Read Tunisian Arabic New Testament مَرْقُسْ 12 Bible Online

مَرْقُسْ 12 - Tunisian Arabic New Testament bible

مَرْقُسْ 12

¹وِبْدَا يَسُوعْ يْحَدِّثْ فِيهُمْ بِالأَمْثَالْ، قَالْ: «ثَمَّة وَاحِدْ زْرَعْ سَانْيَة مْتَاعْ عْنِبْ وْدَوِّرْهَا بْسُورْ وِبْنَى فِيهَا مَعْصْرَة وِعْمَلْ فِيهَا نَاظُورْ وِكْرَاهَا لِجْمَاعَة خَمَّاسَا وْسَافِرْ لِبْلاَدْ أُخْرَى.

²وْكِطَابْ العْنِبْ بْعَثْ وَاحِدْ مِالخُدَّامْ مْتَاعُو لِلخَمَّاسَا بَاشْ يَاخُذْ بَايُو مِالصَّابَة.

³آمَا هُومَا شِدُّوهْ وْضَرْبُوهْ وْرَجّْعُوهْ يْدِيهْ فَارْغَة

⁴وِبْعَثِّلْهُمْ مَرَّة أُخْرَى خْدِيمْ آخَرْ. يَاخِي ضَرْبُوهْ عْلَى رَاسُو دَمْغُوهْ ورَجّْعُوهُولُو مُهَانْ.

⁵وِبْعَثْ وَاحِدْ آخَرْ، وْقَتْلُوهْ. وْزَادْ بْعَثْ بَرْشَة أُخْرِينْ وْثَمَّة شْكُونْ مِنْهُمْ الِّي ضَرْبُوهُمْ وْثَمَّة شْكُونْ الِّي قَتْلُوهُمْ.

⁶وْمَا بْقَالُو كَانْ وْلِدْ وَاحِدْ يْحِبُّو بَرْشَة زَادْ بْعَثْهُولْهُمْ فِي الإِخِّرْ وْقَالْ: "تَوْ يْقَدّْرُوا وِلْدِي!"

⁷آمَا الخَمَّاسَا قَالُوا لِبْعَضْهُمْ: "هَاذَا هُوَ الِّي بَاشْ يُورِثْ هَيَّا نُقْتْلُوهْ وِالوَرْثَة الكُلْهَا بَاشْ تْوَلِّي مْتَاعْنَا!"

⁸وْشَدُّوهْ وْقَتْلُوهْ وِرْمُوهْ لْبَرَّة مِالسَّانْيَة مْتَاعْ العْنِبْ.

⁹آشْ بَاشْ يَعْمِلْ مُولَى العْنِبْ؟ بَاشْ يْجِي وْيُقْتُلْ الخَمَّاسَا وْيَعْطِي العْنِبْ لْنَاسْ أُخْرِينْ.

¹⁰يَاخِي مَا قْرِيتُوشْ الآيَة الِّي فِي الكْتَابْ المُقَدَّسْ؟ "الحَجْرَة الِّي رَفْضُوهَا البَنَّايَا. هِيَ بِيدْهَا وَلاَّتْ حَجْرِةْ السَّاسْ الِّي الدَّارْ قَايْمَة عْلِيهَا.

¹¹الرَّبْ عْمَلْ الشَّيْء هَاذَا، وْهُوَ عْجِيبْ فِي عِينِينَا!"»

¹²وْكَانُوا شْيُوخْ اليْهُودْ يْلَوّْجُوا كِيفَاشْ يْشِدُّوا يَسُوعْ كِفِهْمُوا الِّي هُوَ كَانْ يُقْصُدْ فِيهُمْ هُومَا بِالمَثَلْ هَاذَا آمَا كَانُوا خَايْفِينْ مِالنَّاسْ وْخَلَّاوْهْ وِمْشَاوْ.

¹³وْبَعْثُوا لْيَسُوعْ جْمَاعَة مِنْ الفَرِّيسِيِّينْ وِالأَعْضَاءْ مْتَاعْ حِزْبْ هِيرُودُسْ بَاشْ يْحَصّْلُوهْ بْكِلْمَة يْقُولْهَا.

¹⁴وْجَاوْهْ وْقَالُولُو: «يَا مُعَلِّمْ، أَحْنَا نَعْرْفُوا الِّي إِنْتِ صَادِقْ، وْمَا يْهِمِّكْشْ فِي حَتَّى حَدْ. عْلَى خَاطْرِكْ مَا تْرَاعِيشْ مْقَامَاتْ النَّاسْ، وِتْعَلِّمْ طْرِيقْ اللهْ بِالحَقْ: يَاخِي حْلاَلْ بَاشْ نَدْفْعُوا الضَّرَايِبْ لِلقَيْصَرْ وِلاَّ لاَ؟»

¹⁵آمَا هُوَ فَاقْ بِالنِّفَاقْ مْتَاعْهُمْ وْقَالِلْهُمْ: «عْلاَشْ تْجَرّْبُوا فِيَّ؟ جِيبُولِي دِينَارْ بَاشْ نْشُوفْهَا!»

¹⁶وْجَابُولُو وَحْدَة وَلَّى سْإِلْهُمْ: «مْتَاعْ شْكُونْ التَّصْوِيرَة هَاذِي وِالإِسْمْ هَاذَا؟» قَالُولُو: «مْتَاعْ القَيْصِرْ.»

¹⁷قَالِلْهُمْ يَسُوعْ: «أَعْطِيوْ الحَاجَاتْ مْتَاعْ القَيْصِرْ لِلقَيْصَرْ، وِالحَاجَاتْ مْتَاعْ اللهْ للهْ.» وِالكُلْهُمْ بْقَاوْ مِتْعَجّْبِينْ فِيهْ.

¹⁸وْجَاوْ جْمَاعَة مِالصَّدُّوقِيِّينْ لْيَسُوعْ وْهُومَا الِّي يْقُولُوا الِّي مَا ثَمَّاشْ قْيَامَة بَعْدْ المُوتْ وْسِأْلُوهْ وْقَالُوا:

¹⁹«يَا مُعَلِّمْ، مُوسَى كْتِبِّلْنَا: "إِذَا كَانْ وَاحِدْ خُوهْ مَاتْ وْخَلَّى مَرْتُو مِنْ بَعْدُو مِنْ غِيرْ مَا يْجِيبْ وْلاَدْ. رَاهُو يِلْزْمُو يْعَرِّسْ بِيهَا وِيْجِيبْ وْلاَدْ وِيْقَيِّدْهُمْ بْإِسْمْ خُوهْ الِّي مَاتْ."

²⁰وْكَانْ ثَمَّة سَبْعَة إِخْوَة الأُوِّلْ فِيهُمْ عَرِّسْ بِمْرَا وْمَاتْ مِنْ غِيرْ مَا تْجِيبْ مِنُّو وْلاَدْ.

²¹وْعَرِّسْ بِيهَا الثَّانِي وْمَاتْ مِنْ غِيرْ مَا يْجِيبْ وْلاَدْ وِالثَّالِثْ زَادَا عْمَلْ نَفْسْ الشَّيْء.

²²وْهَكَّا عَرّْسُوا بِيهَا السَّبْعَة إِخْوَة مِنْ غِيرْ مَا جَابُوا وْلاَدْ. وْبَعْدْهُمْ الكُلْ زَادِتْ مَاتِتْ المْرَا.

²³فِي يُومْ القْيَامَة المْرَا هَاذِيكَا بَاشْ تْكُونْ مَرْةْ شْكُونْ فِيهُمْ، عْلَى خَاطِرْهَا عَرّْسِتْ بِيهُمْ الكُلْهُمْ؟»

²⁴جَاوِبْهُمْ يَسُوعْ: «إِنْتُومَا غَالْطِينْ عْلَى خَاطِرْكُمْ مَا فْهِمْتُوشْ الكْتَابْ المُقَدَّسْ وْقُدْرِةْ اللهْ؟

²⁵وَقْتِلِّي النَّاسْ يْقُومُوا مِنْ بِينْ المُوتَى رَاهُمْ لاَ يْعَرّْسُوا وْلاَ يْعَرّْسُوا بِيهُمْ وِيْكُونُوا كِيفْ المْلاَيْكَة الِّي فِي السْمَاءْ.

²⁶آمَا كَانْكُمْ عْلَى القْيَامَة مْتَاعْ المُوتَى يَاخِي مَا قْرِيتُوشْ فِي كْتَابْ مُوسَى كِيفَاشْ اللهْ كَلّْمُو بِحْذَا شَجْرِةْ العِلِّيقْ وْقَالُّو: "آنَا إِلاَهْ إِبْرَاهِيمْ وْإِلاَهْ إِسْحَاقْ وْإِلاَهْ يَعْقُوبْ."

²⁷هُوَ مُوشْ إِلاَهْ المُوتَى، هُوَ إِلاَهْ الحَيِّينْ. رَاكُمْ غَالْطِينْ بَرْشَة!»

²⁸وَاحِدْ مِنْ الكُتَّابْ مْتَاعْ اليْهُودْ سْمَعْهُمْ وَقْتِلِّي هُومَا يِتْنَاقْشُوا وْشَافْ الِّي يَسُوعْ جَاوِبْهُمْ بِالقْدَا وَلَّى مْشَالُو وْسِأْلُو: «آنَا هِي الوْصِيَّة الأُولَى الِّي هِيَ أَهَمْ مِالوْصَايَا الأُخْرَى الكُلْهَا؟»

²⁹جَاوْبُو يَسُوعْ: «أَهَمْ وْصِيَّة هِيَ: "اسْمَعْ يَا إِسْرَائِيلْ الرَّبْ إِلاَهْنَا هُوَ رَبْ وَاحِدْ.

³⁰حِبْ الرَّبْ إِلاَهِكْ بْقَلْبِكْ الكُلُّو وِبْرُوحِكْ الكُلْهَا وِبْعَقْلِكْ الكُلُّو وِبْقُوتِكْ الكُلْهَا."

³¹وِالوْصِيَّة الثَّانْيَة هِيَ: "حِبْ قْرِيبِكْ كِيفْ مَا تْحِبْ رُوحِكْ"، مَا ثَمَّاشْ وْصِيَّة أُخْرَى أَعْظِمْ مِنْ هَاذُومَا.»

³²وْقَالُّو الكَاتِبْ: «صْحِيحْ يَا مُعَلِّمْ! إِنْتِ قُلْتْ الحَقْ إِنُّو اللهْ وَاحِدْ وْمَا ثَمَّاشْ غِيرُو.

³³وْإِنُّو الوَاحِدْ يْحِبُّو بْقَلْبُو الكُلُّو وِبْعَقْلُو الكُلُّو وِبْقُوتُو الكُلْهَا وِيْحِبْ قْرِيبُو كِيفْ مَا يْحِبْ رُوحُو، هَاذَا رَاهُو أَعْظِمْ مِنْ القَرَابِينْ المَحْرُوقَة وِالذْبَايِحْ الكُلْهَا.»

³⁴وْوَقْتِلِّي يَسُوعْ شَافْ الِّي هُوَ جَاوِبْ بْحِكْمَة قَالُّو: «مَاكِشْ بْعِيدْ عْلَى مَمْلِكْةْ اللهْ!» وِمْبَاعِدْ حَتَّى وَاحِدْ مَا تْشَجَّعْ وْسِأْلُو عْلَى أَيْ حَاجَة.

³⁵وْقَالْ يَسُوعْ وَقْتِلِّي كَانْ يْعَلِّمْ فِي الهَيْكِلْ: «عْلاَشْ الكُتَّابْ مْتَاعْ اليْهُودْ يْقُولُوا الِّي المَسِيحْ هُوَ وِلْدْ دَاوُدْ؟

³⁶وْدَاوُدْ بِيدُو يْقُولْ بِالرُّوحْ القُدُسْ: قَالْ رَبِّي لْرَبّي: أُقْعُدْ عْلَى يْمِينِي حَتَّى لِينْ نْحُطْ أَعْدَاءِكْ تَحْتْ سَاقِيكْ.

³⁷إِذَا كَانْ دَاوُدْ يْنَادِيلُو رَبّْنَا إِمَّالاَ كِيفَاشْ يْكُونْ وِلْدُو؟» وِالبَرْشَة نَاسْ الِّي مُوجُودِينْ كَانُوا يِسْمْعُوا فِيهْ وْهُومَا فَرْحَانِينْ.

³⁸وْوَقْتِلِّي يَسُوعْ كَانْ يْعَلِّمْ فِيهُمْ قَالْ: «رُدُّوا بَالْكُمْ مِنْ الكُتَّابْ مْتَاعْ اليْهُودْ، هَاكَا الِّي يْحِبُّوا يْدُورُوا فِي جْبَايِبْ طْوَالْ وِيْحِبُّوا النَّاسْ تْسَلِّمْ عْلِيهُمْ فِي الأَسْوَاقْ.

³⁹وْكِيُدْخْلُوا لِلمَجَامِعْ وِلاَّ يِمْشِيوْ لِلسَّهْرِيَّاتْ يْحِبُّوا يُقْعْدُوا فِي البْقَايِعْ الأُولَى.

⁴⁰هَاكَا الِّي يْفُكّوا مِلْكْ الْهْجَاجِيلْ وْيِحْسْبُوا فِي رْوَاحْهُمْ يْطَوّْلُوا فِي الصَّلاَةْ هَاذُوكُمْ بَاشْ يِتْحَاسْبُوا أَكْثِرْ مِالنَّاسْ الأُخْرِينْ!»

⁴¹وْوَقْتِلِّي يَسُوعْ قْعَدْ مْقَابِلْ الصَّنْدُوقْ مْتَاعْ الهَيْكِلْ كَانْ يِتْفَرِّجْ فِي النَّاسْ كِيفَاشْ يْحُطُّوا فِي الفْلُوسْ فِي الصُّنْدُوقْ وْبَرْشَة نَاسْ غُنْيَا كَانُوا يَرْمِيوْ فِي بَرْشَة فْلُوسْ.

⁴²وِمْبَاعِدْ جَاتْ مْرَا فْقِيرَة رَاجِلْهَا مِيتْ وِرْمَاتْ فِلْسِينْ.

⁴³نَادَى يَسُوعْ تْلاَمِذْتُو وْقَالِلْهُمْ: «نْقُلْكُمْ الحَقْ المْرَا الفْقِيرَة هَاذِي الِّي رَاجِلْهَا مِيتْ حَطِّتْ أَكْثِرْ مِالنَّاسْ الأُخْرِينْ الكُلْهُمْ في الصَّنْدُوقْ.

⁴⁴الكُلْهُمْ عْطَاوْ مِالفَاضِلْ عْلِيهُمْ آمَا هِيَ رَغْمِلِّي مِحْتَاجَة حَطِّتْ كُلْ مَا عِنْدْهَا. حَطِّتْ الفْلُوسْ الِّي عَايْشَة بِيهَا الكُلْهَا.»