Read Tunisian Arabic New Testament مَرْقُسْ 1 Bible Online

مَرْقُسْ 1 - Tunisian Arabic New Testament bible

مَرْقُسْ 1

¹هَاذِي هِيَ البِدَايَة مْتَاعْ إِنْجِيلْ يَسُوعْ المَسِيحْ إِبْنْ اللهْ

²كِيفْ مَا تْكِتْبِتْ فِي كْتَابْ النَّبِي إِشَعْيَاءْ: «هَانِي نَبْعِثْ قُدَّامِكْ رَسُولِي الِّي يْحَضِّرْلِكْ الطْرِيقْ

³صُوتْ يْنَادِي فِي الخْلاَء: حَضّْرُوا طْرِيقْ رَبّْنَا، وْخَلُّوا الثْنَايَا مْتَاعُو تِتْسْوَى.»

⁴جَا يُوحَنَّا المَعْمَدَانْ فِي الخْلاَء يْنَادِي بْمَعْمُودِيِّةْ التَّوْبَة بَاشْ تِتْغْفِرْالذْنُوبْ.

⁵وِمْشَاوْلُو النَّاسْ الِّي فِي مَنْطِقْةْ اليَهُودِيَّة وِلِّي سَاكْنِينْ فِي أُورْشَلِيمْ الكُلْهَا وِتْعَمّْدُوا عْلَى يْدِيهْ فِي وَادْ الأُرْدُنْ بَعْدْ مَا اعْتَرْفُوا بِذْنُوبْهُمْ.

⁶وْكَانِتْ لِبْسِةْ يُوحَنَّا مِنْ وْبَرْ الجْمَالْ وِحْزَامُو جِلْدْ وْيَاكُلْ فِي الجْرَادْ وِالعْسَلْ الجَّالِي.

⁷وْكَانْ يْبَشِّرْ وِيْقُولْ: «بَاشْ يْجِي الِّي هُوَ أَقْوَى مِنِّي وْمَا نِسْتْحَقِّشْ بَاشْ نَهْبِطْ وِنْحِلُّو خْيُوطْ صَنْدَالُو.

⁸آنَا عَمِّدْتْكُمْ بِالمَاء، آمَا هُوَ بَاشْ يْعَمِّدْكُمْ بِالرُّوحْ القُدُسْ.»

⁹فِي الوَقْتْ هَاذَاكَا جَا يَسُوعْ مِالنَّاصْرَة الِّي فِي مَنْطِقْةْ الجَلِيلْ وِتْعَمِّدْ فِي وَادْ الأُرْدُنْ عْلَى يْدِينْ يُوحَنَّا

¹⁰وْدُوبْ مَا خْرَجْ مِنْ المَاء شَافْ السْمَاءْ تْحَلِّتْ وِالرُّوحْ القُدُسْ هْبَطْ عْلِيهْ فِي هَيْئِةْ حْمَامَة.

¹¹وْجَا صُوتْ مِالسْمَاءْ يْقُولْ: «إِنْتِ ابْنِي الِّي نْحِبُّو، آنَا فَرْحَانْ بِيكْ.»

¹²وْبِالوَقْتْ الرُّوحْ القُدُسْ هَزْ يَسُوعْ لِلخْلاَء

¹³وْعَدَّى أَرْبْعِينْ يُومْ وِالشِّيطَانْ يْجَرَّبْ فِيهْ وْكَانْ فِي وُسْطْ الحَيَوَانَاتْ الْمِتْوَحْشَة وِالمْلاَيْكَة تِخْدِمْ فِيهْ.

¹⁴وْبَعْدْ مَا يُوحَنَّا حَطُّوهْ فِي الحَبْسْ، مْشَى يَسُوعْ لْمَنْطِقْةْ الجَلِيلْ يْبَشِّرْ بْمَلَكُوتْ اللهْ

¹⁵وِيْقُولْ: «الزْمَانْ كْمِلْ وْمَمْلِكْةْ اللهْ قُرْبِتْ. تُوبُوا وِامّْنُوا بِالإِنْجِيلْ!»

¹⁶وْوَقْتِلِّي كَانْ يَسُوعْ يِمْشِي عْلَى شَطْ البُحَيْرَة مْتَاعْ الجَلِيلْ شَافْ سِمْعَانْ وْخُوهْ أَنْدَرَاوُسْ يَرْمِيوْ فِي الشْبَاكْ فِي البُحَيْرَة عْلَى خَاطِرْهُمْ كَانُوا صَيَّادَا.

¹⁷قَالِلْهُمْ يَسُوعْ: «تَبّْعُونِي وْآنَا بَاشْ نْرُدْكُمْ صَيَّادَا مْتَاعْ نَاسْ.»

¹⁸وْبِالوَقْتْ خَلاَّوْ الشْبَاكْ مْتَاعْهُمْ وْتَبّْعُوهْ.

¹⁹وْبَعْدْ مَا زَادْ مْشَى شْوَيَّة شَافْ يَعْقُوبْ وْيُوحَنَّا وْلاَدْ زَبَدِي فِي الفْلُوكَة يْصَلّْحُوا فِي الشْبَاكْ.

²⁰وْبِالوَقْتْ نَادَالْهُمْ وْخَلاَّوْ بُوهُمْ زَبَدِي مْعَ الخَدَّامَا فِي الفْلُوكَة وْتَبّْعُوهْ.

²¹وِمْبَاعِدْ مْشَى يَسُوعْ وِتْلاَمِذْتُو لْكَفْرْنَاحُومْ وْفِي نْهَارْ السِّبْتْ دْخَلْ يَسُوعْ لِلمَجْمَعْ وِبْدَا يْعَلِّمْ.

²²الحَاضْرِينْ بْقَاوْ مِتْعَجّْبِينْ مِنْ التَّعْلِيمْ مْتَاعُو عْلَى خَاطْرُو كَانْ يْعَلِّمْ فِيهُمْ كِيفْ وَاحِدْ عَنْدُو سُلْطَة مُوشْ كِيفْ الكُتَّابْ مْتَاعْ اليْهُودْ.

²³وْكَانْ ثَمَّة فِي المَجْمَعْ رَاجِلْ سَاكْنُو رُوحْ مَنْزُوسْ صَاحْ

²⁴وْقَالْ: «آشْ بِينَّا وْبِينِكْ يَا يَسُوعْ النَّاصْرِي؟ يَاخِي جِيتْ بَاشْ تِهْلِكْنَا؟ آنَا نَعْرِفْ إِنْتِ شْكُونْ. إِنْتِ قُدُّوسْ اللهْ!»

²⁵يَاخِي يَسُوعْ أُمْرُو وْقَالُّو: «اسْكُتْ! وْأُخْرُجْ مِنُّو.»

²⁶صْرَعْ الرُّوحْ المَنْزُوسْ الرَّاجِلْ وْصَاحْ بْصُوتْ عَالِي وِخْرَجْ مِنُّو.

²⁷النَّاسْ الكُلْ بْقَاوْ مِتْعَجّْبِينْ وِبْدَاوْا يِسْأْلُوا فِي بْعَضْهُمْ: «شْنُوَّة هَاذَا؟ هَذا تَعْلِيمْ جْدِيدْ؟ وْعِنْدُو سُلْطَة حَتَّى مِالأرْوَاحْ المَنْزُوسَة يُأْمُرْ فِيهُمْ وْهُومَا يْطِيعُوهْ!»

²⁸وْبِالوَقْتْ تِنْشَرْ خْبَرْ يَسُوعْ فِي المَنَاطِقْ الِّي فِي الجَلِيلْ الكُلْهَا.

²⁹وْدُوبْ مَا يَسُوعْ وِتْلاَمِذْتُو خَرْجُوا مِالمَجْمَعْ مْشَاوْ لْدَارْ سِمْعَانْ وْأَنْدَرَاوُسْ وِمْعَاهُمْ يَعْقُوبْ وْيُوحَنَّا.

³⁰وِنْسِيبِةْ سِمْعَانْ كَانِتْ رَاقْدَة فِي الفَرْشْ عِنْدْهَا السْخَانَة وْبِالوَقْتْ كَلّْمُوا عْلِيهَا يَسُوعْ.

³¹قْرُبِّلْهَا وْشَدّْهَا مِنْ يِدّْهَا وْقَوِّمْهَا وْبِالوَقْتْ تْنَحَّاتْ عْلِيهَا السْخَانَة وْوَلِّتْ تِخْدِمْ فِيهُمْ.

³²وْفِي العْشِيَّة وَقْتِلِّي غَابِتْ الشَّمْسْ النَّاسْ جَابُولُو المُرْضَى وِلِّي سَاكْنِتْهُمْ الشْوَاطِنْ الكُلْهُمْ

³³وِالنَّاسْ الِّي فِي أُورْشَلِيمْ الكُلْهُمْ تْلَمُّوا قُدَّامْ البَابْ،

³⁴وِشْفَى بَرْشَة نَاسْ كَانُوا يْعَانُوا مِنْ بَرْشَة أَمْرَاضْ وْخَرِّجْ بَرْشَة شْوَاطِنْ. وْمَا خَلاَّشْ الشْوَاطِنْ يِتْكَلّْمُوا عْلَى خَاطِرْهُمْ عَرْفُوا شْكُونُو هُوَ.

³⁵وِاليُومِتْ غُدْوَة فِي الصْبَاحْ بِكْرِي قَامْ يَسُوعْ وِمْشَى لْبُقْعَة خَالْيَة وِبْدَا يْصَلِّي.

³⁶وِمْشَى سِمْعَانْ وِلِّي مْعَاهْ يْلَوّْجُوا عْلِيهْ

³⁷وْوَقْتِلِّي لْقَاوْهْ قَالُولُو: «رَاهُمْ النَّاسْ الكُلْ يْلَوّْجُوا عْلِيكْ!»

³⁸قَالِلْهُمْ: «هَيَّا نِمْشِيوْا لِلمُدُنْ الأُخْرَى القْرِيبَة بَاشْ نْبَشِّرْ فِيهَا عْلَى خَاطِرْنِي جِيتْ لِلشَّيْء هَاذَا.»

³⁹وِمْشَى يْبَشِّرْ فِي مَجَامِعْ اليْهُودْ الِّي فِي مَنْطِقْةْ الجَلِيلْ الكُلْهَا وِيْخَرِّجْ فِي الشْوَاطِنْ.

⁴⁰وْجَاهْ وَاحِدْ أَبْرِصْ يِتْشَحِّتْ فِيهْ وْطَاحْ عْلَى رْكَايْبُو قُدَّامُو وْقَالْ: «إِذَا إِنْتِ تْحِبْ رَاكْ تِقْدِرْ تِشْفِينِي.»

⁴¹حَنْ عْلِيهْ يَسُوعْ وْمَدْ يِدُّو وْمَسُّو وْقَالْ: «آنَا نْحِبْ، اتْشْفَى!»

⁴²وْدُوبْ مَا يَسُوعْ تْكَلِّمْ تْنَحَّى عْلِيهْ البْرَصْ وْتِشْفَى.

⁴³وْبِالوَقْتْ أَمْرُو يَسُوعْ بَاشْ يِمْشِي وْنَبِّهْ عْلِيهْ

⁴⁴وْقَالُّو: «رُدْ بَالِكْ، مَا تْقُولِشْ لْحَتَّى حَدْ. آمَا إِمْشِي لِلكَاهِنْ خَلِّيهْ يْشُوفِكْ وْقَدِّمْ القُرْبَانْ الِّي أْمَرْ بِيهْ مُوسَى عْلَى خَاطْرِكْ تِشْفِيتْ بَاشْ يْكُونْ الشَّيْء هَاذَاكَا شْهَادَة لِيهُمْ.»

⁴⁵آمَا هُوَ مْشَى وِبْدَا يْنَادِي وِنْشَرْ الخْبَرْ حَتَّى لِينْ يَسُوعْ مَا عَادِشْ يِقْدِرْ يُدْخُلْ لْحَتَّى بْلاَدْ جْهَارْ وْوَلَّى يُسْكُنْ فِي الخْلاَء وِالنَّاسْ يْجِيوْهْ مِنْ كُلْ بْلاَصَة.