Read Tunisian Arabic New Testament مَتَّى 9 Bible Online

مَتَّى 9 - Tunisian Arabic New Testament bible

مَتَّى 9

¹وِرْكِبْ يَسُوعْ فِي الفْلُوكَة وِتْعَدَّى وْجَا لِمْدِينْتُو.

²وْجَابُولُو النَّاسْ وَاحِدْ مَشْلُولْ رَاقِدْ عْلَى فْرَاشُو، وْكِشَافْ يَسُوعْ إِيمَانْهُمْ قَالْ لِلمَشْلُولْ: «اتْشَجَّعْ يَا وِلْدِي، رَاهِي ذْنُوبِكْ تْغِفْرِتْ.»

³وْثَمَّة جْمَاعَة مِنْ الكُتَّابْ مْتَاعْ اليْهُودْ قَالُوا فِي قْلُوبْهُمْ: «الرَّاجِلْ هَاذَا كْفَرْ!»

⁴آمَا يَسُوعْ عْرَفْهُمْ شْنُوَّة يْفَكّْرُوا، وْقَالِلْهُم: «عْلاَشْ تَقْرَاوْ فِي الشَّرْ فِي قْلُوبْكُمْ؟

⁵شْنُوَّا الأَسْهِلْ؟ إِنُّو يِتْقَالْ: "ذْنُوبِكْ تْغِفْرِتْ،" وِلاَّ يِتْقَالْ: "قُومْ وْإِمْشِي؟"

⁶آمَا بَاشْ تَعْرْفُوا الِّي آنَا إِبْنْ الإِنْسَانْ عِنْدِي السُّلْطَة فِي الأَرْضْ بَاشْ نِغْفِرْ الذْنُوبْ.» وِمْبَاعِدْ قَالْ لِلمَشْلُولْ: «قُومْ! هِزْ فْرَاشِكْ وْرَوِّحْ لْدَارِكْ.»

⁷وْهَكَّا قَامْ وْرَوِّحْ لْدَارُو.

⁸وْوَقْتِلِّي النَّاسْ شَافُوا الِّي جْرَى خَافُوا وْمَجّْدُوا اللهْ الِّي عْطَى سُلْطَة كِيفْ هَاذِي لِلبَشَرْ.

⁹وْكِتْعَدَّى يَسُوعْ مِنْ غَادِي شَافْ رَاجِلْ إِسْمُو مَتَّى قَاعِدْ فِي المَكْتِبْ مْتَاعْ الضَّرَايِبْ. وْقَالُّو: «تَبَّعْنِي.» وَلَّى قَامْ وْتَبّْعُو.

¹⁰وَقْتِلِّي يَسُوعْ مِتَّكِّي فِي دَارْ مَتَّى وْقَاعِدْ يَاكُلْ، جَاوْ بَرْشَة نَاسْ مِلِّي يْلِمُّوا فِي الضَّرَايِبْ وِالمِذْنْبِينْ وْقَعْدُوا مْعَ يَسُوعْ وِتْلاَمِذْتُو.

¹¹وْكِيفْ شَافُوا الفَرِّيسِيِّينْ الشَّيْء هَاذَا قَالُوا لِتْلاَمِذْتُو: «عْلاَشْ المُعَلِّمْ مْتَاعْكُمْ يَاكُلْ مْعَ الِّي يْلِمُّوا فِي الضَّرَايِبْ وِالمِذْنْبِينْ؟»

¹²آمَا كِسْمَعْ يَسُوعْ الشَّيْء هَاذَاكَا، قَالْ: «مُوشْ الصْحَاحْ هُومَا الِّي مِحْتَاجِينْ لِطْبِيبْ، آمَا رَاهُمْ المُرْضَى.

¹³إِمْشِيوْ اتْعَلّْمُوا آشْ مَعْنَاهَا الآيَة هَاذِي: "نْحِبْ رَحْمَة مُوشْ ذْبِيحَة." وْآنَا جِيتْ بَاشْ نِدْعِي المِذْنْبِينْ، مُوشْ الأَبْرَارْ.»

¹⁴وْجَاوْ تْلاَمِذْةْ يُوحَنَّا لْيَسُوعْ وْقَالُوا: «عْلاَشْ أَحْنَا وِالفَرِّيسِيِّينْ نْصُومُوا بَرْشَة، وِتْلَامِذْتِكْ مَا يْصُومُوشْ؟»

¹⁵قَالِلْهُمْ يَسُوعْ: «يَاخِي المِسْتَدْعِينْ لِلعِرْسْ يْنَجّْمُوا يْنَوّْحُوا، وِالعْرِيسْ مَازَالْ مَا بِينَاتْهُمْ؟ بَاشْ يْجيوْ نْهَارَاتْ يِتْهَزْ العْرِيسْ بْعِيدْ عْلِيهُمْ وِالوَقْتْ هَاذَاكَا بَاشْ يْصُومُوا.

¹⁶مَا ثَمَّاشْ حَتَّى وَاحِدْ يْرَقِّعْ لِبْسَة قْدِيمَة بِقْمَاشْ جْدِيدْ، عْلَى خَاطِرْ القْمَاشْ بَاشْ يُشْرُبْ وْيَاكُلْ مِاللِّبْسَة القْدِيمَة وِالتَّقْطِيعَة تْوَلِّي أَكْبِرْ.

¹⁷وْمَا ثَمَّاشْ حَتَّى وَاحِدْ يْحُطْ شْرَابْ جْدِيدْ فِي قْرِبْ قْدِيمَة، مَا كَانِشْ القْرِبْ بَاشْ تِطَّرْشِقْ وِالشْرَابْ يِتْكَبْ وِالقْرِبْ تِتْكَسِّرْ. آمَا رَاهُو الشْرَابْ الجْدِيدْ يِتْحَطْ فِي قْرِبْ جْدِيدَة وْهَكَّا يِتْحُفْظُوا لِثْنِينْ.»

¹⁸وَقْتِلِّي يَسُوعْ يْكَلِّمْ فِيهُمْ، جَا وَاحِدْ مِنْ رُؤَسَاءْ اليْهُودْ وِسْجِدْ قُدَّامُو وْقَالْ: «بِنْتِي مَازَالِتْ كِمَاتِتْ. إِيجَا وْحُطْ عْلِيهَا يِدِّكْ تَوْ تَحْيَى.»

¹⁹وْقَامْ يَسُوعْ وْتَبّْعُو هُوَ وِتْلاَمِذْتُو.

²⁰وْكَانِتْ ثَمَّة مْرَا تْعَانِي مِنْ نَزِيفْ دَمْ مِنْ ثْنَاشِنْ سْنَة، جَاتُو مِنْ تَالِي وْمَسِّتْ الطّْرَفْ مْتَاعْ دَبْشُو،

²¹عْلَى خَاطِرْهَا قَالِتْ فِي قَلْبْهَا: «كَانْ نْمِسّْلُو دَبْشُو بَرْكْ تَوْ نِتْشْفَى.»

²²دَارْ يَسُوعْ وْكِشَافْهَا قَالِلْهَا: «آثْقِي يَا بِنْتِي رَاهُو إِيمَانِكْ شْفَاكْ.» وْبِالوَقْتْ المْرَا وَلاَّتْ لاَبَاسْ.

²³وْوَقْتِلِّي وْصُلْ يَسُوعْ لْدَارْ الرَّئِيسْ اليْهُودِي وْشَافْ الجْمَاعَة الِّي يْزَمّْرُوا فِي الدْفَايِنْ وِالنَّاسْ عَامْلِينْ خُوضَة،

²⁴قَالْ: «إِبْعْدُوا! البْنَيَّة مَا مَاتِتْشْ، آمَا رَاهِي رَاقْدَة.»

²⁵وْوَقْتِلِّي خَرْجُوا العْبَادْ، دْخَلْ وْشَدْ البْنَيَّة مِنْ يِدّْهَا يَاخِي قَامِتْ.

²⁶وِالخْبَرْ مْتَاعْ الشَّيْء هَاذَا تِنْشَرْ فِي الجِيهَة هَاذِيكَا الكُلْهَا.

²⁷وْكِتْعَدَّى يَسُوعْ مِنْ غَادِي، ثَمَّة زُوزْ رْجَالْ عِمْيَانْ تَبّْعُوهْ وْهُومَا يْصِيحُوا: «يَا وِلْدْ دَاوُدْ أَرْحِمْنَا!»

²⁸وَقْتِلِّي دْخَلْ لِلدَّارْ، جَاوْهْ الزُّوزْ رْجَالْ العِمْيَانْ. قَالِلْهُمْ يَسُوعْ: «يَاخِي تِمّْنُوا الِّي آنَا قَادِرْ بَاشْ نَعْمِلْ الشَّيْء هَاذَا؟» قَالُولُو: «إِي نْعَمْ، يَا سِيدِي!»

²⁹وَلَّى مَسّْهُمْ يَسُوعْ مِنْ عِينِيهُمْ وْقَالْ: «خَلِّيهمْ يْنَالُوا عْلَى قَدْ إِيمَانْكُمْ.»

³⁰وِتْحَلِّتْ عِينِيهُمْ. وْنَبِّهْ عْلِيهُمْ يَسُوعْ: «رُدُّوا بَالْكُمْ لاَ وَاحِدْ يَعْرِفْ!»

³¹آمَا هُومَا خَرْجُوا وْنَشْرُوا الخْبَرْ مْتَاعُو فِي المَنْطْقَة هَاذِيكَا الكُلْهَا.

³²وْوَقْتِلِّي الزُّوزْ عِمْيَانْ خَارْجِينْ، ثَمَّة جْمَاعَة جَابُولُو وَاحِدْ بَكُّوشْ، سَاكْنُو شِيطَانْ.

³³خَرِّجْ يَسُوعْ الشِّيطَانْ وِالبَكُّوشْ وَلَّى يِتْكَلِّمْ. لَكِنْ النَّاسْ بْقَاوْ مِتْعَجّْبِينْ وْقَالُوا: «مَا شُفْنَاشْ حَاجَة كِيفْ هَاذِي فِي إِسْرَائِيلْ!»

³⁴آمَا الفَرِّيسِيِّينْ قَالُوا: «يْخَرِّجْ فِي الشْوَاطِنْ بْقُوِّةْ رَئِيسْ الشْوَاطِنْ.»

³⁵وْدَارْ يَسُوعْ فِي المُدُنْ وِالقُرَى الكُلْهَا يْعَلِّمْ فِي المَجَامِعْ مْتَاعْهُمْ وِيْبَشِّرْ بِالإِنْجِيلْ مْتَاعْ مَمْلِكْةْ اللهْ وْيِشْفِي فِي النَّاسْ مِالأَمْرَاضْ وِالوْجَايِعْ الكُلْهَا.

³⁶وَقْتِلِّي شَافْ النَّاسْ حَنْ عْلِيهُمْ عْلَى خَاطِرْهُمْ كَانُوا قَالْقِينْ وْتَاعْبِينْ كِيفْ الغْنَمْ الِّي مَا عِنْدْهَاشْ سَارِحْ.

³⁷وْقَالْ لِتْلاَمِذْتُو: «الصَّابَة بَرْشَة، آمَا الحَصَّادَا شْوَيَّة

³⁸إِمَّالاَ اطْلْبُوا مِنْ مُولَى الصَّابَة بَاشْ يَبْعِثْ خَدَّامَا لِلصَّابَة مْتَاعُو.»