Read Tunisian Arabic New Testament مَرْقُسْ 13 Bible Online

مَرْقُسْ 13 - Tunisian Arabic New Testament bible

مَرْقُسْ 13

¹وْوَقْتِلِّي كَانْ يَسُوعْ خَارِجْ مِالهَيْكِلْ، قَالُّو وَاحِدْ مِنْ تْلاَمِذْتُو: «يَا مُعَلِّمْ، شُوفْ مَلاَّ حْجَرْ وْمَلاَّ بَنْيْ!»

²جَاوْبُو يَسُوعْ: «شُفْتْ البَنْيْ العْظِيمْ هَاذَا؟ حَتَّى حَجْرَة لِهْنَا مَا هِي بَاشْ تَبْقَى فُوقْ أُخْتْهَا، الكُلُّو بَاشْ يْطِيحْ.»

³وْوَقْتِلِّي كَانْ يَسُوعْ قَاعِدْ فِي جْبَلْ الزِّيتُونْ مْقَابِلْ الهَيْكِلْ سِأْلُوهْ بُطْرُسْ وْيَعْقُوبْ وْيُوحَنَّا وْأَنْدَرَاوُسْ عْلَى جْنَبْ

⁴«قُلْنَا وَقْتَاشْ الحَاجَاتْ هَاذِي بَاشْ تَاقَعْ وِشْنُوَّة الأَمَارَة الِّي تْوَرِّي الِّي هِيَ بَاشْ اتِّمْ.»

⁵وْقَالِلْهُمْ يَسُوعْ: «رُدُّوا بَالْكُمْ مَا تْخَلِّيوْشْ حَتَّى وَاحِدْ يْغَلِّطْكُمْ

⁶رَاهُمْ بَرْشَة نَاسْ بَاشْ يْجِيوْ بْإِسْمِي وِيْقُولُوا: "آنَا هُوَ المَسِيحْ!" وِيْغَلّْطُوا بَرْشَة نَاسْ

⁷آمَا وَقْتِلِّي تِسْمْعُوا بِحْرُوبْ قْرِيبَة وِحْرُوبْ فِي بْلاَيِصْ بْعِيدَة مَا تْخَافُوشْ. رَاهُو الشَّيْء هَاذَا يِلْزْمُو يَاقَعْ، آمَا مَا هِيشْ هَاذِيكَا النْهَايَة.

⁸شَعْبْ بَاشْ يْجِي ضِدْ شَعْبْ وْمَمْلْكَة ضِدْ مَمْلْكَة، وْبِشْ يَاقَعْ جُوعْ وِزْلاَزِلْ فِي بَرْشَة بْلاَيِصْ آمَا هَاذَا الكُلُّو مَاهُو إِلاَّ أَوِّلْ الوْجَايِعْ مْتَاعْ الوْلاَدَة.

⁹آمَا رُدُّوا بَالْكُمْ عْلَى رْوَاحْكُمْ. رَاهُمْ بَاشْ يْهِزُّوكُمْ لِلمَجْلِسْ مْتَاعْ اليْهُودْ وْبِشْ تِتْضَرْبُوا فِي المَجَامِعْ وْبِشْ تَاقْفُوا قُدَّامْ الحُكَّامْ وِالمُلُوكْ عْلَى خَاطْرِي بَاشْ تِشْهْدُولْهُمْ.

¹⁰وِقْبَلْ مَا تْجِي النْهَايَة لاَزِمْ الإِنْجِيلْ يُوصِلْ لِلشْعُوبْ الكُلْهَا.

¹¹وْوَقْتِلِّي يْهِزُّوكُمْ بَاشْ يْسَلْمُوكُمْ مَا تْخَمَمُوشْ مِنْ قْبَلْ فِي شْنُوَّة بَاشْ تْقُولُوا: آمَا قُولُوا الكْلاَمْ الِّي يِتْعْطَالْكُمْ فِي الوَقْتْ هَاذَاكَا عْلَى خَاطِرْ مَا كُمْشْ إِنْتُومَا الِّي بَاشْ تِتْكَلّْمُوا آمَا رَاهُو الرُّوحْ القُدُسْ هُوَ الِّي بَاشْ يِتْكَلِّمْ.

¹²وِالخُو بَاشْ يْسَلِّمْ خُوهْ لِلمُوتْ، وِالبُو وِلْدُو، وِيْدُورُوا الوْلاَدْ عْلَى وَالْدِيهُمْ وْيُقْتْلُوهُمْ.

¹³وْبِشْ تْكُونُوا مَكْرُوهِينْ عِنْدْ النَّاسْ الكُلْ عْلَى خَاطِرْ إِسْمِي. آمَا الِّي يِثْبِتْ لِلإِخْرْ رَاهُو بَاشْ يُخْلُصْ.»

¹⁴«وْوَقْتِلِّي تْشُوفُوا نْجَاسِةْ الخْرَابْ مُوجُودَة فِي البْلاَصَة الِّي مَا حَقّْهَاشْ تْكُونْ فِيهَا. (بَاشْ الِّي يَقْرَى يِفْهِمْ!) الوَقْتْ هَاذَاكَا الِّي فِي مَنْطِقْةْ اليَهُودِيَّة يِلْزِمْهُمْ يُهْرْبُوا لِلجْبَالْ.

¹⁵وِلِّي هُوَ فُوقْ السْطَحْ مَا يِلْزْمُوشْ لاَ يَهْبِطْ لْدَارُو وْلاَ يُدْخْلِلْهَا بَاشْ يَاخُذْ حَاجَة مِنْ وُسْطْهَا.

¹⁶وِلِّي يِخْدِمْ فِي السَّانْيَة مَا يِلْزْمُوشْ يَرْجَعْ لِلدَّارْ بَاشْ يْهِزْ الكَبُّوطْ مْتَاعُو.

¹⁷وْيَا وِيلْهُمْ النْسَاء الحْبَالَى وِلِّي يْرَضّْعُوا فِي الأَيَّامَاتْ هَاذُوكُمْ!

¹⁸يِلْزِمْكُمْ تْصَلِّيوْ بَاشْ الشَّيْء هَاذَاكَا مَا يَاقِعْشْ فِي الشْتَاء

¹⁹فِي الأَيَّامَاتْ هَاذُوكُمْ بَاشْ تَاقَعْ ضِيقَة مَا وُقْعِتْشْ كِيفْهَا مِنْ أَوِّلْ مَا خْلَقْ اللهْ الدِّنْيَا لْتَوَّا وْمَا هِيشْ بَاشْ تَاقَعْ بِالكُلْ.

²⁰وْإذَا كَانْ الرَّبْ مَا قَصِّرْشْ فِي النْهَارَاتْ هَاذُوكُمْ تَالِي رَاهُو مَا نْجَى حَتَّى بَشَرْ، آمَا هُوَ قَصِّرْهُمْ عْلَى خَاطِرْ النَّاسْ الِّي خْتَارْهُمْ.

²¹إِذَا قَالِلْكُمْ وَاحِدْ الوَقْتْ هَاذَاكَا: "هَاوْ المَسِيحْ هْنَا!" وِلاَّ "هَاوِّينُو الغَادِي"، مَا تْصَدّْقُوهِشْ!

²²رَاهُو بَاشْ يُظْهْرُوا بَرْشَة نَاسْ دَجَّالِينْ يِدَّعُوا الِّي هُومَا المَسِيحْ وْبَرْشَة أَنْبِيَاءْ كَذَّابِينْ وْبِشْ يَعْمْلُوا مُعْجْزَاتْ وِعْجَايِبْ بَاشْ كَانْ نَجّْمُوا يْغَلّْطُوا حَتَّى النَّاسْ الِّي خْتَارْهُمْ اللهْ.

²³رُدُّوا بَالْكُمْ. هَانِي خَبِّرْتْكُمْ بْكُلْ شَيْء قْبَلْ مَا يَاقَعْ.»

²⁴«آمَا رَاهُو فِي الأَيَّامَاتْ هَاذُوكُمْ بَعْدْ الضِّيقَة هَاذِيكَا الشَّمْسْ تْوَلِّي ظَلْمَة وْيِتْحْجِبْ ضَوْ القَمْرَة

²⁵النْجُومْ بَاشْ اطِّيحْ مِالسْمَاءْ وْتِتْزَلْزِلْ القُوَّاتْ الِّي فِي السْمَاءْ.

²⁶وِالوَقْتْ هَاذَاكَا بَاشْ تْشُوفُونِي آنَا إِبْنْ الإِنْسَانْ جَايْ فِي السْحَابْ بْقُوَّة عْظِيمَة وْمَجْدْ.

²⁷وِالوَقْتْ هَاذَاكَا بَاشْ نَبْعِثْ المْلاَيْكَة مْتَاعِي وْبِشْ نْلِمْ الِّي خْتَرْتْهُمْ مِالجِهَاتْ الأَرْبْعَة مِنْ إِخْرْ الدِّنْيَا لْإِخْرْ السْمَاءْ.»

²⁸«خُوذُوا العِبْرَة مِالكَرْمَة: دُوبْ مَا عِيدَانْهَا تِخْضَارْ وْتَعْمِلْ الوْرَقْ، تَعْرْفُوا الِّي الصِّيفْ قْرُبْ.

²⁹إِمَّالاَ إِنْتُومَا زَادَا كِتْشُوفُوا الحَاجَاتْ هَاذِي قَاعْدَة تَاقَعْ. أَعْرْفُوا الِّي آنَا قْرِيبْ وِلِّي آنَا عْلَى الأَبْوَابْ.

³⁰نْقُلْكُمْ الحَقْ: الجِيلْ هَاذَا مُوشْ بَاشْ يُوفَى حَتَّى لِينْ تَاقَعْ الحَاجَاتْ هَاذِي الكُلْهَا.

³¹السْمَاءْ وِالأَرْضْ بَاشْ يَفْنَاوْ آمَا كْلاَمِي عُمْرُو مَا يِفْنَى.»

³²«وِاليُومْ هَاذَاكَا وِالسَّاعَة هَاذِيكَا حَتَّى حَدْ مَا يَعْرِفْهُمْ، لاَ المْلاَيْكَة الِّي فِي السْمَاءْ وْلاَ الإِبْنْ، آمَا كَانْ الآبْ وَحْدُو يَعْرِفْهُمْ.

³³رُدُّوا بَالْكُمْ وْفِيقُوا عْلَى خَاطِرْكُمْ مَا تَعْرْفُوشْ وَقْتَاشْ يْجِي الوَقْتْ.

³⁴كِيفْ إِنْسَانْ سَافِرْ وْخَلَّى دَارُو وِعْطَى الحُكْمْ لِلخُدَّامْ مْتَاعُو وْوَرَّى لْكُلْ وَاحِدْ فِيهُمْ شْنُوَّة بَاشْ يِخْدِمْ وْوَصَّى العَسَّاسْ الِّي فِي البَابْ بَاشْ يْرُدْ بَالُو.»

³⁵«فِيقُوا، رَاكُمْ مَا تَعْرْفُوشْ وَقْتَاشْ مُولَى الدَّارْ يْجِي، يَامَا فِي العْشِيَّة امَّخَّرْ وِلاَّ فِي نُصْفْ اللِّيلْ وِلاَّ وَقْتِلِّي يْصِيحْ السَّرْدُوكْ وِلاَّ فِي الصْبَاحْ.

³⁶خِيرْ مَا يْجِي صُدْفَة وْيَلْقَاكُمْ رَاقْدِينْ.

³⁷الشَّيْء الِّي نْقُولْهُولْكُمْ إِنْتُومَا نْقُولُو لِلنَّاسْ الكُلْ: رُدُّوا بَالْكُمْ!»