Read Tunisian Arabic New Testament مَرْقُسْ 11 Bible Online

مَرْقُسْ 11 - Tunisian Arabic New Testament bible

مَرْقُسْ 11

¹كِي قْرُبْ يَسُوعْ وِتْلاَمِذْتُو مِنْ أُورْشَلِيمْ. وُصْلُوا لْبِيتْ فَاجِي وْقَرْيِةْ بِيتْ عَنْيَا. فِينْ جْبَلْ الزِّيتُونْ، بْعَثْ يَسُوعْ زُوزْ مِنْ تْلاَمِذْتُو

²وْقَالِلْهُمْ: «إِمْشِيوْ لِلقَرْيَة المْقَابْلِتْكُمْ وْدُوبْ مَا تُدْخْلُوهَا تَلْقَاوْ جَحْشْ مَرْبُوطْ مَا رْكِبْ عْلِيهْ حَتَّى حَدْ، حِلُّولُو الرْبَاطْ وْجِيبُوهُولِي هْنَا.

³وْإِذَا وَاحِدْ قَالِلْكُمْ: "آشْ تَعْمْلُوا؟" قُولُوا: "الرَّبْ مِحْتَاجْلُو" وْتَوْ يْرَجّْعُو فِيسَعْ.»

⁴وِمْشَاوْ وِلْقَاوْ جَحْشْ مَرْبُوطْ البَرَّة مِالبَابْ عْلَى الطْرِيقْ. حَلُّولُو الرْبَاطْ

⁵يَاخِي ثَمَّة جْمَاعَة كَانُوا وَاقْفِينْ الغَادِي قَالُولْهُمْ: «آشْ تَعْمْلُوا؟ عْلاَشْ تْسَيّْبُوا فِي الجَّحْشْ؟»

⁶وْجَاوْبُوا كِيفْ مَا وَصَّاهُمْ يَسُوعْ بِالضَّبْطْ وَلاَّوْ خَلاَّوْهُمْ هَزُّوهْ.

⁷وْجَابُوا الجَّحْشْ لْيَسُوعْ وْحَطُّوا عْلِيهْ كْبَابِطْهُمْ وْهُوَ رْكِبْ عْلِيهْ.

⁸وْبَرْشَة نَاسْ فِرْشُوا دْبَشْهُمْ فِي الطْرِيقْ وْنَاسْ أُخْرِينْ جَابُوا عِيدَانْ قَصُّوهَا مِالسْوَانِي.

⁹وِالنَّاسْ الِّي مَاشِينْ قُدَّامْ يَسُوعْ وِلِّي يْتَبّْعُوا فِيهْ كَانُوا يْغَنِّيوْ: أُوصَنَّا! مُبَارَكْ الِّي جَايْ بْإِسْمْ الرَّبْ

¹⁰مُبَارْكَة مَمْلِكْةْ بُونَا دَاوُدْ الِّي جَايَة! أُوصَنَّا فِي الأَعَالِي!

¹¹وِمْبَاعِدْ دْخَلْ يَسُوعْ لْأُورْشَلِيمْ، وِمْشَى لِلهَيْكِلْ وِتْفَرِّجْ فِي الحَاجَاتْ الِّي فِيهْ الكُلْهَا حَتَّى لْإِخْرْ العْشِيَّة، وِالوَقْتْ كَانْ امَّخَّرْ يَاخِي خْرَجْ وِمْشَى لْبِيتْ عَنْيَا هُوَ وِالأَثْنَاشِنْ تِلْمِيذْ.

¹²وِاليُومِتْ غُدْوَة بَعْدْ مَا مْشَاوْ مِنْ بِيتْ عَنْيَا يَسُوعْ جَاعْ.

¹³وْشَافْ مِنْ بْعِيدْ كَرْمَة عَامْلَة الوْرَقْ مْشَالْهَا بَالِكْشِي يَلْقَى فِيهَا كَرْمُوسْ وْوَقْتِلِّي وْصُلِّلْهَا مَا لْقَى فِيهَا كَانْ الوْرَقْ عْلَى خَاطِرْ وَقْتْ الكَرْمُوسْ مَازَالْ مَا جَاشْ.

¹⁴تْكَلِّمْ وْقَالِلْهَا: «حَتَّى حَدْ مَا عَادْ يَاكُلْ مِنِّكْ الغَلَّة لِلأَبَدْ!» وِتْلاَمِذْتُو كَانُوا يِسْمْعُوا فِيهْ.

¹⁵وْوُصْلُوا لْأُورْشَلِيمْ، وِدْخَلْ يَسُوعْ لِلهَيْكِلْ وِبْدَا يْطَرِّدْ فِلِّي كَانُوا يْبِيعُوا وْيِشْرِيوْ فِي وُسْطْ الهَيْكِلْ وِقْلِبْ الطْوَاوِلْ مْتَاعْ النَّاسْ الِّي يْصَرّْفُوا فِي الفْلُوسْ وِالكْرَاسِي مْتَاعْ الِّي يْبِيعُوا فِي الحْمَامْ.

¹⁶وْمَا خَلاَّشْ حَتَّى وَاحِدْ يْدَخِّلْ أَيْ حَاجَة لِلهَيْكِلْ.

¹⁷وْعَلِّمْهُمْ وْقَالِلْهُمْ: «يَاخِي مَا تِكْتِبْشْ فِي الكْتَابْ المُقَدَّسْ: بِيتِي بَاشْ تِتْسَمَّى بِيتْ الصَّلاَةْ مْتَاعْ الشْعُوبْ الكُلْهُمْ؟ وِانْتُومَا رَدِّيتُوهَا دَامُوسْ السُّرَّاقْ!»

¹⁸وْسَمْعُوا رُؤَسَاءْ الكُهَّانْ وِالكُتَّابْ مْتَاعْ اليْهُودْ بِلِّي وْقَعْ وِبْدَاوْا يْلَوّْجُوا كِيفَاشْ يُقْتْلُوهْ، آمَا كَانُوا خَايْفِينْ مِنُّو عْلَى خَاطِرْ النَّاسْ الكُلْ كَانْ عَاجِبْهُمْ تَعْلِيمُو.

¹⁹وْوَقْتِلِّي جَاتْ العْشِيَّة خْرَجْ يَسُوعْ وِتْلاَمِذْتُو مِالمْدِينَة.

²⁰وْوَقْتِلِّي كَانُوا مِتْعَدِّينْ اليُومِتْ غُدْوَة فِي الصْبَاحْ بِكْرِي شَافُوا الكَرْمَة الكُلْهَا يَابْسَة حَتَّى مِنْ عْرُوقْهَا.

²¹وِتْذَكِّرْ بُطْرُسْ وْقَلُّو: «يَا مُعَلِّمْ شُوفْ! الكَرْمَة الِّي إِنْتِ لْعَنْتْهَا يِبْسِتْ!»

²²جَاوِبْ يَسُوعْ وْقَالْ: «امّْنُوا بِالله!

²³نْقُلْكُمْ الحَقْ: الِّي يْقُولْ لِلجْبَلْ هَاذَا: "اتْقَلِّعْ وْطِيحْ فِي البْحَرْ!" وْمَا يْشِكِّشْ فِي قَلْبُو آمَا يِمِّنْ إِنُّو الشَّيْء الِّي يْقُولُو بَاشْ يَاقَعْ. رَاهُو الشَّيْء هَاذَاكَا بَاشْ يَاقَعْ.

²⁴هَاذَاكَا عْلاَشْ نْقُولِلْكُمْ: أَيْ حَاجَة تُطْلْبُوهَا فِي الصَّلاَةْ، امّْنُوا الِّي إِنْتُومَا خْذِيتُوهاَ وْتَوْ تِتْعْمَلِّلْكُمْ.

²⁵وْوَقْتِلِّي تَاقْفُوا بَاشْ تْصَلُّوا، وْتِتْذَكّْرُوا الِّي ثَمَّة وَاحِدْ غْلُطْ مْعَاكُمْ اغْفْرُولُو بَاشْ بُوكُمْ الِّي فِي السْمَاءْ يِغْفْرِلْكُمْ ذْنُوبْكُمْ.

²⁶[وْإِذَا كَانْ مَا تَغْفْرُوشْ لِلأُخْرِينْ، بُوكُمْ الِّي فِي السْمَاءْ زَادَا مَا يَغْفِرْشْ لِيكُمْ ذْنُوبْكُمْ.]»

²⁷وِمْبَاعِدْ رَجْعُوا لْأُورْشَلِيمْ مَرَّة أُخْرَى وْوَقْتِلِّي كَانْ يِمْشِي فِي الهَيْكِلْ مْشَاوْلُو رُؤَسَاءْ الكُهَّانْ وِالكُتَّابْ مْتَاعْ اليْهُودْ وِالشْيُوخْ

²⁸وْسِأْلُوهْ: «بَانَا سُلْطَة تَعْمِلْ فِي الشَّيْء هَاذَا؟ وِشْكُونْ عْطَاكْ السُّلْطَة بَاشْ تَعْمِلْ الشَّيْء هَاذَا؟»

²⁹جَاوِبْهُمْ يَسُوعْ وْقَالِلْهُمْ: «وْآنَا زَادَا نِسْإِلْكُمْ سُؤَالْ وَاحِدْ وْإِذَا تْجَاوْبُونِي عْلِيهْ نْقُلْكُمْ بَانَا سُلْطَة آنَا قَاعِدْ نَعْمِلْ فِي الشَّيْء هَاذَا:

³⁰مْنِينْ جَاتْ المَعْمُودِيَّة مْتَاعْ يُوحَنَّا؟ مِالسْمَاءْ وِلاَّ مِنْ عِنْدْ النَّاسْ؟ جَاوْبُونِي!»

³¹تْفَاهْمُوا مَا بِينَاتْهُمْ وْقَالُوا: «إِذَا قُلْنَا: "مِالسْمَاءْ" يْقُولْ: "إِمَّالاَ عْلاَشْ مَا امِّنْتُوشْ بِيهْ؟"

³²يَاخِي نْقُولُوا: "مِنْ عِنْدْ النَّاسْ؟"» وْكَانُوا خَايْفِينْ مِنْ النَّاسْ عْلَى خَاطِرْهُمْ الكُلْهُمْ كَانُوا مُقْتَنْعِينْ الِّي يُوحَنَّا نَبِي بِالحَقْ.

³³وْجَاوْبُوا يَسُوعْ وْقَالُولُو: «مَا نَعْرْفُوشْ.» قَالِلْهُمْ يَسُوعْ: «حَتَّى آنَا مَا نْقُلْكُمْشْ بْأَيْ سُلْطَة نَعْمِلْ فِي الشَّيْء هَاذَا.»