Read Tunisian Arabic New Testament مَرْقُسْ 16 Bible Online

مَرْقُسْ 16 - Tunisian Arabic New Testament bible

مَرْقُسْ 16

¹وْبَعْدْ مَا وْفَى السِّبْتْ شْرَاتْ مَرْيَمْ المَجْدَلِيَّة وْمَرْيِمْ أُمْ يَعْقُوبْ وْسَالُومَة القْوَارِصْ بَاشْ يْجِيوْ وِيِدْهْنُوا بِيهَا الجُثَّة مْتَاعْ يَسُوعْ.

²وْفِي النْهَارْ الأُوِّلْ مِالجِّمْعَة الأُخْرَى جَاوْ لِلقْبَرْ فِي الصْبَاحْ بِكْرِي وَقْتْ طْلُوعْ الشَّمْسْ.

³وْكَانُوا يْقُولُوا لِبْعَضْهُمْ: «شْكُونْ بَاشْ يْبَعّْدِلْنَا الحَجْرَة مِالبَابْ مْتَاعْ القْبَرْ؟»

⁴وْوَقْتِلِّي خَزْرُوا شَافُوا الِّي الحَجْرَة تْنَحَّاتْ رَغْمِلِّي هِيَ كَانِتْ كْبِيرَة بَرْشَة.

⁵وْكِدَخْلُوا فِي وُسْطْ القْبَرْ شَافُوا فِي الجِيهَة اليْمِينْ وْلَدْ شَبَابْ قَاعِدْ وْلاَبِسْ جِبَّة بِيضَة يَاخِي خَافُوا.

⁶آمَا هُوَ قَالِلْهُمْ: «مَا تِسْتَغْرْبُوشْ! إِنْتُومَا تْلَوّْجُوا عْلَى يَسُوعْ النَّاصْرِي الِّي تِصْلَبْ. هُوَ مُوشْ هْنَا، رَاهُو قَامْ، هَايْ البُقْعَة الِّي كَانْ مَحْطُوطْ فِيهَا.

⁷آمَا إِمْشِيوْ وْقُولُوا لِتْلاَمِذْتُو وِلْبُطْرُسْ: "رَاهُو بَاشْ يِسْبِقْكُمْ لِلجَلِيلْ، وِالغَادِي بَاشْ تْشُوفُوهْ كِيمَا قَالِلْكُمْ."»

⁸خَرْجُوا وْهَرْبُوا مِالقْبَرْ وْهُومَا مَرْعُوبِينْ وْمِتْعَجّْبِينْ بَرْشَة، وْمَا قَالُوا لْحَتَّى حَدْ عْلَى خَاطِرْهُمْ كَانُوا خَايْفِينْ.

⁹وْبَعْدْ مَا قَامْ يَسُوعْ مِالمُوتْ ظْهُرْ عْلَى الصْبَاحْ بِكْرِي لْمَرْيَمْ المَجْدَلِيَّة الِّي خَرِّجْ مِنْهَا سَبْعَة شْوَاطِنْ وِالشَّيْء هَاذَاكَا وْقَعْ فِي النْهَارْ الأُوِّلْ مِالجِّمْعَة الجْدِيدَة.

¹⁰مْشَاتْ وْخَبّْرِتْ الِّي كَانُوا مْعَاهْ فِي الوَقْتْ الِّي هُومَا كَانُوا يْنَوّْحُوا وْيِبْكِيوْ.

¹¹وْهَاذُوكُمْ كِسَمْعُوا الِّي يَسُوعْ حَيْ وِلِّي مَرْيَمْ شَافِتُّو مَا صَدّْقُوشْ.

¹²وْبَعْدْ هَاذَا ظْهُرْ يَسُوعْ فِي مَنْظِرْ آخَرْ لْزُوزْ مِنْ تْلاَمِذْتُو وْهُومَا مَاشِينْ لِلقَرْيَة.

¹³وْهُومَا مْشَاوْ وْخَبّْرُوا البْقِيَّة، آمَا هُومَا زَادَا مَا صَدّْقُوهُمْشْ.

¹⁴وِمْبَاعِدْ ظْهُرْ لِلحْدَاشِنْ تِلْمِيذْ، وَقْتِلِّي كَانُوا يَاكْلُوا عْلَى المِيدَة، وْلاَمْهُمْ عْلَى خَاطِرْهُمْ مَا امّْنُوشْ وِقْلُوبْهُمْ كَانِتْ كَاسْحَة، كِمَا صَدّْقُوشْ النَّاسْ الِّي شَافُوهْ بَعْدْ مَا قَامْ مِالمُوتْ.

¹⁵وْقَالِلْهُمْ: «إِمْشِيوْ لِلعَالَمْ الكُلُّو وْبَشّْرُوا النَّاسْ الكُلْهُمْ بِالإِنْجِيلْ

¹⁶الِّي يِمِّنْ وْيِتْعَمِّدْ بَاشْ يُخْلُصْ، آمَا الِّي مَا يِمِّنْشْ رَاهُو بَاشْ يِتْحْكَمْ عْلِيهْ.

¹⁷وِلِّي يِمّْنُوا بَاشْ اتَّبِّعْهُمْ الأَمَارَاتْ هَاذِي: بَاشْ يْخَرّْجُوا الشْوَاطِنْ بْإِسْمِي وْبِشْ يِتْكَلّْمُوا بْلُغَاتْ جْدِيدَة عْلِيهُمْ

¹⁸وْبِشْ يْشِدُّوا اللْفَاعِى بِيدِيهُمْ. وْإِذَا يُشْرْبُوا شَيْء يُقْتُلْ مَا يْضُرّْهُمْشْ بِالكُلْ، وِيْحُطُّوا يْدِيهُمْ عْلَى المُرْضَى وْهُومَا يَبْرَاوْ.»

¹⁹وْبَعْدْ مَا كَلِّمْهُمْ الرَّبْ يَسُوعْ تِرْفَعْ لِلسْمَاء وِقْعَدْ عْلَى يْمِينْ اللهْ.

²⁰وْخَرْجُوا تْلاَمِذْتُو يْبَشّْرُوا فِي البْقَايِعْ الكُلْ، وِالرَّبْ يْعَاوِنْ فِيهُمْ وِيْثَبِّتْ فِي الكِلْمَة بِالمُعْجْزَاتْ الِّي اتَّبَّعْهَا. آمِينْ.