Read Tunisian Arabic New Testament مَرْقُسْ 14 Bible Online

مَرْقُسْ 14 - Tunisian Arabic New Testament bible

مَرْقُسْ 14

¹قْبَلْ عِيدْ الفِصْحْ وْعِيدْ الفْطِيرْ بْيُومِينْ، رُؤَسَاءْ الكُهَّانْ وِالكُتَّابْ مْتَاعْ اليْهُودْ كَانُوا يِتْحَيّْلُوا بَاشْ يْشِدُّوا يَسُوعْ وْيُقْتْلُوهْ.

²آمَا كَانُوا يْقُولُوا: «الشَّيْء هَاذَا مَا يِلْزْمُوشْ يَاقَعْ فِي العِيدْ، بَاشْ مَا تَاقَعْشْ مَشَاكِلْ فِي وُسْطْ الشَّعْبْ!»

³وَقْتِلِّي كَانْ يَسُوعْ قَاعِدْ عْلَى المِيدَة فِي دَارْ سِمْعَانْ الأَبْرِصْ الِّي فِي بِيتْ عَنْيَا جَاتْ مْرَا هَازَّة دَبُّوزَة مْتَاعْ عِطْرْ النَّارْدِينْ الصَّافِي وِالغَالِي وْكَسّْرِتْهَا وْصَبِّتْ العِطْرْ عْلَى رَاسُو.

⁴وْثَمَّة نَاسْ مِالحَاضْرِينْ تْغَشَشُوا وْقَالُوا: «عْلاَشْ التَّبْذِيرْ هَاذَا الكُلُّو مْتَاعْ العِطْرْ؟

⁵رَاهُو كَانْ مُمْكِنْ يِتْبَاعْ بْأَكْثِرْ مِنْ ثْلاَثَة مْيَاتْ دِينَارْ وِالفْلُوسْ تِتْعْطَى لِلفُقَرَاءْ.» وِبْدَاوْا يْلُومُوا فِي المْرَا

⁶آمَا يَسُوعْ قَالْ: «أَخْطُوهَا! عْلاَشْ تْقَلّْقُوا فِيهَا؟ رَاهِي عَمْلِتْ مْعَايَا حَاجَة بَاهْيَة.

⁷الفُقَرَاءْ دِيمَا مْعَاكُمْ وِتْنَجّْمُوا تَعْمْلُوا مْعَاهُمْ الخِيرْ وَقْتِلِّي تْحِبُّوا آمَا آنَا مَانِيشْ بَاشْ نْكُونْ مْعَاكُمْ دِيمَا.

⁸هِيَ عَمْلِتْ الِّي تِقْدِرْ عْلِيهْ وْغَسّْلِتْ بَدْنِي بِالمْسَبِّقْ وْحَضّْرِتُّو لِلدْفِينَة.

⁹نْقُلْكُمْ الحَقْ: وِينْ يِتْبَشِّرْ بِالإِنْجِيلْ فِي الدِّنْيَا الكُلْهَا، بَاشْ يِتْحْكَى عَلِّي عِمْلاَتُو المْرَا هَاذِي، بَاشْ النَّاسْ دِيمَا يِذَّكْرُوهَا!»

¹⁰وْيَهُوذَا الإِسْخَرْيُوطِي الِّي هُوَ وَاحِدْ مِالأَثْنَاشْ مْشَى لْرُؤَسَاءْ الكُهَّانْ بَاشْ يْخُونْ يَسُوعْ.

¹¹وْوَقْتِلِّي سَمْعُوهْ فَرْحُوا وْوَعْدُوهْ بَاشْ يَعْطِيوْهْ فْلُوسْ وْكَانْ يِسْتَنَّى حَتَّى لِينْ تْجِي فُرْصَة بَاهْيَة بَاشْ يْخُونُو.

¹²وْفِي النْهَارْ الأُوِّلْ مْتَاعْ عِيدْ الفْطِيرْ الِّي كَانُوا يِذْبْحُوا فِيهْ عَلُّوشْ الفِصْحْ قَالُوا التْلاَمْذَة لْيَسُوعْ: «وِينْ تْحِبّْنَا نِمْشِيوْا وِنْحَضّْرُولِكْ عْشَاء الفِصْحْ بَاشْ تَاكْلُو؟»

¹³وِبْعَثْ يَسُوعْ زُوزْ مِنْ تْلاَمِذْتُو وْقَالِلْهُمْ: «إِمْشِيوْ لِلمْدِينَة وْتَوْ تَلْقَاوْ رَاجِلْ هَازْ قُلَّة مْتَاعْ مَاء تَبّْعُوهْ.

¹⁴وِالدَّارْ الِّي يُدْخْلِلْهَا قُولُوا لْمُولاَهَا: "المُعَلِّمْ يْقُولْ: وِينِي بِيتْ الضْيُوفْ الِّي بَاشْ نَاكُلْ فِيهَا عْشَاء الفِصْحْ مْعَ تْلاَمِذْتِي؟"

¹⁵وْهُوَ بَاشْ يْوَرِّيكُمْ بِيتْ كْبِيرَة فِي الطَّاقْ الفُوقَانِي فِيهَا دْبَشْ وْحَاضْرَة، فِي البِيتْ هَاذِيكَا حَضّْرُولْنَا عْشَاء عِيدْ الفِصْحْ!»

¹⁶وِمْبَاعِدْ خَرْجُوا التْلاَمْذَة وْدَخْلُوا لِلمْدِينَة وِلْقُوا كُلْ شَيْء كِيفْ مَا قَالِلْهُمْ عْلِيهْ وْحَضّْرُوا عْشَاء الفِصْحْ.

¹⁷وْفِي العْشِيَّة جَا يَسُوعْ هُوَ وِالأَثْنَاشِنْ تِلْمِيذْ.

¹⁸وَقْتِلِّي كَانُوا قَاعْدِينْ يَاكْلُوا، قَالْ يَسُوعْ: «نْقُلْكُمْ الحَقْ: وَاحِدْ مِنْكُمْ بَاشْ يْخُونِّي وْهُوَ تَوَّا يَاكُلْ مْعَايَ.»

¹⁹وِبْدَاوْا التْلاَمْذَة يِحْزْنُوا وِيْقُولُوا بِالوَاحِدْ بِالوَاحِدْ: «يَاخِي آنَا هُوَ؟»

²⁰وْقَالِلْهُمْ: «هُوَ وَاحِدْ مِالأَثْنَاشْ قَاعِدْ يَاكُلْ مْعَايَ تَوَّا فِي الصْحَنْ.

²¹رَانِي آنَا إِبْنْ الإِنْسَانْ لاَزِمْنِي نْمُوتْ كِيفْ مَا تِكْتِبْ عْلِيَّ فِي الكْتَابْ المُقَدَّسْ وْيَا وِيلُو الرَّاجِلْ الِّي بَاشْ يْخُونِّي! الرَّاجِلْ هَاذَاكَا خِيرْلُو لُوكَانْ مَا تُولِدْشْ.»

²²وْوَقْتِلِّي كَانُوا يَاكْلُوا خْذَا يَسُوعْ خُبْزَة وْبَارِكْ وِقْسِمْ وِعْطَى لِتْلاَمِذْتُو وْقَالْ: «خُوذُوا، هَاذَا بَدْنِي.»

²³وِخْذَا كَاسْ وْكِشْكَرْ عْطَاهُمْ شَرْبُوا الكُلْهُمْ.

²⁴وْقَالِلْهُمْ: «هَاذَا هُوَ دَمِّي، دَمْ العَهْدْ الْجْدِيدْ الِّي جْرَى عْلَى خَاطِرْ بَرْشَة نَاسْ.

²⁵نْقُولِلْكُمْ الحَقْ: مِنْ تَوْ مَا عَادِشْ بَاشْ نُشْرُبْ مِنْ العَصِيرْ مْتَاعْ العْنِبْ حَتَّى لِينْ يْجِي النْهَارْ هَاذَاكَا الِّي نُشْرْبُو فِيهْ جْدِيدْ فِي مَمْلِكْةْ اللهْ.»

²⁶وِمْبَاعِدْ سَبّْحُوا رَبِّي بِالغْنَاء وِمْشَاوْ لِجْبَلْ الزِّيتُونْ.

²⁷وْقَالِلْهُمْ يَسُوعْ: «الكُلْكُمْ بَاشْ تِمْشِيوْ وِتْخَلُّونِي، رَاهُو مَكْتُوبْ فِي الكْتَابْ المُقَدَّسْ: بَاشْ نَضْرِبْ السَّارِحْ تِتْفَرِّقْ الغْنَمْ.

²⁸آمَا بَعْدْ مَا نْقُومْ مِالمُوتْ رَانِي بَاشْ نِسْبِقْكُمْ لِلجَلِيلْ.»

²⁹يَاخِي قَالُّو بُطْرُسْ: «حَتَّى لُوكَانْ خَلاَّوْكْ الكُلْهُمْ، آنَا عُمْرِي مَا نْخَلِّيكْ.»

³⁰وْقَالُّو يَسُوعْ: «نْقُلِّكْ الحَقْ، اليُومْ، فِي اللِّيلَة هَاذِي، قْبَلْ مَا يْصِيحْ السَّرْدُوكْ مَرّْتِينْ، تْكُونْ نْكَرْتْ فِيَّ ثْلاَثَة مَرَّاتْ.»

³¹آمَا بُطْرُسْ شَدْ صْحِيحْ وْقَالْ: «مَا نِيشْ بَاشْ نُنْكْرِكْ بِالكُلْ حَتَّى كَانْ لْزِمْ بَاشْ نْمُوتْ مْعَاكْ!» وِالكْلاَمْ هَاذَا بِيدُو قَالُوهُولُو التْلاَمْذَة الكُلْهُمْ.

³²وِمْشَاوْ لِبْلاَصَة إِسْمْهَا جَثْسَيْمَانِي، وْقَالْ يَسُوعْ لِتْلاَمِذْتُو: «أُقْعْدُوا لِهْنَا خَلِّينِي آنَا نِمْشِي نْصَلِّي.»

³³وْهَزْ مْعَاهْ بُطْرُسْ وْيَعْقُوبْ وْيُوحَنَّا وِبْدَا يْحِسْ بِالقْلَقْ وِالحُزْنْ.

³⁴وْقَالِلْهُمْ: «نْحِسْ الِّي رُوحِي حْزِينَة بَرْشَة لْحَدْ المُوتْ. اسْتَنُّوا هْنَا وَابْقَاوْ فَايْقِينْ.»

³⁵وِبْعِدْ عْلِيهُمْ شْوَيَّة وِهْبَطْ عْلَى رْكَايْبُو عْلَى الأَرْضْ وِبْدَا يْصَلِّي بَاشْ إِذَا كَانْ مُمْكِنْ السَّاعَة هَاذِيكَا مَا تِتْعَدَّاشْ عْلِيهْ.

³⁶وْقَالْ: «يَا بَابَا! يَا بُونَا! إِنْتِ قَادِرْ عْلَى كُلْ شَيْء، بَعِّدْ عْلِيَّ الكَاسْ هَاذَا، آمَا خَلِّي تْكُونْ مَشِيئْتِكْ إِنْتِ، مُوشْ مَشِيئْتِي آنَا.»

³⁷وِمْبَاعِدْ جَا وِلْقَاهُمْ رَاقْدِينْ وْقَالْ لْبُطْرُسْ: «يَاخِي إِنْتِ رَاقِدْ يَا سِمْعَانْ؟ مَا تْنَجِّمْشْ تَسْهِرْ حَتَّى سَاعَة وَحْدَة؟

³⁸أَسْهْرُوا وْصَلِّيوْ بَاشْ مَا تَاقْعُوشْ فِي تَجْرْبَة. رَاهِي الرُّوحْ تْحِبْ تَبْقَى فَايْقَة آمَا البْدَنْ رَاهُو ضْعِيفْ.»

³⁹وِمْشَى مَرَّة أُخْرَى وْصَلَّى وْقَالْ الكْلاَمْ هُوَ بِيدُو.

⁴⁰وِرْجَعْ مَرَّة أُخْرَى وِلْقَاهُمْ رَاقْدِينْ عْلَى خَاطِرْهُمْ مَا نَجّْمُوشْ يْهِزُّوا رُوسْهُمْ مِالنُّومْ وْمَا لْقَاوْشْ آشْ يْجَاوْبُوهْ.

⁴¹وْجَا المَرَّة الثَّالْثَة وْقَالِلْهُمْ: «يَاخِي مَازِلْتُوا لْتَوْ رَاقْدِينْ وْمِرْتَاحِينْ؟ يِكْفِي! رَاهِي السَّاعَة جَاتْ. تَوَّا آنَا إِبْنْ الإِنْسَانْ بَاشْ يْسَلّْمُونِي لِيْدِينْ المِذْنْبِينْ.

⁴²قُومُوا، هَيَّا نِمْشِيوْا! هَاوْ جَا الِّي بَاشْ يْخُونِّي!»

⁴³وْبِالوَقْتْ وَقْتِلِّي هُوَ يِتْكَلِّمْ جَا يَهُوذَا الِّي هُوَ وَاحِدْ مِالأَثْنَاشْ وِمْعَاهْ بَرْشَة نَاسْ هَازِّينْ سْيُوفَا وِعْصِي بَعْثُوهُمْ رُؤَسَاءْ الكُهَّانْ وِالكُتَّابْ مْتَاعْ اليْهُودْ وِالشْيُوخْ.

⁴⁴وِلِّي بَاشْ يْخُونُو عْطَاهُمْ أَمَارَة وْقَالْ: «الِّي بَاشْ نْبُوسُو هَاذَاكَا هُوَ. شِدُّوهْ وْهِزُّوهْ وْعِسُّوا عْلِيهْ بِالقْدَا.»

⁴⁵وْمِلِّي وْصُلْ مْشَالُو طُولْ وْقَالْ: «يَا مُعَلِّمْ!» وْبَاسُو.

⁴⁶وِالنَّاسْ شَدُّوهْ

⁴⁷آمَا وَاحِدْ مِالوَاقْفِينْ جْبِدْ سِيفْ وِضْرَبْ العَبْدْ مْتَاعْ كْبِيرْ الكُهَّانْ قَصّْلُو وِذْنُو.

⁴⁸وْقَلْهُمْ يَسُوعْ: «يَاخِي رَدِّيتُونِي مُجْرِمْ جَايِينِّي بِالسْيُوفَا وِالعْصِي؟

⁴⁹كُلْ يُومْ كُنْتْ مَا بِينَاتْكُمْ نْعَلِّمْ فِي الهَيْكِلْ وْمَا شَدِّيتُونِيشْ آمَا الشَّيْء هَاذَا الكُلُّو وْقَعْ بَاشْ يْتِمْ الِّي تْقَالْ فِي الكْتَابْ المُقَدَّسْ»

⁵⁰الوَقْتْ هَاذَاكَا التْلاَمْذَة خَلاَّوْهْ وْهَرْبُوا.

⁵¹وْثَمَّة وْلَدْ كَانْ يْتَبَّعْ فِيهْ وْكَانْ لاَبِسْ قَطْعَة دْبَشْ وَحْدَة عْلَى اللْحَمْ، يَاخِي شَدُّوهْ

⁵²وَلَّى خَلاَّهَالْهُمْ وِهْرَبْ عِرْيَانْ.

⁵³وْهَزُّوا يَسُوعْ لِكْبِيرْ الكُهَّانْ. وِينْ تْلَمُّوا رُؤَسَاءْ الكُهَّانْ الكُلْهُمْ وِالشْيُوخْ وِالكُتَّابْ مْتَاعْ اليْهُودْ.

⁵⁴وْبُطْرُسْ كَانْ يْتَبَّعْ فِيهْ حَتَّى لِينْ وْصُلْ لِلوُسْطِيَّة مْتَاعْ دَارْ كْبِيرْ الكُهَّانْ وْكَانْ قَاعِدْ مْعَ الحُرَّاسْ مْتَاعْ الهَيْكِلْ يِدَّفَّي عْلَى النَّارْ.

⁵⁵وْرُؤَسَاءْ الكُهَّانْ وِلِّي فِي المَجْلِسْ مْتَاعْ اليْهُودْ الكُلْهُمْ يْلَوّْجُوا عْلَى شْكُونْ يِشْهِدْ عْلَى يَسُوعْ بَاشْ يُقْتْلُوهْ يَاخِي مَا لْقَاوْشْ

⁵⁶وْبَرْشَة نَاسْ قَدّْمُوا وْشِهْدُوا بِالبَاطِلْ آمَا شْهَادِتْهُمْ جَاتْ عَكْسْ بْعَضْهَا.

⁵⁷وِمْبَاعِدْ ثَمَّة شْكُونْ وُقْفُوا وْشِهْدُوا عْلِيهْ بِالكِذْبْ وْقَالُوا:

⁵⁸«سْمَعْنَاهْ يْقُولْ: "بَاشْ نْطَيِّحْ الهَيْكِلْ هَاذَا الِّي صَنْعِتُّو يْدِينْ البَشَرْ، وْبَعْدْ ثْلاَثَة أَيَّامْ بَاشْ نِبْنِي هَيْكِلْ آخَرْ مُوشْ مَصْنُوعْ بِالِيْدِينْ."»

⁵⁹آمَا زَادُوا تْخَالْفُوا فِي الشّْهَادَة هَاذِي زَادَا.

⁶⁰وِوْقُفْ كْبِيرْ الكُهَّانْ فِي الوُسْطْ وِسْإِلْ يَسُوعْ وْقَالْ: «يَاخِي مَا عِنْدِكْ مَا تْجَاوِبْ؟ يَاخِي مَا كِشْ تِسْمَعْ فِي الرْجَالْ هَاذُومَا كِيفَاشْ يِشْهْدُوا عْلِيكْ؟»

⁶¹آمَا يَسُوعْ بْقَى سَاكِتْ وْمَا جاوِبْشْ بْحَتَّى شَيْء وْعَاوِدْ كْبِيرْ الكُهَّانْ سِأْلُو وْقَالُّو: «يَاخِي إِنْتِ المَسِيحْ، إِبْنْ اللهْ المُبَارَكْ؟»

⁶²قَالْ يَسُوعْ: «آنَا هُوَ. وْبِشْ تْشُوفُونِي آنَا إِبْنْ الإِنْسَانْ قَاعِدْ عْلَى يْمِينْ قُدْرِةْ اللهْ وْجَايْ فِي سْحُبْ السْمَاءْ!»

⁶³قَطِّعْ كْبِيرْ الكُهَّانْ دَبْشُو وْقَالْ: «يَاخِي مَازِلْنَا مِحْتَاجِينْ لِشْهُودْ؟

⁶⁴هَاكُمْ سْمَعْتُوهْ كِيفَاشْ كْفَرْ. شْنُوَّة رَايْكُمْ؟» الكُلْهُمْ حُكْمُوا عْلِيهْ الِّي هُوَ يِسْتْحَقْ بَاشْ يْمُوتْ.

⁶⁵وْثَمَّة نَاسْ بْدَاوْا يِبْزْقُوا عْلِيهْ، وْغَمّْضُولُو عِينِيهْ وْيَضْرْبُوا فِيهْ عْلَى وِجْهُو وِيْقُولُولُو: «كَانِكْ نَبِي طَلِّعْ شْكُونْ ضَرْبِكْ!» وِبْدَاوْا الحُرَّاسْ مْتَاعْ الهَيْكِلْ يَضْرْبُوا فِيهْ بِالكَفْ.

⁶⁶وْوَقْتِلِّي بُطْرُسْ كَانْ لُوطَة فِي الوُسْطِيَّة مْتَاعْ الدَّارْ جَاتْ خْدِيمَة مْتَاعْ كْبِيرْ الكُهّان

⁶⁷وْوَقْتِلِّي شَافِتْ بُطْرُسْ يِدَّفَّى ثَبّْتِتْ فِيهْ وْقَالِتْ: «إِنْتِ زَادَا كُنْتْ مْعَ يَسُوعْ النَّاصْرِي!»

⁶⁸آمَا هُوَ نْكَرْ وْقَالْ: «مَا نَعْرِفْشْ وْمَا نِفْهِمْشْ آشْ قَاعْدَة تْقُولْ!» وِمْشَى البَرَّا وِقْعَدْ وِينْ البَابْ وْبِالوَقْتْ صَاحْ السَّرْدُوكْ.

⁶⁹وْوَقْتِلِّي شَافَاتُو الخْدِيمَة قَالِتْ مَرَّة أُخْرَى لِلنَّاسْ الِّي وَاقْفِينْ الغَادِي: «هَاذَا رَاهُو وَاحِدْ مِنْهُمْ!»

⁷⁰آمَا هُوَ زَادْ نْكَرْ مَرَّة أُخْرَى وِمْبَاعِدْ شْوَيَّة الوَاقْفِينْ الغَادِي قَالُوا مَرَّة أُخْرَى لْبُطْرُسْ: «بِالحَقْ إِنْتِ وَاحِدْ مِنْهُمْ عْلَى خَاطْرِكْ مِنْ مَنْطِقْةْ الجَلِيلْ.»

⁷¹آمَا هُوَ بْدَا يَلْعِنْ وْيِحْلِفْ: «رَانِي مَا نَعْرْفُوشْ الرَّاجِلْ الِّي تَحْكِيوْ عْلِيهْ هَاذَا.»

⁷²وْفِي الوَقْتْ هَاذَاكَا صَاحْ السَّرْدُوكْ مَرَّة ثَانْيَة وِتْذَكِّرْ بُطْرُسْ كِلْمِةْ يَسُوعْ كِقَلُّو: «قْبَلْ مَا يْصِيحْ السَّرْدُوكْ مَرّْتِينْ تْكُونْ إِنْتِ نْكَرْتْنِي ثْلاَثَة مَرَّاتْ.» وْوَقْتِلِّي فْهِمْ الكْلاَمْ هَاذَا بْكَى.