتَاعْ المْيَا: «إِمْشِي، وْخَلَّى يِتْعْطَالِكْ عْلَى قَدْ إِيمَانِكْ.» وِالعَبْدْ تِشْفَى فِي الوَقْتْ هَاذَاكَا بِالضَّبْطْ.

¹⁴وْوَقْتِلِّي دْخَلْ يَسُوعْ لْدَارْ بُطْرُسْ، شَافْ الِّي نْسِيبِةْ بُطْرُسْ رَاقْدَة عِنْدْهَا السْخَانَة.

¹⁵مَسّْهَا مِنْ يِدّْهَا، تْنَحَّاتْ عْلِيهَا السْخَانَة. وْقَامِتْ وْوَلاَّتْ تِخْدِمْ فِيهْ.

¹⁶فِي العْشِيَّة هَاذِيكَا مْعَ غْرُوبْ الشَّمْسْ، جَابُولُو بَرْشَة نَاسْ سَاكْنِتْهُمْ الشْوَاطِنْ، وْخَرِّجْ الأَرْوَاحْ بْكِلْمَة وَحْدَة، وِشْفَى المُرْضَى الكُلْهُمْ.

¹⁷وِالشَّيْء هَاذَا وْقَعْ بَاشْ يْتِمْ الشَّيْء الِّي قَالُو النَّبِي إِشَعْيَاءْ: خْذَا وْجَايِعْنَا، وْهَزْ مْرَاضْنَا.

¹⁸وْوَقْتِلِّي يَسُوعْ شَافْ الِّي ثَمَّة بَرْشَة نَاسْ دَايْرِينْ بِيهْ، أْمَرْ تْلاَمِذْتُو بَاشْ يِتْعَدَّاوْ لِلشَّطْ الِّي فِي الجِيهَة الأُخْرَى.

¹⁹وْثَمَّة وَاحِدْ مِالكُتَّابْ مْتَاعْ اليْهُودْ جَاهْ وْقَالُّو: «يَا مُعَلِّمْ، بَاشْ نْتَبّْعِكْ لأَيْ بْلاَصَة تِمْشِيلْهَا.»

²⁰وْقَالُّو يَسُوعْ: «الثْعَالِبْ عِنْدْهَا مْغَاغِرْ، وِطْيُورْ السْمَاءْ عِنْدْهَا عْشَاشْ، آمَا آنَا إِبْنْ الإِنْسَانْ، رَانِي مَا عِنْدِيشْ بْلاَصَة نْكِنْ فِيهَا رَاسِي.»

²¹وْقَالُّو وَاحِدْ آخَرْ مِالتْلاَمْذَة: «يَا سِيدْنَا، خَلِّي نِمْشِي فِي الأُوِّلْ نِدْفِنْ بَابَا.»

²²آمَا يَسُوعْ قَالُّو: «تَبَّعْنِي وْخَلِّي المُوتَى يِدْفْنُوا المُوتَى مْتَاعْهُمْ!»

²³وَقْتِلِّي طْلَعْ يَسُوعْ فِي الفْلُوكَة خَلْطُوا عْلِيهْ تْلاَمِذْتُو.

²⁴وْجَاتْ رِيحْ قْوِيَّة فِي البُحَيْرَة حَتَّى لِينْ المُوجْ غَطَّى الفْلُوكَة. آمَا يَسُوعْ كَانْ رَاقِدْ.

²⁵وِمْشَاوْلُو تْلاَمِذْتُو وْقَيّْمُوهْ وْقَالُولُو: «يَا رَبْ مَنَّعْنَا، رَانَا بَاشْ نْمُوتُوا!»

²⁶وْقَالِلْهُمْ يَسُوعْ: «شْبِيكُمْ مَرْعُوبِينْ بَرْشَة، يَلِّي إِيمَانْكُمْ ضْعِيفْ؟» وِمْبَاعِدْ قَامْ وِأْمَرْ الرِّيحْ وِالبُحَيْرَة، وِالدِّنْيَا رَاضِتْ بَرْشَة.

²⁷وِالنَّاسْ تْعَجّْبُوا وْقَالُوا: «شْكُونُو هَاذَا الِّي حَتَّى مِالرِّيحْ وِالبُحَيْرَة يْطِيعُوهْ!»

²⁸وْكِجَا يَسُوعْ لِلجِيهَة الأُخْرَى لْمَنْطِقْةْ الجَدَرِيِّينْ عَرْضُوهْ زُوزْ رْجَالْ سَاكْنِتْهُمْ الشْوَاطِنْ خَارْجِينْ مِالجَّبَّانَة، وْكَانُوا هَايْجِينْ بَرْشَة، حَتَّى لِينْ مَا نَجِّمْ حَتَّى حَدْ يِتْعَدَّى عْلَى الطْرِيقْ هَاذَاكَا.

²⁹وْكَانُوا يْصِيحُوا: «آشْ بِينَّا وْبِينِكْ، يَا إِبْنْ اللهْ؟ يَاخِي جِيتْ لِهْنَا بَاشْ تْعَذِّبْنَا قْبَلْ الوَقْتْ؟»

³⁰وْكَانُوا ثَمَّة بَرْشَة حْلاَلِفْ يَرْعُوا فِي بْلاَصَة بْعِيدَة عْلِيهُمْ،

³¹وِتْشَحّْتُوهْ الشْوَاطِنْ وْقَالُوا: «إِذَا كَانْ تْخَرِّجْنَا، أَبْعِثْنَا لِلحْلاَلِفْ!»

³²قَالِلْهُمْ: «إِمْشِيوْ!» يَاخِي خَرْجُوا وْدَخْلُوا فِي الحْلاَلِفْ، وْهَبْطُوا الحْلاَلِفْ الكُلْهُمْ مِنْ حَافِةْ الجْبَلْ لِلبْحَرْ وْغَرْقُوا فِي المَاء.

³³هَرْبُوا السُّرَّاحْ وْدَخْلُوا لِلمْدِينَة وْقَالُوا عْلَى كُلْ شَيْء وْعَلِّي جْرَى لِلزُّوزْ رْجَالْ الِّي سَاكْنِتْهُمْ الشْوَاطِنْ.

³⁴وَلّوا النَّاسْ الِّي فِي المْدِينَة الكُلْهُمْ خَرْجُوا بَاشْ يْقَابْلُوا يَسُوعْ. وِتْشَحّْتُوهْ بَاشْ يَرْحِلْ مِنْ مَنْطْقِتْهُمْ.