Read Tunisian Arabic New Testament مَرْقُسْ 3 Bible Online

مَرْقُسْ 3 - Tunisian Arabic New Testament bible

مَرْقُسْ 3

¹وِدْخَلْ يَسُوعْ لِلمَجْمَعْ مَرَّة أُخْرَى وْكَانْ ثَمَّة رَاجِلْ يِدُّو يَابْسَة.

²بْدَاوْا يْرَاقْبُوا فِيهْ إِذَا كَانْ بَاشْ يِشْفِي الرَّاجِلْ هَاذَاكَا فِي نْهَارْالسِّبْتْ وِلاَّ لاَ. بَاشْ يِقْدْرُوا يِتْهْمُوهْ.

³قَالْ لِلرَّاجِلْ الِّي يِدُّو يَابْسَة: «قُومْ وْآقِفْ فِي الوُسْطْ!»

⁴وِمْبَاعِدْ قَالِلْهُمْ: «يَاخِي حْلاَلْ فِي نْهَارْ السِّبْتْ بَاشْ نَعْمْلُوا الخِيرْ وِلاَّ الشَّرْ؟ نْخَلّْصُوا رُوحْ وِلاَّ نُقْتْلُوهَا؟» آمَا هُومَا بْقَاوْ سَاكْتِينْ.

⁵خْزَرِّلْهُمْ يَسُوعْ وْهُوَ مِتْغَشِشْ وِحْزِنْ بَرْشَة بِسْبَبْ القْسَاوَة مْتَاعْ قْلُوبْهُمْ وْقَالْ لِلرَّاجِلْ: «مِدْ يِدِّكْ!» مَدّْهَا وْإِذَا بِيهَا رَجْعِتْ صْحِيحَة.

⁶خَرْجُوا الفَرِّيسِيِّينْ مِالمَجْمَعْ وْبِالوَقْتْ بْدَاوْا يِتْفَاهْمُوا عْلِيهْ مْعَ أَعْضَاءْ حِزْبْ هِيرُودُسْ بَاشْ يُقْتْلُوهْ.

⁷مْشَى يَسُوعْ وِتْلاَمِذْتُو عْلَى صْوَابْ البُحَيْرَة وْتَبّْعُوهْ بَرْشَة نَاسْ مِنْ مَنْطِقْةْ الجَلِيلْ وِاليَهُودِيَّة

⁸وْأُورْشَلِيمْ وْأَدُومِيَّة وْمِنْ الجِيهَاتْ الِّي غَادِي مِنْ وَادْ الأُرْدُنْ وْبَرْشَة نَاسْ مِنْ البْلاَيِصْ الِّي دَايْرَة بِمْدِينِةْ صُورْ وْصَيْدَا عْلَى خَاطِرْهُمْ سَمْعُوا بِالشَّيْء الِّي عَمْلُو.

⁹قَالْ يَسُوعْ لِتْلاَمِذْتُو بَاشْ يْحَضّْرُولُو فْلُوكَة عْلَى ذِمّْتُو بَاشْ النَّاسْ مَا يْزَاحْمُوهِشْ.

¹⁰عْلَى خَاطْرُو شْفَى بَرْشَة نَاسْ يَاخِي وَلَّى كُلْ وَاحِدْ مْرِيضْ يْجِيهْ بَاشْ يْمِسُّو.

¹¹وْكَانِتْ الأَرْوَاحْ المَنْزُوسَة وَقْتِلِّي تْشُوفُو تِسْجِدْلُو وْهِيَ تْنَادِي: «إِنْتِ إِبْنْ اللهْ!»

¹²وْكَانْ يُأْمُرْ فِيهُمْ بْقُوَّة بَاشْ مَا يُنْشْرُوشْ خَبْرُو.

¹³وِمْبَاعِدْ طْلَعْ يَسُوعْ لِلجْبَلْ وْنَادَى لِلِّي يْحِبْ عْلِيهُمْ بَاشْ يْتَبّْعُوهْ، وْهُومَا جَاوْهْ.

¹⁴وِاخْتَارْ ثْنَاشِنْ وَاحِدْ بَاشْ يْكُونُوا مْعَاهْ وْسَمَّاهُمْ رُسُلْ بَاشْ يَبْعِثْهُمْ يْبَشّْرُوا

¹⁵وِتْكُونْ عِنْدْهُمْ سُلْطَة بَاشْ يْخَرّْجُوا الشْوَاطِنْ.

¹⁶وِالأَثْنَاشْ الِّي خْتَارْهُمْ هُومَا: سِمْعَانْ الِّي سَمَّاهْ بُطْرُسْ

¹⁷وْيَعْقُوبْ وْيُوحَنَّا وْلاَدْ زَبَدِي، الِّي سَمَّاهُمْ بُوَانَرْجِسْ وْمَعْنَاهَا وْلاَدْ الرَّعْدْ

¹⁸وْأَنْدَرَاوُسْ وْفِيلِبُّسْ وْبَرْثُلْمَاوُسْ وْمَتَّى وْتُومَا وْيَعْقُوبْ وِلْدْ حَلْفَى وْتَدَّاوُسْ وْسِمْعَانْ الِّي يْغِيرْ عْلَى بْلاَدُو

¹⁹وْيَهُوذَا الإِسْخَرْيُوطِي الِّي بَاشْ يْخُونُو.

²⁰وِمْشَى يَسُوعْ لْدَارْ وْزَادُوا تْلَمُّوا النَّاسْ مَرَّة أُخْرَى حَتَّى لِينْ يَسُوعْ وِتْلاَمِذْتُو مَا عَادِشْ يْنَجّْمُوا حَتَّى يَاكْلُوا المَاكْلَة.

²¹وْوَقْتِلِّي سَمْعُوا أَقَارْبُو جَاوْ بَاشْ يْهِزُّوهْ عْلَى خَاطِرْ النَّاسْ قَالُوا: «خْرَجْ مِنْ عَقْلُو.»

²²وِالكُتَّابْ مْتَاعْ اليْهُودْ الِّي هَبْطُوا مِنْ أُورْشَلِيمْ قَالُوا: «رَاهُو سَاكْنُو بَعْلَزَبُولْ رَئِيسْ الشْوَاطِنْ وْرَاهُو يْخَرِّجْ فِي الشْوَاطِنْ بِالرَّئِيسْ مْتَاعْهُمْ!»

²³نَادَالْهُمْ يَسُوعْ وْكَلِّمْهُمْ بِالأَمْثَالْ وْقَالْ: «كِيفَاشْ شِيطَانْ يْنَجِّمْ يْخَرِّجْ شِيطَانْ؟

²⁴إِذَا كَانْ مَمْلْكَة تْقِسْمِتْ عْلَى بْعَضْهَا، رَاهِي مُوشْ مُمْكِنْ بَاشْ ادَّاوِمْ.

²⁵وْإِذَا كَانْ دَارْ تْقِسْمِتْ عْلَى بْعَضْهَا، رَاهِي الدَّارْ هَاذِيكَا مُوشْ مُمْكِنْ تِثْبِتْ.

²⁶وْإِذَا كَانْ الشِّيطَانْ جَا ضِدْ رُوحُو وْتِقْسِمْ رَاهُو مُوشْ مُمْكِنْ بَاشْ يِثْبِتْ، آمَا رَاهُو بَاشْ يِفْنَى.

²⁷حَتَّى حَدْ مَا يْنَجِّمْ يُدْخُلْ لْدَارْ وَاحِدْ قْوِي وْيِسْرِقْ الحَاجَاتْ الِّي فِيهَا إِلاَّ إِذَا كَانْ رْبَطْ القْوِي فِي الأُوِّلْ وْبَاعِدْ يِسْرِقْلُو دَارُو.

²⁸نْقُلْكُمْ الحَقْ: الذْنُوبْ الِّي يَعْمْلُوهَا النَّاسْ الكُلْهَا مُمْكِنْ تِتْغْفِرْ وِالكُفْرْ مْتَاعْهُمْ زَادَا

²⁹آمَا الِّي يَكْفِرْ بِالرُّوحْ القُدُسْ عُمْرُو مَا يِتْغْفِرْلُو، وْيَبْقَى مُدَانْ بْذَنْبُو لِلأَبَدْ.»

³⁰وْهَاذَاكَا عْلَى خَاطِرْهُمْ كَانُوا يْقُولُوا: «رَاهُو سَاكْنُو رُوحْ مَنْزُوسْ.»

³¹وْجَاوْ إِخْوِةْ يَسُوعْ وْأُمُّو وْوُقْفُوا البَرَّى مِالدَّارْ وْبِعْثُولُو شْكُونْ يْنَادِيلُو.

³²وْكَانُوا بَرْشَة نَاسْ قَاعْدِينْ دَايْرِينْ بِيهْ. قَالُولُو: «رَاهِي أُمِّكْ وْإِخْوْتِكْ يِسْتَنَّاوْ فِيكْ البَرَّى.»

³³جَاوِبْهُمْ وْقَالْ: «شْكُونْهُمْ أُمِّي وْإِخْوْتِي؟»

³⁴وْدَوِّرْ عِينِيهْ فِي القَاعْدِينْ دَايْرِينْ بِيهْ وْقَالْ: «هَاذُمْ هُومَا أُمِّي وْإِخْوْتِي

³⁵الِّي يَعْمِلْ الشَّيْء الِّي يْحِبْ عْلِيهْ اللهْ هُوَ خُويَا وْأُخْتِي وْأُمِّي.»