Read Tunisian Arabic New Testament مَرْقُسْ 15 Bible Online

مَرْقُسْ 15 - Tunisian Arabic New Testament bible

مَرْقُسْ 15

¹وْفِي الصْبَاحْ بِكْرِي تْشَاوْرُوا رُؤَسَاءْ الكُهَّانْ مْعَ الشْيُوخْ وِالكُتَّابْ مْتَاعْ اليْهُودْ وِالمَجْلِسْ مْتَاعْ اليْهُودْ. وْكَتّْفُوا يَسُوعْ وْهَزُّوهْ وْسَلْمُوهْ لْبِيلاَطُسْ.

²وْسِأْلُو بِيلاَطُسْ: «يَاخِي إِنْتِ مَلِكْ اليْهُودْ؟» جَاوْبُو يَسُوعْ: «إِنْتِ قُلْتْ.»

³وْرُؤَسَاءْ الكُهَّانْ كَانُوا يِتْهْمُوا فِيهْ ابَّرْشَة تُهَمْ.

⁴وْعَاوِدْ سِأْلُو بِيلاَطُسْ مَرَّة أُخْرَى وْقَالْ: «يَاخِي مَاكِشْ بَاشْ تْجَاوِبْ بْحَتَّى شَيْء؟ شُوفْ رَاهُمْ قَاعْدِينْ يِتْهْمُوا فِيكْ ابَّرْشَة تُهَمْ.»

⁵آمَا يَسُوعْ مَا جَاوِبْ بْحَتَّى شَيْء حَتَّى لِينْ بِيلاَطُسْ بْقَى مِسْتَغْرِبْ.

⁶وْفِي كُلْ عِيدْ كَانْ بِيلاَطُسْ يْسَيِّبْ لِليْهُودْ وَاحِدْ مِالمْرَابِيطْ الِّي يْحِبُّوا عْلِيهْ.

⁷وْكَانْ ثَمَّة فِي الحَبْسْ وَاحِدْ إِسْمُو بَارَابَاسْ مَرْبُوطْ مْعَ جْمَاعَة ثُوَّارْ قَتْلُوا نَاسْ وَقْتِلِّي كَانِتْ ثَمَّة خُوضَة فِي البْلاَدْ.

⁸وْطَلْعُوا النَّاسْ وِبْدَاوْا يُطْلْبُوا مِنْ بِيلاَطُسْ بَاشْ يَعْمِلْ الشَّيْء الِّي مِتْعَوِّدْ يَعْمْلُو فِي العِيدْ.

⁹آمَا بِيلاَطُسْ سْإِلْهُمْ: «يَاخِي تْحِبُّونِي نْسَيّْبِلْكُمْ مَلِكْ اليْهُودْ؟»

¹⁰وْهُوَ كَانْ يَعْرِفْ الِّي رُؤَسَاءْ الكُهَّانْ سَلْمُوهُولُو بِسْبَبْ الغِيرَة.

¹¹آمَا رُؤَسَاءْ الكُهَّانْ حَرّْشُوا الشَّعْبْ بَاشْ يْصِيحُوا وْيُطْلْبُوا مِنُّو إِنُّو يْسَيّْبِلْهُمْ بَارَابَاسْ فِي عُوضُو.

¹²قَالِلْهُمْ بِيلاَطُسْ مَرَّة أُخْرَى: «إِمَّالاَ آشْ تْحِبُّونِي نَعْمِلْ لِلِّي تْسَمِّيوْ فِيهْ مَلِكْ اليْهُودْ.»

¹³وْمَرَّة أُخْرَى بْدَاوْا يْصِيحُوا: «اُصْلْبُو!»

¹⁴وِسْإِلْهُمْ بِيلاَطُسْ: «شْنُوَّة الشَّرْ الِّي عَمْلُو؟» آمَا هُومَا وَلُّوا يْصِيحُوا أَكْثِرْ: «اُصْلْبُو!»

¹⁵وْكِحَبْ بِيلاَطُسْ يْرَضِّي الشَّعْبْ وَلَّى سَيّْبِلْهُمْ بَارَابَاسْ وْسَلّْمِلْهُمْ يَسُوعْ بَاشْ يِتْصْلَبْ بَعْدْ مَا ضَرْبُو بِالسُّوطْ.

¹⁶وْهَزُّوهْ الجُنُودْ لْدَاخِلْ لِلسَّاحَة مْتَاعْ القْصَرْ وْلَمُّوا فِرْقِةْ العَسْكِرْ الكُلْهَا

¹⁷وْلَبّْسُوهْ لِبْسَة حَمْرَا وْعَمْلُوا تَاجْ مِالشُّوكْ وْحَطُّوهْ فُوقْ رَاسُو

¹⁸وِبْدَاوْا يْسَلْمُوا عْلِيهْ وِيْقُولُوا: «يَحْيَى مَلِكْ اليْهُودْ!»

¹⁹وْكَانُوا يَضْرْبُوا فِيهْ عْلَى رَاسُو بْقَصْبَة وْيِبْصْقُوا عْلِيهْ وْيَهْبْطُوا عْلَى رْكَايِبْهُمْ وْيُسْجْدُوا قُدَّامُو.

²⁰وْبَعْدْ مَا تْمَسْخْرُوا عْلِيهْ نَحَّاوْلُو اللِّبْسَة الحَمْرَا وْلَبّْسُوهْ دَبْشُو وْهَزُّوهْ البَرَّة بَاشْ يُصْلْبُوهْ.

²¹وْثَمَّة وَاحِدْ مِتْعَدِّي مَازَالْ كِجَا مِالرِّيفْ وْإِسْمُو سِمْعَانْ مِنْ مَنْطِقْةْ قِيرِينَة وْهُوَ بُو اسْكَنْدَرْ وْرُوفُسْ يَاخِي لَزّْمُوا عْلِيهْ بَاشْ يْهِزْ الصَّلِيبْ مْتَاعْ يَسُوعْ.

²²وْجَابُوهْ لْبُقْعَة تِتْسَمَّى الجُلْجْثَة وِلِّي مَعْنَاهَا بُقْعِةْ الجُمْجْمَة.

²³وِعْطَاوْهْ شْرَابْ مْخَلِّطْ بْحَاجَة يْسَمِّيوْهَا المُرْ آمَا هُوَ مَا شْرَبْهَاشْ.

²⁴وْصَلْبُوهْ وْعَمْلُوا قُرْعَة عْلَى لِبْسْتُو شْكُونْ بَاشْ يَاخُذْهَا وْقَسْمُوهَا.

²⁵وْكَانْ وَقْتْهَا التِّسْعَة مْتَاعْ الصْبَاحْ كِصَلْبُوهْ.

²⁶وِالتُّهْمَة الِّي تَاهْمِينُو بِيهَا كَانِتْ مَكْتُوبَة عْلَى لُوحَة فُوقْ رَاسُو: «مَلِكْ اليْهُودْ.»

²⁷وْصَلْبُوا مْعَاهْ زُوزْ مْجَرّْمَة، وَاحِدْ عْلَى يْمِينُو وْوَاحِدْ عْلَى يْسَارُو.

²⁸[وْهَكَّا تَمْ الِّي تْقَالْ فِي الكْتَابْ المُقَدَّسْ: «وْحِسْبُوهْ مْعَ المُجْرْمِينْ.»]

²⁹وِالنَّاسْ الِّي يِتْعَدِّيوْ مِنْ غَادِي كَانُوا يْسِبُّوا فِيهْ وِيْدَوّْحُوا عْلِيهْ فِي رُوسْهُمْ وِيْقُولُوا: «هَهْ! يَلِّي بَاشْ اطَّيَّحْ الهَيْكِلْ وْتِبْنِيهْ فِي ثْلاَثَة أَيَّامْ.

³⁰خَلِّصْ رُوحِكْ وْأَهْبِطْ مِنْ فُوقْ الصَّلِيبْ!»

³¹وْنَفْسْ الشَّيْء زَادَا رُؤَسَاءْ الكُهَّانْ وِالكُتَّابْ مْتَاعْ اليْهُودْ كَانُوا يِتْمَسْخْرُوا عْلِيهْ وِيْقُولُوا لِبْعَضْهُمْ: «خَلِّصْ النَّاسْ الأُخْرِينْ آمَا مَا يْنَجِّمْشْ يْخَلِّصْ رُوحُو.

³²تْرَى خَلَّى المَسِيحْ مَلِكْ إِسْرَائِيلْ تَوَّا يَهْبِطْ مِنْ فُوقْ الصَّلِيبْ، بَاشْ نْشُوفُوا وْنِمّْنُوا.» وِالزُّوزْ مْجَرّْمَة الِّي مَصْلُوبِينْ مْعَاهْ هُومَا زَادَا كَانُوا يْعَايْرُوا فِيهْ.

³³وِمْعَ نُصْفْ نْهَارْ ظْلاَمِتْ الدِّنْيَا الكُلْهَا حَتَّى لِلثْلاَثَة مْتَاعْ العْشِيَّة.

³⁴وْفِي مَاضِى ثْلاَثَة صَاحْ يَسُوعْ بْصُوتْ عَالِي: «ألُّوِي! ألُّوِي! لَمَا شَبَقْتَنِي؟» وْمَعْنِتْهَا «يَا رَبِّي! يَا رَبِّي! عْلاَشْ خَلِّيتْنِي؟»

³⁵وْثَمَّة شْكُونْ مِالوَاقْفِينْ الغَادِي سَمْعُوهْ وْقَالُوا: «شُوفُوا، هَاوْ يْنَادِي عْلَى إِيلِيَّا!»

³⁶وْثَمَّة وَاحِدْ جْرَى وْحَطْ شِفُونَة فِي الخَلْ وِرْبَطْهَا فِي قَصْبَة وْمَدّْهَالُو بَاشْ يُشْرُبْ وْقَالْ: «خَلِّينَا نْشُوفُوا إِذَا كَانْ إِيلِيَّا بَاشْ يْجِي وِيْهَبّْطُو.»

³⁷وْصَاحْ يَسُوعْ بْصُوتْ عَالِي وْطَلْعِتْ رُوحُو.

³⁸وْتِقْسِمْ الحْجَابْ مْتَاعْ الهَيْكِلْ عْلَى ثْنِينْ مِالفُوقْ الُّوطَا.

³⁹وِالقَايِدْ مْتَاعْ المْيَاةْ عَسْكْرِي الِّي كَانْ وَاقِفْ مْقَابْلُو وَقْتِلِّي شَافْ يَسُوعْ كِيفَاشْ مَاتْ قَالْ: «بِالحَقْ الإِنْسَانْ هَاذَا كَانْ إِبْنْ اللهْ!»

⁴⁰وْكَانُوا ثَمَّة نْسَاء يِتْفَرّْجُوا مِنْ بْعِيدْ آشْ قَاعِدْ يَاقَعْ وْمِنْهُمْ مَرْيَمْ المَجْدَلِيَّة وْمَرْيِمْ أُمْ يَعْقُوبْ الصْغِيرْ وْيُوسِى، وْسَالُومَة.

⁴¹وِالنْسَاء هَاذُومَا كَانُوا يْتَبّْعُوا فِيهْ وْيِخْدْمُوا فِيهْ وَقْتِلِّي كَانْ فِي الجَلِيلْ، وْبَرْشَة نْسَاء أُخْرِينْ طَلْعُوا مْعَاهْ لْأُورْشَلِيمْ.

⁴²وْكِجَاتْ العْشِيَّة، وِاليُومْ هُوَ يُومْ التَّحْضِيرْ، الِّي هُوَ قْبَلْ نْهَارْ السِّبْتْ.

⁴³جَا يُوسُفْ الِّي مِنْ مْدِينِةْ الرَّامَة، وْهُوَ رَاجِلْ مَعْرُوفْ وْعُضْوْ فِي المَجْلِسْ مْتَاعْ اليْهُودْ، وْهُوَ بِيدُو كَانْ يِسْتَنَّي فِي مَمْلِكْةْ اللهْ، تْشَجَّعْ وِدْخَلْ لْبِيلاَطُسْ وِطْلَبْ بَاشْ يْخَلِّيهْ يْهِزْ الجُثَّة مْتَاعْ يَسُوعْ.

⁴⁴إِسْتَغْرِبْ بِيلاَطُسْ الِّي يَسُوعْ مَاتْ. وِاسْتَدْعَى القَايِدْ مْتَاعْ المْيَاةْ عَسْكْرِي وْسِأْلُو: «يَاخِي مَاتْ مِنْ مُدَّة طْوِيلَة؟»

⁴⁵وْكِعْرَفْ مِنْ القَايِدْ مْتَاعْ المْيَا الِّي يَسُوعْ مَاتْ عْطَى الجُثَّة لْيُوسُفْ.

⁴⁶شْرَى يُوسُفْ كْفَنْ وْهَبِّطْ يَسُوعْ مِنْ فُوقْ الصَّلِيبْ وْكَفّْنُو وْدِفْنُو فِي قْبَرْ مَحْفُورْ فِي الحْجَرْ كِيفْ الدَّامُوسْ وْحَطْ حَجْرَة عْلَى بَابْ القْبَرْ.

⁴⁷وْكَانِتْ مَرْيَمْ المَجْدَلِيَّة وْمَرْيِمْ أُمْ يُوسِى يُخْزْرُوا لِلبْلاَصَة الِّي تِدْفَنْ فِيهَا يَسُوعْ.