Read Tunisian Arabic New Testament مَرْقُسْ 2 Bible Online

مَرْقُسْ 2 - Tunisian Arabic New Testament bible

مَرْقُسْ 2

¹وْبَعْدْ أَيَّامَاتْ رْجَعْ يَسُوعْ لْمَنْطِقْةْ كَفْرْنَاحُومْ وْتِنْشَرْ الخْبَرْ الِّي هُوَ فِي الدَّارْ.

²تْلَمُّوا بَرْشَة نَاسْ حَتَّى لِينْ مَا بْقَاتْشْ بْلاَصَة لْحَتَّى حَدْ قُدَّامْ البَابْ. وِبْدَا يِحْكِي مْعَاهُم بْكِلْمِةْ اللهْ.

³وْجَابُولُو وَاحِدْ مَشْلُولْ هَازِّينُو أَرْبْعَة رْجَالْ.

⁴آمَا مَا قِدْرُوشْ يُقْرْبُولُو بِسْبَبْ الزَّحْمَة الكْبِيرَة. وْنُقْبُوا السْطَحْ مْتَاعْ الدَّارْ الِّي كَانْ فِيهَا يَسُوعْ وْهَبّْطُوا الفْرَاشْ الِّي رَاقِدْ عْلِيهْ المَشْلُولْ.

⁵وَقْتِلِّي شَافْ يَسُوعْ إِيمَانْهُمْ قَالْ لِلمَشْلُولْ: «يَا وْلِيدِي رَاهِي ذْنُوبِكْ تْغِفْرِتْ.»

⁶وْكَانُوا مْعَ النَّاسْ جْمَاعَة مِنْ الكُتَّابْ مْتَاعْ اليْهُودْ بْدَاوْا يْفَكّْرُوا فِي قْلُوبْهُمْ:

⁷«شْبِيهْ الرَّاجِلْ هَاذَا يِتْكَلِّمْ هَكَّا؟ رَاهُو يَكْفِرْ! شْكُونْ غِيرْ اللهْ وَحْدُو يِقْدِرْ يِغْفِرْ الذْنُوبْ؟»

⁸وْبِالوَقْتْ عْرَفْ يَسُوعْ الشَّيْء الِّي يْفَكّْرُوا فِيهْ وَلَّى سْإِلْهُمْ: «عْلاَشْ تْفَكّْرُوا فِي الشَّيْء هَاذَا؟

⁹آنَا هُو أسْهِلْ؟ بَاشْ يِتْقَالْ لِلمَشْلُولْ: "ذْنُوبِكْ تْغِفْرِتْ" وِلاَّ يِتْقَالُّو: "قُومْ! هِزْ فْرَاشِكْ وْإِمْشِي."

¹⁰آمَا هَكَّا تَعْرْفُوا الِّي آنَا إِبْنْ الإِنْسَانْ عِنْدِي السُّلْطَة فِي الأَرْضْ بَاشْ نِغْفِرْ الذْنُوبْ» وِمْبَاعِدْ قَالْ لِلمَشْلُولْ:

¹¹«نْقُلِّكْ: قُومْ! هِزْ فْرَاشِكْ وْإِمْشِي لْبِيتِكْ.»

¹²قَامْ بِالوَقْتْ وْهَزْ فْرَاشُو وِمْشَى قُدَّامْ النَّاسْ الكُلْ وِبْقَاوْ الكُلْهُمْ مِتْعَجّْبِينْ وْسَبّْحُوا اللهْ وْقَالُوا: «الشَّيْء هَاذَا عْمُرْنَا مَا شُفْنَا مِثْلُو بِالكُلْ!»

¹³وِخْرَجْ يَسُوعْ مَرَّة ثَانْيَة لْشَطْ البُحَيْرَة وْخَلْطُوا عْلِيهْ النَّاسْ الكُلْ وِبْدَا يْعَلِّمْ فِيهُمْ.

¹⁴وْوَقْتِلِّي كَانْ يِمْشِي شَافْ لاَوِي وِلْدْ حَلْفَى قَاعِدْ فِي المَكْتِبْ مْتَاعْ الضَّرَايِبْ وْقَلُّو: «تَبَّعْنِي!» وْقَامْ وْتَبّْعُو.

¹⁵وْوَقْتِلِّي كَانْ يَسُوعْ قَاعِدْ يَاكُلْ فِي دَارْ لاَوِي جَاوْ بَرْشَة مِلِّي يْلِمُّوا فِي الضَّرَايِبْ وِالمِذْنْبِينْ وْكَانُوا بِحْذَاهْ هُوَ وِتْلاَمِذْتُو. وْبَرْشَة مِنْهُمْ كَانُوا يْتَبّْعُوا فِيهُمْ.

¹⁶وْوَقْتِلِّي الكُتَّابْ مْتَاعْ اليْهُودْ وِالفَرِّيسِيِّينْ شَافُوا الِّي يَسُوعْ يَاكُلْ مْعَ الِّي يْلِمُّوا فِي الضَّرَايِبْ قَالُوا لِتْلاَمِذْتُو «عْلاَشْ يَاكُلْ مْعَ الِّي يْلِمُّوا فِي الضَّرَايِبْ وِالمِذْنْبِينْ؟»

¹⁷سْمَعْ يَسُوعْ وْجَاوِبْهُمْ: «مُوشْ الصْحَاحْ هُومَا المِحْتَاجِينْ لِلطْبِيبْ آمَا رَاهُمْ المُرْضَى. جِيتْ بَاشْ نِدْعِي المِذْنْبِينْ، مُوشْ الأَبْرَارْ.»

¹⁸وْكَانُوا تْلاَمِذْةْ يُوحَنَّا وِالفَرِّيسِيِّينْ صَايْمِينْ يَاخِي جَاوْ جْمَاعَة لْيَسُوعْ يِسْأْلُوا فِيهْ: «عْلاَشْ تْلاَمِذْةْ يُوحَنَّا وِتْلاَمِذْةْ الفَرِّيسِيِّينْ يْصُومُوا وِتْلَامِذْتِكْ مَا يْصُومُوشْ؟»

¹⁹جَاوِبْهُمْ: «يَاخِي يْنَجّْمُوا المِسْتَدْعِينْ لِلعِرْسْ يْصُومُوا وِالعْرِيسْ مَازَالْ فِي وُسْطْهُمْ؟ مَا دَامُو العْرِيسْ فِي وُسْطْهُمْ مَا يْنَجّْمُوشْ يْصُومُوا.

²⁰آمَا بَاشْ يْجِيوْ نْهَارَاتْ يِتْهَزْ العْرِيسْ بْعِيدْ عْلِيهُمْ وِالوَقْتْ هَاذَاكَا بَاشْ يْصُومُوا.»

²¹«مَا ثَمَّاشْ حَتَّى وَاحِدْ يْرَقِّعْ لِبْسَة قْدِيمَة بْقَطْعَة مِنْ قْمَاشْ جْدِيدْ مَا كَانِشْ تْوَلِّي القَطْعَة الجْدِيدَة تِتْكَمِّشْ وْتَاكُلْ مِاللِّبْسَة القْدِيمَة وِتْوَلِّي التَّقْطِيعَة أَكْبِرْ.

²²وْمَا ثَمَّاشْ حَتَّى وَاحِدْ يْحُطْ شْرَابْ جْدِيدْ فِي قْرِبْ قْدِيمَة بَاشْ الشْرَابْ الجْدِيدْ مَا يفَرْقِعْشْ القْرِبْ. رَاهُو الشْرَابْ الجْدِيدْ يِتْحَطْ فِي قْرِبْ جْدِيدَة.»

²³وِتْعَدَّى يَسُوعْ فِي نْهَارْ سِبْتْ فِي وُسْطْ الزَّرْعْ وْشَقُّوا تْلاَمِذْتُو الزَّرْعْ وْهُومَا يْنَحِّيوْ فِي السْبُولْ مْتَاعْ القَمْحْ.

²⁴قَالُوا الفَرِّيسِيِّينْ لْيَسُوعْ: «شُوفْ، عْلاَشْ تْلاَمِذْتِكْ يَعْمْلُوا فِي حْوَايِجْ مَا تْحِلِّشْ نْهَارْ السِّبْتْ؟»

²⁵جَاوِبْهُمْ: «يَاخِي مَا قْرِيتُوشْ شْنُوَّة عْمَلْ دَاوُدْ وِلِّي مْعَاهْ وَقْتِلِّي حْتَاجُوا وْجَاعُوا؟

²⁶كِيفَاشْ دْخَلْ لْبِيتْ اللهْ فِي وَقْتْ أَبِيَاثَارْ الِّي هُوَ كْبِيرْ الكُهَّانْ وِكْلَى مِنْ خُبْزْ القُرْبَانْ الِّي الكُهَّانْ وَحَّدْهُمْ كَانْ مَسْمُوحِلْهُمْ بَاشْ يَاكْلُوا مِنُّو وْزَادْ عْطَى لِصْحَابُو كْلاَوْ؟»

²⁷وْزَادْ قَالِلْهُمْ: «رَاهُو السِّبْتْ تُوجِدْ لْفَايِدْةْ الإِنْسَانْ مُوشْ الإِنْسَانْ هُوَ الِّي تُوجِدْ بَاشْ يْكُونْ عَبْدْ لِلسِّبْتْ.

²⁸آنَا إِبْنْ الإِنْسَانْ رَبْ السِّبْتْ زَادَا.»