Read Tunisian Arabic New Testament مَرْقُسْ 10 Bible Online

مَرْقُسْ 10 - Tunisian Arabic New Testament bible

مَرْقُسْ 10

¹وِطْلَعْ يَسُوعْ مِالبْلاَصَة هَاذِيكَا وْجَا لْمَنْطِقْةْ اليَهُودِيَّة وِالمَنَاطِقْ الِّي وْرَاء وَادْ الأُرْدُنْ وِتْلَمُّوا بِيهْ النَّاسْ مِنْ جْدِيدْ وْكِالعَادَة بْدَا يْعَلِّمْ فِيهُمْ.

²وِمْشَاوْلُو جْمَاعَة فَرِّيسِيِّينْ وْسِأْلُوهْ بَاشْ يْحُطُّوهْ فِي تَجْرْبَة: «يَاخِي حْلاَلْ بَاشْ الرَّاجِلْ يْطَلِّقْ مَرْتُو؟»

³آمَا هُوَ جَاوِبْهُمْ وْقَلْهُمْ: «آشْ وَصَّاكُمْ مُوسَى؟»

⁴قَالُوا: «مُوسَى سْمَحْ لِلرَّاجِلْ بَاشْ يِكْتِبْ وَرْقِةْ الطْلاَقْ لْمَرْتُو وِمْبَاعِدْ يْطَلِّقْهَا.»

⁵قَالِلْهُمْ يَسُوعْ: «مُوسَى كْتِبِّلْكُمْ الوْصِيَّة هَاذِي عْلَى خَاطِرْ قْلُوبْكُمْ كَاسْحَة.

⁶آمَا رَاهُو مِنْ أَوِّلْ الدِّنْيَا رَبِّي خْلَقْ الإِنْسَانْ أَنْثَى وِذْكَرْ.

⁷وْهَاذَاكَا عْلاَشْ الرَّاجِلْ يْخَلِّي بُوهْ وْأُمُّو وْيِتْرْبَطْ بْمَرْتُو

⁸وْلِثْنِينْ يْوَلِّيوْ بْدَنْ وَاحِدْ إِمَّالاَ هُومَا مَا عَادُوشْ ثْنِينْ آمَا بْدَنْ وَاحِدْ.

⁹هَاذَاكَا عْلاَشْ الِّي يَجْمْعُو اللهْ مَا يْفَرّْقُوشْ الإِنْسَانْ.»

¹⁰وْفِي الدَّارْ عَاوْدُوا التْلاَمْذَة سِأْلُوهْ مِنْ جْدِيدْ عْلَى الشَّيْء هَاذَاكَا بِيدُو.

¹¹قَالِلْهُمْ: «الِّي يْطَلِّقْ مَرْتُو وِيْعَرِّسْ بِمْرَا أُخْرَى رَاهُو زْنَى.

¹²وْإِذَا كَانْ المْرَا اطَّلِّقْ رَاجِلْهَا وِتْعَرِّسْ بْرَاجِلْ آخَرْ رَاهِي تِزْنَى!»

¹³وْثَمَّة نَاسْ جَابُوا لْيَسُوعْ وْلاَدْ صْغَارْ بَاشْ يْحُطْ عْلِيهُمْ يِدُّو وِيْبَارِكْهُمْ آمَا التْلاَمْذَة لاَمُوا عْلِيهُمْ.

¹⁴وْوَقْتِلِّي شَافْهُمْ يَسُوعْ تْغَشِشْ وْقَالِلْهُمْ: «خَلُّوا الصْغَارْ يْجُونِي وْمَا تْحُوزُوهُمْشْ، رَاهِي مَمْلِكْةْ اللهْ لِلنَّاسْ الِّي كِيفْهُمْ.

¹⁵نْقُولِلْكُمْ الحَقْ: الِّي مَا يِقْبِلْشْ مَمْلِكْةْ اللهْ كِيفْ وْلِدْ صْغِيرْ عُمْرُو مَا يُدْخْلِلْهَا!»

¹⁶وِمْبَاعِدْ هَزْ الوْلاَدْ الصْغَارْ فِي حَمْلْتُو وْحَطْ عْلِيهِمْ يْدِيهْ وْبَارِكْهُمْ.

¹⁷وْوَقْتِلِّي يَسُوعْ خَارِجْ لِلطْرِيقْ ثَمَّة رَاجِلْ مْشَالُو يِجْرِي بْسُرْعَة وِهْبَطْ عْلَى رْكَايْبُو قُدَّامُو وْسِأْلُو: «يَا مُعَلِّمْ يَا صَالِحْ آشْ نَعْمِلْ بَاشْ نُورِثْ الحَيَاةْ الأَبَدِيَّة؟»

¹⁸آمَا يَسُوعْ قَالُّو: «عْلاَشْ تْنَادِيلِي يَا صَالِحْ؟ مَا ثَمَّاشْ حَتَّى وَاحِدْ صَالِحْ كَانْ اللهْ وَحْدُو.

¹⁹إِنْتِ تَعْرِفْ الوْصَايَا: مَا تُقْتُلْشْ، مَا تَزْنَاشْ، مَا تِسْرِقْشْ، مَا تِشْهِدْشْ بِالبَاطِلْ، مَا تْغُشِّشْ، إِكْرِمْ بُوكْ وْأُمِّكْ!»

²⁰قَالُّو: «يَا مُعَلِّمْ، الحَاجَاتْ هَاذُمْ الكُلْهُمْ نَعْمِلْ فِيهُمْ مِلِّي كُنْتْ صْغِيرْ.»

²¹وْبَعْدْهَا خْزَرْلُو يَسُوعْ وْحَبُّو وْقَالُّو: «مَا زَالِتْ نَاقْصَاتِكْ حَاجَة وَحْدَة، بِيعْ كُلْ مَا تِمْلِكْ وْفَرّْقُو عْلَى الفُقَرَاءْ وْهَكَّا يْوَلِّي عِنْدِكْ كَنْزْ فِي السْمَاءْ وِمْبَاعِدْ إِيجَا وْتَبِّعْنِي.»

²²آمَا هُوَ كِسْمَعْ الكْلاَمْ هَاذَا مْشَى حْزِينْ وْوَلَّى مَهْمُومْ عْلَى خَاطْرُو كَانْ صَاحِبْ مَالْ كْثيرْ.

²³هَزْ يَسُوعْ عِينِيهْ وِخْزَرْ عْلَى جْنَابُو وْقَالْ لِتْلاَمِذْتُو: «قَدَّاشْ صْعِيبْ عْلَى النَّاسْ الغُنْيَا بَاشْ يُدْخْلُوا لْمَمْلِكْةْ اللهْ!»

²⁴تْعَجّْبُوا التْلاَمْذَة وَقْتِلِّي سَمْعُوا كْلاَمُو وْزَادْ يَسُوعْ قَالِلْهُمْ: «يَا وْلاَدِي قَدَّاشْ صْعِيبْ عْلَى النَّاسْ الغُنْيَا بَاشْ يُدْخْلُوا لْمَمْلِكْةْ اللهْ!

²⁵دْخُولْ الجْمَلْ فِي نُقْبَة مْتَاعْ إِبْرَة أسْهِلْ مِنْ إِنُّو وَاحِدْ غْنِي يُدْخُلْ لْمَمْلِكْةْ اللهْ!»

²⁶التْلاَمْذَة سْتَغْرْبُوا بَرْشَة وْقَالُوا لِبْعَضْهُمْ: «إِمَّالاَ شْكُونْ يْنَجِّمْ يُخْلُصْ؟»

²⁷خْزَرِّلْهُمْ يَسُوعْ وْقَالِلْهُمْ: «هَاذَا مُسْتَحِيلْ عِنْدْ النَّاسْ آمَا مُوشْ عِنْدْ اللهْ، كُلْ شَيْء مُمْكِنْ عِنْدْ اللهْ!»

²⁸قَلُّو بُطْرُسْ: «شُوفْ، أَحْنَا خَلِّينَا كُلْ شَيْء وْتَبِّعْنَاكْ.»

²⁹جَاوْبُو يَسُوعْ: «نْقُلْكُمْ الحَقْ: كُلْ مِنْ خَلِّي دَارْ وِلاَّ إِخْوَة وِلاَّ خْوَاتْ وِلاَّ أُمْ وِلاَّ بُو وِلاَّ وْلاَدْ وِلاَّ أَرْضْ عْلَى خَاطْرِي وِعْلَى خَاطِرْ الإِنْجِيلْ

³⁰بَاشْ يَاخُذْ قَدْهُمْ مْيَاةْ مَرَّة دْيَارْ وْإِخْوَة وِخْوَاتْ وْأُمَّاتْ وِوْلاَدْ وْأَرَاضِي فِي الزْمَانْ هَاذَا وْيِضْطَهْدُوهْ زَادَا وْيَاخُذْ فِي الآخْرَة الحَيَاةْ الأَبَدِيَّة.

³¹آمَا رَاهُمْ بَرْشَة نَاسْ فِي الأُوِّلْ بَاشْ يْوَلِّيوْ فِي الإِخِّرْ وِالنَّاسْ الِّي فِي الإِخِّرْ بَاشْ يْوَلِّيوْ فِي الأُوِّلْ!»

³²وْكَانُوا فِي الطْرِيقْ طَالْعِينْ لْأُورْشَلِيمْ. وْيَسُوعْ يِمْشِي فِي لُوِّلْ وِالتْلاَمْذَة كَانُوا مِتْعَجّْبِينْ وِالنَّاسْ الأُخْرِينْ الِّي يْتَبّْعُوا فِيهْ خَايْفِينْ وْهَزْ الأَثْنَاشِنْ تِلْمِيذْ وَحَّدْهُمْ وِبْدَا يَحْكِيلْهُمْ عَلِّي بَاشْ يَجْرَالُو وْقَالْ:

³³«هَانَا طَالْعِينْ لْأُورْشَلِيمْ وْآنَا إِبْنْ الإِنْسَانْ بَاشْ يْسَلّْمُونِي لْرُؤَسَاءْ الكُهَّانْ وِالكُتَّابْ مْتَاعْ اليْهُودْ. بَاشْ يُحْكْمُوا عْلِيَّ بِالمُوتْ وِيْسَلّْمُونِي لِلشْعُوبْ الأُخْرِينْ.

³⁴بَاشْ يِتْمَسْخْرُوا عْلِيَّ وْيِبْصْقُوا عْلِيَّ وْيَضْرْبُونِي بِالسُّوطْ وْيُقْتْلُونِي وْفِي النْهَارْ الثَّالِثْ بَاشْ نْقُومْ مِالمُوتْ!»

³⁵الوَقْتْ هَاذَاكَا مْشَالُو يَعْقُوبْ وْيُوحَنَّا وْلاَدْ زَبَدِي وْقَالُولُو: «يَا مُعَلِّمْ: نْحِبُّوكْ تَعْمْلِلْنَا الشَّيْء الِّي نُطْلْبُوهْ مِنِّكْ.»

³⁶سْإِلْهُمْ: «آشْ تْحِبُّوا نَعْمْلِلْكُمْ؟»

³⁷قَالُولُو: «خَلِّينَا نُقْعْدُوا وَاحِدْ عْلَى يْمِينِكْ وِالآخَرْ عْلَى يْسَارِكْ وَقْتِلِّي تُقْعُدْ عْلَى عَرْشِكْ فِي المَجْدْ مْتَاعِكْ!»

³⁸قَالِلْهُمْ يَسُوعْ: «انْتُومَا مَا كُمْشْ عَارْفِينْ شْنُوَّة قَاعْدِينْ تُطْلْبُوا: يَاخِي تْنَجّْمُوا تُشْرْبُوا الكَاسْ الِّي بَاشْ نُشْرُبْهَا وِلاَّ تِتْعَمّْدُوا بِالمَعْمُودِيَّة الِّي بَاشْ نِتْعَمِّدْ بِيهَا؟»

³⁹قَالُولُو: «انَّجّْمُوا» جَاوِبْهُمْ يَسُوعْ: «رَاكُمْ بَاشْ تُشْرْبُوا الكَاسْ الِّي بَاشْ نُشْرُبْهَا وْبِشْ تِتْعَمّْدُوا بِالمَعْمُودِيَّة الِّي بَاشْ نِتْعَمِّدْ بِيهَا.

⁴⁰آمَا القْعَادْ عْلَى يْمِينِي وِعْلَى يْسَارِي مَا انَّجِّمْشْ نَعْطِيهْ كَانْ لِلِّي حَضِّرْهُولْهُمْ اللهْ.»

⁴¹وْوَقْتِلِّي سَمْعُوا العَشْرَة تْلاَمْذَة الأُخْرِينْ تْغَشَشُوا عْلَى يَعْقُوبْ وْيُوحَنَّا.

⁴²آمَا يَسُوعْ نَادَالْهُمْ وْقَالِلْهُمْ: «تَعْرْفُوا الِّي الحُكَّامْ مْتَاعْ الشْعُوبْ يِتْحَكّْمُوا فِيهُمْ، وِلِّي عِنْدْهُمْ سُلْطَة يِتْسَلّْطُوا عْلِيهُمْ.

⁴³آمَا انْتُومَا لاَزِمْ مَا يْكُونِشْ مَا بِينَاتْكُمْ الشَّيْء هَاذَاكَا. آمَا الِّي يْحِبْ يْكُونْ فِيكُمْ عْظِيمْ خَلِّيهْ يْكُونْ خَادِمْ لِيكُمْ.

⁴⁴وِلِّي يْحِبْ يْوَلِّي لُوِّلْ فِيكُمْ خَلِّيهْ يْكُونْ عَبْدْ لِيكُمْ.

⁴⁵حَتَّى آنَا إِبْنْ الإِنْسَانْ مَا جِيتِشْ بَاشْ النَّاسْ يِخْدْمُونِي آمَا جِيتْ بَاشْ نِخْدِمْهُمْ وْنَعْطِي حْيَاتِي بَاشْ نِفْدِي بِيهَا بَرْشَة مِنْهُمْ.»

⁴⁶وِمْبَاعِدْ وُصْلُوا لْأَرِيحَا وْوَقْتِلِّي يَسُوعْ كَانْ خَارِجْ مِنْ المْدِينَة وِمْعَاهْ تْلاَمِذْتُو وْبَرْشَة نَاسْ أُخْرِينْ كَانْ بَارْتِيمَاوُسْ الأَعْمَى وِلْدْ تِيمَاوْسْ قَاعِدْ عْلَى جْنَبْ الطْرِيقْ يُطْلُبْ.

⁴⁷وَقْتِلِّي سْمَعْ الِّي هَاذَاكَا هُوَ يَسُوعْ الِّي مِالنَّاصْرَة بْدَا يْعَيِّطْ وِيْقُولْ: «يَا يَسُوعْ وِلْدْ دَاوُدْ! ارْحِمْنِي!»

⁴⁸وْصَاحُوا عْلِيهْ بَرْشَة نَاسْ بَاشْ يُسْكُتْ، آمَا هُوَ زَادْ فِي الصْيَاحْ: «يَا وِلْدْ دَاوُدْ ارْحِمْنِي.»

⁴⁹وِوْقُفْ يَسُوعْ وْقَالْ: «نَادِيوْلُو.» وْنَادَاوْ لِلرَّاجِلْ الأَعْمَى وْقَالُولُو: «اتْشَجَّعْ وْقُومْ! آهُوَ يْنَادِيلِكْ!»

⁵⁰نَحَّى كَبُّوطُو وْنَقِّزْ جَا وَاقِفْ عْلَى سَاقِيهْ وْجَا لْيَسُوعْ.

⁵¹وْسِأْلُو يَسُوعْ: «شْنُوَّة تْحِبّْنِي نَعْمِلِّكْ؟» قَالُّو الأَعْمَى: «يَا مُعَلِّمْ، نْحِبْ نَرْجَعْ نْشُوفْ!»

⁵²وْقَالُّو يَسُوعْ: «إِمْشِي! إِيمَانِكْ شْفَاكْ.» وْبِالوَقْتْ رْجَعْ يْشُوفْ وِبْقَى يْتَبَّعْ فِي يَسُوعْ فِي الطْرِيقْ.